ລາວກ່າວວ່າ ຕົນຈະດໍາເນີນການຄົ້ນຄວ້າຄັ້ງໃໝ່ກ່ຽວກັບ
ຜົນກະທົບຕໍ່ສະພາບແວດລ້ອມຂອງເຂື່ອນໄຟຟ້າແຫ່ງນຶ່ງ
ທີ່ຕົນຢາກສ້າງຂຶ້ນໃນເຂດລຸ່ມແມ່ນໍ້າຂອງ ໂດຍຈະປະຕິ
ບັດຕາມຄໍາຂໍຮ້ອງຈາກພວກປະເທດເພື່ອນບ້ານໃຫ້ສຶກ
ສາເບິ່ງໂຄງການດັ່ງກ່າວຕື່ມອີກນັ້ນ.
ທ່ານດາວວົງພອນແກ້ວ ຮອງເອກອະທິບໍດີກົມໄຟຟ້າ
ລາວ ກ່າວໃນວັນອັງຄານວານນີ້ວ່າ ລາວຈະຈ້າງພວກ
ທີ່ປຶກສາໃຫ້ທໍາການຄົ້ນຄວ້າຕື່ມອີກ ແລະຈະຂໍໃຫ້ບໍລິ
ສັດກໍ່ສ້າງໄທ ທີ່ມີບົດບາດນໍາພາໃນໂຄງການດັ່ງກ່າວ
ອອກທຶນໃນການສຶກສາຄົ້ນຄວ້າທີ່ວ່ານີ້.
ທ່ານດາວວົງກ່າວຕືມວ່າ ວຽກກໍ່ສ້າງໂຄງການດັ່ງກ່າວ
ຈະເລື່ອນເວລາອອກໄປ ເພື່ອການສຶກສາທີ່ວ່ານີ້.
ເຂື່ອນໄຊຍະບູລີ ຈະເປັນເຂື່ອນໄຟຟ້າພະລັງນໍ້າແຫ່ງທໍາອິດໃນເຂດລຸ່ມແມ່ນໍ້າຂອງ ແຕ່ເຖິງ
ຢ່າງໃດກໍດີ ຈີນໄດ້ສ້າງເຂື່ອນຫລາຍແຫ່ງແລ້ວໃນເຂດຕອນເໜືອຕາມລໍາແມ່ນໍ້າຂອງ ທີ່ຈີນ
ເອີ້ນວ່າແມ່ນໍ້າລ້ານຊ້າງນັ້ນ.
ໃນເດືອນຜ່ານມານີ້ຄະນະກໍາມາທິການແມ່ນໍ້າຂອງສາກົນຫວຽດນາມ ກໍາປູເຈຍແລະໄທ ຊຶ່ງ
ແມ່ນໍ້າຂອງໄຫລຜ່ານປະເທດເຫລົ່ານີ້ເຊ່ນກັນນັ້ນ ຮ້ອງຂໍຢາກໄດ້ຂໍ້ມູນເພີ່ມຕື່ມກ່ຽວກັບຜົນ
ກະທົບທີ່ອາດມີຂຶ້ນຕໍ່ພວກສັດປ່າ ປູປາແລະການເຮັດຮົ້ວສວນໄຮ່ນາເລາະລຽບຕາມລໍາແມ່
ນໍ້າຂອງ. ຫວຽດນາມຍັງຂໍຮ້ອງໃຫ້ໝົດທຸກໂຄງການສ້າງເຂື່ອນໄຟຟ້າຕາມລໍາແມ່ນໍ້າຂອງ
ເລື່ອນເວລາອອກໄປອີກ 10 ປີສໍາລັບທຳການສຶກສາເພີ່ມຕື່ມ. ຄະນະກໍາມາທິການດັ່ງກ່າວ
ຊຶ່ງມີວັດຖຸປະສົງ ເພື່ອໃຫ້ໄດ້ຮັບຄວາມເຫັນດີເຫັນພ້ອມຈາກພວກປະເທດໃນພາກພື້ນຢ່າງ
ເປັນເອກກະສັນ ສໍາລັບການພັດທະນາທີ່ຍືນຍົງຂອງແມ່ນໍ້າດັ່ງກ່າວ ບໍ່ມີສິດອໍານາດທີ່ຈະກີດ
ກັນຫຼືສະກັດກັ້ນຕໍ່ໂຄງການສ້າງເຂື່ອນໃດໆ.
ລາວວາງແຜນຈະສ້າງເຂື່ອນຫລາຍແຫ່ງໃນລໍາແມ່ນໍ້າຂອງເພື່ອຜະລິດກະແສໄຟຟ້າ ຊຶ່ງຕົນ
ສາມາດຂາຍໃຫ້ປະເທດອື່ນໆໄດ້. ກ່ອນໜ້ານີ້ໄທຮັບປາກວ່າຈະຊື້ພະລັງໄຟຟ້າຈາກລາວ
ໃນປະລິມານ 95 ເປີເຊັນຈາກໂຄງການດັ່ງກ່າວ.
