ຄະນະກຳມາທິການຮ່ວມລະຫວ່າງລາວ-ໄທ ຕົກລົງເສີມຂະ
ຫຍາຍການຮ່ວມມືໃນ 4 ໂຄງການທີ່ແນໃສ່ການພັດທະນາ
ເສດຖະກິດ ທັງໃນດ້ານການຄ້າ ການເຊື່ອມຕໍ່ການຄົມມະ
ນາຄົມ-ຂົນສົ່ງ ແລະຕະຫລາດເງິນທຶນ.
ທ່ານເສກ ວັນນະເມທີ ອະທິບໍດີກົມສາລະນິເທດກະຊວງການຕ່າງປະເທດຂອງໄທ
ຖະແຫລງຢືນຢັນວ່າ ກອງປະຊຸມຄະນະກຳມາທິການຮ່ວມ ວ່າດ້ວຍຄວາມຮ່ວມມືລະ
ຫວ່າງລາວ-ໄທຄັ້ງທີ 19 ທີ່ມີຂຶ້ນຢ່າງເປັນທາງການໃນທ້າຍເດືອນມັງກອນນີ້ ຢູ່ນະຄອນ
ຫລວງວຽງຈັນ ໂດຍມີທ່ານທອງລຸນ ສີສຸລິດ ກັບທ່ານພົນເອກ ທະນະສັກ ປະຕິມາປະກອນ ຮອງນາຍົກລັດຖະມົນຕີ ແລະລັດຖະມົນຕີວ່າການຕ່າງປະເທດຂອງທັງ 2 ຝ່າຍເປັນປະທານຮ່ວມກັນນັ້ນ ໄດ້ໃຫ້ຄວາມສຳຄັນ ທີ່ຈະເສີມຂະຫຍາຍ ຄວາມຮ່ວມມືລະຫວ່າງກັນໃນ 4 ໂຄງການທີ່ສຳຄັນດ້ວຍກັນ.
ໂດຍສຳຫລັບໂຄງການທຳອິດ ກໍຄືການພັດທະນາພື້ນທີ່ຊາຍແດນ ແລະເຂດເສດຖະກິດ
ພິເສດຊາຍແດນ ທີ່ຕິດຕໍ່ລະຫວ່າງສອງປະເທດ ຕິດຕາມດ້ວຍການພັດທະນາໂຄງຂ່າຍ
ການຄົມມະນາຄົມ-ຂົນສົ່ງທີ່ເຊື່ອມໂຍງ ໃນພູມິພາກ ຊຶ່ງລວມເຖິງເສັ້ນທາງລົດໄຟ ທີ່
ເຊື່ອມຕໍ່ລະຫວ່າງຈີນ ລາວ ແລະ ໄທ ດ້ວຍສ່ວນໂຄງການທີ 3 ກໍແມ່ນການຮ່ວມມືໃນ
ດ້ານແຮງງານ ທີ່ຈະມີການຈັດທຳບັດ Smart Card ໃຫ້ກັບແຮງງານລາວທຸກຄົນ ທີ່ຜ່ານ
ການພິສູດສັນຊາດໃນໄທແລ້ວນັ້ນ ແລະການພັດທະນາຕະຫລາດຫລັກຊັບໃນລາວ ທີ່
ລວມເຖິງການລະດົມທຶນຂອງລາວ ໃນຕະຫລາດທຶນໄທອີກດ້ວຍ.
ຊຶ່ງກ່ອນໜ້ານີ້ ກະຊວງການເງິນລາວ ກໍໄດ້ອະນຸມັດແຜນການລະດົມເງິນທຶນ ຂອງ
ບໍລິສັດຜະລິດກະແສໄຟຟ້າລາວ (ມະຫາຊົນ) ຫຼື EDL-GEN ຢ່າງເປັນທາງການແລ້ວ
ແລະ ກໍເຮັດວໃຫ້ EDL-GEN ສາມາດທີ່ຈະອອກພັນທະບັດ ເພື່ອລະດົມທຶນຈາກຕະ
ຫລາດທຶນໃນໄທ ແລະອາຊ່ຽນໄດ້ຕາມກົດໝາຍ.
ໂດຍພາຍໃຕ້ແຜນການດັ່ງກ່າວນີ້ EDL-GEN ໄດ້ວາງເປົ້າໝາຍ
ທີ່ຈະລະດົມເງິນທຶນໃຫ້ໄດ້ໃນມູນຄ່າລວມບໍ່ນ້ອຍກວ່າ 1,000
ລ້ານດອນລາ ເພື່ອຈະໄດ້ນຳມາໃນໂຄງການພັດທະນາ ແຫລ່ງ
ພະລັງງານໄຟຟ້າ ໃນລາວ ທີ່ຢູ່ໃນການຄຸ້ມຄອງຂອງ EDL-GEN
ໃຫ້ເພີ້ມຂຶ້ນຈາກ 881 ເມກາວັດ ໃນປັດຈຸບັນ ເປັນບໍ່ນ້ອຍກວ່າ
2,272 ເມກາວັດ ພາຍໃນປີ 2020.
ໂດຍສາເຫດສຳຄັນທີ່ຈະເຮັດໃຫ້ EDL-GEN ໄດ້ຮັບການ
ອະນຸມັດດັ່ງກ່າວນີ້ ກໍເພາະວ່າ EDL-GEN ເປັນບໍລິສັດຫລັກ
ຊັບແຫ່ງຊາດລາວ ທີ່ມີຜົນປະກອບການເປັນທີ່ໜ້າເຊື່ອຖື ໃນສາຍຕາຂອງນັກລົງທຶນຊາວຕ່າງຊາດ ກໍຄືມີທຶນຈົດທະບຽນເຖິງ 4,900 ຕື້ກີບ ຫຼືເກີນກວ່າ 612 ລ້ານດອນລາ ແລະໃນນີ້ກໍເປັນການຖືຫຸ້ນ ໂດຍລັດວິສາຫະກິດໄຟຟ້າລາວ (EDL) ເຖິງ 75 ເປີເຊັນ.
ໃນປັດຈຸບັນນີ້ມີ 3 ບໍລິສັດທີ່ຈົດທະບຽນ ໃນຕະຫລາດຫລັກຊັບຂອງລາວກໍຄື EDL-GEN ທະນາຄານການຄ້າຕ່າງປະເທດ (ມະຫາຊົນ) ຫຼື BCEL ແລະບໍລິສັດ Lao World ຈຳກັດ (ມະຫາຊົນ) ຊຶ່ງໃນລະຍະຕະຫລອດປີ 2014 ທີ່ຜ່ານມາ ນັ້ນ ຫຸ້ນຂອງ EDL-GEN ມີລາຄາຊື້-ຂາຍສະເລ່ຍ 7,400 ກີບ ຕໍ່ຫຸ້ນສ່ວນ ຫຸ້ນຂອງ BCEL ແລະບໍລິສັດ Lao World ມີລາຄາສະເລ່ຍ 7,400 ກີບກັບ 8,000 ກີບຕໍ່ຫຸ້ນຕາມລຳດັບ.
ນອກຈາກນີ້ ຕະຫລາດຫລັກຊັບແຫ່ງຊາດລາວ ຍັງມີແຜນການທີ່ຈະຈົດທະບຽນບໍລິສັດເພີ້ມຂຶ້ນອີກໃນມໍ່ໆນີ້ ໂດຍມີເງື່ອນໄຂວ່າບໍລິສັດທີ່ຈະຈົດທະບຽນນັ້ນ ຈະຕ້ອງມີການພັດທະນາລະບົບບັນຊີ ແລະມີລະບົບການບໍລິຫານງານທີ່ໄດ້ມາດຕະຖານສາກົນດັ່ງທີ່ ທ່ານສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ຜູ້ຊີ້ນຳຂົງເຂດເສດຖະກິດການຜະລິດ ແລະການຈະລາຈອນ ໃນຖານະປະທານຄະນະກຳມະການ ຄຸ້ມຄອງຕະຫລາດຫລັກຊັບ ແຫງຊາດລາວ ກໍໄດ້ໃຫ້ການຢືນຢັນກັບ ວີໂອເອວ່າ:
“ແຕ່ວ່າຄັນຖ້າພວກເຂົາບໍ່ກຽມພ້ອມໄດ້ຕາມອັນນີ້ນິ ຂ້ອຍກະບໍ່ຮັບ ຍົກຕົວຢ່າງ
ບໍລິສັດອັນນີ້ ທີ່ເຈົ້າມານີ້ ຄັນເຈົ້າມີໜີ້ສິນມະຫາສານແລ້ວ ຍັງຈະເອົາເຂົ້າມາ
ແມ່ນໃຜຈະມາຊື້ກັບເຈົ້າ ຫຼືວ່າ ຢູ່ໃນບໍລິສັດ ໂຄງສ້າງການຈັດຕັ້ງຂອງເຈົ້າ ກໍບໍ່ດີ
ຜູອຳນວຍການນີ້ເດ ເຂົາສົງໄສວ່າ ໝໍນີ້ມີປາກົດການສໍ້ໂກງ ແລ້ວຄົນທັງຫຼາຍ
ເຂົາກໍຮູ້ກັນເດ້ເນາະ ອັນນີ້ໄດ້ເວົ້າກັນລະອຽດສົມຄວນ.”
ໂດຍກ່ອນໜ້ານີ້ ຄະນະກຳມະການຄຸ້ມຄອງຕະຫລາດຫລັກຊັບ ແຫ່ງຊາດລາວ ກໍໄດ້
ກວດສອບບໍລິສັດຈຳນວນ 1,087 ລາຍ ຊຶ່ງພົບວ່າ ມີ 38 ບໍລິສັດ ທີ່ສາມາດຈະຈົດ
ທະບຽນໃນຕະຫລາດຫລັກຊັບໄດ້ ແຕ່ວ່າກໍມີພຽງ 20 ບໍລິສັດເທົ່ານັ້ນ ທີ່ໄດ້ສະແດງ
ເຈດຈຳນົງ ຈະຂໍຈົດ ທະບຽນ ໃນຕະຫລາດຫລັກຊັບ ໂດຍໃນນີ້ລວມເຖິງວິສາຫະກິດ ໂທລະຄົມມະນາຄົມລາວ (EDL) ບໍລິສັດລາວໂທລະຄົມມະນາຄົມ (Lao Telecom)
ກຸ່ມບໍລິສັດດາວເຮືອງ ການບິນລາວ (Lao Airlines) ທະນາຄານພົງສະຫວັນ ແລະ
ບໍລິສັດຄ້ານ້ຳມັນເຊື້ອໄຟ ເປັນຕົ້ນ.
