ການນຳຂັ້ນສູງໃນລາວ ຢືນຢັນວ່າຍຸດທະສາດການພັດທະນາຂອງພັກຄອມມີວນິສ ຈີນ
ຄືແບບຢ່າງ ທີ່ພັກປະຊາຊົນ ປະຕິວັດລາວ ຍຶດຖື ແລະນຳໃຊ້ໃນ ການຈັດຕັ້ງປະຕິບັດ
ເພື່ອການພັດທະນາ ລາວ ຢ່າງຮອບດ້ານ.
ທ່ານ ຄຳພັນ ພົມມະທັດ ກຳມະການກົມການເມືອງສູນກາງພັກປະຊາຊົນ ປະຕິວັດ
ລາວ ແລະຫົວໜ້າຫ້ອງວ່າການສູນກາງພັກ ໃຫ້ການຢືນຢັນຕໍ່ກອງປະຊຸມ ເນື່ອງໃນໂອ
ກາດ ວັນວິທະຍາສາດແຫ່ງຊາດ ປະຈຳປີ 2018 ເມື່ອບໍ່ນານມານີ້ວ່າ ບັນດາ ນັກວິທະ
ຍາສາດ ແລະນັກຄົ້ນຄວ້າຂອງລາວ ຕ້ອງໃຫ້ຄວາມສຳຄັນເປັນພິເສດ ໃນການຮຽນຮູ້
ວິທີຄິດ ແລະ ການຈັດຕັ້ງປະຕິບັດຂອງ ບັນດານັກວິທະຍາສາດ ແລະ ນັກຄິດຄົ້ນປະ
ດິດສ້າງທັງຫລາຍຂອງຈີນ ຊຶ່ງໄດ້ເຮັດໃຫ້ມີການພັດທະນາ ເຕັກໂນໂລຈີຕ່າງໆໃນຈີນ
ຢ່າງວ່ອງໄວ ແລະກ້າວຂຶ້ນມາ ຢູ່ແຖວໜ້າໃນການພັດທະນາເຕັກໂນໂລຈີໃໝ່ໆ ຂອງ
ໂລກ ໃນປັດຈຸບັນ.
ຍິ່ງໄປກວ່ານັ້ນ ການທີ່ລາວ ແລະຈີນມີລະບົບທາງການເມືອງ ແລະການປົກຄອງ ໃນ
ຮູບແບບດຽວກັນ ຍັງເຮັດໃຫ້ພັກປະຊາຊົນປະຕິວັດລາວ ຍຶດຖືວ່າ ຍຸດທະສາດການ
ພັດທະນາຂອງພັກຄອມມີວນິສຈີນ ກໍຄືແບບຢ່າງຂອງຍຸດທະສາດການພັດທະນາ
ປະເທດ ທີ່ນຳມາປັບໃຊ້ ແລະຈັດຕັ້ງປະຕິບັດໃນລາວໄດ້ອີກດ້ວຍເຊັ່ນກັນ ດັ່ງທີ່ ທ່ານ
ຄຳພັນ ໃຫ້ການຢືນຢັນວ່າ:
ຈີນໄດ້ພັດທະນາວິທະຍາສາດ ເປັນຕົ້ນປັນຍາປະດິດ ປັດຈຸບັນນີ້ ຄືວ່າ ຢູ່ໃນລະ
ດັບທີ່ໄວເກີນ ແມ່ນການມອງເຫັນ ການກຳນົດວິໄສທັດຂອງພັກ-ຂອງລັດ ພ້ອມ
ກັນນັ້ນຫລະແມ່ນສຸມໃສ່ສະໜັບສະໜຸນ ທຶນຮອນ ຖືວ່າອັນນີ້ກໍຄືຈຸດເດັ່ນຂອງ
ລະບົບຂອງພວກເຮົາ. ສະນັ້ນ ຈຸດນີ້ໜີ້ ຢາກໃຫ້ເຫັນວ່າແຜນຍຸດທະສາດ ນະ
ໂຍບາຍ ນິຕິກຳຕ່າງໆ ຫລືແມ່ນກະທັ້ງການລົງທຶນ ພວກເຮົາແມ່ນປະເທດ ທີ່
ພັກກຳອຳນາດ. ສະນັ້ນ ບົດຮຽນຂອງຈີນ ຖືວ່າ ພວກເຮົາຄວນໄດ້ສຶກສາ-ສຸມໃສ່
ທີ່ສຸດ.
ໂດຍສະເພາະແມ່ນຄວາມສຳເລັດໃນການພັດທະນາເຂດເສດຖະກິດພິເສດໃນຈີນນັ້ນ
ຖືເປັນຕົ້ນແບບໃນການພັດທະນາ ທີ່ພັກ-ລັດຖະບານລາວ ໄດ້ນຳມາປັບໃຊ້ໃນລາວ
ຢ່າງຕັ້ງໜ້າ ຊຶ່ງໃນປັດຈຸບັນນີ້ ລັດຖະບານລາວກໍສາມາດສ້າງຕັ້ງເຂດເສດຖະກິດພິເສດ ແລະເຂດເສດຖະກິດສະເພາະແລ້ວ 12 ເຂດ ພາຍໃຕ້ເປົ້າໝາຍ ທີ່ຈະສ້າງຕັ້ງໃຫ້ໄດ້
ທັງໝົດ 58 ເຂດໃນທົ່ວປະເທດ ໂດຍເຖິງມີ 351 ບໍລິສັດ ທີ່ມີມູນຄ່າການລົງທຶນຫຼາຍ
ກວ່າ 8,000 ລ້ານໂດລາ ໃນນີ້ກໍລວມທັງບໍລິສັດຈາກຈີນ 234 ບໍລິສັດ.
ທາງດ້ານກະຊວງແຜນການ ແລະການລົງທຶນ ລາຍງານວ່າ ບັນດາບໍລິສັດຈີນໄດ້ລົງທຶນ
ໃນລາວ ເປັນອັນດັບທີນຶ່ງ ຊຶ່ງມີມູນຄ່າລວມເກີນກວ່າ 10,000 ລ້ານໂດລາ ໃນ 700
ກວ່າໂຄງການ ຊຶ່ງລວມເຖິງການ ລົງທຶນໃນພາກພະລັງງານ 9 ໂຄງການ ທີ່ຜະລິດໄຟ
ຟ້າແລ້ວ ກໍຄືເຂື່ອນນໍ້າລີກ 1, 2 ເຂື່ອນນໍ້າງື່ມ 5, ເຂື່ອນນໍ້າງຽບ 2, ເຂື່ອນນໍ້າອູ 2, 5
ແລະ 6, ເຂື່ອນນໍ້າມັງ 1,ເຂື່ອນນໍ້າໄຜ່ ແລະເຂື່ອນນໍ້າແບງ ທັງຍັງມີອີກ 10 ກວ່າໂຄງການ ທີ່ກຳລັງກໍ່ສ້າງ ແລະຈະສ້າງແລ້ວສຳເລັດພາຍໃນປີ 2020 ເຊັ່ນດຽວກັນກັບການລົງທຶນ
ເພື່ອກໍ່ສ້າງລະບົບສາຍສົ່ງກະແສໄຟຟ້າຂະໜາດ 230 ກິໂລໂວນ ແລະ 500 ກິໂລໂວນ
ຈຳນວນ 8 ໂຄງການ ພາຍໃຕ້ເປົ້າໝາຍການເປັນຄູ່ຮ່ວມຍຸດທະສາດໃນການພັດທະນາ
ລາວ ໃຫ້ເປັນໝໍ້ໄຟຂອງອາຊ່ຽນ ໃຫ້ໄດ້ ຢ່າງເປັນຮູບປະທຳນັ້ນເອງ.
ທັງນີ້ໂດຍຍັງບໍ່ທັນຮວມເຖິງການລົງທຶນໃນເຂດພັດທະນາເສດຖະກິດໃໝ່ສີທັນດອນ
ຂອງບໍລິສັດລາວ ມະຫານະທີສີທັນດອນ ແລະການລົງທຶນຈຳກັດ ຈາກຮົງກົງ ປະເທດ
ຈີນແຕ່ຢ່າງໃດ ຊຶ່ງບໍລິສັດດັ່ງກ່າວນີ້ ໄດ້ລົງທຶນໃນເຂດພັດທະນາເສດຖະກິດໃໝ່ສີທັນ
ດອນ-ຄອນພະເພັງ ທີ່ເມືອງໂຂງໃນແຂວງຈຳປາສັກ ໂດຍຜ່ານມາກໍ ໄດ້ທຳການສຳ
ຫຼວດ-ອອກແບບການກໍ່ສ້າງສຳເລັດແລ້ວ ທັງພື້ນຖານໂຄງລ່າງຕ່າງໆ ເພື່ອຮອງຮັບ
ພາກທຸລະກິດແລະບໍລິການຢ່າງຄົບວົງຈອນ ເຊັ່ນເຂດອຸດສາຫະກຳ Electronic ແລະ
ເທັກໂນໂລຈີ ດ້ານຂໍ້ມູນ-ຂ່າວສານ ເຂດແປຮູບສິນຄ້າກະສິກຳ ແລະຫັດຖະກຳ ເຂດ
ການຄ້າເສລີ-ປອດພາສີ ແລະບໍລິການຄົບວົງຈອນ ແລະປະມົງປອດໄພສານພິດເປັນຕົ້ນ.
ທັງນີ້ ໂດຍກຸ່ມທຸລະກິດຈີນຈະໃຊ້ເງິນລົງທຶນຮວມເຖິງ 9,000 ລ້ານໂດລາສຳລັບດຳເນີນ
ການກໍ່ສ້າງສູນການຄ້າປອດພາສີ, ໂຮງແຮມ-ຣີສອຕ໌ ທະນາຄານ ແລະປະກັນໄພສູນບໍລິ
ການດ້ານສຸຂະພາບແລະຄວາມງາມ, ໂຮງຮຽນນາໆຊາດ, ສະຖານບັນເທີງຄົບວົງຈອນ,
ສວນສະນຸກ, ສະຖານີຂົນສົ່ງ, ຕະຫຼາດກາງຄືນ Night Plaza, ອຸດທະຍານທຳມະຊາດ
ນ້ຳຂອງໂດຍເມືອງໃໝ່ສີທັນດອນ ຈະຮອງຮັບພົນລະເມືອງໄດ້ເຖິງ 8 ແສນຄົນ ກັບນັກ
ທ່ອງທ່ຽວອີກ 15 ລ້ານຄົນຕໍ່ປີ ຊຶ່ງນັກທ່ອງທ່ຽວສ່ວນໃຫຍ່ກໍຄືຊາວຈີນນັ້ນເອງ.
ເຂດພັດທະນາເສດຖະກິດໃໝ່ສີທັນດອນ ມີອາຍຸສຳປະທານ 50 ປີ ໃນພື້ນທີ່ຮວມ
9,846 ເຮັກຕາ ແລະຖ້າວ່າ ການດຳເນີນງານເປັນໄປຕາມເປົ້າໝາຍທີ່ວາງໄວ້ ກໍຄາດ
ວ່າ ຈະມີເງິນຕາຕ່າງປະເທດ ເຂົ້າມາໝູນວຽນ ໃນເຂດເສດຖະກິດໃໝ່ ສີທັນດອນ
ຫລາຍກວ່າ 2,400 ລ້ານໂດລາຕໍ່ປີ.
