ລັດຖະບານລາວຈະບໍ່ສາມາດຫຼຸດອັດຕາເງິນເຟີ້ໃຫ້ລົງສູ່ລະດັບ 1 ຕົວເລກໄດ້ໃນປີ 2025 ໂດຍຄາດວ່າຈະສາມາດປະຕິບັດໄດ້ດີທີ່ສຸດທີ່ລະດັບ 11% ຖ້າຫາກວ່າການສົ່ງສິນຄ້າອອກໄປຕ່າງປະເທດເປັນໄປຕາມແຜນການທີ່ວາງໄວ້.
ທ່ານນາງ ວັດທະນາ ດາລາລອຍ ຮັກສາການຜູ້ວ່າການທະນາຄານແຫ່ງຊາດລາວ ໄດ້ຖະແຫຼງວ່າລັດຖະບານລາວຈະບໍ່ສາມາດແກ້ໄຂບັນຫາເງິນເຟີ້ທີ່ສູງກວ່າ 25% ໃຫ້ຫຼຸດລົງມາຍູ່ທີ່ລະດັບທີ່ເປັນຕົວເລກໂຕດຽວໄດ້ ໃນປີ 2025 ຍ່າງແນ່ນອນ ເພາະວ່າລາວຍັງຕ້ອງປະເຊີນກັບບັນຫາການຂາດດຸນການຄ້າຕ່າງປະເທດຢ່າງຕໍ່ເນື່ອງ ໂດຍນ້ຳມັນ, ຍານພາຫະນະ, ເຄື່ອງຈັກ ແລະ ສິນຄ້າອຸບປະໂພກບໍລິໂພກ ກໍຍັງເປັນປະເພດສິນຄ້ານຳເຂົ້າທີ່ເຮັດໃຫ້ລາວປະສົບກັບບັນຫາຂາດດຸນການຄ້າກັບຕ່າງປະເທດຫຼາຍທີ່ສຸດ.
ເພາະສະນັ້ນ, ຖ້າຫາກວ່າລາວສາມາດຫຼຸດຜ່ອນການນໍາເຂົ້າສິນຄ້າດັ່ງກ່າວດ້ວຍການສົ່ງເສີມການຜະລິດພາຍໃນໃຫ້ເພິ່ມຂື້ນໄດ້ຍ່າງແທ້ຈິງນັ້ນ ກໍຈະເຮັດໃຫ້ອັດຕາເງິນເຟີ້ຫຼຸດລົງ ໂດຍຄາດຫວັງວ່າຈະຫຼຸດອັດຕາເງິນເຟີ້ໃນລາວລົງສູ່ລະດັບ 11% ໃຫ້ໄດ້ໃນປີ 2025 ດັ່ງທີ່ ທ່ານນາງ ວັດທາະນາ ໃຫ້ການຢືນຢັນວ່າ
“ໃນປີ 2025, ຄາດວ່າຈະຢູ່ໃນລະດັບສະເລ່ຍປະມານ 11%. ບໍ່ທັນໄດ້ 1 ໂຕເລກ ແຕ່ວ່າຈະຕ້ອງໄດ້ປະຕິບັດ 4 ວຽກ ງານມະຫາພາກໃຫ້ກົມກຽວກັນ ຊຶ່ງລວມມີວຽກງານເງິນຕາ, ວຽກການເງິນ, ວຽກການຄ້າຕ່າງປະເທດ ແລະ ວຽກງານຊຸກຍູ້ການຜະລິດພາຍໃນຂອງພວກເຮົາ ຊຶ່ງທັ້ງ 4 ບັນຫານີ້ ປັດຈຸບັນ ລັດຖະບານ ແລະ ຂະແຫນງການທີ່ກ່ຽວຂ້ອງກຳລັງສຸມໃສ່ຈັດຕັ້ງປະຕິບັດ.”
ແຕ່ຍ່າງໃດກໍ່ຕາມ ຖ້າຫາກວ່າລວມມູນຄ່າການສົ່ງອອກພະລັງງານໄຟຟ້າ ເຂົ້າາດ້ວຍນັ້ນ ກໍຈະເຮັດໃຫ້ລາວເປັນຝ່າຍທີ່ໄດ້ປຽບດຸນການຄ້າຕ່າງປະເທດ ແຕ່ເນື່ອງຈາກວ່າພະລັງງານໄຟຟ້າທີ່ສົ່ງອອກນັ້ນເປັນການລົງທຶນຂອງບໍລິສັດຕ່າງປະເທດທີ່ກູ້ຢືມທຶນຈາກຕ່າງປະເທດ ຈຶ່ງຕ້ອງນຳໃຊ້ລາຍຮັບສ່ວນຫລາຍທີ່ໄດ້ຮັບຈາກການສົ່ງອອກໄຟຟ້ານັ້ນໄປເພື່ອການຊຳລະຫນີ້ດັງກ່າວ ເພາະສະນັ້ນ ຈຶ່ງບໍ່ໄດ້ໂອນເງິນຕາທີ່ໄດ້ຈາກການສົ່ງອອກພະລັງງານໄຟຟ້າ ເຂົ້າສູ່ລະບົບທະນາຄານໃນລາວແຕ່ຢ່າງໃດ.
ພາຍໃຕ້ສະພາບການດັງກ່າວນີ້ ນອກຈາກຈະເຮັດໃຫ້ລັດຖະບານລາວບໍ່ສາມາດ ແກ້ໄຂວິກິດການເສດຖະກິດ-ການເງິນໄດ້ຢ່າງເປັນຮູບປະທໍາພາຍໃນປີ 2024 ນີ້ ໂດຍສະເພາະ ແມ່ນອັດຕາເງິນເຟີ້ສູງ ແລະດັດສະນີລາຄາການຊົມໃຊ້ທີ່ປັບຕັວສູງຂຶ້ນນັບມື້ ກໍຍັງໄດ້ສົ່ງຜົນກະທົບເຮັດໃຫ້ຄ່າເງິນກີບຕົກຕ່ຳລົງ. ໂດຍທີ່ລັດຖະບານລາວບໍ່ສາມາດກໍານົດອັດຕາແລກປ່ຽນ ແລະຄວບຄຸມການແລກປ່ຽນເງິນຕາໃນຕະຫຼາດທີ່ເປັນຈິງໄດ້ເລີຍເພາະວ່າການຂາດດຸນການຄ້າ ໄດ້ເຮັດໃຫ້ທຶນສຳຮອງເງິນຕາຕ່າງປະເທດຂອງລາວ ຫຼຸດລົງນັບມື້ ສະນັ້ນຈຶ່ງບໍ່ແມ່ນເລື່ອງງ່າຍທີ່ຈະແກ້ໄຂວິກິດການທາງເສດຖະກິດໃນລາວໄດ້ຍ່າງແທ້ຈິງ ດັ່ງເຈົ້າໜ້າທີ່ຂັ້ນສູງຂອງລາວ ໄດ້ໃຫ້ການຍອມຮັບວ່າ
“ບັນຫາເງິນເຟີ້ນີ້ ກໍຖືວ່າເປັນບັນຫາທີ່ຫຍຸ້ງຍາກພໍສົມຄວນໃນການຄຸ້ມຄອງທີ່ເປັນສາເຫດໃຫ້ອັດຕາແລກປ່ຽນອ່ອນຄ່າ ປີ 2024 ນີ້ ຈັງຫວະການອ່ອນຄ່າຂອງອັດຕາແລກປ່ຽນນີ້ກໍຢັງສືບຕໍ່ ສະນັ້ນບັນຫາອັດຕາເງິນເຟີ້ນີ້ ຕົ້ນ ຕໍກໍແມ່ນບັນຫາອັດຕາແລກປ່ຽນ ພວກເຮົາຈະຕ້ອງຄຸ້ມຄອງບັນຫາອັດຕາແລກປ່ຽນນີ້ເພື່ອເຮັດໃຫ້ມັນມີຄວາມຫມັ້ນຄົງຫຼາຍກ່ວາເກົ່າ ເພື່ອເຮັດໃຫ້ບັນຫາເງິນເຟີ້ຫຼຸດລົງໄດ້ ສະເພາະບັນຫາອັດຕາແລກປ່ຽນນີ້ ພວກເຮົາກຳລັງຄົ້ນຄວ້າມາດຕະການເພີ່ມເຕີມເພື່ອເຮັດແນວໃດ? ເພື່ອຈະຊ່ວຍຢຸດການເຫນັງຕິງຂອງອັດຕາແລກປ່ຽນເພີ່ມຂຶ້ນ”
ຍິ່ງໄປກວ່ານັ້ນ, ບັນຫາເງິນເຟີ້ ແລະ ຄ່າເງິນກີບຕົກຕ່ຳລົງດັ່ງກ່າວນີ້ ກໍຍັງໄດ້ສົ່ງຜົນກະທົບຕໍ່ລະດັບລາຍໄດ້ສະ ເລ່ຍຂອງປະຊາກອນລາວອີກດ້ວຍ ເມື່ອໃສ່ເປັນເງິນໂດລາ ສະຫະລັດ ກໍຄືສໍາລັບປະຊາຊົນໃນທົ່ວປະເທດທີ່ມີລາຍໄດ້ສະເລ່ຍ 28.97 ລ້ານກີບ ຫຼືເທ່າກັບ 2,022 ໂດລາຕໍ່ຄົນ ໃນປີ 2022 ນັ້ນ ກໍຈະຄິດເປັນພຽງແຕ່ $1,308 ຕໍ່ຄົນເທ່ານັ້ນ ຖ້າອີງໃສ່ອັດຕາແລກປ່ຽນໃນທະນາຄານທີ່ອັດຕາສະເລ່ຍ 1 ໂດລາຕໍ່ 22,140 ກີບໃນຂະນະທີ່ອັດຕາແລກປ່ຽນໃນຕະຫຼາດຕົວຈິງໄດ້ປັບຂຶ້ນເປັນຫຼາຍກວ່າ 26,000 ກີບຕໍ່ໂດລາສະຫະລັດ.
ຟໍຣັມສະແດງຄວາມຄິດເຫັນ