ແຮງງານລາວ ທີ່ທຳງານຢ່າງຖືກຕ້ອງ ຕາມກົດໝາຍໃນໄທ
ມີສິດໃນການຊື້ປະກັນສຸຂະພາບ ແລະ ໄດ້ຮັບການຄຸ້ມຄອງ
ເຊັ່ນດຽວກັນກັບບັນດາແຮງງານ ທີ່ເປັນຄົນໄທ ໃນທຸກໆ
ດ້ານແລ້ວ.
ທ່ານອຳນວຍ ກາຈີນະ ຮອງຫົວໜ້າຫ້ອງການ ກະຊວງສາທາລະນະສຸກຂອງໄທ ຖະແຫລງ ຢືນຢັນວ່າ ແຮງງານຈາກລາວ ຊຶ່ງລວມເຖິງແຮງງານຈາກມຽນມາ ກຳປູເຈຍ ແລະ
ຫວຽດນາມ ທີ່ທຳງານຢູ່ໃນໄທ ຢ່າງຖືກຕ້ອງຕາມກົດໝາຍນັ້ນ ມີສິດໃນການຊື້ປະກັນ
ເພື່ອຂໍຮັບການຄຸ້ມຄອງ ດ້ານສຸຂະພາບອະນາໄມ ຢ່າງສະເໝີພາບ ກັບບັນດາແຮງງານ
ທີ່ເປັນຄົນໄທໃນທຸກໆດ້ານແລ້ວ ນັບແຕ່ວັນທີ 1 ເມສາ 2015 ເປັນຕົ້ນມາ.
ທັງນີ້ໂດຍມີ 3 ລະຍະຂອງການປະກັນສຸຂະພາບ ໃຫ້ເລືອກ ຄື ລະຍະ 1 ປີ ລະຍະ 6 ເດືອນ ແລະ ລະຍະ 3 ເດືອນດ້ວຍອັດຕາຄ່າທຳນຽມ 2,100 ບາດ 1,400 ບາດ ແລະ 1,000 ບາດ ຕາມລຳດັບ ສ່ວນເດັກນ້ອຍອາຍຸ ຕ່ຳກວ່າ 7 ປີ ທີ່ເປັນລູກ ຫຼື ຜູ້ຕິດຕາມ ຂອງບັນດາແຮງງານເຫຼົ່ານີ້ ກໍຈະເສຍຄ່າທຳນຽມພຽງແຕ່ 365 ບານຕໍ່ປີເທົ່ານັ້ນ.
ທ່ານອຳນວຍ ໄດ້ໃຫ້ການຢືນຢັນດ້ວຍວ່າ ແຮງງານລາວ
205,215 ຄົນ ແລະ ຜູ້ຕິດຕາມ 8,884 ຄົນ ທີ່ມີສິດຊື້ປະກັນ
ສຸຂະພາບ ຕາມມາດຕະການໃໝ່ດັ່ງກ່າວນີ້ ຂອງທາງການໄທ
ຫາກແຕ່ວ່າ ເຄືອຂ່າຍ ອົງການເພື່ອໃຫ້ການຊ່ວຍເຫຼືອ ແກ່
ແຮງງານຕ່າງດ້າວໃນໄທ ກໍເຊື່ອວ່າ ມີແຮງງານລາວອີກຫຼາຍ
ກວ່າ 2 ແສນຄົນ ທີ່ບໍ່ໄດ້ຮັບສິດດັ່ງກ່າວນີ້ ເນື່ອງຈາກວ່າ ຍັງ
ບໍ່ໄດ້ແຈ້ງຈົດທະບຽນຢ່າງຖືກຕ້ອງ ຈຶ່ງເປັນກຸ່ມແຮງງານ ທີ່ບໍ່
ມີໂອກາດ ໄດ້ຮັບການຄຸ້ມຄອງສຸຂະພາບດັ່ງກ່າວ ທັງຍັງສ່ຽງ
ທີ່ຈະຕ້ອງຕົກໄປເປັນເຫຍື່ອ ຂອງຂະບວນການຄ້າມະນຸດ
ໃນໄທອີກດ້ວຍ.
ທາງດ້ານພົນເອກ ສົມຍົດ ພຸ່ມພັນມ່ວງ ຜູ້ບັນຊາການສຳນັກງານຕຳຫຼວດແຫ່ງຊາດໄທ
ຢືນຢັນວ່າ ການຄ້າມະນຸດເປັນບັນຫາ ຮີບດ່ວນ ທີ່ທາງການຕຳຫຼວດໄທ ກຳລັງດຳເນີນ
ມາດຕະການປາບປາມ ແລະ ສະກັດກັ້ນຢ່າງເຂັ້ມງວດທີ່ສຸດ ໃນເວລານີ້ ເພາະເປັນບັນຫາ
ທີ່ເກີດຂຶ້ນຢ່າງກວ້າງຂວາງ ທັງຍັງໄດ້ສົ່ງຜົນກະທົບຕໍ່ຄວາມສະຫງົບຮຽບຮ້ອຍ ໃນສັງຄົມ
ໄທ ທຸກລະດັບອີກດ້ວຍ.
ໂດຍສະເພາະແມ່ນການຄ້າແຮງງານ ຜິດກົດໝາຍຈາກມຽນມາ ກຳປູເຈຍ ແລະ ລາວນັ້ນ
ຍັງໄດ້ກາຍເປັນບັນຫາທີ່ກ່ຽວຂ້ອງ ກັບການຄ້າປະເວນີ ທັງໂດຍສະມັກໃຈ ແລະ ຖືກບີບ
ບັງຄັບ ຊຶ່ງໃນນີ້ກໍລວມເຖິງແຮງງານເດັກ ແລະ ແມ່ຍິງຈາກລາວດ້ວຍ ເພາະສະນັ້ນ ຈຶ່ງ
ເຮັດໃຫ້ສຳນັກງານຕຳຫຼວດແຫ່ງຊາດໄທ ຕ້ອງດຳເນີນມາດຕະການປາບປາມ ໃນຂັ້ນ
ເດັດຂາດ ຢູ່ໃນເຂດຊາຍແດນໄທ ທີ່ຕິດຕໍ່ກັບລາວ ເນື່ອງຈາກເປັນເຂດ ທີ່ມີບັນຫາເກີດ
ຂຶ້ນຫຼາຍທີ່ສຸດ ດັ່ງທີ່ ພົນຕຳຫຼວດເອກ ສົມຍົດ ໄດ້ຢືນຢັນວ່າ:
“ໃນການປ້ອງກັນ ປາບປາມການຄ້າມະນຸດ ໄດ້ກວດຂັນ ຈັບກຸມເຄືອຂ່າຍນຳແຮງ
ງານເດັກ ແລະຜູ້ຍິງລາວ ເຂົ້າມາລັກລອບຂາຍປະເວນີ ຫຼື ບັງຄັບຄ້າປະເວນີໃນ
ພື້ນທີ່ ຈັງຫວັດໜອງຄາຍ ໂດຍປັດຈຸບັນນີ້ ຢູ່ລະຫວ່າງການສືບສວນຂະຫຍາຍຜົນ
ເພື່ອທີ່ຈະທຳການຢຶດຊັບ ແລະດຳເນີນການຕໍ່ນາຍທຶນຜູ້ທີ່ໃຫ້ການສະໜັບສະໜຸນ
ຜູ້ທີ່ຢູ່ເບື້ອງຫຼັງການຄ້າມະນຸດ ຊຶ່ງຂ້າພະເຈົ້າຈະດຳເນີນການຢ່າງເຂັ້ມງວດ ເພື່ອ
ທີ່ຈະຂຸດຮາກຖອນໂຄນ ບໍ່ໃຫ້ມີການກະທຳຜິດໄດ້ອີກຕໍ່ໄປ ແລະ ໃນວັນນີ້ ທ່ານ
ນາຍົກລັດຖະມົນຕີ ຈະໄດ້ປະກາດໃຫ້ເປັນວາລະແຫ່ງຊາດ.”
ທາງດ້ານກະຊວງປ້ອງກັນຄວາມສະຫງົບຂອງລາວ ໄດ້ເລີ້ມການຈັດຕັ້ງປະຕິບັດມາດຕະ
ການບໍ່ອະນຸຍາດໃຫ້ເຍົາວະຊົນລາວ ອາຍຸຕ່ຳກວ່າ 18 ປີ ເດີນທາງໄປໄທ ໂດຍລຳພັງ
ຢ່າງເດັດຂາດ ເມື່ອບໍ່ນານມານີ້ ໂດຍຖືເປັນມາດຕະການປ້ອງກັນ ບໍ່ໃຫ້ເຍົາວະຊົນລາວ
ຕ້ອງຕົກໄປເປັນເຫຍື່ອ ຂອງການຄ້າມະນຸດໃນໄທ ໂດຍສະເພາະແມ່ນ ເຍົາວະຊົນລາວ
ເພດຍິງນັ້ນ ຖືເປັນກຸ່ມປະຊາກອນລາວທີ່ໄດ້ຕົກເປັນເຫຍື່ອຂອງການຄ້າມະນຸດ ແລະ ຖືກ
ບີບບັງຄັບໃຫ້ຕ້ອງຂາຍບໍລິການທາງເພດ ຢູ່ໃນໄທຫຼາຍຂຶ້ນນັບມື້.
ແຕ່ຢ່າງໃດກໍຕາມ ໃນລະຍະ 14 ປີມານີ້ ທາງການໄທ ກໍສາມາດໃຫ້ການຊ່ວຍເຫຼືອແຮງງານລາວ ທີ່ສ່ວນໃຫຍ່ເປັນເຍົາວະຊົນທີ່ຕົກເປັນເຫຍື່ອຂອງການຄ້າມະນຸດໃນໄທໄດ້ພຽງ 2,217 ຄົນເທົ່ານັ້ນ.
