ປະຊາຊນລາວພາກັນລັກລອບປູກຝິ່ນເພີ້ມຂຶ້ນຫລາຍກວ່າ 29% ຍ້ອນວ່າພວກເຂາເຈ້າກຳລັງປະເຊີນກັບບັນຫາຄວາມທຸກຍາກທີ່ຮ້າຍແຮງຫລາຍຂຶ້ນ. ໂດຍທີ່ທາງການລາວ ບໍ່ໄດ້ໃຫ້ການຊ່ວຍເຫລືອແຕ່ຍ່າງໃດ.
ເຈົ້າໜ້າທີ່ປະສານງານຕ່າງປະເທດດ້ານການປາບປາມການຄ້າຢາເສບຕິດຂອງລາວ ເປີດເຜີຍວ່າ ການລັກລອບປູກຝິ່ນຂອງປະຊາຊນລາວຍູ່ໃນເຂດແຂວງພາກເໜືອມີແນວໂນ້ມທີ່ຈະເພີ້ມຂຶ້ນ ໃນປີ 2024. ໂດຍຄາດວ່າ ໄດ້ມີການລັກລອບປູກຝິ່ນ ໃນລາວ ໄປແລ້ວ ໃນເນື້ອທີ່ 6,000 ກວ່າເຮັກຕາແລະ ຄາດຫມາຍວ່າຍັງຈະເພີ່ມຂຶ້ນເປັນກວ້າງ ກວ່າ 8,800 ເຮັກຕາພາຍໃນ 2 ເດືອນຂ້າງໜ້ານີ້ ເຊິງຈະເຮັດໃຫ້ການຜະລິດຝິ່ນດິບໃນລາວມີນໍ້າໜັກລວມເກິນກວ່າ 80 ໂຕນ ຫຼື ເພີ່ມຂຶ້ນຫຼາຍກວ່າ 29% ເມື່ອທຽບໃສ່ປີ 2023. ໂດຍມີສາເຫດມາຈາກບັນຫາຄວາມທຸກຍາກຂອງປະຊາຊົນ ທີ່ໜັກໜ່ວງເພີ່ມຂຶ້ນນັບມື້ ໂດຍທີ່ທາງການລາວບໍ່ໄດ້ໃຫ້ການຊ່ວຍເຫລືອແຕ່ຍ່າງໃດ. ຈືງມີພຽງແຕ່ການຊ່ວຍເຫຼືອຈາກລັດຖະບານຈີນທີ່ເປັນສ່ວນໃຫຍ່ໃຫ້ທຶນແກ່ການປາບປາມເປັນດ້ານຫລັກ ດັງທີ່ຜູ້ປະສານງານຕ່າງປະເທດຂອງລາວ ໄດ້ຢືນຢັນວ່າ:
“ພື້ນທີ່ລັກສະນະກ້ວາງຂວາງ ແລ້ວກະປະຊາຊົນດຳລງຊີວິດແບບກະແຈກກະຈາຍມັນບໍ່ໄດ້ຢູ່ໃກ້ຕັວເມືອງ ພາກສ່ວນທີ່ຜະລິດຝິ່ນນີ້ຫນະ. ອັນທີສອງມາຫລະແມ່ນເຮາຊອກຫາຍາກ. ພື້ນທີ່ມັນກວ້າງເນ້າະ ໄທເຮາຍ່າງໄປເດ້. ມັນກາຍບ່ອນທີ່ປູກຝິ່ນ. ອັນທີສາມມາລ່ະແມ່ນປະຊາຊົນກະຢູ່ເຂດຫ່າງໄກສອກຫຼີກ ມັນບໍ່ທັນເຂົ້າໃຈລະບຽບກົດໝາຍ. ແລ້ວກະຜົນຮ້າຍຂອງຢາເສບຕິດ. ແລ້ວກະລັດຖະບານຈີນກັບລັດຖະບານລາວ ກໍໄດ້ຮ່ວມມືກັນຕໍ່ຕ້ານ. ສະກັດກັ້ນການລັກລອບປູກຝິ່ນ ສະກັດກັ້ນການຂົນ ສົ່ງສິ່ງເສບຕິດ ໃນໄລຍະຜ່ານມາ ກະສາມາດມ້າງລາຍຄະດີໄດ້ຫຼາຍລາຍ.”
ທັ້ງນີ້ ການພົວພັນແລກປ່ຽນຂໍ້ມູນ-ຂ່າວສານ ດ້ານຢາເສບຕິດ ລະຫວ່າງ ລາວ-ຈີນ-ມຽນມາແລະໄທ ໃນໄລຍະ 2 ປີຜ່ານມາ ໄດ້ເຮັດໃຫ້ທາງການລາວ ສາມາດສະກັດກັ້ນ ແລະ ປາບປາມການລັກລອບຄ້າຂາຍຢາເສບຕິດ ໃນເຂດຊາຍແດນລາວ-ຈີນ-ມຽນມາ-ໄທ ໄດ້ເພີ່ມຂຶ້ນ ຊື່ງເຫັນໄດ້ຈາກວ່າການທີ່ຕໍາຫຼວດລາວສາມາດຈັບຜູ້ຄ້າຢາເສບຕິດໄດ້ 17,900 ກວ່າຄົນ ໃນນັ້ນ, ຫຼາຍກວ່າ 55% ເປັນຜູ້ຕ້ອງຫາທີ່ມີອາຍຸລະຫວ່າງ 18-25 ປີ ທີ່ພົວພັນກັບການຄ້າຢາເສບຕິດ ທັ້ງຍັງມີສ່ວນກ່ຽວຂ້ອງກັບອາດຊະຍາກຳທີ່ພັວພັນກັບນັກຄ້າຢາເສບຕິດຊາວຕ່າງຊາດກວ່າ 2,800 ຄົນ ໃນນັ້ນລວມທັງພວກຄ້າຢາເສບຕິດຫວຽດນາມດ້ວຍນັ້ນ ຈືງເຮັດໃຫ້ທາງການຫວຽດນາມ ປາດຖະໜາຢາກຈະຫຼຸດຜ່ອນອາດຊະຍາກຳດັ່ງກ່າວ ໂດຍໃຫ້ການຊ່ວຍເຫຼືອລັດຖະບານລາວ ໃນການກໍ່ສ້າງສູນບຳບັດຜູ້ຕິດຢາເສບຕິດ ແລະ ພັດທະນາອາຊີບໃຫ້ແກ່ນັກໂທດໃນຄະດີຢາເສບຕິດທີ່ກຳລັງດຳເນິນການກໍ່ສ້າງຍູ່ລາວໃນເວລານີ້ ດັງທີ່ ພົນເອກວິໄລ ລ້າຄຳຟອງ, ຮອງນາຍົກລັດຖະມົນຕີ, ລັດຖະມົນຕີກະຊວງຄວາມສະຫງົບ ຢືນຢັນວ່າ:
“ດຽວນີ້ເຮາກະໄດ້ໄປຂໍທຶນຫວຽດນາມ ເພິ່ນຕົກລົງວ່າສິມາສ້າງສູນທົດລອງໃຫ້ພວກເຮາເປັນສູນຂະຫນາດໃຫຍ່ ແລ້ວເຮາກໍໄດ້ຊອກດິນໃຫ້ປະມານ 10 ປາຍເຮັກຕາເພິ່ນຈະເຮັດເປັນທັ້ງສູນຜະລິດ. ທັ້ງເປັນສູນບຳບັດ ທັ້ງເປັນສູນຝຶກອົບຮົມອີຫຍັງຕ່າງໆຍູ່ຫັ່ນຫມດ ເພິ່ນຈະມີລະບບຄັກແນ ແລ້ວກະຟື້ນຟູສຸກຂະພາບ ອອກໄປແລ້ວໃຫ້ມີວຽກເຮັດງານທຳ. ຫຼາຍຄົນກະເວ້າຫັ່ນແຫລະ ເປັນຫຍັງ? ເມື່ອອອກໄປແລ້ວມັນຈັ່ງກິນຄືນ ເປັນຫຍັງ? ອອກໄປແລ້ວຈັ່ງເຮັດວຽກບໍ່ເປັນ ເປັນຫຍັງ? ອອກໄປແລ້ວຈັ່ງບໍ່ມີວຽກເຮັດ ກະຄືຮູ້ຫັ່ນຫລະ ນັກໂທດຫັ່ນນ່ະໄດ້ອອກໄປແລ້ວ ໃຜສິຈ້າງເຂົ້າມາເຮັດວຽກ ເຂາກະຍ່ານພໍແຮງແລ້ວ."
ສ່ວນຢາເສບຕິດ ແລະ ສານເຄມີ ທີ່ເຈົ້າໜ້າທີ່ລາວ ຍຶດໄດ້ ໃນໄລຍະ 18 ເດືອນຜ່ານມາມີນໍ້າໜັກລວມເກີນກວ່າ 100 ໂຕນ ໃນນີ້ມີຢາບ້າທີ່ຍືດໄດ້ 300 ລ້ານກວ່າເມັດ, ຜງຢາບ້າ 90 ກວ່າກິໂລກຣາມ, ຍາໄອສ໌ 8,519 ກິໂລກຣາມ. ເຮໂລອິນ 670 ກິໂລກຼາມ, ກັນຊາແຫ້ງ 40 ໂຕນ, ຝິ່ນ 487 ກິໂລ, ເຄຕາມີນກວ່າ 3 ໂຕນ, ຢາອີ 67 ກິໂລ, ຄາເຟອີນກວ່າ 286 ກິໂລ, ໂຄເຄນກວ່າ 100 ກິໂລກຼາມ, ສານເຄມີກວ່າ 91 ໂຕນ. ພ້ອມດ້ວຍອາວຸດປືນ, ຍານພາຫະນະ, ແລະອຸປະກອນສື່ສານທີ່ທັນສະໄໝກວ່າ 36,000 ລາຍການ.
ສ່ວນການກໍ່ອາຊະຍາກຳທີ່ພັວພັນກັບການຄ້າຢາເສບຕິດ ທີ່ສົ່ງຜົນກະທົບຢ່າງແຜ່ຫຼາຍໃນສັງຄົມລາວໃນປັດຈຸບັນ ກໍແມ່ນອາດຊະຍາກຳທີ່ເກີດຂຶ້ນຢູ່ທີ່ສະຖານບັນເທິງຕ່າງໆ ທີ່ນັກທຸລະກິດຈີນເປັນເຈົ້າຂອງ. ແລະ ລູກຄ້າທີ່ມາໃຊ້ສະຖານບັນເທິງເຫລ່ານີ້ສ່ວນຫລາຍກໍແມ່ນລູກຄ້າຊາວຈີນນັ່ນເອງ.
ຍິ່ງໄປກວ່ານັ້ນ, ການກະທໍາຜິດເກີ່ຍວກັບຢາເສບຕິດ ຍັງເປັນຄະດີອາຍາທີ່ຖືກດໍາເນີນຄະດີຕໍ່ສານ ປະຊາຊົນລາວຫລາຍທີ່ສຸດ. ທັງນີ້ ກໍຍ້ອນວ່າມີການຈັດຕັ້ງແລະເຄື່ອນໄຫວຜິດກົດໝາຍທີ່ມີລັກສະນະຂ້າມຊາດ ແລະ ມີເຄືອຂ່າຍກວ້າງຂວາງ ທັ້ງໃນລາວ-ມຽນມາ ແລະ ໄທ. ທັງນີ້ ເຖິງແມ່ນວ່າ ຣັຖບານລາວ ໄດ້ປະກາດເປັນວາລະແຫ່ງຊາດ ວ່າຈະປາບປາມການລັກລອບຄ້າຢາເສພຕິດໃຫ້ໄດ້ຢ່າງສິ້ນເຊິງໃນປີ 2023 ກໍຕາມ ແຕ່ວ່າກະເປັນໄປບໍ່ໄດ້ ລັດຖະບານລາວຈຶ່ງໄດ້ປະກາດເລື່ອນເປົ້າໝາຍດັ່ງກ່າວໄປຮອດປີ 2025.
ຟໍຣັມສະແດງຄວາມຄິດເຫັນ