ລິ້ງ ສຳຫລັບເຂົ້າຫາ

ການລົງທຶນເພີ່ມຂຶ້ນຂອງຈີນ ຢູ່ໃນລາວ ຍັງຜົນໃຫ້ມີການ ຕັດໄມ້ທໍາລາຍປ່າ ຫລາຍຂຶ້ນ

  • ຊົງຣິດ ໂພນເງິນ

ການລົງທຶນເພີ່ມຂຶ້ນຂອງຈີນ ຢູ່ໃນລາວ ຍັງຜົນໃຫ້ມີການ ຕັດໄມ້ທໍາລາຍປ່າ ຫລາຍຂຶ້ນ

ເຈົ້າໜ້າ​ທີລາ​ວຢືນຢັນ​ວ່າ ການ​ລົງທຶນ​ຂອງ​ຈີນ​ທີ່​ເພີ່ມ​ຂຶ້ນນັບ​ມື້ ​ໂດຍ​ສະ​ເພາະ​ແມ່ນ​ຢູ່​ເຂດ​ແຂວງ​ພາກ​ເໜືອ​ນັ້ນ ​ໄດ້​ສົ່ງ​ຜົນ​ກະທົບ​ຕໍ່​ເນຶ່ອງ ​ເຮັດ​ໃຫ້​ມີ​ການ​ຕັດ​ໄມ້​ທໍາລາຍ​ປ່າ​ເພີ່ມ​ຫລາຍ​ຂື້ນ​ເຊັ່ນ​ກັນ ຊຶ່ງ​ກໍ​ໄດ້​ສົ່ງ​ຜົນ​ກະທົບ​ ຕໍ່ສະພາບ​ແວດ​ລ້ອມ​ທໍາ​ມະ​ຊາດ​​ແລະປະຊາຊົນລາ​ວ ຢ່າງ​ກວ້າງຂວາງ.

ທາງ​ການ​ກະຊວງ​ແຜນການ​ແລະ​ການ​ລົງທຶນ​ຂອງ​ລາວ​ໄດ້ ​ສະ​ເໜີ​ລາຍ​ງານ​ລ່າ​ສຸດ ​ເມື່ອ​ບໍ່​ດົນ​ມາ​ນີ້​ວ່າ ການ​ລົງທຶນ​ຂອງ​ ບັນດາ​ບໍລິສັດ​ຈາກ​ຈີນ​ໃນ​ລາວ​ໄດ້​ເພີ່ມ ຫລາຍ​ຂື້ນ​ຢ່າງ​ຕໍ່​ເນຶ່ອງ ​ໂດຍ​ສຳ​ລັບ​ໃນ​ໄລຍະ​ຫົກ​ເດືອນ​ທຳ​ອິດ ຂອງ​ປີ 2010 ນີ້ ກໍ​ປາກົດ​ວ່າການ​ລົງ​ທຶນຂອງ​ຈີນ​ໃນ​ລາວ​ໄດ້​ເພີ່ມ ຂຶ້ນອີກ​ເຖິງ 344 ລ້ານ​ໂດ​ລາ ຊຶ່ງ​ບໍ່​ພຽງ​ແຕ່​ຈະ​ຖື​ເປັນ​ມູນ​ຄ່າ​ການ​ລົງທຶນ​ທີ່​ສູງ​ກວ່າ​ໄທ​ ເກືອບ​ເຖິງ 100 ​ເທົ່າ​ຕົວ​ເທົ່າ​ນັ້ນ ຫາກ​ແຕ່​ຍັງ​ໄດ້​ເປັນ​ຜົນ ເຮັດ​ໃຫ້ມູນ​ຄ່າ​ການ​ລົງທຶນ​ສະ​ສົມ​ຂອງ​ຈີນ​ໃນ​ລາວ ​ແຊງ​ໜ້າ​ໄທ​ໄປ​ແລ້ວ​ອີກ​ດ້ວຍ. ທັງ​ນີ້​ໂດຍ​ນັບ​ຈາ​ກປີ 2000 ​ເປັນ​ຕົ້ນ ມາ​ຈົນ​ເຖິງ​ປັດຈຸບັນ​ນີ້ກໍ​ປາກົດ​ວ່າ​ຈີນ​ມີ​ມູນ​ຄ່າ​ການ​ລົງທຶນ​ສະ​ສົມ​ຢູ່​ໃນ​ລາວ​ແລ້ວຫລາຍ​ກວ່າ 2,900 ລ້ານ​ໂດ​ລາ ​ໃນ​ຂະນະ​ທີ່​ການ​ລົງທຶນ​ຂອງ​ໄທ​ທີ່​ເຄີຍ​ເປັນອັນ​ດັບ 1 ​ໃນ​ລາວ​ນັ້ນ ກໍ​ໄດ້​ຕົກລົງ​ມາ​ຢູ່​ອັນ​ດັບ​ທີ່ 2 ​ໂດຍ​ມີ​ມູນ​ຄ່າການ​ລົງທຶນ​ສະ​ສົມ​ຢູ່ 2,600 ລ້ານ​ໂດ​ລາ ​ແລະ​ອັນ​ດັບ​ທີ່ 3 ນັ້ນກໍ​ແມ່ນ​ການ​ລົງທຶນ​ຈາກ​ຫວຽດນາມ​ທີ່ມີ​ມູນ​ຄ່າ ການ​ລົງທຶນ​ສະ​ສົມ​ເກີນກວ່າ 2,200 ລ້ານ​ໂດ​ລາ​ແລ້​ວ​ໃນ​ປັດຈຸບັນ​ນີ້.

ຍິ່ງ​ໄປ​ກວ່າ​ນັ້ນ ຖ້າ​ຫາກ​ພິ​ຈາລະ​ນາ​ຈາກ​ໄລຍະ 6 ​ເດືອນ​ທຳ​ອິດ​ຂອງ​ປີ​ນີ້ ຊ່ຶງ​ປາກົດ​ວ່າມີ ​ການ​ລົງທຶນ​ຈາກ​ໄທໃນ​ລາວ​ເພີ່ມ​ຂຶ້ນພຽງ​ບໍ່​ເຖິງ 4 ລ້ານ​ໂດ​ລາ​ເທົ່າ​ນັ້ັນ ​ໃນ​ຂະນະ​ທີ່​ບໍລິສັດ​ຈາກ​ຈີນ​ກັບ​ຍັງ​ຄົງ​ພາກັນຫລັ່ງໄຫລ​ເຂົ້າ ​ໄປ​ລົງທຶນ​ໃນ​ລາວ​ເພີ່ມ​ຂຶ້ນຢ່າງ​ຕໍ່​ເນຶ່ອງດ້ວຍແລ້ວ ຈຶ່ງ​ເຮັດ​ໃຫ້​ເຊື່ອວ່າ ​ຈີນ​ຈະ​ສາມາດ​ຄອງ​ອັນ​ດັບ​ທີ່ 1 ຂອງ​ຕ່າງຊາດ ​ທີ່​ມີ​ມູນ​ຄ່າ​ການ​ລົງທຶນ​ໃນ​ລາວ​ຫລາຍ​ທີ່​ສຸດ ​ໄດ້​ຕໍ່​ໄປ​ອີກ​ຢ່າງ​ຍາວ​ນານ​ແນ່ນອນ.

ທາງ​ດ້ານ​ເຈົ້າໜ້າ​ທີ່​ກົມ​ປ່າ​ໄມ້ ກະຊວງ​ກະສິກໍາ-ປ່າ​ໄມ້​ລາວ ​ໄດ້​ໃຫ້ການ​ຍອມ​ຮັບ​ວ່າການ ​ລົງທຶນ​ຂອງ​ຈີນ​ໃນ​ລາວ​ທີ່ເພີ່ມ​ຂຶ້ນດັ່ງກ່າວ​ນີ້ ​ເຖິງ​ແມ່ນ​ວ່າ​ຈະເປັນ​ຜົນ​ດີ​ຕໍ່​ການ​ພັດທະນາ​ທາງ​ເສ​ດຖະກິດ​ໃນ​ລາວ​ກໍ​ຕາມ ຫາກ​ແຕ່​ວ່າ​ໃນຂະນະ​ດຽວ​ກັນ ກໍ​ໄດ້​ສົ່ງ​ຜົນ​ກະທົບ​ດ້ານ​ລົບ​ຕໍ່ ​ສະພາບ​ແວດ​ລ້ອມ​ທໍາ​ມະ​ຊາດ​ ແລະ​ສະພາບ​ຊີວິດ​ຄວາມ​ເປັນ​ຢູ່ຂອງປະຊາຊົນ​ລາວ​ຢ່າງ ​ກວ້າງ​ຂວາງດ້ວຍ.

ສວນປູກຕົ້ນຢູຄາລິບຕັສ ຢູ່ລາວ
ສວນປູກຕົ້ນຢູຄາລິບຕັສ ຢູ່ລາວ

ທັງ​ນີ້​ເນຶ່ອງຈາກ​ວ່າ ​ບັນ​ດາ​ບໍ​ລິສັດ​ຈາກ​ຈີນ​ທີ່​ລົງທຶນ​ໃນ​ລາວ ​ໂດຍສະ​ເພາະ​ແມ່ນ​ການ​ລົງທຶນ​ໃນ​ພາກ​ກະສິກໍາ​ ທີ່​ມີ​ການ​ເຊົ່າ​ທີ່​ດິນ​ເປັນ​ບໍລິ​ເວນ​ກວ້າງ​ເພື່ອ​ປູກ​ພືດ​ເສດຖະກິດ ​ເຊັ່ນ ຢາງ ພາລາ ​ໄມ້​ວິກ ຫລື​ຢູຄາ​ລິບ​ຕັສ ມັນ​ຕົ້ນ ອ້ອຍ ສາລີ ​ແລະ​ຖົ່ວ​ຕ່າງ​ໆ​ນັ້ນ ກໍ​ປາກົດວ່າ​ບັນດາ​ບໍ​ລິ​ສັດ​ຈາກ​ຈີນ​ເຫລົ່າ​ນີ້ ​ຕ່າງ​ກໍ​ໄດ້​ພາກັນ​ຕັດ​ໄມ້​ທໍາລາຍ​ປ່າ​ຢູ່​ໃນ​ລາວ​ ຢ່າງ​ກວ້າງ ຂວາງ​ດ້ວຍ ດັ່ງ​ທີ່​ເຈົ້າໜ້າ​ທີ່​ຂອງ​ແຂວງ​ພົງສາລີ ທີ່​ບໍ່​ປະສົງ ​ຈະ​ອອກ​ຊື່ ​ໄດ້​ໃຫ້ການ​ອະທິບາຍ​ເຖິງ​ສະພາບ​ການ​ທີ່​ເກີດ​ຂຶ້ນ​ໃນ​ແຂວງ​ພົງສາລີ​ວ່າ:

“​ແຂວງ​ພົງສາລີ​ນີ້ ກໍລະນີ​ທີ່​ປະຊາຊົນ​ໄດ້​ສະ​ເໜີ​ການ​ຮຽກຮ້ອງ​ມາ​ຫລາຍ​ ກວ່າ​ໝູ່​ນັ້ນ​ກໍ​ແມ່ນ​ບັນຫາ​ການ​ຕັດໄມ້ ​ເພາະວ່າ​ການ​ຕັດ​ໄມ້​ນີ້​ເຖິງ​ແມ່ນ​ວ່າ​ທີ່​ອອກ​ໜ້າ​ສ່ວນ​ຫລາຍ​ຈະ​ເປັນ​ບໍ​ລິ​ສັດ​ຂອງ​ຄົນ​ລາວ​ກໍ​ຕາມ​ ຫາກ​ແຕ່​ວ່າ​ຜູ້​ຕັດນັ້ນ​ ກໍ​ແມ່ນ​ຈີນ ບັດ​ນີ້​ເຂົາ​ຢາກ​ຕັດ​ບ່ອນໃດ​ເຂົາ​ກໍ​ຕັດ ຈຶ່ງ​ເຮັດ​ໃຫ້​ປະຊາຊົນ​ຢາກຮູ້​ເຫດຜົນ​ວ່າ​ຕັດ​ເພື່ອ​ຫຍັງ ຫລື ຕັດ​ພື່ອ​ຊໍາລະ​ຫຍັງ​ ຈຶ່ງ​ຕ້ອງ​ຕັດ​ຫລາຍ​ແທ້ ບ່ອນ​ທີ່​ບໍ່ຄວນ​ຕັດ​ກໍ​ຍັງ​ຕັດ ຮອດ​ດິນ​ແລ​ະປ່າ​ທີ່​ປະຊາຊົນ​ຄຸ້ມ​ຄອງ​ ກໍຍັງຕັດ”

ກ່ອນ​ໜ້າ​ນີ້ ອົງການ​ເຄືອ​ຂ່າຍ​ອະນຸລັກ​ຊັບພະຍາກອນ​ທໍ​າມະ​ຊາດ​ໃນ​ເຂດ​ລຸ່ມ​ແມ່​ນໍ້າຂອງ​ໄດ້ ​ລາຍງານ​ວ່າ ການລັກ​ລອບ​ຕັດ​ໄມ້​ໃນ​ລາວ​ໄດ້​ກາຍ​ເປັນ​ບັນຫາ​ໃຫຍ່​ຂຶ້ນນັບ​ມື້ ​ໂດຍ​ເຂດ​ທີ່​ມີ ​ການ​ລັກລອບ​ຕັດ​ໄມ້​ເພື່ອ​ການ​ຄ້າໄມ້​ເຖື່ອນ ​ຫລາຍ​ທີ່​ສຸດ​ໃນ​ລາວ​ນັ້ນ ​ກໍ​ແມ່ນ​ເຂດ​ຊາຍ​ແດນ​ ທີ່​ຕິດ​ຕໍ່​ກັບ​ຫວຽດນາມ ຈີນ ​ແລະ ​ໄທ ຊຶ່ງ​ປະມານ​ການ​ວ່າ ​ໄດ້​ມີ​ການ​ລັກລອບ​ຕັດ​ໄມ້​ແລະ​ຂົນ​ສົ່ງ​ໄມ້​ອອກ​ຈາກ​ລາວ​ ໄປ​ຍັງ 3 ປະ​ເທດ​ດັ່ງກ່າວ​ນີ້​ ໃນ​ປະລິມາ​ນຫລາຍ​ກວ່າ 200,000 ແມດ​ກ້ອນ ໃນ​ແຕ່ລະ​ປີ.

ທັງ​ນີ້​ໂດຍ​ຈາ​ການ​ສຳ​ຫລວດ​ສະພາບປ່າ​ໄມ້​ໃນ​ລາວ​ເມື່ອ​ປີ 1992 ກໍ​ພົບ​ວ່າ​ລາວ​ມີອັດຕາ​ ຄວາມ​ໜາ​ແໜ້ນ​ຂອງປ່າ​ໄມ້​ປົກ​ຫຸ້ມ​ຢູ່​ເຖິງ 47% ຂອງ​ພື້ນ​ທີ່​ທັງ​ໝົດ ຫາກ​ແຕ່​ວ່າ ​ອັດຕາ ​ຄວາມ​ໜາ​ແໜ້ນ​ຂອງ​ປ່າ​ໄມ້ ​ກໍ​ໄດ້​ລົດ​ລົງ​ສູ່​ລະດັບ 41% ​ໃນ​ປີ 2002 ​ແລະ​ໃນ​ປັດຈຸບັນ​ນີ້​ກໍ​ເຊື່ອ​ວ່າ​ ປ່າ​ໄມ້​ໃນ​ລາວ​ຍັງ​ຄົງ​ເຫລືອ​ຢູ່​ພຽງ​ແຕ່​ ບໍ່​ເກີນ 35% ຂອງພື້ນ​ທີ​ທັງ​ໝົດເທົ່າ​ນັ້ນ.

ແຕ່​ຢ່າງ​ໃດ​ກໍ​ຕາມ ດ້ວຍ​ການ​ສົ່ງ​ເສີມ​ໃຫ້​ພາກ​ເອ​ກກະ​ຊົນ​ດໍາ​ເນີນ​ໂຄງການ​ລົງທຶນ​ເພື່​ອການ ​ປູກ​ຕົ້ນ​ໄມ້​ສໍາລັບ​ອຸດສາ​ຫະກໍາ​ແປ​ຮູບ​ຢ່າງ​ຕັ້ງໜ້າ​ນັ້ນ ກໍເຮັດ​ໃຫ້​ທາງ​ການ​ລາວ​ເຊື່ອໝັ້ນ​ວ່າ ​ຈ​ະ​ເຮັດ​ໃຫ້​ປ່າ​ໄມ້​ລາວ​ມີ​ຄວາມ​ໜາ​ແໜ້ນ ​ເພີ່ມ​ຂຶ້ນ​ເປັນ 70% ຂອງ​ພື້ນ​ທີ່​ທັງ​ໝົດ​ຂອງ​ປະ​ເທດໄດ້​ພາຍ​ໃນ​ປີ 2020.

XS
SM
MD
LG