ລັດຖະມົນຕີ ໄດ້ຍອມຮັບວ່າ ເປັນການຍາກຢ່າງຍິ່ງທີ່ຈະດຳເນີນ
ມາດຕະການປາບປາມ ເພື່ອໃຫ້ບັນລຸເປົ້າໝາຍຂອງອາຊ່ຽນ ໃນ
ການເຮັດໃຫ້ລາວເປັນປະເທດ ທີ່ປອດຢາເສບຕິດໄດ້ໃນປີ 2015.
ພົນຈັດຕະວາສົມແກ້ວ ສີລາວົງ ຮັກສາການລັດຖະມົນຕີວ່າການກະຊວງປ້ອງກັນຄວາມ
ສະຫງົບ ໄດ້ຖະແຫລງຍອມຮັບວ່າ ເປັນການຍາກຢ່າງຍິ່ງ ທີ່ຈະສາມາດບັນລຸເປົ້າໝາຍ
ໃນການເຮັດໃຫ້ລາວເປັນປະເທດ ທີ່ປອດຈາກບັນຫາຢາເສບຕິດໄດ້ ໃນປີ 2015 ທີ່ຖື
ເປັນເປົ້າໝາຍຮ່ວມກັນ ຂອງປະເທດສະມາຊິກ ໃນກຸ່ມອາຊ່ຽນທັງ 10 ປະເທດ.
ທັງນີ້ ໂດຍເຖິງແມ່ນວ່າ ທາງການລາວຈະໄດ້ດຳເນີນ ມາດຕະການປາບປາມຢ່າງໜັກ
ກໍຕາມ ຫາກແຕ່ວ່າ ກໍບໍ່ສາມາດຈະທຳລາຍເຄືອຂ່າຍ ການຄ້າຢາເສບຕິດ ໃຫ້ໝົດໄປ
ໄດ້ເລີຍ ເນື່ອງຈາກວ່າ ຜູ້ຕ້ອງຫາໃນຄະດີຢາເສບຕິດ ທີ່ຖືກຈັບກຸມນັ້ນ ຈະບໍ່ຍອມໃຫ້ຂໍ້
ມູນທີ່ເຊື່ອມໂຍງໄປເຖິງ ສະມາຊິກຄົນອື່ນໆ ໃນເຄືອຂ່າຍ ຂອງພວກເຂົາເຈົ້າເລີຍ ດັ່ງທີ່
ພົນຈັດຕະວາສົມແກ້ວ ໄດ້ໃຫ້ການຢືນຢັນວ່າ:
“ເລື້ອງຊອກຜູ້ຊັດທອດນະ ຢາກຮູ້ບ່ອນກົກ ມັນເອົາມາ ແລະບ່ອນໄປ ມັນສິໄປ
ໄສ ມັນບໍ່ບອກເດັດຂາດ ມັນເວົ້າແຕ່ເອົາມາແຕ່ທາງເໜືອ ແລະຈະເອົາໄປທາງ
ໃຕ້ ມີແຕ່ເທົ່ານັ້ນ ຄຳຕອບຂອງມັນ ສະນັ້ນກໍສະແດງວ່າ ເຂົາມີຄຳໝັ້ນສັນຍານຳ
ກັນ ຈັບແຕ່ເຈົ້າ ຈະບໍ່ໍບອກເລື້ອງເຮົາ ຈະບໍ່ຊັດທອດ ມີແນວນັ້ນ ໃນຕົວຈິງກໍເປັນ
ແນວນີ້ ຍາກທີ່ສຸດ.”
ທາງດ້ານທ່ານກຸ ຈັນສີນາ ປະທານຄະນະກຳມະການຄວບຄຸມ
ແລະກວດກາຢາເສບຕິດແຫ່ງຊາດ ໄດ້ໃຫ້ການຢືນຢັນວ່າ ທາງ
ການລາວໄດ້ດຳເນີນມາດຕາການສະກັດກັ້ນ ແລະປາບປາມ
ເຄືອຂ່າຍການຄ້າຢາເສບຕິດຢ່າງເຂັ້ມງວດ ທັງຍັງໄດ້ຮ່ວມມືກັບ
ປະເທດເພື່ອບ້ານ ໃນການສ້າງຕັ້ງໜ່ວຍພິເສດ ເພື່ອປະສານງານ
ໃນການປາບປາມ ຢູ່ຊາຍແດນເປັນການ ສະເພາະດ້ວຍ ດັ່ງທີ່
ທ່ານກຸ ໄດ້ເນັ້ນຢ້ຳວ່າ:
“ເຈົ້າໜ້າທີ່ຕຳຫລວດໄດ້ຮ່ວມມືກັບພາກສ່ວນກ່ຽວຂ້ອງຂັ້ນ
ຕ່າງໆ ປະຕິບັດໜ້າທີ່ ຂອງຕົນດ້ວຍຄວາມຮັບຜິດຊອບສູງ
ສຳຫລັບກັບບັນດາປະເທດເພື່ອນບ້ານ ທີ່ໃກ້ຄຽງນັ້ນ ພວກ
ເຮົາໄດ້ມີກອງປະຊຸມ ສອງຝ່າຍ ຫຼາຍຝ່າຍ ໃນລະດັບຊາດ ແລະລະດັບທ້ອງຖິ່ນ
ນອກຈາກນັ້ນ ພວກເຮົາກໍຍັງໄດ້ສ້າງຕັ້ງ ໜ່ວຍປະສານງານກວດກາ ແລະຄວບ
ຄຸມຢາເສບຕິດ ຕາມຊາຍແດນ ໃຫ້ສາມາດປະຕິບັດວຽກງານໄດ້ ຢ່າງມີປະສິດ
ທິຜົນ.”
ກ່ອນໜ້ານີ້ ຄະນະກຳມະການຄວບຄຸມ ແລະກວດກາຢາເສບຕິດແຫ່ງຊາດລາວ ກໍໄດ້
ລາຍງານວ່າ ເຂດຊາຍແດນທາງບົກລະຫວ່າງລາວ ຫວຽດນາມ ໄດ້ຖືກຂະບວນການຄ້າ
ຢາເສບຕິດຂ້າມຊາດສວຍໃຊ້ ເປັນເສັ້ນທາງລັກລອບຂົນຢາເສບຕິດ ຈາກເຂດສາມ
ຫລ່ຽມຄຳ ໄປຕ່າງປະເທດຫຼາຍຂຶ້ນນັບມື້ ໂດຍເສັ້ນທາງທີ່ແກ້ງຄ້າຢາເສບຕິດນຳໃຊ້ຫຼາຍ
ທີ່ສຸດໃນລາວ ກໍຄືຖະໜົນເລກ 13 ຈາກພາກເໜືອຕໍ່ມາຍັງຖະໜົນເລກ 9 ໃນແຂວງ
ສະຫວັນນະເຂດ ຕໍ່ໄປຍັງຫວຽດນາມ ແລະປະເທດທີ 3 ຕາມລຳດັບ.
ຍິ່ງໄປກວ່ານັ້ນ ການທີ່ຂະບວນການຄ້າຢາເສບຕິດ ຂ້າມຊາດໄດ້ຫັນມາໃຊ້ເຂດແດນລາວ ເປັນເສັ້ນທາງໃນການລັກລອບຂົນສົ່ງຢາເສບຕິດຈາກເຂດສາມຫລ່ຽມຄຳ ໄປຍັງປະເທດທີ
3 ຫຼາຍຂຶ້ນດັ່ງກ່າວນີ້ ຍັງເປັນປັດໄຈສຳຄັນທີ່ຊຸກຍູ້ໃຫ້ເຍົາວະຊົນລາວພາກັນຫັນໄປຊົມໃຊ້ ຢາເສບຕິດເພີ້ມຂຶ້ນນັບມື້ອີກດ້ວຍໂດຍສະເພາະແມ່ນການເສບຢາບ້າໃນກຸ່ມນັກຮຽນ
-ນັກສຶກສານັ້ນ ຖືເປັນບັນຫາທີ່ໜ້າເປັນຫ່ວງທີ່ສຸດ.
ໂດຍເຖິງແມ່ນວ່າ ກະຊວງສຶກສາທິການ ແລະກິລາ ຈະໄດ້ພະຍາຍາມແກ້ໄຂບັນຫາດັ່ງກ່າວ ແລ້ວກໍຕາມ ແຕ່ກໍຍັງບໍ່ສາມາດເຮັດໃຫ້ສະພາບການດີຂຶ້ນໄດ້ເລີຍ ຊຶ່ງຈະເຫັນໄດ້ຈາກການ
ທີ່ຄະນະກຳມະການຄວບຄຸມ ແລະກວດກາຢາເສບຕິດແຫ່ງຊາດ ໄດ້ສຸ້ມກວດນ້ຳປັດສະວະ ຂອງນັກຮຽນ-ນັກສຶກສາ ໂດຍບໍ່ໄດ້ມີການແຈ້ງລ່ວງໜ້າຢູ່ໃນເຂດ 145 ເມືອງ ເມື່ອປີ 2012 ທີ່ພົບວ່າ ມີນັກຮຽນ-ນັກສຶກສາ ຈຳນວນຫຼາຍກວ່າ 6 ໝື່ນຄົນ ທີ່ໃຊ້ຢາເສບຕິດ ສ່ວນການສຸ້ມ
ກວດໃນປີ 2013 ກໍພົບວ່າ ມີນັກຮຽນ-ນັກສຶກສາລາວ ທີ່ຊົມໃຊ້ຢາເສບຕິດນັ້ນ ກໍເພີ້ມຂຶ້ນ ເປັນຫຼາຍກວ່າ 8 ໝື່ນຄົນອີກດ້ວຍ.
ຍິ່ງໄປກວ່ານັ້ນ ກໍຍັງເຮັດໃຫ້ເຊື່ອວ່າ ມີເຍົາວະຊົນລາວ ເຂົ້າໄປຫຍຸ້ງກ່ຽວກັບຢາເສບຕິດ
ຫຼາຍຂຶ້ນ ເພາະການສຳຫລວດເມື່ອທ້າຍປີ 2013 ພົບວ່າມີເຍົາວະຊົນລາວເກີນກວ່າ
245,000 ຄົນ ທີ່ຢູ່ໃນສິ່ງແວດລ້ອມ ທີ່ມີຄວາມສ່ຽງສູງ ທີ່ຈະເຂົ້າໄປຫຍຸ້ງກ່ຽວກັບ
ຢາເສບຕິດນັ້ນເອງ.
