ທາງການລາວກັບຈີນໄດ້ຮ່ວມກັນຈັດພິທີເປີດຫຼັກໝາຍເຂດແດນໃໝ່ ທີ່ຕັ້ງຢູ່ລະຫວ່າງດ່ານບໍ່ເຕັນ ຢູ່ແຂວງຫຼວງນ້ຳທາຂອງລາວ ກັບດ່ານບໍ່ຫ່ານ ໃນເຂດສິບສອງພັນນາຂອງຈີນຢ່າງເປັນທາງການເມື່ອບໍ່ນານມານີ້. ໂດຍມີທ່ານ ຫຽມ ພົມມະຈັນ ກັບທ່ານ ຫຼິວ ເຈິ່ນໝິງ, ລັດຖະມົນຕີຊ່ວຍວ່າການຕ່າງປະເທດຂອງທັງສອງຝ່າຍເປັນປະທານໃນ
ພິທີຮ່ວມກັນ.
ຫຼັກໝາຍເຂດແດນໃໝ່ດັ່ງກ່າວນີ້ ຖືເປັນຫຼັກໝາຍທຳອິດ ພາຍໃຕ້ຂໍ້ຕົກລົງວ່າດ້ວຍການປັກຫຼັກໝາຍເຂດແດນລະ
ຫວ່າງລາວກັບຈີນເພີ່ມຕື່ມຂຶ້ນຈຳນວນ 104 ຫຼັກໝາຍໃນຕະຫຼອດແນວເຂດຕິດຕໍ່ຊາຍແດນລະຫວ່າງສອງປະເທດທີ່ມີໄລຍະທາງຍາວທັງໝົດ 505 ກິໂລແມັດ, ຊຶ່ງນອກຈາກຈະເຮັດໃຫ້ເຂດຊາຍແດນລະຫວ່າງສອງປະເທດມີຄວາມເຊັດເຈນຫຼາຍຂື້ນແລ້ວກໍ່ຍັງຈະເຮັດໃຫ້ງ່າຍຕໍ່ການທີ່ຈະດຳເນີນໂຄງການພັດທະນາຕ່າງໆ ຢູ່ໃນເຂດຊາຍແດນສອງປະເທດໃນໄລຍະຕໍ່ໄປອີກດ້ວຍ.
ທັ້ງນີ້ກໍ່ເນື່ອງຈາກວ່າ ການຮ່ວມມືລະຫວ່າງ
ລາວກັບຈີນໄດ້ຂະຫຍາຍຕົວເພີ່ມຂື້ນນັບມືໃນ
ທຸກໆດ້ານເຊັ່ນ:ການຄ້າສອງຝ່າຍທີ່ມີມູນຄ່າ
ລວມເກີນກວ່າ 1,000 ລ້ານໂດລາເມື່ອປີ
ກາຍ ສ່ວນການລົງທຶນຂອງຈີນຢູ່ໃນລາວ
ນັ້ນກໍມີມູນຄ່າລວມເກີນກວ່າ 3,600 ລ້ານ
ໂດລາ ຊຶ່ງກໍເຮັດໃຫ້ຈີນກາຍເປັນຜູ້ລົງທຶນ
ອັນດັບ 1 ໃນລາວແລ້ວໃນປະຈຸບັນນີ້.
ເພາະສະນັ້ນ ເພື່ອເປັນການປ້ອງກັນບໍ່ໃຫ້
ເກີດບັນຫາຂໍ້ຂັດແຍ້ງລະຫວ່າງປະຊາຊົນ
ທີ່ຢູ່ຊາຍແດນທັງສອງປະເທດ ຈຶ່ງຕ້ອງມີການປັກຫຼັກໝາຍເຂດແດນເພີ້ມຕື່ມຂຶ້ນອີກດັ່ງກ່າວ.
ຍິ່ງໄປກວ່ານັ້ນ ທາງການລາວ ແລະ ຈີນຍັງໄດ້ຕົກລົງຮ່ວມກັນດ້ວຍວ່າ ຈະພັດທະນາເຂດ
ຊາຍແດນລະຫວ່າງສອງປະເທດໃຫ້ເປັນຊາຍແດນແຫ່ງມິດຕະພາບ, ສັນຕິພາບ ແລະການ
ຮ່ວມມືຢ່າງແທ້ຈິງອີກດ້ວຍ. ດັ່ງທີ່ທ່ານ ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະ
ມົນຕີວ່າການກະຊວງການຕ່າງປະເທດລາວ ໄດ້ຖະແຫລງຢືນຢັນວ່າ:
“ສາຍພົວພັນມິດຕະພາບ ແລະການຮ່ວມມືລະຫວ່າງສອງປະເທດລາວ-ຈີນໄດ້ຮັບ
ການພັດທະນາໃຫ້ເຕີບໃຫຍ່
ຂະຫຍາຍຕົວເປັນກ້າວໆມາ
ໂດຍສະເພາະໃນຊຸມປີ 90
ນັ້ນ ທັງສອງປະເທດ ໄດ້ແກ້
ໄຂບັນຫາຊາຍແດນ ທີ່ຕົກ
ທອດມາແຕ່ປະຫວັດສາດ
ໄດ້ຢ່າງສົມບູນ ອັນໄດ້ເຮັດ
ໃຫ້ຊາຍແດນລະຫວ່າງສອງ
ປະເທດໄດ້ກາຍເປັນຊາຍ
ແດນແຫ່ງສັນຕິພາບ ມິດຕະ
ພາບ ແລະຄວາມໝັ້ນຄົງ ຍາວນານ”.
ທາງກາລາວ ແລະຈີນ ໄດ້ຮ່ວມກັນສຳຫຼວດ ແລະປັກຫຼັກໝາຍເຂດແດນໄລຍະທຳອິດແລ້ວເສັດໃນປີ 1993 ໂດຍມີຫຼັກໝາຍເຂດຊາຍແດນທັງໝົດຈຳນວນ 47 ຫຼັກໝາຍ ໃນຕະຫຼອດຊາຍແດນທີ່ມີໄລຍະຍາວ 505 ກິໂລແມັດ. ສ່ວນການປັກຫຼັກເຂດແດນໃໝ່ເພີ່ມຕື່ມຂຶ້ນນີ້ກໍຄາດວ່າຈະແລ້ວເສັດທັງ 104 ຫຼັກໝາຍໃນທ້າຍປີ 2011 ນີ້ ແລະສຳລັບໃນປີ 2012 ນັ້ນທາງກາງຂອງທັງສອງຝ່າຍກໍ່ຍັງໄດ້ຕັ້ງເປົ້າໝາຍວ່າ ຈະຮ່ວມກັນຈັດທຳແຜນທີ່ຊາຍແດນສະ ບັບໃໝ່ໃຫ້ແລ້ວເສັດອີກດ້ວຍ.
ລາວ ແລະຈີນ ໄດ້ສະຖາປະນາຄວາມສໍາ
ພັນທາງການທູດລະຫວ່າງກັນນັບຈາກປີ 1961 ເປັນຕົ້ນມາ ຊຶ່ງກໍຄົບຮອບ 50 ປີ ໃນປີນີ້ພໍດີ ປະຈຸບັນນີ້ ຈີນນັບເປັນປະເທດນຶ່ງທີ່ໄດ້ໃຫ້ການຊ່ວຍເຫຼືອແກ່ລາວເພີ່ມຫຼາຍຂຶ້ນນັບມື້ ເຊິ່ງຖ້ານັບຈາກປີ 1990 ຈົນເຖິງທ້າຍປີ 2010 ນັ້ນ ກໍປະກົດວ່າລັດຖະບານຈີນໄດ້ໃຫ້ການຊ່ວຍເຫຼືອທາງດ້ານງົບປະມານແກ່ລັດຖະບານລາວຄິດເປັນມູນຄ່າລວມຫຼາຍກວ່າ 6,500 ລ້ານຢວນ ຫຼືເທົ່າກັບ 1,850 ລ້ານໂດລາສໍາລັບນໍາໃຊ້ເຂົ້າໃນການພັດທະນາ 130 ກວ່າໂຄງການໃນລາວ.
ສ່ວນດ້ານການຄ້າລະຫວ່າງລາວກັບຈີນໃນຕະຫຼອດປີ 2010 ທີ່ຜ່ານມານັ້ນ ກໍມີມູນຄ່າ
ລວມສູງກວ່າເປົ້າໝາຍ ທີ່ທາງການທັງສອງຝ່າຍໄດ້ວາງເອົາໄວ້ ຊຶ່ງກໍຄືໃນຂະນະທີ່ເປົ້າ
ໝາຍໄດ້ວາງເອົາໄວ້ທີ່ລະດັບ 1,000 ລ້ານໂດລານັ້ນ ກໍ່ປະກົດວ່າ ການຄ້າທີ່ທັງສອງຝ່າຍ ປະຕິບັດໄດ້ຈິງນັ້ນມີມູນຄ່າລວມເຖິງ 1,055 ລ້ານໂດລາ. ແລະເຊື່ອວ່າຈະເພີ່ມຂື້ນຫຼາຍ
ກວ່າ 2,000 ລ້ານໂດລາໃນປີ 2015 ແລະເກີນກວ່າ 5,000 ລ້ານໂດລາໃນປີ 2020 ອີກດ້ວຍ.
