ຮອງນາຍົກລັດຖະມົນຕີໄທຢືນຢັນວ່າ ລັດຖະບານໄທບໍ່ມີແຜນການຈະຊື້ກະແສໄຟ
ຟ້າຈາກລາວເພີ້ມຂຶ້ນ ແຕ່ຈະພັດທະນາໂຄງຂ່າຍເພື່ອຮອງຮັບການສົ່ງກະແສໄຟຟ້າ
ຈາກລາວຜ່ານໄທ ໄປມາເລເຊຍ-ສິງກະໂປ.
ພົນອາກາດເອກ ປະຈິນ ຈັ່ນຕອງ ຮອງນາຍົກລັດຖະມົນຕີໄທຢືນຢັນວ່າ ລັດຖະບານ
ໄທບໍ່ມີແຜນການທີ່ຈະຊື້ກະແສໄຟຟ້າຈາກລາວເພີ້ມຂຶ້ນ ໃນໄລຍະ 7-8 ປີ ຕໍ່ໜ້າ
ແຕ່ຈະຍັງຄົງຮັບຊື້ກະແສໄຟຟ້າຈາກລາວໄວ້ ທີ່ລະດັບເດີມຄື 9,000 ເມກາວັດ ໃນ
ຊ່ວງປີ 2019-2044 ເນື່ອງຈາກວ່າໄທ ມີພະລັງງານໄຟຟ້າສຳຮອງເກີນຄວາມຕ້ອງ
ການທີ່ເປັນຈິງເຖິງ 12,000 ເມກາວັດ ຊຶ່ງຄິດເປັນ 39 ເປີເຊັນ ຂອງການຊົມໃຊ້ພະ
ລັງງານທັງໝົດ ໃນປັດຈຸບັນ.
ຍິ່ງໄປກວ່ານັ້ນ ລັດຖະບານໄທຍັງໄດ້ກຳໜົດແຜນການພັດທະນາແຫລ່ງພະລັງງານ
ທາງເລືອກທີ່ແນໃສ່ການເສີມສ້າງ ຄວາມໝັ້ນຄົງດ້ານພະລັງງານໃນໄລຍະຍາວໄວ້ເປັນທີ່ຮຽບຮ້ອຍແລ້ວດ້ວຍນັ້ນ ໝາຍຄວາມວ່າ ລັດຖະບານໄທຈະຫລຸດການນຳເຂົ້າພະລັງງານໄຟຟ້າຈາກຕ່າງປະເທດຢ່າງຕໍ່ເນື່ອງ ແລະຫັນມາໃຫ້ການສົ່ງເສີມຜະລິດພະລັງງານທາງເລືອກ ພາຍໃນປະເທດໃຫ້ຫລາຍຂຶ້ນນັບມື້ ໂດຍສະເພາະແມ່ນ ການເພີ້ມການຜະລິດພະລັງງານໝູນວຽນ ທັງພະລັງງານແສງອາທິດ ແລະພະລັງງານຈາກຊີວະມວນນັ້ນ ກໍຍັງຈະເຮັດໃຫ້ໄທບໍ່ມີຄວາມຈຳເປັນທີ່ຈະຕ້ອງຊື້ກະແສໄຟຟ້າຈາກລາວ ໃນ ໄລຍະຍາວອີກດ້ວຍ.
ທັງນີ້ ລັດຖະບານໄທຍັງໄດ້ວາງແຜນການຈະປັບປ່ຽນສະຖານະຈາກຜູ້ຊື້ໄປເປັນ
ຫຸ້ນສ່ວນໃນການສົ່ງອອກກະແສໄຟຟ້າຂອງລັດຖະບານລາວໃນອະນາຄົດ ດ້ວຍ
ການພັດທະນາລະບົບໂຄງຂ່າຍສາຍສົ່ງກະແສໄຟຟ້າ ເພື່ອຮອງຮັບການສົ່ງກະແສໄຟຟ້າ ຈາກລາວຜ່ານໄທໄປມາເລເຊຍ ແລະສິງກະໂປໃນອະນາຄົດ ດັ່ງທີ່ພົນເອກປະຈິນ ໃຫ້ການຢືນຢັນວ່າ:
“ພູດເຖິງພະລັງງານນັ້ນ ຂໍຣຽນວ່າ ເຣົາເຫັນຈຸດແຂງຂອງປະເທດລາວ ເຣົາມີ
ຄວາມຮ່ວມມືຍາວນານ ໃນການທີ່ຈະເພິ່ງພາພະລັງງານຊຶ່ງກັນແລະກັນ. ໃນ
ຫລາຍປີທີ່ຜ່ານມານັ້ນ ປະເທດໄທໄດ້ເຊັນສັນຍາຊື້ໄຟຟ້າຈາກລາວຈຳນວນ
ລວມທັງສິ້ນ 9,000 ເມກາວັດ. ຂະນະນີ້ ມີຄວາມກ້າວໜ້າຂຶ້ນໄປເກີນ 70 ເປີ
ເຊັນແລ້ວ ຈາກນີ້ໄປໄທຈະເປັນທາງຜ່ານໃຫ້ໄຟຟ້າຈາກລາວນັ້ນລົງໄປສູ່ຕອນ
ໃຕ້ໄທ ກໍຄືມາເລເຊຍ.”
ທາງດ້ານ ດຣ. ກຸນລະຍົດ ອຸດົມວົງເສລີ, ຜູ້ອໍານວຍການສະຖາບັນວິໄຈພະລັງ
ງານແຫ່ງມະຫາວິທະຍາໄລຈຸລາລົງກອນຂອງໄທຢືນຢັນວ່າ ການທີ່ໄທມີປະລິ
ມານໄຟຟ້າສໍາຮອງເກີນຄວາມຕ້ອງການຕົວຈິງໃນອັດຕາສະເລ່ຍສູງເຖິງ 39 ເປີ
ເຊັນ ເຮັດໃຫ້ບໍ່ຈໍາເປັນຈະຕ້ອງນໍາເຂົ້າໄຟຟ້າຈາກຕ່າງປະເທດເລີຍຈົນເຖິງປີ 2026.
ໃນຂະນະດຽວກັນການນໍາເຂົ້າໄຟຟ້າຈາກລາວຄິດເປັນສັດສ່ວນພຽງແຕ່ 15 ເປີເຊັນ
ເທົ່ານັ້ນ ຂອງການຊົມໃຊ້ພະລັງງານໄຟຟ້າທັງໝົດ. ເພາະສະນັ້ນ ຖ້າຫາກວ່າລັດຖະ
ບານໄທປະສົບຜົນສຳເລັດໃນການພັດທະນາພະລັງງານທາງເລືອກຕາມແຜນການທີ່
ວາງໄວ້ໃນປີ 2025 ກໍຍ່ອມຈະເຮັດໃຫ້ໄທບໍ່ມີຄວາມຈຳເປັນທີ່ຈະຕ້ອງຊື້ກະແສໄຟຟ້າ
ຈາກລາວເພີ້ມຂຶ້ນນັ້ນເອງ.
ໃນປັດຈຸບັນ ລັດຖະບານໄທ ໄດ້ຕົກລົງຮັບຊື້ກະແສໄຟຟ້າຈາກລາວ 9,000 ເມກາ
ວັດເປັນເວລາ 25 ປີ ນັບຈາກປີ 2019-2044 ແຕ່ວ່າພາຍໃນປີ 2021 ລາວຈະມີ
ແຫລ່ງຜະລິດພະລັງງານໄຟຟ້າເຖິງ 100 ໂຄງການທີ່ມີກໍາລັງຕິດຕັ້ງລວມເຖິງ
13,000 ເມກາວັດ ທັງຍັງຄາດວ່າການຊົມໃຊ້ພະລັງງານໄຟຟ້າພາຍໃນລາວຈະ
ເພີ້ມຂຶ້ນເປັນ 2,862 ເມກາວັດໃນປີ 2021 ໝາຍຄວາມວ່າ ລາວຈະມີປະລິມານ
ພະລັງງານໄຟຟ້າເກີນຄວາມຕ້ອງການພາຍໃນ 1,138 ເມກາວັດ ທີ່ຈະຕ້ອງສົ່ງ
ອອກໄປຕ່າງປະເທດ ຊຶ່ງບໍ່ແມ່ນປະເທດໄທນັ້ນເອງ.
ທັງນີ້ ລັດຖະບານຫວຽດນາມໄດ້ຕົກລົງຈະຮັບຊື້ພະລັງງານໄຟຟ້າຈາກລາວໃນປະ
ລິມານລວມເຖິງ 5,000 ເມກາວັດພາຍໃນປີ 2025 ທັງຍັງໄດ້ທໍາການກໍ່ສ້າງແນວ
ສາຍສົ່ງກະແສໄຟຟ້າແຮງສູງ ທີ່ມີຂະໜາດ 220 KV ແລະ 500 KV ເພື່ອຮອງຮັບ
ການສົ່ງກະແສໄຟຟ້າຈາກລາວໄປຫວຽດນາມອີກດ້ວຍ.
ສ່ວນລັດຖະບານກໍາປູເຈຍ ກໍໄດ້ຕົກລົງໃນຫລັກການວ່າ ຈະຮັບຊື້ກະແສໄຟຟ້າຈາກ
ລາວ 1,000 ເມກາວັດ ພາຍໃນປີ 2025. ຫາກແຕ່ວ່າດ້ວຍຂໍ້ຈໍາກັດໃນດ້ານເງິນທຶນ
ສໍາລັບນໍາໃຊ້ໃນການກໍ່ສ້າງແນວສາຍສົ່ງກະແສໄຟຟ້າແຮງສູງ ກໍາປູເຈຍກໍນໍາເຂົ້າພະ
ລັງງານໄຟຟ້າຈາກລາວໄດ້ພຽງ 115 ກິໂລວັດເທົ່ານັ້ນ. ສ່ວນລັດຖະບານມຽນມານັ້ນ
ກໍໄດ້ສະແດງຄວາມສົນໃຈ ທີ່ຈະຮັບຊື້ກະແສໄຟຟ້າຈາກລາວບໍ່ໜ້ອຍກວ່າ 200 ເມ
ກາວັດນັ້ນ ກໍຍັງບໍ່ມີຄວາມຊັດເຈນວ່າຈະສາມາດລົງນາມໃນສັນຍາຮ່ວມກັນໄດ້ເມື່ອ
ໃດແທ້ ແລະລັດຖະບານມາເລເຊຍ ກໍໄດ້ຕົກລົງຮັບຊື້ກະແສໄຟຟ້າໃນປະລິມານລວມ
100 ເມກາວັດເທົ່ານັ້ນ.
