ກອງປະຊຸມຂອງຄະນະລັດຖະບານລາວ ພາຍໃຕ້ການເປັນປະທານຂອງທ່ານ ທອງສິງ
ທໍາມະວົງນາຍົກລັດຖະມົນຕີລາວ ໄດ້ມີມັດຕິອະນຸມັດແຜນການປັບຂຶ້ນເງິນເດືອນໃຫ້
ແກ່ຄູ-ອາຈານ ໃນທົ່ວປະເທດໃນທ້າຍເດືອນມັງກອນນີ້ ໂດຍຫວັງວ່າຈະເປັນຜົນເຮັດ
ໃຫ້ບັນດາຄູ-ອາຈານ ມີສະພາບຊີວິດການເປັນຢູ່ທີ່ດີຂຶ້ນ ອັນຈະສົ່ງຜົນຕໍ່ເນື່ອງໄປເຖິງ
ການພັດທະນາເພື່ອຍົກລະດັບການສຶກສາຂອງລາວໃຫ້ດີຂຶ້ນ ອີກດ້ວຍ.
ນອກຈາກນີ້ ຄະນະລັດຖະບານລາວກໍຍັງຄາດຫວັງອີກດ້ວຍວ່າການປັບຂຶ້ນເງິນເດືອນ
ໃຫ້ແກ່ບັນດາຄູ-ອາຈານເປັນກໍລະນີພິເສດໃນຄັ້ງນີ້ ຈະເປັນປັດໃຈທີ່ຊ່ວຍດຶງດູດເອົາ
ບຸກຄະລາກອນ ທີ່ມີຄວາມຮູ້ ຄວາມສາມາດໃຫ້ເຂົ້າມາມີສ່ວນຮ່ວມໃນການພັດທະນາ
ຄຸນນະພາບການສຶກສາຂອງລາວໃຫ້ໄດ້ມາດຕະຖານ ຂອງກຸ່ມອາຊຽນດ້ວຍກັນ ແລະ
ໄດ້ມາດຕະຖານສາກົນເທື່ອລະກ້າວອີກດ້ວຍ.
ດັ່ງທ່ານນາງບຸນເພັງ ມູນໂພໄຊ ລັດຖະມົນຕີປະຈໍາສໍານັກງານນາຍົກລັດຖະມົນຕີ ແລະໂຄສົກຄະນະລັດຖະບານລາວ ໄດ້ຖະແຫລງຊີ້ແຈງໃນຕອນນຶ່ງວ່າ:
“ເພື່ອປັບປຸງກົນໄກການ
ຄຸ້ມຄອງໃຫ້ຄູສອນ ປະຕິ
ບັດໜ້າທີ່ຢ່າງມີປະສິດທິ
ຜົນສູງ ຊຸກຍູ້ສົ່ງເສີມ ແລະ
ດຶງດູດ ໃຫ້ຄົນຢາກຮຽນ
ແລະເປັນຄູ ປັບປຸງເງິນເດືອນ ແລະສິ່ງຈູງໃຈໃຫ້ສູງຂຶ້ນ ດ້ວຍການປັບປຸງ ລະບົບການຈັດສັນຂັ້ນເງິນເດືອນຂອງຄູໃຫ້ແຕກຕ່າງກັບລັດຖະກອນທົ່ວໄປ ຍົກສະຖານະພາບ ຖານະບົດບາດ ຊີວິດການເປັນຢູ່ທີ່ດີຂອງຄູ.”
ແຕ່ຢ່າງໃດກໍຕາມ ທາງການລາວກໍຍັງບໍ່ທັນໄດ້ໃຫ້ລາຍລະອຽດວ່າຈະມີການປັບຂຶ້ນເງິນ
ເດືອນ ໃຫ້ແກ່ບັນດາຄູ-ອາຈານໃນສັດສ່ວນເທົ່າໃດແທ້ ເນື່ອງຈາກວ່າ ຍັງຈະຕ້ອງສະເໜີ
ແຜນການດັ່ງກ່າວ ຕໍ່ກອງປະຊຸມສະພາແຫ່ງຊາດ ເພື່ອໃຫ້ການຮັບຮອງ ແລະອະນຸມັດ
ແຜນການຢ່າງເປັນທາງການເສຍກ່ອນ ຊຶ່ງຄາດໝາຍວ່າ ສະພາແຫ່ງຊາດລາວ ຈະມີການ
ປະຊຸມສະໄໝສາມັນຄັ້ງທີ 3 ພາຍໃນເດືອນມິຖຸນາ ປີນີ້.
ກ່ອນໜ້ານີ້ ທ່ານ ລີຕູ ບົວປາວ, ລັດຖະມົນຕີ ຊ່ວຍວ່າການກະຊວງສຶກສາທິການ ແລະກິ
ລາ ຖະແຫຼງຍອມຮັບວ່າ ໂຮງຮຽນໃນເຂດຊົນນະບົດຍັງຕ້ອງປະເຊີນກັບບັນຫາຂາດແຄນ
ບຸກຄະລາກອນຄູຕໍ່ໄປ ເຖິງແມ່ນວ່າ ລັດຖະບານລາວໄດ້ອະນຸມັດໃຫ້ເພີ່ມຈໍານວນຄູໄດ້ເຖິງ
9,600 ຄົນ ໃນສົກຮຽນປະຈໍາປີ 2011-2012 ນີ້ກໍຕາມ ຫາກແຕ່ກໍມີຄູພຽງສ່ວນໜ້ອຍທີ່
ໄດ້ສະໝັກໃຈປະຈໍາຢູ່ໂຮງຮຽນໃນເຂດຊົນນະບົດ.
ສາເຫດທີ່ຄູສ່ວນໃຫຍ່ບໍ່ຢາກໄປປະຈໍາຢູ່ໂຮງຮຽນໃນເຂດຊົນນະບົດນັ້ນ ກໍເພາະວ່າ ບໍ່ຢາກ
ໃຊ້ຊີວິດຢ່າງລໍາບາກ ແລະທີ່ສໍາຄັນອີກປະການນຶ່ງກໍຄື ຄູໃນເຂດຊົນນະບົດ ຍັງໄດ້ຮັບເງິນ
ເດືອນບໍ່ຕົງຕາມກໍານົດເວລາອີກດ້ວຍ. ໃນຂະນະທີ່ຄູໃນເຂດຕົວເມືອງນັ້ນ ມີທັງຄວາມສະ
ດວກ ສະບາຍໃນການໃຊ້ຊີວິດ ແລະໄດ້ຮັບເງິນເດືອນຕາມກໍານົດເວລາໂດຍຜ່ານ ລະບົບ
ທະນາຄານອີກດ້ວຍ. ດ້ວຍສະພາບການທີ່ເປັນຢູ່ນີ້ ຈຶ່ງເຮັດໃຫ້ເຂດຕົວເມືອງມີຈໍານວນຄູ
ເກີນລະດັບຄວາມຕ້ອງການ, ໃນຂະນະທີ່ຄູແຕ່ລະຄົນທີ່ຢູ່ເຂດຊົນະບົດນັ້ນ ກັບຕ້ອງຮັບ
ພາລະໃນການສອນນັກຮຽນເຖິງ 70 ຄົນ ຫຼື 2 ຫ້ອງຮຽນເປັນຢ່າງໜ້ອຍ.
ໃນປັດຈຸບັນຢູ່ທົ່ວປະເທດລາວ ມີຈຳນວນ
ຄູທັງໝົດຫຼາຍກ່ວາ 63,000 ຄົນ ເຊິ່ງໃນ
ນີ້ກໍມີຢູ່ປະມານ 37,000 ຄົນ ທີ່ເປັນຄູໃນ
ໂຮງຮຽນຂອງລັດຖະບານ. ສ່ວນທີ່ເຫຼືອ
ກໍເປັນຄູຕາມສະຖານສຶກສາຂອງພາກ
ເອກະຊົນ ໂດຍສ່ວນໃຫຍ່ກໍຄືບັນດາຄູທີ່
ບໍ່ຍອມໄປປະຈໍາຢູ່ໂຮງຮຽນຂອງລັດຖະບານ
ໃນເຂດຊົນນະບົດນັ້ນເອງ.
ໃນປັດຈຸບັນນີ້ ລາວຈະມີໂຮງຮຽນປະຖົມຢູ່ເຖິງ 94% ຂອງຈໍານວນໝູ່ບ້ານທັງໝົດໃນທົ່ວ
ປະເທດ ແລະໃນຂະນະດຽວກັນ ກໍເຮັດໃຫ້ 91.6% ຂອງເດັກນ້ອຍໃນໄວຮຽນທັງໝົດ
ມີໂອກາດໄດ້ຮຽນໜັງສືໃນລະດັບປະຖົມ ແລະສ່ວນ 68% ກໍໄດ້ຮຽນຈົນຈົບມັດທະຍົມ
ຕົ້ນກໍຕາມ ຫາກແຕ່ວ່າໂອກາດໃນການໄດ້ຮຽນລະດັບມັດທະຍົມປາຍແລະລະດັບປະລິນ
ຍາຕີນັ້ນ ກໍຍັງຄົງມີອັດຕາສະເລ່ຍທີ່ຕໍ່າຫລາຍ ໂດຍສະເພາະແມ່ນໃນລະດັບປລິນຍາຕີນັ້ນ
ມີຄົນລາວບໍ່ເຖິງ 1% ຂອງປະຊາກອນລາວໃນທົ່ວປະເທດ ທີ່ມີໂອກາດໄດ້ຮຽນ.
