ກອງທັບອິສຣາແອລກ່າວໃນວັນອັງຄານມື້ນີ້ວ່າ ກອງກໍາລັງຂອງຕົນໄດ້ເຂົ້າຍຶດ ເມືອງຣາຟາ ທີ່ຢູ່ຟາກຂອງເຂດກາຊາ, ເຊິ່ງຕັ້ງຢູ່ລະຫວ່າງເຂດກາຊາ ແລະ ປະເທດ ອີຈິບ, ເປັນເວລານຶ່ງມື້ ລຸນຫຼັງມີຄໍາສັ່ງໃຫ້ຊາວປາແລັສໄຕນ໌ ຫຼາຍສິບ ພັນຄົນອອກຈາກບໍໍລິເວນດັ່ງກ່າວ ແລະໄດ້ທໍາການໂຈມຕີທາງອາກາດຊ້ຳແລ້ວ ຊ້ຳອີກ.
ປະຕິບັດການຂອງອິສຣາແອລ ມີຂຶ້ນຫຼັງຈາກຫຼາຍອາທິດທີ່ເຈົ້າໜ້າທີ່ຂອງ ອິສຣາແອລ ກ່າວວ່າການບຸກໂຈມຕີຢູ່ເມືອງຣາຟາ ແມ່ນມີຄວາມຈຳເປັນເພື່ອ ບັນລຸເປົ້າໝາຍຂອງພວກເຂົາ ທີ່ຈະເອົາຊະນະກຸ່ມຮາມາສ, ໃນຂະນະທີ່ ສະຫະລັດ, ອົງການສະຫະປະຊາຊາດ ແລະບັນດາປະເທດຕ່າງໆ ໄດ້ເຕືອນ ການໂຈມຕີໃນບໍລິເວນທີ່ມີພົນລະເຮືອນຊາວປາແລັສໄຕນ໌ ອາໄສຢູ່ຢ່າງໜາ ແໜ້ນວ່າ ສາມາດກໍ່ໃຫ້ເກີດໄພພິບັດທາງດ້ານມະນຸດສະທໍາໄດ້.
ທ່ານໂຈເຊັບ ບໍແຣລ (Josep Borrell), ປະທານດ້ານນະໂຍບາຍການຕ່າງ ປະເທດຂອງສະຫະພາບຢູໂຣບ ກ່າວຕໍ່ບັນດານັກຂ່າວໃນວັນອັງຄານມື້ນີ້ວ່າ “ສິ່ງໃດກໍຕາມທີ່ພວກເຂົາກ່າວ, ຂ້າພະເຈົ້າຢ້ານວ່າ ສິ່ງນີ້ຈະສົ່ງຜົນເຮັດໃຫ້ມີຜູ້ເສຍຊີວິດຢ່າງຫຼວງຫຼາຍອີກຄັ້ງ, ພົນລະເຮືອນໄດ້ເສຍຊີວິດຢ່າງຫຼວງຫຼາຍ, ເຊິ່ງມັນບໍ່ມີບ່ອນໃດເປັນເຂດທີ່ປອດໄພຢູ່ໃນກາຊາເລີຍ.”
ໂຄສົກກະຊວງການຕ່າງປະເທດຈີນ ທ່ານ ຫຼິນ ຈຽນ (Lin Jian) ກ່າວອ້າງ ເຖິງ “ຄວາມຕ້ອງການຢ່າງລົ້ນເຫຼືອຂອງປະຊາຄົມໂລກ” ໃນຂະນະທີ່ ຈີນ ໄດ້ ຮຽກຮ້ອງໃຫ້ ອິສຣາແອລ ຈົ່ງຢຸດບຸກໂຈມຕີໂຈມຕີຂົງເຂດກາຊາ ແລະ “ການປະຕິບັດການທຸກຢ່າງທີ່ສາມາດເຮັດໄດ້ ເພື່ອຫຼີກເວັ້ນບໍ່ໃຫ້ເກີດໄພພິບັດດ້ານມະນຸດສະທຳທີ່ຮ້າຍແຮງຫຼາຍກວ່ານີ້ຢູ່ໃນແຫຼມກາຊາ.”
ລັດຖະມົນຕີການຕ່າງປະເທດຂອງອິສຣາແອລ ທ່ານອິສຣາແອລ ແຄັດສ໌ (Israel Katz) ໄດ້ຂຽນຂໍ້ຄວາມລົງໃນສື່ສັງຄົມວ່າ ການເຄື່ອນໄຫວຂອງ ອິສຣາແອລ ເຂົ້າໄປໃນເມືອງຣາຟາ ແມ່ນກ່ຽວກັບການບັນລຸເປົ້າໝາຍຫຼັກ ຂອງຕົນ, ລວມທັງການປົດປ່ອຍໂຕປະກັນທີ່ກຳລັງຖືກຄວບຄຸມໂຕໂດຍກຸ່ມ ຮາມາສ ແລະ ການເອົາຊະນະກຸ່ມຫົວຮຸນແຮງ.
ການເຄື່ອນໄຫວຢູ່ໃນຂົງເຂດກາຊາ ຍັງໄດ້ມີຂຶ້ນລຸນຫຼັງການປະກາດໂດຍກຸ່ມຮາມາສ ທີ່ວ່າພວກເຂົາໄດ້ຮັບເອົາຂໍ້ສະເໜີຢຸດຍິງ ທີ່ຖືກດໍາເນີນການໂດຍນັກເຈລະຈາ ອີຈິບ ແລະ ກາຕ້າ.
ຟໍຣັມສະແດງຄວາມຄິດເຫັນ