ລິ້ງ ສຳຫລັບເຂົ້າຫາ

logo-print

ອາ​ລີເວົ້າ​ວ່າ ແມ່​ຍິງ​ລາວສະ​ໄໝ​ໃໝ່ ຈະຕ້ອງບໍ່​ພຽງ​ແຕ່​ເກັ່ງ ຍັງ​​​ຕ້ອງຮັກ​ສາ ​ວັດ​ທະ​ນາ​ທຳ​ລາວ​ໄວ້ ອີກ​ດ້ວຍ


ທ.ນ. ອາ​ລີ ມາກ​ເທ​ພາ​ລັກ, ຜູ້​ຍິງ​ເກັ່ງ, ງາມທີ່​​ມັກສົ່ງ​ເສີມ​ຄວາມ​ສະ​ເໝີ​ພາບຍິງ​ຊາຍ ແລະ​ທຸກ​ຊົນ​ຊາດ​ຊົນ​ເຜົ່າ ພ້ອມ​ກັບຮັກ​ວັດ​ທະ​ນະ​ທຳ​ລາວ

ວັນ​ທີ 8 ​ມີ​ນາ ເປັນ​ວັນ​ແມ່​ຍິງ​ສາ​ກົນ. ວັນ​ດັ່ງ​ກ່າວ ໂດຍ​ລວມ​ແລ້ວ ມີຈຸດ​ປະ​ສົງຍົກ​ສູງ​ຄວາມ​ສະ​ເໝີ​ພາບ​ລະ​ຫວ່າງຍິງ-ຊາຍ ຫລືຕໍ່​ຕ້ານ​ການ​ປະ​ຕິ​ບັດ​ແບບ ຮຸນ​ແຮງ ແລະ​ລຳ​ອຽງຕໍ່​ແມ່​ຍິງ. ເພື່ອ​ສ້າງ​ແຮງ​ດົນ​ໃຈ​ໃຫ້​ແກ່​ແມ່​ຍິງທັງ ຫລາຍ​ຢູ່​ທົ່ວ​ໂລກນັ້ນ ​ຫລາຍອົງ​ການ ແລະ​ປະ​ຊາ​ຄົມໄດ້​ອຸ​ທິດວັນ​ດັ່ງ​ກ່າວໃຫ້​ແກ່​ການ ເນັ້ນ​ເຖິງ​ຄວາມ​ສຳ​ຄັນຂອງຜົນ​ງານ​ຂອງ​ແມ່​ຍິງ​ຈາກຫລາຍເຊື້ອ​ຊາດ, ຊົນ​ເຜົ່າ, ວັດ​ທະ​ນະ​ທຳ, ຖາ​ນະ​ເສດ​ຖະ​ກິດ ແລະ​ການ​ເມືອງ ແລະ​ມີ​ການສະ​ຫລອງວັນ​ດັ່ງ​ກ່າວ ຢູ່ໃນຫລາຍແຫ່ງ​ຂອງ​ໂລກ. ມື້ນີ້ ທາງວີ​ໂອ​ເອ ​ຈະນຳ​ເອົາ​ປະ​ສົບ​ການຂອງ​ແມ່​ຍິງຊາວ​ລາວ-ອາ​ເມ​ຣິ​ກັນ​ຄົນ​ນຶ່ງ ຊຶ່ງ​ກໍ​ຄື​ນາງ ອາ​ລີນ ມາກ​ເທ​ພາ​ລັກ ຈາກ​ເມືອງລັ​ສເວ​ກັ​ສ, ລັດ​ເນ​ວາ​ດາ ທີ່ມີ​ບົດ​ບາດ​ໃນການ​ສົ່ງ​ເສີມ​ຄວາມ​ສະ​ເໝີ​ພາບ​ໃນ​ປະ​ຊາ​ຄົມ​ອາ​ເມ​ຣິ​ກັນມາ​ເລົ່າ​ສູ່​ບັນ​ດາ​ທ່ານ​ຟັງ. ລາຍ​ລະ​ອຽດກ່ຽວ​ກັບ​ເລື້ອງນີ້ຈະ​ເປັນ​ແນວ​ໃດ​ນັ້ນ ຂໍ​ເຊີນ​ທ່ານ​ຮັບ​ຟັງ​ຈາກ​ບົວ​ສະ​ຫວັນ​ໄດ້​ເລີຍ.

ທ່ານ​ຜູ້​ຟັງ​ທີ່​ເຄົາ​ລົບ, ຫລາຍໆ​ທ່ານ​ຄົງ​ຮູ້​ແລ້​ວ​ເນາະ​ວ່າ ວັນ​ແມ່​ຍິງ​ສາ​ກົນ​ທີ່ມີ​ການ​ສະ​ເຫລີມ​ສະ​ຫລອງ​ກັນໃນ​ວັນ​ທີ 3 ມີ​ນາ​ຢູ່ຫລາຍ​ປະ​ເທດນັ້ນ ແມ່ນ​ມີ​ປະ​ຫວັດ​ຄວາມ​ເປັນ​ມາ​ອັນ​ຍາວ​ນາ​ນາ. ມັນ​ໄດ້​ເລີ້ມ​ມີ​ການ​ສະ​ຫລອງ​ວັນ​ດັ່ງ​ກ່າວ​ໃນ​ປີ 1911 ​ຢູ່​ເນ​ເທີ​ແລນ, ເຢຍ​ຣະ​ມັນ, ສະ​ວິດ​ເຊີ​ແລນ ແລະ​ອອ​ສ​ເຕ​ຣຍ ຊຶ່ງ​ການ​ສະ​ຫລອງນັ້ນ ສ່ວນ​ໃຫຍ່ເປັນ​ການ​ເດີນ​ຂະ​ບວນ ຫລື​ ການ​ໂຮມ​ຊຸມ​ນຸມ​ໃນ​ຮູບ​ແບບຕ່າງໆ. ຢູ່​ຕໍ່​ມາ​ຫລາຍ​ສັດ​ຕະ​ວັດ ວັນ​ດັ່ງ​ກ່າວ​ຈຶ່ງ​ໄດ້​ຮັບ​ການ​ຮັບ​ຮູ້ຈາກ​ອົງ​ການ​ສະ​ຫະ​ປະ​ຊາ​ຊາດ​ໃນ​ປີ 1975. ຈຸດ​ປະ​ສົງຫລັກ​ໃນ​ການ​ໂຮມ​ຊຸ​ມ​ນຸມແລະ​ຈຸດ​ປະ​ສົງ​ຂອງ​ການ​ສະ​ເຫລີມ​ສະ​ຫລອງວັນ​ດັ່ງ​ກ່າວແມ່ນເພື່ອ​ໃຫ້​ບັນ​ລຸ 10 ເປົ້າ​ໝາຍ ຊຶ່ງ​ກໍ​ຄື:

  • ຄວາມຍຸຕິທຳ
  • ກຽດສັກສີ
  • ຄວາມຫວັງ
  • ຄວາເປັນເອກະພາບ
  • ການຮ່ວມມື
  • ຄວາມເດັດດ່ຽວໜຽວແໜ້ນ
  • ການໄດ້ຮັບການສັນລະເສີນ
  • ຄວາມເຄົາລົບກັນ
  • ຄວາເຫັນອົກເຫັນໃຈ ແລະ
  • ການໃຫ້ອະໄພ

ໂດຍ​ໄດ້​ຮັບ​ອິດ​ທິ​ພົນ​ຈາກ​ຂະ​ບວນ​ການ​ດັ່ງ​ກ່າວ​ ແມ່​ຍິງເຊື້ອ​ສາຍ​ລາວບໍ່​ວ່າ​ຈະ​ຢູ່​ແຫ່ງ​ຫົນ​ໃດ ກໍ​ບໍ່​ໄດ້​ນ້ອຍ​ໜ້າ​ໃຜ ໃນ​ການ​ພັດ​ທະ​ນາ​ຕົນ​ເອງ ເພື່ອ​ເພີ້ມ​ຄວາມ​ອາດສ​າ​ມາດໃນ​ການ​ເຮັດ​ວຽກ​ງານ ແລະ​ຊ່ວຍ​ເຫລືອ​ສັງ​ຄົມ. ເນື່ອງ​ໃນ​ໂອ​ກາດ​ວັນ​ແມ່​ຍິງ​ສາ​ກົນ ກໍ​ຄື​ວັນ​ທີ 8 ເດືອນ​ມີ​ນາ​ທີ່ຈະ​ມາເຖິງນີ້ ທາງວີ​ໂອ​ເອ ​ມີ​ຄວາມ​ຍິນ​ດີທີ່ຈະ​ນຳ​ເອົາ​ບົດ​ຮຽນ, ​ປະ​ສົບ​ການ ແລະ​ຄວາມ​ຄິດ​ຄວາມ​ເຫັນຂອງ​ແມ່​ຍິງ​ອາ​ເມ​ຣິ​ກັນເຊື້ອ​ສາຍ​ລາວ ຊຶ່ງກໍ​ຄືທ່ານ​ນາງ ອາ​ລີນ ມາກ​ເທ​ພາ​ລັກ ຈາກ​ເມືອງ​ລັ​ສ​ເວ​ກັ​ສ, ລັດ​ເນ​ວາ​ດາ ມາ​ເລົ່າ​ສູ່​ບັນ​ດາ​ທ່ານ​ຟັງ.

ອາ​ລີນເປັນ​ນັກ​ເຄື່ອນໄຫວ ແລະ​ນັກ​ວິ​ຊາ​ການດ້ານ​ບໍ​ລິ​ຫານ​ໄວ 30 ປີ​ ປາຍ. ​ປັດ​ຈຸ​ບັນ ທ່ານ​ນາງ​ເປັນ​ຄະ​ນະ​ກຳ​ມາ​ທິ​ການປະ​ຊາ​ຄົມ​ຊາວ​ເອ​ເຊຍ ແລະ​ຊາວເກາະ​ ໃນ​ມະ​ຫາ​ມະ​ໝຸດປາ​ຊີ​ຟິກ ສຳ​ລັບເຂດ​ເມືອງ​ຄ​ລາກ​ຄ໌​ ໃນ​ນະ​ຄອນ​ລັ​ສ​ເວ​ກັ​ສ, ລັດ​ເນ​ວາ​ດາ​ມາ​ໄດ້ 6 ເດືອນ​ແລ້ວ ນັບ​ຕັ້ງ​ແຕ່​ມີ​ການ​ສ້າງ​ຕັ້ງຄະ​ນະ​ກຳ​ມາ​ທິ​ການ​ດັ່ງ​ກ່າວຂຶ້ນ​ມາ ແລະເປັນນາຍ​ຄັງ​ໃຫ້​ແກ່​ອົງ​ການພັນ​ທະ​ມິດ​ແຫ່ງ​ຊາດ​ຂອງ​ຊາວ​ລາວ-ອາ​ເມ​ຣິ​ກັນ ຫລື LANA ທີ່​ສົ່ງ​ເສີມ​ສິດ​ເທົ່າ​ທຽມ​ກັນ​ຂອງ​ຊາວ​ອາ​ເມ​ຣິ​ກັນ​ເຊື້ອ​ສາຍ​ລາວ​ ມາ​ໄດ້ 5 ປີ​ແລ້ວ. ສ່ວນ​ດ້ານ​ວິ​ຊາ​ອາ​ຊີບ​ຂອງ​ຜູ້​ກຸ່ຽວ​ແມ່ນ​ເປັນຜູ້​ຊ່ວຍ​ຝ່າຍ​ບໍ​ລິຫານຂອງທະ​ນາຄານອາ​ເມ​ຣິ​ກາ ຫລື Bank of America ຢູ່​ໃນ​ນະ​ຄອນ​ລັ​ສ​ເວ​ກັ​ສ.

​ທ.ນ. ອາ​ລີນ (ຊ້າຍ​ສຸດ) ພ້ອມ​ກັບຄົນ​ອື່ນ​ສາ​ບານ​ຕົວ​ເຂົ້າ​ຮັບ​ໃຊ້​ ໃນ​ຄະ​ນະ​ກຳ​ມາ​ທິ​ການປະຊາຄົມຊາວເອເຊຍ ແລະຊາວເກາະ ໃນມະຫາມະໝຸດປາຊີຟິກ ສຳລັບເຂດເມືອງຄລາກຄ໌ ໃນນະຄອນລັສເວກັສ, ລັດເນວາດາ
​ທ.ນ. ອາ​ລີນ (ຊ້າຍ​ສຸດ) ພ້ອມ​ກັບຄົນ​ອື່ນ​ສາ​ບານ​ຕົວ​ເຂົ້າ​ຮັບ​ໃຊ້​ ໃນ​ຄະ​ນະ​ກຳ​ມາ​ທິ​ການປະຊາຄົມຊາວເອເຊຍ ແລະຊາວເກາະ ໃນມະຫາມະໝຸດປາຊີຟິກ ສຳລັບເຂດເມືອງຄລາກຄ໌ ໃນນະຄອນລັສເວກັສ, ລັດເນວາດາ

​ອາ​ລີນ ເປັນ​ແມ່​ຍິງເກັ່ງ​ແລະມີ​ຄວາມ​ເຊື່ອ​ວ່າ​ການ​ປະ​ຕິ​ບັດ​ຕໍ່​ກັນ​ດ້ວຍ​ຄວາມລົບ​ນັບ​ຖື ແລະ​ໃຫ້​ສິດ​ເທົ່າ​ທຽມ​ກັນເປັນ​ແຮງ​ຜັກ​ດັນ​ຄວາມ​ຈະ​ເລີນ​ຂອງ​ມະ​ນຸດຊາດນັ້ນ ​ໄດ້ເຄື່ອນ​ໄຫວສະ​ແຫວງ​ຫາ​ທາງ​ປົກປ້ອງ ແລະ​ສົ່ງ​ເສີມສິດ​ຂອງ​ປະ​ຊາ​ຊົນ​ອາ​ເມ​ຣິ​ກັນເຊື້​ອ​ສາຍ​ເອ​ເຊຍ ຊຶ່ງ​ເປັນຊົນ​ເຜົ່າ​ສ່ວນ​ນ້ອຍ​ກຸ່ມ​ນຶ່ງໃນ​ສະ​ຫະ​ລັດ ມາຕັ້ງ​ແຕ່ຕອນອາ​ຍຸ 22 ປີ​ພຸ້ນ ຊຶ່ງ​ໃນ​ຕອນນັ້ນ ທ່ານ​ນາງ​ຍັງ​ເປັນນັກ​ສຶກ​ສາ​ຂັ້ນ​ປະ​ລິນ​ຍາ​ຕີທີ່​ຝຶກ​ງານຢູ່​ໃນ​ຫ້ອງ​ການ​ຂອງ​ສະ​ມາ​ຊິກ​ສະ​ພາ​ສູງ​ທ່ານ​ນຶ່ງໃນ​ລັດ​ໄອ​ໂອ​ວາ. ຈາກນັ້ນ ເມື່ອ​ໄດ້​ສ້າງ​ຄອບ​ຄົວ ແລະ​ຍົກ​ຍ້າຍ​ມາ​ຢູ່​ໃນ​ລັດ​ເນ​ວາ​ດາ ທ່ານ​ນາງ​ກໍ​ຍັງສືບ​ຕໍ່​ປະ​ກອບ​ສ່ວນ​ເຂົ້າ​ໃນ​ພາ​ລະ​ກິດ​ດັ່ງ​ກ່າວ​ດ້ວຍ​ຄ​ວາ​ມ​ມັກຮັກ ແລະ​ຫ້າວ​ຫັນ. ເຖິງ​ແມ່ນ​ຈະ​ເກີດ ແລະເຕີບ​ໃຫຍ່​ຂຶ້ນຢູ່​ໃນ​ເມືອງ​ນ້ອຍໆ ຂອງ​ລັດ​ໄອ​ໂອ​ວາ ຢູ່​ທາງ​ພາກ​ຕາ​ເວັນ​ຕົກ​ຕອນ​ກາງ​ຂອງ​ສະ​ຫະ​ລັດທີ່ມີ​ຄົນ​ສ່ວ​ນ​ໃຫຍ່​ເປັນ​ຄົນ​ຜິວ​ຂາວກໍ​ຕາມ​ ແຕ່​ອາ​ລິນ​ຍັງ​ເວົ້າ​ພາ​ສາ​ລາວ​ໄດ້​ດີ​ສົມ​ຄວນ.

ເມື່ອ​ຖາມ​ວ່າ​ທ່ານ​ນາງ​ຮູ້​ສຶກ​ແນວ​ໃດ​ຕໍ່​ວັນ​ແມ່​ຍິງ​ສາ​ກົນ​ ໃນ​ການ​ຍົກ​ສູງ​ບົດ​ບາດ​ແມ່​ຍິງ​ລາວ ແລະ​ກຽດ​ສັກ​ສີ​ຂອງ​ຄົນ​ລາວ​ໃຫ້ທຽບ​ເທົ່າ​ກັບຄົນ​ເຊື້ອ​ສາຍ​ອື່ນ​ຢູ່​ໃນ​ສັງ​ຄົມ​ອາ​ເມ​ຣິ​ກັນອັນ​ກວ້າງ​ໃຫຍ່ນັ້ນ ທ່ານ​ນາງຕອບ​ວ່າ:

“ຂ້າ​ນ້ອຍໜີ້ ​ຄິດວ່າ ມັນ​ສຳ​ຄັນ​ຫລາຍ….ສະ​ໄໝ​ແຕ່ກີ້​ໜິ…”

ທ.ນ. ອາ​ລີ ມາກ​ເທ​ພາ​ລັກ (ທີ​ສາມຈາກ​ຂວາ), ນາຍ​ຄັງ ແລະ​ຄະ​ນະ​ກຳ​ມະ​ການ​ບໍ​ລິ​ຫານ​ອົງ​ການ LANA ຖ່າຍ​ຮູບ​ຮ່ວມ​ກັບ​ຄະ​ນະ
ທ.ນ. ອາ​ລີ ມາກ​ເທ​ພາ​ລັກ (ທີ​ສາມຈາກ​ຂວາ), ນາຍ​ຄັງ ແລະ​ຄະ​ນະ​ກຳ​ມະ​ການ​ບໍ​ລິ​ຫານ​ອົງ​ການ LANA ຖ່າຍ​ຮູບ​ຮ່ວມ​ກັບ​ຄະ​ນະ

​ເມື່ອ​ເວົ້າ​ເຖິງ​ຄວາມເຊື່ອແບບ​ດັ້ງ​ເດີມ​ໃນ​ປະ​ເພ​ນີ​ລາວນັ້ນ ທ່ານ​ນາງ​ອະ​ທິ​ບາຍ​ວ່າ:

“our culture has an expectation:...."
“ວັດ​ທະ​ນະ​ທຳ​ຂອງ​ເຮົາ​ມີ​ຄວາມ​ຄິດ​ຄາດ​ຫວັງ​ກ່ຽວ​ກັບ​ແມ່​ຍິງ​ແບບ ຜູ້​ຊາຍ​ໄປ​ຊອກ​ຫາ​ແມ່​ຍິງ​ຈາກ​ບ້ານ​ໄຮ່ ບ້ານ​ນາ, ແມ່​ຍິງ​ທຸກ​ຍາກ ແລະ​ຊື້​ເອົາ​ນາງ​ມາ​ໃນ​ຮູບ​ແບບ​ວ່າ ໃຫ້​ຄ່າ​ດອງ ເຫັນ​ແມ່​ຍິງ​ເປັນ​ຄື​ກັນ​ກັບວ່າ​ເປັນ​ສິ່ງ​ຂອງ. ຂ້ອຍ​ເຂົາ​ໃຈວ່າ ​ເປັນ​ຫຍັງ​ແມ່​ຍິງ​ຈຶ່ງ​ມີ​ບົດ​ບາດ​ເປັນ​ແບບນັ້ນ ກໍ​ແມ່ນເພື່ອ​ຄວາມ​ຢູ່​ລອດ. ແຕ່​ວ່າ​ໃນ​ສະ​ໄໝ​ນີ້ ແມ່​ຍິງ​ແມ່ນ​ຫາ​ເງິນ​ມາ​ເພື່ອ​ໃຊ້​ຈ່າຍ​ເຄິ່ງ​ນຶ່ງ​ຂອງ​ການຄ່າ​ໃຊ້​ຈ່າຍ​ໃນ​ເຮືອນຊານ. ບາງ​ເທື່ອ​ແມ່​ຍິງ​ອາດ​ຈະຮັບ​ຜິດ​ຊອບ​ຈ່າຍ​ຄ່າ​ໃຊ້​ຈ່າຍ​ທຸກ​ຢ່າງ​ ເມື່ອ​ຜົວ​ມີ​ແຕ່​ນັ່ງ​ຢູ່​ເຮືອນ ແຕ່​ປານນັ້ນ​ກໍ​ຕາມ ຜົວກໍ​ຍັງ​ມີ​ຄວາມ​ຄາດ​ຫວັງ​ຢາກ​ໃຫ້​ແມ່​ຍິງເຮັດ​ໜ້າ​ທີ່​ແບບ​ດັ້ງ​ເດີມ ສະ​ໄໝ​ບູ​ຮານນັ້ນ​ຢູ່.”

ທັງ​ນີ້ ນອກ​ຈາກນັ້ນ​ນ​ແລ້ວ ອາ​ລີນບອກວ່າ ແມ່​ຍິງ​ລາວ​ໃນ​ສະ​ໄໝ​ນີ້ຕ້ອງ​ເຂັ້ມ​ແຂງ, ເຮັດ​ວຽກ​ຄຽງ​ບ່າ​ຄຽງ​ໄຫລ່​ກັນ​ກັບ​ເພດ​ຊາຍ ພ້ອມ​ທັງ​ເປັນ​ຕົວ​ຢ່າງ​ໃຫ້​ແກ່​ຄົນ​ລຸ້ນ​ໃໝ່ ​ທັງ​ນີ້ກໍ​ຍ້ອນ​ວ່າ​ການ​ເກີດຢູ່​ໃນ​ຄອບອົບ​ພະ​ຍົບຢູ່​ໃນ​ເມືອງ​ທີ່​ມີ​ຄົນ​ເຊື້ອ​ຊາດ​ອື່ນ ໂດຍ​ສະ​ເພາະ​ຄົນ​ຜິວ​ຂາວ​ເປັນ​ສ່ວນ​ໃຫຍ່ນັ້ນ ທ່ານ​ນາງບອກ ວ່າຕົນ ປະ​ສົບ​ກັບ​ຄວາມ​ຫຍຸ້ງ​ຍາກນາງໆ ປະ​ການລວມ​ທັງ​ການ​ຂາດ​ຜູ້​ເປັນ​ແບບ​ເປັນຢ່າງ​ທີ່​ດີ​ ໂດຍ​ສະ​ເພາະ​ແມ່ນ​ແມ່​ຍິງ ໃນ​ດ້ານ​ການ​ສຶກ​ສາ ແລະ​ພັດ​ທ​ະນາຕົນ​ເອງ​ຮອບ​ດ້ານ ​ຊຶ່ງ​ຜູ້ກ່ຽວ​ໃຫ້​ຄຳ​ເຫັນ​ວ່າ:

ດັ່​ງ​ກ່າວ​ຢູ່​ຂ້າງ​ເທິງນັ້ນ ຄວາມ​ເດັດ​ດ່ຽວ​ໜຽວ​ແໜ້ນ ແລະໃຫ້ຄວາມ​ເຄົາ​ລົບ​ເຊິ່ງ​ກັນ​ແລະກັນ ແລະການ​ຮ່ວມ​ມືກັນ ແມ່ນນອນ​ໃນ​ຈຸດ​ປະ​ສົງ 10 ຂໍ້ທີ່​ວັນ​ແມ່​ຍິງສາ​ກົນ​ຢາກສົ່ງ​ເສີມ. ສະ​ນັ້ນ ​ທ່ານ​ນາງອາ​ລີນ​ເວົ້າ​ເຖິງ​ຄຸນ​ສົມ​ບັດ​ຂອງ​ແມ່​ຍິງລາວສະ​ໄໝ​ໃໝ່​ວ່າ​:

ແຕ່​ບໍ່​ພຽງ​ແຕ່​ເທົ່າ​ນັ້ນການ​ເປັນ​ແມ່​ຍິງ​ລາວ​ສ​ະໄໝ​ໃໝ່​ກໍ​ຍັງ​ຕ້ອງ​ຮັກ​ສາ​ປະ​ເພ​ນີ​ຂອງເຊື້ອຊາດ​ຊົນ​ເຜົ່າ​ຂອງ​ຕົນ​ໄວ້ ຊຶ່ງ​ທ່ານ​ນາງ​ຍົກ​ຂຶ້ນ​ມາ​ໃຫ້​ເຫັນ​ວ່າ:

"ເຮົາ​ຄວນ​ຮັກ​ສາ​ປະ​ເພ​ນີ​ລາວ​ຂອງ​ເຮົາ​ໄວ້, ຕ້ອງ​ຮູ້​ຈັກ​ຕ່ຳ ຈັກ​ສູງ, ຮູ້ຈັກ​ຮີດ​ຄອງ​ປະ​ເພ​ນີ​ລາວ.... ເຖິງ​ແມ່ນ​ວ່າ​ເຮົາ​ຈະ​ຢູ່​ປະ​ເທ​ດ​ໃດ ສະ​ໄໝ​ໃດ​ກ​ຢ່າ."

ອາ​ລີ ມາກ​ເທ​ພາ​ລັກ (ກາງ​ເສື້ອ​ດຳ) ກັບຄະ​ນະ​ກຳ​ມະ​ການປະຊາຄົມຊາວເອເຊຍ ແລະຊາວເກາະມະຫາມະໝຸດປາຊີຟິກ
ອາ​ລີ ມາກ​ເທ​ພາ​ລັກ (ກາງ​ເສື້ອ​ດຳ) ກັບຄະ​ນະ​ກຳ​ມະ​ການປະຊາຄົມຊາວເອເຊຍ ແລະຊາວເກາະມະຫາມະໝຸດປາຊີຟິກ

ເມື່ອ​ຖາມ​ເຖິງ​ບົດ​ບາດ​ຂອງ​ທ່ານ​ນາງ​ໃນ​ນາມ​ເປັນ​ຄະ​ນະ​ກຳ​ມາ​ທິ​ການຂອງປະ​ຊາ​ຄົມ​ຊາວ​ເອ​ເຊຍ ແລະ​ຊາວເກາະ​ໃນ​ມະ​ຫາ​ມະ​ໝຸດປາ​ຊີ​ຟິກ​ໃນເຂດ​ເມືອງ​ຄ​ລາກ​ຄ໌, ນະຄອນ​ລັ​ສ​ເວ​ກັ​ສ, ທີ່​ເປັນ​ເມືອງ​ທີ່​ມີ​ປະ​ຊາ​ກອນ​ຄົນ​ເຊື້ອ​ສາຍ​ເອ​ເຊຍ ຂະ​ຫຍາຍ​ຕົວ​ໄວ​ທີ່​ສຸດ​ໃນ​ສະ​ຫະ​ລັດນັ້ນ ຄະ​ນະ​ກຳ​ມາ​ທິ​ການແຕ່​ລະ​ຄົນເຮັດ​ວຽກ​ຢ່າງບໍ່​ຮູ້​ອິດ​ຮູ້​ເມື່ອຍ ເຖິງແມ່ນວ່າ​ຈະ​ບໍ່​ໄດ້​ຮັບ​ເງິນ​ຄ່າ​ຕອບ​ແທນກໍ​ຕາມ ທັງ​ນີ້ ກໍ​ເພາະ​ຢາກ​ເຮັດ​ໃຫ້​ປະ​ຊາ​ຄົມ​ດີເຮົາ​ຂຶ້ນ ຊຶ່ງ​ທ່ານ​ນາງ​ເວົ້າ​ເຖິງ​ບົດ​ບາດ​ຂອງຄະ​ນະ​ກຳ​ມະ​ການວ່າ: ​

“ເປັນ​ສຽງ​ໃຫ້​ຄົນ​ເອ​ເຊຍ…..”

ທ່ານ​ນາງ​ກ່າວ​ຕໍ່​ໄປ​ວ່າ:

“What type of resources, what elderly care…”
"ມີແຫລ່ງຊ່ວຍເຫລືອແນວໃດແດ່? ມີການຊ່ວຍເຫລືອອັນໃດແດ່ແກ່ຜູ້ເຖົ້າ​? ຈະເອົາລູກໄປເຂົ້າຮຽນຢູ່ໃນມະຫາວິທະຍາໄລແນວໃດ? ການໄປໂຮງໝໍເດ່ ເຂົາເຈົ້າຕ້ອງການນານແປພາສາບໍ່?"

ທ່ານ​ນາງບອກ​ອີກວ່າ​ໃນ​ການ​ເປັນ​ແຫລ່ງ​ສະ​ໜອງ​ການ​ຊ່ວຍ​ເຫລືອ​ທົ່ວ​ໄປ​ໃຫ້​ແກ່​ປະ​ຊາ​ຄົມ​ເອ​ເຊຍທີ່ປະ​ກອບ​ສ່ວນ​ອັນ​ຫລວງ​ຫລາຍ​ໃນ​ການ​ສ້າງ​ເສດ​ຖະ​ກິດ​ຂອງ​ເມືອງ​ດັ່ງ​ກ່າວນັ້ນ ຄະ​ນະ​ກຳ​ມາ​ທິ​ການຊຶ່ງທ່ານ​ນາງສະ​ຫລຸບ​ສູ່​ຟັງວ່າ:

"ເຮົາ​ເປັນ​ສຽງ, ໜ້າ​ຕາ​ໃຫ້​ຄົນ​ເອ​ເຊຍ.. ໃຫ້​ເມືອງ.... ບໍ່​ມີ​ທາງ​ໄປ​ໜິ ມາ​.. ມາ​ຫາ Commision."

ສະ​ຫລຸບ​ແລ້ວ ທ່ານ​ນາງ​ອາ​ລີນ ມາກ​ເທ​ພາ​ລັກ ເປັນ​ແມ່​ຍິງ​ອາ​ເມ​ຣິ​ກັນເຊື້ອ​ສາຍ​ລາວ​ສະ​ໄໝ​ໃໝ່ ທີ່ບໍ່​ພຽງ​ແຕ່ເປັນ​ຄົນ​ເກັ່ງທາງ​ດ້ານ​ວິ​ຊາ​ສະ​ເພາະ ແຕ່​ກໍຍັງ​ເປັນ​ຄົນເດັດ​ດ່ຽວ​ໜຽວ​ແໜ້ນຮອບ​ດ້ານ ໂດຍ​ສະ​ເພາະ​ແມ່ນການ​ເຄື່ອນ​ໄຫວ​ສົ່ງ​ເສີມ​ຄວາມ​ສະ​ເໝີ​ພາບ​ຂອງ​ແມ່​ຍິງ ແລະ​ຜູ້​ຊາຍ ຕະ​ຫລອດ​ທັງຄວາມ​ສະ​ເໝີ​ພາບ​ລະ​ຫວ່າງ​ຊົນ​ຊາດ ຊົນ​ເຜົ່າ ໂດຍ​ສະ​ເພາະ​ແມ່ນເຊື້ອ​ສາຍ​ເອ​ເຊຍໃນ​ສະ​ຫະ​ລັດ ແລະ​ຮັກ​ຮີດ​ຄອງປະ​ເພ​ນີ​ອັນ​ດີ​ງາມ​ຂອງ​ລາວອີກ​ດ້ວຍ.

ເບິ່ງຄວາມເຫັນ

XS
SM
MD
LG