ເຈົ້າໜ້າທີ່ຂັ້ນສູງຂອງສູນຕ້ານໂຣກເອດແຫ່ງຊາດລາວໄດ້ໃຫ້
ການຄາດໝາຍວ່າຄົນລາວຈະຕິດເຊື້ອໂຣກ HIV-AIDS
ເພີ້ມຂຶ້ນເປັນຫຼາຍກວ່າ 1,400 ຄົນພາຍໃນປີ 2015 ເປັນຢ່າງຊ້າ ຖ້າຫາກວ່າອັດຕາສະ ເລ່ຍການຕິດເຊື້ອໃນກຸ່ມຄົນລາວຈະຍັງຄົງເພີ່ມສູງຂຶ້ນຢ່າງຕໍ່ເນື່ອງຄືກັບໃນຕະຫຼອດໄລຍະ
20 ປີມານີ້ ໂດຍສະເພາະແມ່ນການຕິດເຊື້ອໂລກ HIV-AIDS ໃນກຸ່ມປະຊາກອນເພດຍິງ
ຂອງລາວນັ້ນກໍຍັງຖືວ່າໄດ້ມີການເພີ່ມສູງຂຶນຢ່າງໄວວ່າທີ່ສູດເມື່ອທຽບກັບປະເທດອື່ນໆໃນ
ພູມີພາກເອເຊຍອີກດ້ວຍ ຊຶ່ງກໍຄືເພີ່ມຈາກ 18% ໃນປີ 1990 ຂຶ້ນມາເປັນ 35% ຂອງ ຈໍານວນຜູ້ຕິດເຊື້ອທັງໝົດໃນປີ 2010 ທີ່ຜ່ານມາ.
ຈາກການສຸ່ມກວດເລືອດຂອງປະຊາຊົນລາວຫລາຍກວ່າ 2 ແສນຄົນໃນ 17 ແຂວງທົ່ວ
ປະເທດໃນຊ່ວງປີ 1990 ຫາທ້າຍປີ 2010 ທີ່ຜ່ານມານັ້ນ ກໍພົບວ່າມີຄົນລາວຕິດເຊື້ອ
ຈໍານວນ 4,272 ຄົນ ຊຶ່ງໃນຈຳນວນດັ່ງກ່າວນີ້ ກໍປາກົດວ່າມີຜູ້ທີ່ເປັນໂຣກເອດສ໌ຢ່າງສົມ
ບູນແບບແລ້ວ ຈໍານວນເຖິງ 2,376 ຄົນ ແລະກໍໄດ້ເສຍຊີວິດໄປແລ້ວເຖິງ 1,170 ຄົນ
ຫລືຄິດເປັນອັດຕາສ່ວນ ສູງກວ່າ 27% ຂອງຈຳນວນທັງໝົດ ຊຶ່ງກໍເປັນຍ້ອນວ່າລະບົບ
ການບໍລິການດ້ານການປິ່ນປົວ ແລະການຮັກສາສຸຂະພາບຂອງລັດຖະບານນັ້ນ ຍັງຄົງ
ບໍ່ສາມາດທີ່ຈະໃຫ້ການເບິ່ງແຍງບັນດາຄົນລາວທີ່ຕິດເຊື້ອໂຣກດັ່ງກ່າວນີ້ ໄດ້ຢ່າງທົ່ວເຖິງ
ເນື່ອງຈາກວ່າໃນປັດຈຸບັນ ຍັງຄົງມີສູນປິ່ນປົວຄົນຕິດເຊື້ອໂລກ HIV-AIDs ຂອງລັດຖະ
ບານລາວພຽງ 7 ແຫ່ງເທົ່ານັ້ນໃນທົ່ວປະເທດ ໂດຍ 2 ແຫ່ງ ຢູໃນເຂດນະຄອນວຽງຈັນ.
ສ່ວນອີກ 5 ແຫ່ງ ຕັ້ງຢູ່ໃນແຂວງສະຫວັນນະເຂດ, ຈໍາປາສັກ, ຫຼວງພະບາງ, ບໍ່ແກ້ວ
ແລະຫລວງນໍ້າທາ.
ພ້ອມກັນນັ້ນ ເມື່ອປະກອບກັບ
ການທີ່ລາວເປັນປະເທດທີ່ມີຈຸດ
ທີ່ຕັ້ງຢູ່ເຂດສູນກາງທີ່ສາມາດຈະ
ເຊື່ອມຕໍ່ກັບທຸກປະເທດທີ່ຕັ້ງຢູ່ໃນ
ເຂດລຸ່ມແມ່ນໍ້າຂອງດ້ວຍກັນໄດ້
ໃນທຸກທິດທຸກທາງດ້ວຍແລ້ວ
ກໍຍັງນັບເປັນປັດໃຈສໍາຄັນທີ່ຈະ
ເຮັດໃຫ້ປະຊາຊົນລາວມີຄວາມ
ສ່ຽງຢ່າງສູງ ທີ່ຈະຕິດເຊື້ອໂຣກ
ດັ່ງກ່າວນີ້ ຫລາຍຂຶ້ນນັບມື້ອີກ
ດ້ວຍ ໂດຍສະເພາະແມ່ນການ
ຕິດເຊື້ອຈາກການມີເພດສໍາພັນ
ດັ່ງທີ່ເຈົ້າໜ້າທີ່ລາວໄດ້ໃຫ້ການ
ຊີ້ແຈງໃນຕອນນຶ່ງວ່າ:
“ການຕິດເຊື້ອທາງເພດສໍາພັນຢູ່ບ້ານເຮົາເຫັນວ່າມັນເພີ່ມຫລາຍຂຶ້ນ ແລະຢູ່ໃນຂົງເຂດປະເທດອ້ອມຂ້າງຂອງເຮົາກໍມີການຕິດເຊື້ອຫລາຍຂຶ້ນ ແລະປະເທດເຮົາກໍເປັນທາງຜ່ານ ຊຶ່ງແນ່ນອນການເດີນທາງໄປມາຫາສູ່ກັນຂອງບັນດານັກທ່ອງທ່ຽວ ກໍແມ່ນບັນຫາທີ່ສະກັດກັ້ນບໍ່ໄດ້”
ກຸ່ມປະຊາກອນລາວທີ່ຕິດເຊື້ອໂຣກ HIV-AIDS ຫລາຍທີ່ສຸດ ກໍຄືກຸ່ມແມ່ຍິງທີ່ປະກອບອາ
ຊີບຢູ່ໃນພາກບໍລິການ, ກຸ່ມແຮງງານເຄື່ອນຍ້າຍ, ກຸ່ມທີ່ຊົມໃຊ້ຢາເສບຕິດ, ກຸ່ມແຮງງານ
ອຸດສາຫະກໍາ, ກຸ່ມນັກຮຽນນັກສຶກສາທີ່ຢູ່ຕາມຫໍພັກ ແລະກຸ່ມຮັກຮ່ວມເພດ ເນື່ອງຈາກ
ຖືວ່າເປັນກຸ່ມທີ່ມີຄວາມສຸ່ມສ່ຽງທີ່ຈະໄດ້ຮັບເຊື້ອ HIV-AIDS ຫລາຍທີ່ສຸດ.
ລາຍງານຂອງກະຊວງສາທາລະນະສຸກລາວໄດ້ລະບຸວ່າສາເຫດສໍາຄັນທີ່ເຮັດໃຫ້ຄົນລາວຕິດ
ເຊື້ອ HIV-AIDS ຫລາຍທີ່ສຸດນັ້ນ ກໍຄືການມີເພດສໍາພັນໂດຍບໍ່ມີການປ້ອງກັນດ້ວຍການ
ສວມຖົງຢາງອະນາໄມ ໂດຍສະເພາະແມ່ນການຕິດເຊື້ອໃນກຸ່ມຜູ້ຍິງທີ່ຂາຍບໍລິການທາງເພດ
ແລະການຮັກຮ່ວມເພດດຽວກັນນັ້ນ ກໍຍັງນັບເປັນພາຫະນະທີ່ເຮັດໃຫ້ມີການແຜ່ລະບາດຂອງ
ເຊື້ອໂຣກຢ່າງໄວວາອີກດ້ວຍ.
ນອກຈາກນັ້ນ ກຸ່ມແຮງງານລາວທີ່ໄດ້ພາກັນໄປລັກລອບທໍາງານໂດຍຜິດກົດໝາຍຢູ່ໃນປະ
ເທດເພື່ອນບ້ານ ໂດຍສະເພາະແມ່ນປະເທດໄທ ກໍນັບວ່າເປັນອີກກຸ່ມນຶ່ງທີ່ມີຄວາມສ່ຽງຢ່າງ
ສູງທັງໃນຖານະທີ່ເປັນຜູ້ຮັບເຊື້ອແລະຜູ້ນໍາເອົາເຊື້ອໂຣກໄປຕິດຕໍ່ເຖິງຄົນຮັກ ໂດຍສະເພາະ
ແມ່ນກຸ່ມແຮງງານລາວເພດຍິງທີ່ພາກັນລັກລອບທໍາງານຢູ່ໃນໄທໂດຍຜິດກົດໝາຍ ກໍຍັງມີ
ໂອກາດທີ່ຈະຖືກບັງຄັບໃຫ້ຕ້ອງຂາຍບໍລິການທາງເພດໂດຍບໍ່ມີການປ້ອງກັນຕົນເອງນັ້ນ
ຖືເປັນກຸ່ມທີ່ສຸ່ມສ່ຽງທີ່ສຸດ ໃນການນຳເອົາເຊື້ອໂຣກເຂົ້າມາໃນລາວ.
