ລິ້ງ ສຳຫລັບເຂົ້າຫາ

logo-print

ໜີ້​ສິນ​ ລັດ​ຖະ​ບານ ສ​ປ​ປ ລາວ ຄິດ​ເປັນ 63.5 ເປີ​ເຊັນ ຂອງ ຍອດ​ຜະ​ລິດ​ຕະ​ພັນ ລວມ​ພາຍ​ໃນ


ກອງ​ທຶ​ນ​ທະ​ນາ​ຄານ​ເອ​ເຊຍ.

ໜີ້​ສິນ​ຂອງ​ລັດ​ຖະ​ບານ​ລາວ​ຄິດ​ເປັນ 65.3 ເປີ​ເຊັນ ຂອງຍອດ​ຜະ​ລິດ​ຕະ​ພັນ​ລວມພາຍ
​ໃນ (GDP) ໃນ​ປີ 2018 ທັງ​ຍັງຄາດ​ວ່າ​ຈະ​ເພີ້ມ​ຂຶ້ນອີກໃນ​ປີ 2019 ເພາະ​ລັດ​ຖະ​ບານ
​ລາວ​ຍັງ​ຕ້ອງ​ກູ້​ຢືມ​ເງິນ​ມາ​ດຸ່ນດ່ຽງ​ງົບ​ປະ​ມ​ານ​ລາຍ​ຈ່າຍ.

ຜູ້​ຊ່ຽວ​ຊານ​ທາງ​ດ້ານ​ການ​ເງິນ​ຂອງ​ທະ​ນາ​ຄານ​ໂລກ​ປະ​ຈຳ ສ​ປ​ປ ລາວ ເປີ​ດ​ເຜີຍ​ວ່າ
ລັດ​ຖະ​ບານ​ລາວ​ຍັງ​ຕ້ອງພະ​ເຊີນ​ກັບ​ສະ​ພາ​ວະ​ການ​ເປັນ​ໜີ້​ພາກ​ລັດ​ເພີ້ມ​ຂຶ້ນຢ່າງ​ຕໍ່​
ເນື່ອງ ທັງ​ນີ້​ໂດຍ​ມີ​ສາ​ເຫດ​ມາ​ຈາກ​ການ​ກູ້​ຢື​ມ​ເງິນ ທັງ​ພາຍ​ໃນ ແລະ​ຈາກ​ຕ່າງ​ປະ​ເທດ
ເພື່ອ​ນຳ​ມາ​ໃຊ້​ສຳ​ລັບການ​ດຸນ​ດ່ຽງ​ທາງ​ດ້ານ​ງົບ​ປະ​ມານ​ລາຍ​ຈ່າຍ​ທີ່​ສູງກວ່າ​ລາຍ​ຮັບ
​ຂອງ​ລັດ​ຖະ​ບານ​ລາວ​ໃນ​ແຕ່​ລະ​ປີ ໂດຍ​ສະ​ເພາະ​ແມ່ນ​ປີ 2016 ນັ້ນ ຖື​ເປັນ​ປີ​ທຳ​ອິດ
​ທີ່​ໜີ້​ສິນ​ຂອງ​ລັດ​ຖະ​ບານ​ລາວ ມີ​ມູນ​ຄ່າ​ລວມ​ເກີນກວ່າ 60 ເປີ​ເຊັນ ຂອງຍອດ​ພະ
​ລິດ​ຕະ​ພັນ​ລວມ (GDP) ແລະ​ຄາດ​ວ່າ​ຈະ​ເພີ້ມ​ຂຶ້ນ​ເປັນ 65.3 ເ​ປີ​ເຊັນ ຂອງ GDP
ໃນ​ປີ 2018 ແລະ​ເກີນ​ກວ່າ 66 ເປີ​ເຊັນ ຂອງ GDP ໃນ​ປີ 2019 ອີກ​ດ້ວຍ.

ຜູ້​ຊ່ຽວ​ຊານ​ຂອງ​ທະ​ນາ​ຄານ​ໂລກລະ​ບຸ​ວ່າ​ການ​ກູ້​ຢືມ​ເງິນ​ຈາກ​ຕ່າງ​ປະ​ເທດ ນັບ​ເປັນ
​ສາ​ເຫດ​ສຳ​ຄັນ​ທີ່​ເຮັດ​ໃຫ້​ໜີ້​ສິນ​ຂອງ​ລັດ​ຖະ​ບານ​ລາວ​ເພີ້ມ​ຂຶ້ນ​ຢ່າງ​ໄວ​ວາ ໂດຍ​ໃນ​ປີ
2016 ລັດ​ຖະ​ບານ​ລາວ​ມີ​ໜີ້​ຕ່າງ​ປະ​ເທດ ແລະ​ໜີ້​ພາຍ​ໃນຄິດ​ເປັນ​ມູນ​ຄ່າ​ລວມ​ເຖິງ
9,550 ລ້ານ​ໂດ​ລາ​ສະ​ຫະ​ລັດ ແລະ​ເພີ້ມ​ຂຶ້ນ​ເປັນ 10,530 ລ້ານ​ໂດ​ລາ​ສະ​ຫະ​ລັດ
ໃນ​ປີ 2017 ສ່ວນປີ 2018 ກໍ​ຄາດ​ວ່າ​ລັດ​ຖະ​ບານ​ລາວ​ຈະ​ມີ​ໜີ້​ສິນເພີ້ມຂຶ້ນ​ເປັນ​ຫຼາຍ
ກວ່າ 12,104 ລ້ານ​ໂດ​ລາ​ສະ​ຫະ​ລັດ ທັງ​ຍັງ​ຄາດ​ໝາຍ​ວ່າ​ຈະ​ເພີ້ມ​ເປັນ 13,491
ລ້ານ​ໂດ​ລາ​ສະ​ຫະ​ລັດ​ໃນ​ປີ 2019 ຕ​າມ​ລຳ​ດັບ.

ແຕ່​ຢ່າງ​ໃດ​ກໍ​ຕາມ ລັດ​ຖະ​ບານ​ລາວ​ກໍ​ໄດ້​ວາງ​ແຜນການ​ທີ່​ຈະ​ຄວ​ບຄຸມສະ​ພາ​ວະ
​ການ​ເປັນ​ໜີ້​ດັ່ງ​ກ່າວ​ດ້ວຍ​ການ​ຈັດ​ຕັ້ງ​ປະ​ຕິ​ບັດ​ຕາມ​ມະ​ຕິ​ຕົກ​ລົງ​ຂອງ​ສະ​ພາ​ແຫ່ງ
​ຊາດ​ລາວ​ຢ່າງ​ເຄັ່ງ​ຄັດ ກໍ​ຄື​ການ​ຈຳ​ກັດ​ການ​ກູ້​ຢືມ​ຈາກ​ຕ່າງ​ປະ​ເທດ​ໃຫ້​ຢູ່​ໃນ​ມູນ​ຄ່າ
​ບໍ່​ເກີນ 400 ລ້ານ​ໂດ​ລາສະ​ຫະ​ລັດ​ຕໍ່​ປີ ດັ່ງ​ທີ່​ທ່ານ​ສົມ​ດີ ດວງ​ດີ ຮອງ​ນາ​ຍົກ​ລັດ​ຖະ​
ມົນ​ຕີ ແລະ​ລັດ​ຖະ​ມົນ​ຕີ​ວ່າ​ການ​ກະ​ຊວງ​ການ​ເງິນ ໄດ້​ໃຫ້​ການ​ຢືນ​ຢັນ​ວ່າ:

“ສຳ​ລັບ​ການ​ກູ່​ຢືມ​ແຕ່​ລະ​ປີ​ນີ້ຢູ່​ໃນ​ກອບ​ເພ​ດານ​ທີ່​ທາງແຫ່ງ​ຊາດ​ໄດ້​ອະ​ນຸ​ມັດ​ໃຫ້​ກູ້
​ຢືມ​ ຄັນ​ສິເວົ້າ​ກະ​ປີ​ນຶ່ງ​ໃນ​ລະ​ດັບ​ທຸກ​ມື້​ນີ້​ກະ​ບໍ່​ເກີນ 400 ລ້ານ​ໂດ​ລາ​ ອັນ​ນີ້​ແມ່ນ​ເງິນ
​ກູ້​ຢືມ​ເພື່ອ​ມາ​ພັດ​ທະ​ນາ​ໂຄງລ່າງ​ອື່ນ​ໆ​ໃຫ້​ແກ່​ລັດ ຍັງ​ບໍ່​ໄລ່​ວ່າ​ເງິນ​ກູ້​ຢືມ​ສຳ​ລັບ​ໂຄງ
​ການ​ທີ່​ມີ​ປະ​ສິດ​ທິ​ຜົນ​ທາງ​ດ້ານ​ເສດ​ຖະ​ກິດຕ່າງ​ຫາກ​ເພື່ອ​ເຮັດ​ແນວ​ໃດ​ບໍ່​ໃຫ້​ໜີ້​ສິນ​
ຕ່າງ​ປະ​ເທດ​ເຮົາ​ເພີ້ມ​ສູງຂຶ້ນ​ ສຳ​ລັບ​ໜີ້​ລົງ​ທຶນ​ຂອງ​ລັດ​ນີ້​ກະ​ແມ່ນ​ທາງ​ກະ​ຊວງ​ແຜນ​
ການ ການ​ລົງ​ທຶນ​ນັ້ນ​ເປັນ​ຜູ້​ຈັດ​ຕັ້ງ​ປະ​ຕິ​ບັດ​ກວດ​ກາ."

ໂດຍ​ອີງ​ຕາມ​ສະ​ຖິ​ຕິ​ຂອງ​ທະ​ນາ​ຄານ​ແຫ່ງ ສ​ປ​ປ ລາວ ລະ​ບຸ​ວ່າ ສະ​ເພາະ​ໜີ້​ຕ່າງ​ປະ
​ເທດ​ຂອງ​ລັດ​ຖະ​ບານ​ລາວ​ໄດ້​ເພີ້ມ​ຂຶ້ນ​ຢ່າງ​ຕໍ່​ເນື່ອງ​ໃນ​ໄລ​ຍະ 10 ກວ່າ​ປີ​ມາ​ນີ້ ຄື​ເພີ້ມ​
ຂຶ້ນ​ຈາກ 2,470 ກວ່າ​ລ້​ານໂດ​ລາ​ສະ​ຫະ​ລັດ ໃນປີ​ 2006 ເປັນ​ຫຼາຍກວ່າ 5,627 ລ້ານ​
ໂ​ດ​ລາ​ສະ​ຫະ​ລັດ​ ໃນ​ປີ 2015 ແລ້​ວກໍ​ເພີ້ມຂຶ້ນ​ເປັນ 6,900 ກວ່າ​ລ້ານໂດ​ລາ​ສະ​ຫະ
​ລັດ ແລະ 8,000 ກວ່າ​ລ້ານໂດ​ລາ​ສະ​ຫະ​ລັດ​ໃນ​ປີ 2016 ແລະ​ປີ 2017 ຕາມ​ລຳ​ດັບ
ສ່ວນ​ໃນ​ປີ 2018 ນີ້ ກໍ​ຄາດ​ວ່າ​ໜີ້​ຕ່າງ​ປະ​ເທດ​ຂອງ​ລັດ​ຖະ​ບານ​ລາວ​ຈະ​ເພີ້ມ​ຂຶ້ນ​ເປັນ​
ຫຼາຍກວ່າ 9,000 ລ້ານ​ໂດ​ລາ​ສະ​ຫະ​ລັດ​ຢ່າງ​ແນ່ນອນ.

ທັງ​ນີ້​ເນື່ອງ​ຈາກວ່າ​ລັດ​ຖະ​ບານ​ລາວ​ຈະ​ບໍ່​ສາ​ມາດ​ຈຳ​ກັດ​ການ​ກູ້​ຢືມ​ຈາກ​ຕ່າງ​ປ​ະ​ເທດ
​ໃຫ້​ຢູ່​ໃນ​ມູນ​ຄ່າ​ລວມ​ບໍ່​ເກີນ 400 ລ້​ານ​ໂດ​ລາສະ​ຫະ​ລັດ​ໃນ​ແຕ່​ລະ​ປີ​ໄດ້​ຢ່າງ​ແທ້​ຈິງ
ເພາະ​ລັດ​ຖະ​ບານ​ລາວ​ໄດ້​ວາງ​ຄາດ​ໝາຍ​ການ​ຂະ​ຫຍາຍ​ຕົວ​ທາງ​ເສດ​ຖະ​ກິດ​ໄວ້​ທີ່
​ອັດ​ຕາ​ສະ​ເລ່ຍ 7 ເປີ​ເຊັນ ຕໍ່​ປີ​ໃນ​ຊ່ວງ​ປີ 2016 ເພື່ອ​ຈະ​ເຮັດ​ໃຫ້​ມູນ​ຄ່າ GDP ​ສະ​
ເລ່ຍ​ເປັນ​ລາຍ​ໄດ້​ຂອງ​ປະ​ຊາ​ຊົນ​ລາວ​ທີ່​ລະ​ດັບ 24.8 ລ້ານ​ກີບ ຫຼື 3,100 ລ້ານ​ໂດ​
ລາ​ສະ​ຫະ​ລັດ​ຕໍ່​ຄົນ​ໃນ​ປີ 2020 ນັ້ນ ​ຕ້ອງ​ເຮັດ​ໃຫ້​ມີ​ກາ​ນ​ກູ້​ຢືມ​ຈາກ​ຕ່າງ​ປະ​ເທດ​ໃນ​
ລະ​ດັບ​ທີ່​ສູງກວ່າ 400 ລ້ານ​ໂດ​ລາ​ສະ​ຫະ​ລັດ​ເຖິງ3-4 ເທົ່າ​ໃນ​ແຕ່​ລະ​ປີ​ນັ້ນ​ເອງ.

ຫາກ​ແຕ່​ວ່າ​ການ​ທີ່​ຈະ​ສາ​ມາດ​ບັນ​ລຸ​ເປົ້າ​ໝາຍ​ດັ່ງ​ກ່າວ​ໄດ້​ນັ້ນ​ ບໍ່​ແມ່ນ​ເລື້ອງ​ງ່າຍ
ເພາະ​ວ່າ​ລັດ​ຖະ​ບານ​ລາວ​ຈະ​ຕ້ອງ​ຊຸກ​ຍູ້​ພາກກະ​ສິ​ກຳ​ປ່າ​ໄມ້​ໃ​ຫ້​ຂະ​ຫຍາຍ​ໂຕ​ເພີ້ມ
​ຂຶ້ນ​ໃນ​ອັດ​ຕາສະ​ເລ່ຍ​ບໍ່​ຕ່ຳ​ກວ່າ 3.2 ເປີ​ເຊັນຕໍ່​ປີ ສ່ວນພາກ​ອຸດ​ສາ​ຫະ​ກຳ ແລະ​ພາກ
ບໍ​ລິ​ການ​ຈະ​ຕ້ອງ​ຂະ​ຫຍາຍ​ໂຕ​ເພີ້ມ​ຂຶ້ນ 9.3 ເປີ​ເຊັນ ແລະ 8.9 ເປີ​ເຊັນ ຕໍ່​ປີ​ຕ​າມ​ລຳ
ດັບ ຊຶ່ງ​ເຮັດ​ໃຫ້​ຈະ​ຕ້ອງ​ລະ​ດົມ​ເງິນ​ທຶນ​ທີ່​ຈະ​ນຳ​ໃຊ້​ໃນ​ໂຄງ​ກາ​ນ​ພັດ​ທະ​ນາ​ຕ່າງໆ​ໃນ​
ມູນ​ຄ່າ​ລວມ​ເຖິງ 27,000 ລ້ານ​ໂດ​ລາ​ສະ​ຫະ​ລັດ ໃນ​ຊ່ວງ​ປີ 2016-2020 ດັ່ງ​ກ່າວ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

ທ່ານອາດຈະມັກເລື້ອງນີ້ຄືກັນ

XS
SM
MD
LG