ລິ້ງ ສຳຫລັບເຂົ້າຫາ

ວັນສຸກ, ໒໙ ມີນາ ໒໐໒໔

ລາວສັ່ງໃຫ້ ພະນັກງານ ພາສີອາກອນທ້ອງຖິ່ນ ຢຸດເກັບ ພາສີສິນຄ້າ ຊໍ້າຊ້ອນ


ທ່ານ​ນາມ​ ວີ​ຍະ​ເກດ ລັດຖະມົນຕີ​ວ່າການ​ກະຊວງ​ອຸດສາຫະກໍາ ​ແລະ​ການ​ຄ້າ
ທ່ານ​ນາມ​ ວີ​ຍະ​ເກດ ລັດຖະມົນຕີ​ວ່າການ​ກະຊວງ​ອຸດສາຫະກໍາ ​ແລະ​ການ​ຄ້າ
ລັດຖະມົນຕີ​ລາວ ຮຽກຮ້ອງ​ໃຫ້​ບັນດາ​ພະນັກງານ​ພາສີ​ໃນ​ລະດັບ​ທ້ອງ​ຖິ່ນ​ຢຸດ​ເຊົາ​ການ​ເກັບ​ອາກອນ​ການ​ຂົນ​ສົ່ງ​ສິນຄ້າ​ທີ່​ຊໍ້າຊ້ອນ​ກັນ ​ເນື່ອງ​ຈາກ​ເຮັດ​ໃຫ້​ສິນຄ້າ​ສົ່ງ ອອກ​ຂອງ​ລາວ​ມີ​ລາຄາ​ສູງ​ຂຶ້ນ.

ລິງໂດຍກົງ

ທ່ານ​ນາມ​ ວີ​ຍະ​ເກດ ລັດຖະມົນຕີ​ວ່າການ​ກະຊວງ​ອຸດສາຫະກໍາ
ແລະ​ການ​ຄ້າ ຖະ​ແຫຼ​ງ ຍອມຮັບ​ວ່າ ສາ​ເຫດ​ສໍາຄັນ​ປະການ​ນຶ່ງ
ທີ່​ເຮັດ​ໃຫ້​ສິນຄ້າ​ສົ່ງ​ອອກ​ຂອງ​ລາວ​ມີ ລາຄາ​ສູງ​ຂຶ້ນຢ່າງ​ບໍ່​ສົມ​ເຫດ​ສົມ​ຜົນ ທັງ​ກໍ​ຍັງ​ໄດ້​ກະທົບ​ຕໍ່​ຄວາມ​ອາດ​ສາມາດ​ ໃນ​ການ​ແຂ່ງ​ຂັນ​ ດ້ານ​ລາ​ຄາ​ໃນ​ຕະຫຼາດ​ຕ່າງປະ​ເທດ ຂອງ​ສິນຄ້າ​ທີ່​ສົ່ງ​ອອກ​ຈາກ​ລາວ​ດ້ວຍ​ນັ້ນ ກໍ​ແມ່ນ​ການ​ທີ່​ບັນດາ​ພະ​ນັກ​ງານ​ພາສີ​ລະດັບ​ທ້ອງ​ຖິ່ນ ​ໄດ້​ພາກັນ​ຈັດ​ເກັບ​ອາກອນ​ສິນຄ້າທີ່​ຂົນ​ສົ່ງ​ຜ່ານ​ເຂດ​ຮັບຜິດຊອບ​ຂອງ​ພວກ​ຕົນ​ຢ່າງ​ຊໍ້າຊ້ອນ​ກັນ.

ຊຶ່ງ​ດ້ວຍ​ກາ​ນຈັດ​ຕັ້ງ​ປະຕິບັດ​ດັ່ງກ່າວ ຈຶ່ງ​ບໍ່​ພຽງ​ແຕ່​ຈະ​ເຮັດ​ໃຫ້​ຕົ້ນ​ທຶນ​ການ​ຜະລິດ​ແລະ​ການ​ຂົນ​ສົ່ງ​ສິນຄ້າ​ໃນລາວ​ເພີ່ມ​ຂຶ້ນ​ໂດຍ​ບໍ່​ຈໍາ​ເປັນ​ເທົ່າ​ນັ້ນ​ ຫາກ​ແຕ່​ກໍ​ຍັງ​ເປັນ​ການ​ຊໍ້າ​ເຕີມ ຫຼື​ເພີ່ມ​ພາລະ​ຄ່າ​ຂົນສົ່ງ​ສິນຄ້າ​ໃນ​ລາວ​ທີ່​ສູງ​ຢູ່​ແລ້ວ​ໃຫ້​ສູງ​ຂື້ນ​ໄປ​ອີກ ​ເພາະສະ​ນັ້ນ ການ​ແກ້​ໄຂ​ບັນຫາ​ດັ່ງກ່າວ​ນີ້ຈຶ່ງ​ມີ​ພຽງ​ແຕ່​ການ​ຢຸດ​ເຊົາ​ການຈັດ​ເກັບ​ອາ​ກອນທີ່​ຊໍ້າ​ຊ້ອນ ກັນ​ຢ່າງ​ສິ້ນ​ເຊີງ​ເທົ່າ​ນັ້ນ ຈຶ່ງ​ຈະ​ຊ່ວຍ​ໃຫ້​ສິນຄ້າ​ລາວ​ມີ​ລາຄາ​ລົດ​ລົງ ​ແລະ​ສາມາດ​ແຂ່ງ ຂັນ​ໃນ​ຕະຫຼາດ​ສາກົນ​ໄດ້ ດັ່ງ​ທີ່​ທ່ານ​ນາມ ​ໄດ້​ຊີ້​ແຈງ​ວ່າ:

“ຜູ້​ຜະລິດ​ນີ້ ​ເຂົາ​ເສຍ​ປະ​ໂຫຍ​ດ ​ເຂົາ​ບໍ່​ຢາກ​ຜະລິດ​ຕໍ່​ເດ່ ​ເຂົາ​ຮູ້​ວ່າ​ກະ​ຫຼໍ່າຢູ່​ປາກ​ຊ່ອງປະມານ 3 ຫາ 6 ບາດ 7 ບາດ ​ໄປ​ຂາຍ​ຢູ່​ຊ່ອງ​ເມັກ​ຈະ​ໄດ້ 11 ບາດ ​ແຕ່ໄປ​ນໍາ​ທາງນີ້ ​ເຈົ້າໜ້າ​ທີ່​ໄປ​ເກັບ​ຕື່ມ​ອີກ ສຸດ​ທ້າຍ​ກັບ​ຄືນ​ມາ​ແລ້ວ ຕົ້ນ​ທຶນ​ຂອງ​ ເຂົາ​ຈະ​ຫຼຸດ​ລົງ​ມາ​ເຫຼືອ​ຢູ່​ນຶ່ງ​ບາດ​ສອງ​ບາດ ກໍ​ຄື​ວ່າ​ເຮັດ​ໃຫ້​ປະຊາຊົນ​ຫັ້ນ​ບໍ່​ມີ​ລາຍ​ຮັບ ກໍ​ທຸກ​ໄປ​ຕື່ມ​ອີກ.”

ນອກຈາກ​ນີ້ ທ່ານ​ນາມ ກໍ​ຍອມຮັບ​ວ່າ​ສິນຄ້າ​ສົ່ງ​ອອກ​ຂອງ​ລາວ ຍັງ​ມີ​ຄຸນ​ນະພາ​ບຕໍ່າ ຈຶ່ງ​ເຮັດ​ໃຫ້ສິນຄ້າ​ສ່ວນ​ໃຫຍ່​ຂອງ​ລາວ ​ບໍ່​ເປັນ​ທີ່​ຍອມຮັບ​ໃນ​ຕະຫຼາດ​ການ​ຄ້າ​ສາກົນ ຊຶ່ງ​ກໍ ​
ເປັນ​ອີກ​ສາ​ເຫດ​ນຶ່ງ ທີ່​ເຮັດ​ໃຫ້​ສິນຄ້າ​ສົ່ງ​ອອກ​ຂອງ​ລາວ​ຍັງ​ບໍ່​ສາມາດ​ທີ່​ຈະແຂ່ງຂັນ​ໃນ ຕະຫຼາດ​ໂລກ​ໄດ້​ຢ່າງ​ແທ້​ຈິງ.

​ເພາະສະ​ນັ້ນ ​ເຖິງ​ແມ່ນ​ວ່າການ​ໄດ້​ຮັບ​ສະຖານະ​ພາບ​ ເປັນ​ສະມາຊິກ​ ໃນ​ອົງການ​ການ​ຄ້າ​ໂລກ​ຂອງ​ລາວ ​ນັບ​ຕັ້ງ​ແຕ່​ທ້າຍ​ປີ 2012 ​ເປັນ ຕົ້ນ​ມາ ຈະ​ເຮັດ​ໃຫ້​ລາວ​ມີ​ປະ​ເທດ​ຄູ່​
ຄ້າ​ເພີ່ມ​ຂຶ້ນຈາກ 60 ກວ່າ​ປະ​ເທດ​ເປັນ 158 ປະ​ເທດ​ທົ່ວ​ໂລກ​ກໍ​ຕາມ ຫາກ​ແຕ່​ວ່າ​ດ້ວຍເຫດ​ທີ່​ສິນຄ້າ​ສົ່ງ​ອອກ​ສ່ວນ​ໃຫຍ່​ຂອງ​ລາວ ​ກໍ​ຍັງ​ເປັນ​ສິນຄ້າ​ປະ​ເພດ​ວັດຖຸ​ດິບ ທີ່​ຄຸນ​ນະ
ພາ​ບບໍ່​ໄດ້​ມາດຕະຖານ ​ຕາມ​ຄວາມ​ຕ້ອງການ​ຂອງຕະຫຼາດ​ຕ່າງປະ​ເທດ ທັງ​ກໍ​ຍັງມີປະ ລິ ມານ​ນ້ອຍ​ດ້ວຍ​ນັ້ນ ຈຶ່ງ​ເຮັດ​ໃຫ້​ລາວ​ໄດ້​ຮັບ​ຜົນ​ປະໂຫຍ​ດຈາກ​ການ​ເປັນສະມາຊິກ​ຂອງ​ອົງການ​ການ​ຄ້າ​ໂລກ ຍັງ​ບໍ່​ຫຼາຍ​ເທົ່າ​ທີ່​ຄວນ.

ທັງ​ນີ້ ​ໂດຍ​ກະຊວງ​ອຸດສາຫະກໍາ ​ແລະ​ການ​ຄ້າ​ໄດ້​ວາງ​ເປົ້າໝາຍ​ທີ່​ຈະ​ສົ່ງ​ສິນຄ້າ​ອອກ​
ໄປ​ຕ່າງປະ​ເທດ​ໃຫ້​ໄດ້​ໃນ​ມູນ​ຄ່າ​ລວມບໍ່​ໜ້ອຍ​ກວ່າ 2,060 ລ້ານ​ໂດ​ລ່າ ​ໃນ​ຕະຫຼາດ​ແຜນການ​ປີ 2012-2013 ຫາກ​ແຕ່​ກໍ​ບໍ່​ສາມາດ​ບັນລຸ​ເປົ້າໝາຍ​ດັ່ງກ່າວ​ໄດ້​ໂດຍ​ແທ້​ຈິງ.

​ໂດຍ​ສາ​ເຫດ​ສໍາຄັນ​ທີ່​ເຮັດ​ໃຫ້ການ​ສົ່ງ​ອອກ​ຂອງ​ລາວ​ສາມາດ​ປະຕິບັດ​ໄດ້​ຕໍ່າ​ກວ່າ​ເປົ້າ ໝາຍ​ ກໍ​ຄື​ການ​ຕົກ​ຕໍ່າລົງ​ຂອງ​ລາຄາ​ຄໍາແລະແຮ່​ທາດ​ຕ່າງໆ​ໃນ​ຕະຫຼາດ​ໂລກໃນຂະນະ
ທີ່​ການ​ສົ່ງ​ອອກ​ຄໍາ ​ແລະ​ແຮ່​ທາດ​ຕ່າງໆ​ຂອງ​ລາວ​ໄປ​ຕ່າງປະ​ເທດ​ນັ້ນ ກໍ​ຄິດ​ເປັນ​ອັດຕາ ສ່ວນ​ເຖິງ 65% ຂອງ​ມູນ​ຄ່າ​ການ​ສົ່ງ​ອອກ​ທັງ​ໝົດ​ຂອງ​ລາວ​ໃນ​ແຕ່ລະ​ປີ ​ເພາະສະ​ນັ້ນ ​ໃນ​ເມື່ອ​ວ່າ​ລາຄາ​ຄໍາ​ແລະ​ແຮ່​ທາດ​ຕ່າງໆ​ຕົກ​ຕໍ່າລົງ ຈຶ່ງ​ເຮັດ​ໃຫ້​ລາຍ​ຮັບ​ຈາກ​ການ​ສົ່ງ​ອອກ​ຄໍາ ​ແລະ​ແຮ່​ທາດ​ຕ່າງໆ​ຂອງ​ລາວ​ ຕ້ອງ​ລົດ​ລົງ​ດ້ວຍ​ນັ້ນເອງ.

ສໍາລັບ​ໃນ​ແຜນການ​ປີ 2013-2014 ນີ້ ລັດຖະບານ​ລາວ​ໄດ້​ຕັ້ງ​ເປົ້າໝາຍ​ທີ່​ຈະ​ຊຸກຍູ້​ການ​ສົ່ງ​ສິນຄ້າ​ອອກ​ໄປຕ່າງປະ​ເທດ​ໃຫ້​ໄ ດ້​ບໍ່​ໜ້ອຍ​ກວ່າ 2,178 ລ້ານ​ໂດ​ລ່າ ​ແຕ່​ຖ້າ ຫາກ​ວ່າ​ສະພາບ​ການ​ຍັງ​ຄົງ​ບໍ່ດີ​ຂຶ້ນກວ່າ​ໃນ​ລະຍະ​ແຜນ​ການ​ປີ 2012-2013 ທີ່​ຜ່ານ​ມາ ກໍ​ຄົງ​ຈະ​ເປັນການ​ຍາກ​ທີ່​ຈະ​ສາມາດ​ບັນລຸ​ເປົ້າໝາຍ​ດັ່ງກ່າວ​ໄດ້​ຢ່າງ​ແທ້​ຈິງ.

ຍິ່ງ​ໄປ​ກວ່າ​ນັ້ນ ກໍ​ຍັງ​ຈະ​ເຮັດ​ໃຫ້​ລາວ​ຕ້ອງ​ປະ​ເຊີນ​ກັບ​ບັນຫາ​ຂາດ​ດຸນ​ການ​ຄ້າ​ ຕ່າງປະ​
ເທດ​ຫຼາຍ​ຂຶ້ນ​ໄປ​ອີກ ​ເນື່ອງ​ຈາກ​ລັດຖະບານ​ລາວ​ໄດ້​ວາງ​ແຜນການ​ທີ່​ຈະ​ຄວບ​ຄຸມ​ການ​ນໍາ​ເຂົ້າສິນຄ້າ​ຈາກ​ຕ່າງປະ​ເທດ​ ໃຫ້​ຢູ່​ໃນ​ມູນ​ຄ່າບໍ່​ເກີນ 2,730 ລ້ານ​ໂດ​ລ່າ ​ແຕ່ຈາກ​ການປະ​ເມີນ​ຂອງ​ທາງ​ການ​ລາວ​ເອງ ກໍ​ເຊື່ອ​ວ່າ​ ຈະ​ມີ​ການ​ນໍາ​ເຂົ້າສິນຄ້າ​ຈາກ​ຕ່າງປະ ເທດ​ຫຼາຍ​ກວ່າ 3,700 ລ້ານ​ໂດ​ລ່າ.
XS
SM
MD
LG