ຂົວຂ້າມແມ່ນ້ຳຂອງແຫ່ງທຳອິດ ລະຫວ່າງ ລາວກັບມຽນມາ
ກໍ່ສ້າງສຳເລັດແລ້ວ ແລະ ມີກຳນົດການ ທີ່ຈະເປີດນຳໃຊ້ ຢ່າງ
ເປັນທາງການ ໃນຕົ້ນເດືອນພຶດສະພາ 2015 ນີ້.
ທ່ານໄຊສົງຄາມ ມະໂນທຳ ຜູ້ຈັດການ ໂຄງການກໍ່ສ້າງຂົວ
ຂ້າມແມ່ນ້ຳຂອງ ແຫ່ງທຳອິດລະຫວ່າງ ສປປ ລາວ ກັບ ສາ
ທາລະນະລັດສະຫະພາບມຽນມາ ໄດ້ຖະແຫຼງຢືນຢັນວ່າ
ການກໍ່ສ້າງຂົວດັ່ງກ່າວ ໄດ້ສຳເລັດສົມບູນແລ້ວ ໃນຂະນະນີ້ຫຼັງຈາກ ທີ່ໄດ້ເລີ້ມລົງມືກໍ່ສ້າງ
ນັບຈາກເດືອນກຸມພາ 2013 ແລະ ມີກຳນົດ ທີ່ຈະເປີດນຳໃຊ້ຢ່າງເປັນທາງການໃນຕົ້ນ
ເດືອນພຶດສະພານີ້.
ຂົວດັ່ງກ່າວນີ້ ເປັນການອອກເງິນທຶນຮ່ວມກັນ ລະຫວ່າງລັດຖະບານລາວ ກັບມຽນມາ
ຝ່າຍລະ 50 ເປີເຊັນ ໃນມູນຄ່າລວມ 26 ລ້ານດອນລາ ໂດຍຕົວຂົວມີຄວາມຍາວ 691.6
ແມັດ ແລະ ກວ້າງ 10.9 ແມັດ ແບ່ງເປັນ 2 ຊ່ອງທາງຢາງ ແລະ 2 ຊ່ອງທາງແລ່ນລົດທີ່
ຮອງຮັບນ້ຳໜັກບັນທຸກໄດ້ ບໍ່ເກີນ 75 ໂຕນ ແລະ ທົນຕໍ່ສະພາວະແຜ່ນດິນໄຫວໃນລະດັບ
7 ຈຸດ ຣິກເຕີ້ ໄດ້.
ທາງການລາວ ແລະມຽນມາຄາດຫວັງວ່າ ຂົວທີ່ເຊື່ອມຕໍ່ຈາກ
ຖະໜົນເລກ 17E ຢູ່ຊຽງກົກ ໃນເຂດເມືອງລອງ ແຂວງຫລວງ
ນ້ຳທາ ໄປຍັງຖະໜົນເລກ 4 ຢູ່ຊຽງລາບ ເມືອງທ່າຂີ້ເຫຼັກ ເຂດ
ລັດສານ ໃນພາກເໜືອຂອງມຽນມາ ຈະປະກອບສ່ວນຢ່າງ
ສຳຄັນເຂົ້າໃນການເສີມຂະຫຍາຍ ການຄ້າ ການລົງທຶນ ແລະ
ການທ່ອງທ່ຽງ ລະຫວ່າງກັນ ທັງກໍຍັງຈະເຊື່ອມຕໍ່ກັບຈີນ ໄທ
ຫວຽດນາມ ຕໍ່ໄປ ເຖິງອິນເດຍ ແລະ ບັງກລາແດັສ ໃນອະນາຄົດ
ອີກດ້ວຍ.
ຂົວມິດຕະພາບລາວ-ມຽນມາ ນັບເປັນຂົວຂ້າມນ້ຳຂອງແຫ່ງທີ
5 ທີ່ເຊື່ອມຕໍ່ລາວ ກັບປະເທດເພື່ອນບ້ານ ໂດຍ 4 ແຫ່ງ ເປັນຂົວ
ຂ້າມນ້ຳຂອງ ທີ່ເຊື່ອມຕໍ່ລາວກັບໄທ ຊຶ່ງມີເປົ້າໝາຍເພື່ອການ
ເຊື່ອມຕໍ່ທາງເສດຖະກິດການຄ້າ ການລົງທຶນ ແລະ ການທ່ອງທ່ຽວເຊັ່ນດຽວກັນ ໂດຍຂົວ
ມິດຕະພາບ ລາວ-ໄທ ທີ່ໄດ້ເປີດນຳໃຊ້ເມື່ອທ້າຍປີ 2013 ກໍຄືຂົວທີ່ເຊື່ອມຕໍ່ຈາກ ເມືອງ
ຫ້ວຍຊາຍ ແຂວງບໍ່ແກ້ວ ໄປທີ່ອຳເພີຊຽງຂອງ ຈັງຫວັດຊຽງຣາຍ ໃນພາກເໜືອຂອງໄທ
ຊຶ່ງຖືເປັນພາກສ່ວນໜຶ່ງ ຂອງການພັດທະນາ ຄວາມຮ່ວມມື ທາງເສດຖະກິດ ໃນອະນຸພາກ
ພື້ນລຸ່ມແມ່ນ້ຳຂອງ ດັ່ງທີ່ທ່ານສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ຜູ້ຊີ້ນຳ
ຂົງເຂດເສດຖະກິດ ການຜະລິດ ແລະຈະລາຈອນສິນຄ້າ ໄດ້ໃຫ້ການຢືນຢັນວ່າ:
“ຂົວມິດຕະພາບລາວ-ໄທແຫ່ງທີ 4 ເປັນການຕອບສະໜອງ
ກັບທ່າອຽງແຫ່ງການສົ່ງເສີມ ການຮ່ວມມື ເພື່ອການພັດ
ທະນາ ໃນພາກພື້ນອາຊີອາຄະເນ ໂດຍສະເພາະຢ່າງຍິ່ງ
ກໍແມ່ນເປັນສ່ວນສຳຄັນອັນໜຶ່ງ ຂອງໂຄງການເຊື່ອມໂຍງ
ອະນຸພາກພື້ນແມ່ນ້ຳຂອງ GMS ແລວເສດຖະກິດເໜືອ-
ໃຕ້ ແລະ ການເຊື່ອມໂຍງ ດ້ານຄົມມະນາຄົມ ລະຫວ່າງ
ອາຊຽນ ກັບ ສປ ຈີນ.”
ກ່ອນໜ້ານີ້ ພົນເອກ ປຣະຍຸດ ຈັນໂອຊາ ນາຍົກລັດຖະມົນຕີໄທ
ກໍໄດ້ຢືນຢັນວ່າ ລັດຖະບານລາວ ແລະໄທ ໄດ້ຕົກລົງຈະຮ່ວມກັນ
ກໍ່ສ້າງຂົວມິດຕະພາບ ຂ້າມແມ່ນ້ຳຂອງ ເພີ້ມຂຶ້ນອີກ 2 ແຫ່ງ ທີ່
ເຊື່ອມຕໍ່ແຂວງບໍລິຄຳໄຊ ກັບຈັງຫວັດບຶງການ ແລະ ແຂວງສາລະວັນ ກັບຈັງຫວັດອຸບົນ
ຣາຊະທານີ.
ໂດຍສຳຫລັບກ່ຽວກັບຮູບແບບ ຂອງການຮ່ວມມືນັ້ນ ພົນເອກປຣະຍຸດ ຢືນຢັນວ່າ ຈະເປັນ
ການອອກທຶນກໍ່ສ້າງຝ່າຍລະ 50 ເປີເຊັນ ຂອງມູນຄ່າການກໍ່ສ້າງທັງໝົດ ແລະລັດຖະບານ
ໄທ ພ້ອມທີ່ຈະເປັນຝ່າຍອອກທຶນໃຫ້ກ່ອນ ໝາຍຄວາມວ່າ ທຶນກໍ່ສ້າງໃນສ່ວນ 50 ເປີເຊັນ
ທີ່ເປັນຄວາມຮັບຜິດຊອບ ຂອງລັດຖະບານລາວນັ້ນ ຈະຖືເປັນເງິນກູ້ລະຍະຍາວ ທີ່ ລັດ
ຖະບານລາວ ຈະຕ້ອງຊຳລະຄືນ ໃຫ້ລັດຖະບານໄທ ໃນພາຍຫຼັງ ຊຶ່ງໂດຍປົກກະຕິແລ້ວ
ຈະມີລະຍະເວລາໃນການຊຳລະຄືນເຖິງ 30 ປີ.
ສຳຫລັບຂົວແຫ່ງທຳອິດ ທີ່ເຊື່ອມຕໍ່ນະຄອນຫລວງວຽງຈັນ ກັບໜອງຄາຍ ແມ່ນເປີດໃຊ້
ເມື່ອປີ 1994 ສ່ວນແຫ່ງທີ 2 ທີ່ແຂວງສະຫວັນນະເຂດ ກັບມຸກດາຫານ ເປີດໃຊ້ເມື່ອຕົ້ນປີ
2007 ໂດຍລັດຖະບານລາວ ກັບໄທກູ້ຢືມເງິນຈາກລັດຖະບານຍີ່ປຸ່ນ ສຳຫຼັບແຫ່ງທີ 3 ທີ່
ແຂວງຄຳມ່ວນ ກັບນະຄອນພະນົມ ເປີດໃຊ້ໃນທ້າຍປີ 2011 ໂດຍລັດຖະບານໄທ ເປັນ
ຝ່າຍອອກທຶນກໍ່ສ້າງທັງໝົດ ແລະ ແຫ່ງທີ 4 ທີ່ຫ້ວຍຊາຍ ກັບຊຽງຂອງດັ່ງກ່າວ ກໍເປັນການ
ອອກທຶນຮ່ວມກັນ ລະຫວ່າງລັດຖະບານໄທ ກັບຈີນ ຝ່າຍລະເຄິ່ງ..
