ຄະນະກໍາມະການຄຸ້ມຄອງຕະຫຼາດຫຼັກຊັບແຫ່ງຊາດລາວ
ໄດ້ອະນຸຍາດໃຫ້ຊາວຕ່າງຊາດມີສິດຊື້-ຂາຍຫຸ້ນຂອງທະນາ
ຄານການຄ້າຕ່າງປະເທດຂອງລັດຖະບານລາວໄດ້ຢ່າງເປັນ
ທາງການ ນັບຕັ້ງແຕ່ກາງເດືອນພຶດ ສະພານີ້ເປັນຕົ້ນມາ, ເນື່ອງຈາກໄດ້ພິຈາລະນາແລ້ວ
ເຫັນວ່າ ການຫ້າມ ຫຼື ບໍ່ໃຫ້ສິດແກ່ຊາວຕ່າງຊາດໃນການທໍາການຊື້-ຂາຍຫຸ້ນໃນຕະຫຼາດ
ຫຼັກຊັບຂອງລາວນັ້ນໄດ້ເປັນຜົນເຮັດໃຫ້ສະພາການຊື້-ຂາຍຫຸ້ນໃນຕະຫຼາດຫຼັກຊັບຂອງລາວມີ
ການເຄື່ອນໄຫວຢ່າງຈໍາກັດ.
ຍິ່ງໄປກວ່ານັ້ນ ກໍຍັງປະກົດວ່າ ການຊື້-ຂາຍຫຸ້ນໄດ້ມີການ
ປັບຕົວລົດລົງມາຢ່າງຕໍ່ເນື່ອງ, ທັງໃນປະລິມານ ມູນຄ່າ
ແລະລາຄາຫຸ້ນນັບຕັ້ງແຕ່ກາງເດືອນກຸມພາເປັນຕົ້ນມາທັ້ງໆ
ທີ່ວ່າ ໃນຕະຫຼອດຊ່ວງເດືອນມັງກອນນັ້ນ ການຊື້-ຂາຍຫຸ້ນ
ໄດ້ປັບຕົວສູງຂຶ້ນຢ່າງຕໍ່ເນື່ອງໃນທຸກດ້ານ ຊຶ່ງກໍ່ຈະເຫັນໄດ້
ຈາກການຊື້-ຂາຍຫຸ້ນສະສົມລວມກັນເຖິງ 9.4 ລ້ານຫຸ້ນ,
ຄິດເປັນມູນຄ່າຫຼາຍກວ່າ 85 ຕື້ກີບ ແລະ ດັດສະນີຂອງ
ການຊື້-ຂາຍຫຸ້ນ ກໍໄດ້ພຸ້ງຂຶ້ນສູງເຖິງລະດັບເກີນກວ່າ
1,860 ຈຸດ ໃນຂະນະທີ່ລາຄາຫຸ້ນຂອງທະນາຄານການຄ້າ
ຕ່າງປະເທດກໍໄດ້ປັບຕົວສູງຂຶ້ນຈາກ 8,000 ກີບ ເປັນ 15,400 ກີບຕໍ່ຫຸ້ນ. ສ່ວນຫຸ້ນຂອງ
ບໍລິສັດໄຟຟ້າລາວນັ້ນກໍ ໄດ້ປັບຕົວສູງຂຶ້ນຈາກ 4,700 ກີບ ເປັນ 8,800 ກີບຕໍ່ຫຸ້ນຫຼືເພີ້ມ
ຂຶ້ນ 92.5% ແລະ 87.2% ຕາມລໍາດັບ.
ແຕ່ຢ່າງໃດກໍຕາມ ດັດສະນີຂອງການຊື້-ຂາຍຫຸ້ນໃນຕະຫຼາດຫຼັກຊັບຂອງລາວກໍໄດ້ເລີ່ມປັບ
ຕົວຫຼຸດລົງໃນໄລ ຍະການສະຫຼອງບຸນປີໃໝ່ຈີນ ແລະ ຫວຽດນາມເພາະປະກົດວ່າລາຄາ
ຊື້-ຂາຍຫຸ້ນທະນາຄານການຄ້າ ຕ່າງປະເທດໄດ້ຫຼຸດລົງຈາກ 15,400 ກີບມາເປັນ 12,100
ກີບຕໍ່ຫຸ້ນ. ສ່ວນຫຸ້ນບໍລິສັດຜະລິດໄຟຟ້າລາວກໍ ໄດ້ຫຼຸດລົງຈາກ 8,800 ກີບມາເປັນ 7,250
ກີບຕໍ່ຫຸ້ນໃນວັນທີ 8 ກຸມພາທີ່ຜ່ານມາ ແລະກໍໄດ້ປັບຕົວຫຼຸດລົງເລື້ອຍມາ.
ທັງນີ້ ທ່ານ ເດດພູວັງ ມູນລັດ, ຜູ້ອໍານວຍການໃຫຍ່ຕະ
ຫຼາດຫຼັກຊັບແຫ່ງຊາດລາວໄດ້ຍອມຮັບວ່າເປັນຍ້ອນ ອິດທິ
ພົນຂອງນັກທຸລະກິດລາວເຊື້ອສາຍຈີນ ແລະ ຫວຽດນາມ
ດັ່ງທີ່ທ່ານໄດ້ໃຫ້ການອະທິບາຍວ່າ:
ຜ່ານມານີ້ ມັນຂາລົງນີ້ ເຮົາບໍ່ໄດ້ໝາຍເຖິງວ່າ ພວກ
ເຮົາມີບັນຫາ, ມັນແມ່ນທີ່ເຂົາເອີ້ນວ່າ ການຂຶ້ນ-ລົງ
ຕາມລະດູການຂອງມັນ, ລະດູການນຶ່ງແມ່ນຢູ່ໃນຫັ້ນ
ທີ່ໄດ້ສະແດງອອກຢ່າງຊັດເຈນກະແມ່ນບູນປີໃຫມ່
ຂອງຊາວຈີນ ແລະ ຊາວຫວຽດນາມ ເພາະວ່າຜູ້ລົງ
ທຶນໃນຕະຫຼາດລາວແມ່ນມີເຊື້ອສາຍຈີນ ແລະ ຫວຽດນາມທີ່ມີສັນຊາດເປັນລາວ
ກະສາມາດຊື້ຂາຍຫຸ້ນຂອງທະນາຄານການຄ້າຕ່າງປະເທດໄດ້ ແລະ ຈຳນວນ
ນຶ່ງກະແມ່ນຊື້ຫຸ້ນຂອງບໍລິສັດຜະລິດໄຟຟ້າລາວກໍຄືກັນ”
ແຕ່ຢ່າງໃດກໍ່ຕາມ ການທີ່ທາງການລາວໄດ້ອະນຸຍາດໃຫ້ຊາວຕ່າງຊາດມີສິດທຳການ
ຊື້-ຂາຍຫຸ້ນຂອງທະນາຄານການຄ້າຕ່າງປະເທດໄດ້ໃນສັດສ່ວນບໍ່ເກີນ 5% ຂອງຈໍານວນ
ຫຸ້ນທັງໝົດ 136 ກວ່າລ້ານຫຸ້ນທີ່ຊື້ -ຂາຍ ຢູ່ໃນຕະຫຼາດຫຼັກຊັບຂອງລາວໃນຄັ້ງນີ້ກໍໄດ້ເຮັດ
ໃຫ້ລາຄາຫຸ້ນຂອງທະນາຄານການຄ້າຕ່າງປະເທດມີການປັບຕົວສູງຂຶ້ນເຖິງ 20% ແລະເຊື່ອ
ວ່າລາຄາຫຸ້ນຈະກັບຄືນສູ່ລະດັບທີ່ເກີນກວ່າ 10,000 ກີບໃນມໍ່ໆນີ້ ຫາກແຕ່ວ່າລາຄາຫຸ້ນ
ຂອງບໍລິສັດຜະລິດໄຟຟ້າລາວກໍ່ຍັງຄົງປັບຕົວຫຼຸດລົງ, ເນື່ອງຈາກທາງການລາວຍັງບໍ່ອະນຸ
ຍາດໃຫ້ຊາວຕ່າງຊາດສາມາດທໍາການຊື້-ຂາຍຫຸ້ນດັ່ງກ່າວໄດ້ນັ້ນເອງ.
ທາງການລາວ ໄດ້ເປີດໃຫ້ມີການຊື້-ຂາຍຫຸ້ນໃນຕະຫຼາດຫຼັກ
ຊັບແຫ່ງທຳອິດຂອງລາວຢ່າງເປັນທາງການ ນັບແຕ່ວັນທີ
11 ເດືອນມັງກອນ ປີ 2011 ເປັນຕົ້ນມາ ແລະ ກໍມີພຽງ
ຫຸ້ນຂອງ 2 ບໍລິສັດກໍຄືບໍລິສັດໄຟ ຟ້າລາວຈໍາກັດ (ມະຫາ
ຊົນ) ແລະບໍລິສັດທະນາຄານການຄ້າຕ່າງປະເທດຈຳກັດ
(ມະຫາຊົນ) ເທົ່ານັ້ນທີ່ໄດ້ ຮັບອະນຸຍາດໃຫ້ມີການຊື້-ຂາຍ
ຫຸ້ນໃນຕະຫຼາດຫຼັກຊັບຂອງລາວດັ່ງກ່າວນີ້.
ຕະຫຼາດຫຼັກຊັບແຫ່ງຊາດຂອງລາວດັ່ງກ່າວນີ້ ເປັນການຮ່ວມທຶນລະຫວ່າງ ທະນາຄານແຫ່ງ
ຊາດລາວກັບຕະຫຼາດຫລັກຊັບແຫ່ງເກົາຫຼີໃຕ້ ໃນອັດຕາສ່ວນ 51% ຕໍ່ 49% ຕາມລໍາດັບ ໂດຍທີ່ຕະຫຼາດຫຼັກຊັບແຫ່ງ ເກົາຫຼີໃຕ້ກໍໄດ້ຊ່ວຍເຫຼືອລາວທັງໃນດ້ານການພັດທະນາບຸກຄະ
ລາກອນ, ດ້ານເທັກນິກ ແລະການວາງລະບົບອໍານວຍຄວາມສະດວກຕ່າງໆ ທີ່ທັນສະໄໝ
ຢ່າງຄົບຊຸດ.