ທ່ານ ສອນສັກ ນໍຍານຊະນະ ຮອງຫົວໜ້າອົງການລົດໄຟແຫ່ງຊາດລາວ ໄດ້ໃຫ້ການ
ຍອມຮັບວ່າ ຈົນເຖິງເວລານີ້ກໍຍັງບໍ່ມີຄວາມຊັດເຈນວ່າ ການກໍ່ສ້າງທາງລົດໄຟຄວາມໄວ ສູງເພື່ອເຊື່ອມຕໍ່ລະຫວ່າງລາວກັບຈີນນັ້ນຈະສາມາດເລີ່ມລົງມືດໍາເນີນການໃນພາກປະຕິ ບັດຕົວຈິງໄດ້ເມື່ອໃດແທ້.
ທັງນີ້ ເຖິງແມ່ນວ່າການສຶກສາສໍາຫຼວດຄວາມເປັນໄປໄດ້ຂອງໂຄງການ ຈະດໍາເນີນການ
ສໍາເລັດຮຽບຮ້ອຍແລ້ວ ທັງໃນດ້ານການກໍານົດເສັ້ນທາງ, ການກໍານົດທີ່ຕັ້ງຂອງສະຖານີ ລົດໄຟການປ້ອງກັນຜົນກະທົບຕໍ່ສິ່ງແວດລ້ອມທໍາມະຊາດ ແລະສັງຄົມ, ການຍົກຍ້າຍປະ
ຊາຊົນອອກຈາກເຂດກໍ່ສ້າງ ແລະການຊົດເຊີຍຄ່າເສຍຫາຍຕ່າງໆ ໃຫ້ກັບປະຊາຊົນລາວ
ກໍຕາມ. ຫາກແຕ່ວ່າບັນຫາໃນເວລານີ້ກໍຄືທາງການຂອງທັງສອງຝ່າຍຍັງບໍ່ສາມາດຕົກລົງ
ເຮັດສັນຍາຮ່ວມທືນລະຫວ່າງກັນໄດ້. ໂດຍສະເພາະແມ່ນໃນສ່ວນທີ່ກ່ຽວກັບການແບ່ງປັນ ຜົນປະໂຫຍດລະຫວ່າງກັນນັ້ນ ຖືເປັນບັນຫາສໍາຄັນທີ່ທາງການຂອງທັງສອງຝ່າຍກໍາລັງ ເຈລະຈາກັນຢູ່ໃນເວລານີ້ ດັ່ງທີ່ທ່ານສອນໄຊໄດ້ໃຫ້ການຊີ້ແຈງວ່າ:
“ໂຄງການນີ້ຖືວ່າເປັນໂຄງ
ການທີ່ລັດຖະບານໄດ້ເຊັນ
ກັນເນາະ ຈະໄດ້ດໍາເນີນ
ການຕໍ່ ແຕ່ວ່າກໍອາດຈະ
ຊັກຊ້າໜ້ອຍນຶ່ງເນາະ
ເພາະວ່າເຮົາເຮັດຕາມຂັ້ນ
ຕອນເດ, ຕາມຂັ້ນຕອນ
ມັນກໍຕ້ອງໄດ້ເຈລະຈາເລື່ອງ
Agreement ນີ້ ໃຫ້ມັນ
ແລ້ວກ່ອນ ເພາະວຽກງານ
ອື່ນມັນຈຶ່ງຈະໄປ. ປັດຈຸບັນ
ນີ້ ພວກເຮົາກະຍັງກະກຽມ
ເລື່ອງສັນຍາໃຫຍ່ກໍຄື
Agreement ນີ້ຍັງລໍຖ້າ
ການກວດກາ ເພື່ອໃຫ້ມັນ
ສອດຄ່ອງກັນທັງສອງກໍ້າສອງຝ່າຍຫັ້ນໜາ ເພື່ອວ່າການເສຍປຽບກໍບໍ່ໃຫ້ມັນສູງ ໃຫ້ຕ່າງຝ່າຍຕ່າງກໍມີຜົນປະໂຫຍດ”
ຕາມແຜນການເດີມນັ້ນ ທາງການລາວແລະຈີນໄດ້ກໍານົດຮ່ວມກັນ ວາງສີລາເລີກ ເພື່ອ
ເລີ້ມລົງມືດຳເນີນການກໍ່ສ້າງໃນພາກຕົວຈິງ ໃນວັນທີ 25 ເດືອນເມສາທີ່ຜ່ານມາແລ້ວ
ແຕ່ກໍບໍ່ສາມາດປະຕິບັດໄດ້ຕາມແຜນການດັ່ງກ່າວ. ດ້ວຍເຫດນີ້ ຈຶ່ງເຮັດ ໃຫ້ມີກະແສ
ຂ່າວລືອອກມາຢ່າງໜາຫູວ່າ ທາງການລາວກັບຈີນໄດ້ຍົກເລີກໂຄງການດັ່ງກ່າວນີ້ແລ້ວ.
ແຕ່ຢ່າງໃດກໍຕາມ ໂດຍອີງຕາມ
ການຈັດຕັ້ງປະຕິບັດແຜນການ
ພັດທະນາ ປະຈໍາປີ 2010-
2011 ໃນໄລຍະ 6 ເດືອນທຳ
ອິດທີ່ຜ່ານມານັ້ນ ທາງການລາວ
ກໍໄດ້ລະບຸໃນລາຍງານວ່າ ການ
ຮ່ວມມືໃນການກໍ່ສ້າງທາງລົດໄຟ
ຄວາມໄວສູງລະຫວ່າງລາວກັບ
ຈີນຈະຍັງຄົງດໍາເນີນຕໍ່ໄປ ຊຶ່ງກໍ
ສອດຄ່ອງກັບການຖະແຫຼງຂອງ
ທ່ານສົມສະຫວາດ ເລັ່ງສະຫວັດ
ຮອງນາຍົກລັດຖະມົນຕີ, ຜູ້ປະຈໍາການຄະນະລັດຖະບານລາວ ກໍໄດ້ຢືນຢັນວ່າ ໂຄງການ
ເຊື່ອມຕໍ່ທາງລົດໄຟຄວາມໄວສູງລະຫວ່າງລາວກັບຈີນດັ່ງກ່າວນີ້ ຈະຍັງຄົງສືບຕໍ່ເນື່ອງຈາກ
ວ່າ ໂຄງການເຊື່ອມຕໍ່ທາງລົດໄຟຄວາມໄວສູງກັບຈີນດັ່ງກ່າວນີ້ ບໍ່ພຽງແຕ່ຈະເປັນການຕອບ
ສະໜອງຕໍ່ແຜນການພັດທະນາໃຫ້ລາວ ໄປເປັນສູນກາງຂອງການເຊື່ອມຕໍ່ທາງດ້ານຄົມມະ
ນາຄົມ-ຂົນສົ່ງໃນເຂດລຸ່ມແມ່ນໍ້າຂອງເທົ່ານັ້ນ ຫາກແຕ່ຍັງຈະເຮັດໃຫ້ລາວເປັນປະເທດທໍາອິດ
ໃນພູມີພາກເອເຊຍຕະເວັນອອກສຽງໃຕ້ ທີ່ມີລະບົບລົດໄຟຄວາມໄວສູງອີກດ້ວຍ.
ກ່ອນໜ້ານີ້ ທາງການລາວແລະຈີນ ໄດ້ຕົກລົງໃນບົດບັນທຶກຄວາມເຂົ້າໃຈຮ່ວມກັນວ່າ ຈະ
ຮ່ວມກັນຈັດຕັ້ງບໍລິສັດຮ່ວມທຶນຂຶ້ນມາ ເພື່ອຮັບຜິດຊອບໃນການກໍ່ສ້າງທາງລົດໄຟຄວາມໄວ
ສູງ ທີ່ເຊື່ອມຕໍ່ຈາກຈີນມາຍັງລາວໂດຍລັດຖະບານລາວ ແລະຈີນຈະຖືຫຸ້ນລົງທຶນໃນສັດສ່ວນ 30% ແລະ 70% ຕາມລໍາດັບ.
ການກໍ່ສ້າງທາງລົດໄຟສະເພາະໃນເຂດລາວ ທີ່ມີໄລຍະທາງຍາວເຖິງ 421 ກິໂລແມັດນັ້ນ ແລະຈະມີການກໍ່ສ້າງສະຖານີໃຫຍ່ 5 ແຫ່ງ ຄືຢູ່ດ່ານບໍ່ເຕັນ, ອຸດົມໄຊ, ຫຼວງພະບາງ, ວັງ
ວຽງ ແລະນະຄອນວຽງຈັນ. ນອກຈາກນັ້ນ ກໍ່ຈະມີສະຖານີນ້ອຍອີກ 16 ແຫ່ງ ທີ່ຢູ່ລະ
ຫວ່າງສະຖານີໃຫຍ່ທັງ 5 ແຫ່ງດັ່ງກ່າວ ພາຍໃຕ້ເປົ້າໝາຍຂະຫຍາຍການກໍ່ສ້າງໃຫ້ສໍາເລັດ
ຕະຫຼອດເສັ້ນທາງພາຍໃນປີ 2015 ດ້ວຍທຶນກໍ່ສ້າງລວມເຖິງ 7,000 ລ້ານໂດລາ ທີ່ຈະກູ້
ຢືມຈາກທະນາຄານພັດທະນາແຫ່ງຊາດຈີນເປັນສ່ວນໃຫຍ່.
