ເສດຖະກິດລາວຕ້ອງການການປະຕິຮູບໂຄງສ້າງ ເພື່ອຫຼຸດພົ້ນອອກຈາກວິກິດການໂດຍໄວເທົ່າທີ່ຈະໄວໄດ້ ດ້ວຍການຫຼຸດລະດັບການເພິ່ງພາດ້ານເສດຖະກິດ, ການຄ້າ ແລະ ການລົງທຶນຈາກຈີນພຽງປະເທດດຽວ.
ຜູ້ຊ່ຽວຊານດ້ານເສດຖະກິດໃນອາຊຽນ ໃຫ້ທັດສະນະວ່າ ເພື່ອແກ້ໄຂວິກິດການເສດຖະກິດແລະການເງິນໃນລາວຢ່າງແທ້ຈິງ, ຈະຕ້ອງດຳເນິນການປະຕິຮູບໂຄງສ້າງເສດຖະກິດມະຫາພາກທັງລະບົບ ດ້ວຍການຫຼຸດລະດັບການເພິ່ງພາທາງເສດຖະກິດການຄ້າ ແລະການເງິນຈາກຈີນພຽງດ້ານດຽວໃຫ້ເປັນການສ້າງຄວາມດຸ່ນດ່ຽງທາງດ້ານການລົງທຶນຂອງຕ່າງປະເທດໃນລາວ ກໍຄືການຊຸກຍູ້ການລົງທຶນຈາກຕ່າງປະເທດໃຫ້ດຸນດ່ຽງກັບການລົງທຶນຂອງຈີນໃນລາວໃຫ້ໄດ້ ເພື່ອຈະເຮັດໃຫ້ເສດຖະກິດມະຫາພາກຂອງລາວບໍ່ຕ້ອງຜູກມັດກັບເສດຖະກິດຂອງຈີນຢ່າງດຽວ ດ້ວຍການດຸນດ່ຽງຍ່າງເໝາະສົມ, ຈືງຈະເຮັດໃຫ້ເສດຖະກິດມະຫາພາກຂອງລາວ ບໍ່ຕ້ອງປະເຊີນກັບວິກິດການຄືເວລານີ້, ຊຶ່ງເປັນຍ້ອນຜົນກະທົບຈາກບັນຫາເສດຖະກິດພາຍໃນຈີນ ເປັນສຳຄັນ ດັງທີ່ຜູ້ຊ່ຽວຊານ ໃຫ້ການຢືນຢັນວ່າ:
“ຕອນນີ້, ປະເທດລາວແມ່ນເຊື່ອມໂຍງເສດຖະກິດຂອງຕົນກັບເສດຖະກິດຈີນ ມັນເບິ່ງຄືວ່າເປັນການວິເຄາະສະຖານະການທີ່ຜິດພາດ. ຫຼັງຈາກໂຄວິດໄດ້ 3 ປີ, ຈີນໄດ້ເປີດປະເທດ ກໍຄາດຫວັງວ່ານັກທ່ອງທ່ຽວຈີນຈະມາ. ປະເທດລາວກໍມີທາງລົດ ໄຟລາວ-ຈີນ. ແຕ່ວ່າເສດຖະກິດຈີນມີບັນຫາໃນປັດຈຸບັນ ທີ່ເຂົາບອກວ່າເສດຖະກິດຈີນຈະຂະຫຍາຍຕົວ 5 ເປີເຊັນນັ້ນ, ແຕ່ຂ້າພະເຈົ້າຄິດວ່າບໍ່ເຖິງດອກ ຍູ່ໃນກອບ 4.5 ເປີເຊັນ ເຖິງ 4.8 ເປີເຊັນ. ສະນັ້ນ, ນັກທ່ອງທ່ຽວຈີນທີ່ມາກໍບໍ່ໄດ້ຕາມເປົ້າໝາຍ. ສອງ, ເສດຖະກິດຈີນບໍ່ດີ, ແຕ່ວ່າຫຼາຍໆກິດຈະກຳຢູ່ໃນປະເທດລາວນັ້ນ ແມ່ນ ລົງທຶນໂດຍຈີນ, ສະນັ້ນ ເງິນກໍບໍ່ມາອີກ."
ແຕ່ຢ່າງໃດກໍ່ຕາມ ການຈະດຸນດ່ຽງການລົງທຶນຂອງປະເທດຕ່າງໆ ກັບຈີນຢູ່ໃນລາວໃຫ້ໄດ້ຢ່າງແທ້ຈິງນັ້ນ ກໍບໍ່ແມ່ນເລື່ອງງ່າຍ. ເນື່ອງຈາກວ່າໃນປັດຈຸບັນນີ້ ບໍລິສັດຈາກຈີນ ຍັງເປັນອັນດັບ 1 ຂອງການລົງທຶນໃນລາວ. ມີຈຳນວນເຖິງ 933 ໂຄງການ ມີມູນຄ່າຫຼາຍກວ່າ 18 ຕື້ໂດລາສະຫະລັດ ແລະເປັນການລົງທຶນໃນທຸກດ້ານ ໂດຍສະເພາະໃນຂົງເຂດພະລັງງານ ການຂຸດຄົ້ນແຮ່ທາດ ການຜະລິດກະສິກຳ ການຄ້າ ແລະການບໍລິການທີ່ສົມບູນແບບ. ສະນັ້ນ, ບໍລິສັດຈີນທີ່ລົງທຶນ ແລະ ດຳເນີນທຸລະກິດຢູ່ລາວ ຈືງສາມາດກຳນົດລາຄາສິນຄ້າແລະບໍລິການຕ່າງໆ ເປັນເງິນຢວນໄດ້ດ້ວຍ ເມື່ອສົມ ທົບກັບການຂັດແຍ້ງດ້ານການຄ້າລະຫວ່າງອາເມຣິກາກັບຈີນ ແລະບໍ່ວ່າຜົນການເລືອກຕັ້ງປະທານາທິບໍດີສະຫະລັດຈະເປັນອັນໃດກໍ່ຕາມ. ຈະບໍ່ສົ່ງຜົນກະທົບຕໍ່ການລົງທຶນຂອງຈີນໃນລາວແລະໃນອາຊຽນແຕ່ຢ່າງໃດ. ດັງທີ່ຜູ້ຊ່ຽວຊານດ້ານເສດຖະກິດ ການຄ້າ ແລະ ການລົງທຶນໃນອາຊຽນ ຢືນຢັນວ່າ:
“ບໍ່ວ່າຜູ້ໃດຈະຊະນະການເລືອກຕັ້ງ, ໂອກາດທີ່ຈະປະເຊີນໜ້າກັນ, ຂັດແຍ້ງກັນລະຫວ່າງອາເມຣິກາກັບຈີນ ຈະບໍ່ມີການປ່ຽນແປງ. ແນວໃດກໍຕາມ, ທັງສອງປະເທດນີ້ຍັງຈະສືບຕໍ່ເປັນຄູ່ແຂ່ງທາງຍຸດທະສາດກັນຕໍ່ໄປ. ສະນັ້ນແລ້ວນິ້, ຈີນກໍຄົງຈະຕ້ອງຊອກຫາທາງອອກແລ້ວວ່າຕອນນີ້ນິ, ຄວາມຕ້ອງການເງິນຢວນມັນເກິດຂື້ນແລ້ວ ທ່າມກາງການຮ່ວມມືຂອງຈີນກັບປະເທດອື່ນໆ. ເລີ້ມຕົ້ນດ້ວຍ ໜຶ່ງແລວທາງ-ໜຶ່ງເສັ້ນທາງນັ້ນ ແລະທຸກປະເທດໃນກຸ່ມໂລກໃຕ້, ເຊິ່ງເປັນປະເທດສ່ວນໃຫຍ່ໃນໂລກ, ສະນັ້ນ ມັນຈຶ່ງເພີ່ມກາລະໂອກາດໃນການພົວພັນດ້ານເສດຖະກິດລະຫວ່າງຈີນກັບປະເທດກຳລັງພັດທະນາທັງຫຼາຍ. ມັນກໍເທົ່າກັບເປັນການນໍາພາໃຫ້ເງິນຢວນພົ້ນເດັ່ນຂຶ້ນຢ່າງງ່າຍດາຍ ແລະຫລາຍຂື້ນ.”
ຜູ້ຊ່ຽວຊານ ຄາດວ່າ ລັດຖະບານລາວ ອາດຈະຕ້ອງຂໍການຊ່ວຍເຫລືອ ແລະ ກູ້ເງິນ ຈາກກອງທຶນການເງິນສາກົນ (IMF) ເພື່ອຊ່ວຍປະເທດລາວໃຫ້ຟື້ນຕົວຈາກວິກິດການທາງເສດຖະກິດ ແລະ ການເງິນ. ເພາະຖ້າຫາກວິກິດການດັ່ງກ່າວຍັງດຳເນີນຕໍ່ໄປ ມັນຈະສົ່ງຜົນໃຫ້ເສດຖະກິດລາວລົ້ມລະລາຍຢ່າງຫລີກລ່ຽງບໍ່ໄດ້ ແລະເງິນກີບຈະຫຼຸດລົງຈົນກ່ວາມັນບໍ່ມີຄ່າ. ສ່ວນຄົນລາວກໍຈະຕ້ອງປະເຊີນກັບໄພເງິນເຟີ້ສູງ. ແລະສິນຄ້າກໍ່ແພງຂຶ້ນເມື່ອລວມກັບອັດຕາສ່ວນໜີ້ສາທາລະນະທີ່ສູງ ແລະ ຄວາມສາມາດໃນການເກັບລາຍຮັບທີ່ຈຳກັດ. ດັ່ງນັ້ນ, ລັດຖະບານລາວ ຈະຕ້ອງຂໍຄວາມຊ່ວຍເຫຼືອຈາກ IMF ນັ່ນເອງ.
ແຕ່ຢ່າງໃດກໍ່ຕາມ ຖ້າລັດຖະບານລາວສາມາດຄວບຄຸມ ແລະ ຫລຸດຜ່ອນອັດຕາເງິນເຟີ້ໄດ້. ທັງສາມາດສ້າງຄວາມເຊື່ອໝັ້ນໃນມູນຄ່າຂອງເງິນກີບໄດ້ຢ່າງແທ້ຈິງ, ເຊື່ອວ່າເສດຖະກິດລາວຈະດີຂຶ້ນໃນໄລຍະຍາວ ທັງນີ້ ກໍຍ້ອນວ່າ ຜ່ານມາ ລັດຖະບານລາວ ໄດ້ລົງທຶນ ຫລາຍດ້ານ ໃນການພັດທະນາ ພື້ນຖານໂຄງລ່າງ. ໂດຍສະເພາະແມ່ນການເຊື່ອມຕໍ່ທາງລົດໄຟກັບຈີນແລະການພັດທະນາພະລັງງານໄຟຟ້າ ແມ່ນປັດໄຈສຳຄັນທີ່ຈະສົ່ງຜົນດີຕໍ່ການພັດທະນາເສດຖະກິດ, ນຳໄປສູ່ການລົບລ້າງຄວາມທຸກຍາກຢ່າງຄົບຖ້ວນໃນປີ 2025 ແຕ່ລາຍຮັບສະເລ່ຍຂອງພົນລະເມືອງລາວໃນປັດຈຸບັນມີພຽງແຕ່ 28.97 ລ້ານກີບ ຫຼື ເທົ່າກັບ 1,353 ໂດລາຕໍ່ຄົນຕໍ່ປີ.
ຟໍຣັມສະແດງຄວາມຄິດເຫັນ