ຄະນະກໍາມາທິການເສດຖະກິດ ແລະສັງຄົມແຫ່ງອົງການ
ສະຫະປະຊາຊາດ ສໍານັກງານປະຈໍາພູມມີພາກເອເຊຍ
ແລະປາຊີຟິກ (ESCAP)ໄດ້ສະເໜີລາຍງານວ່າ ລາວເປັນ
ປະເທດໜຶ່ງທີ່ກໍາລັງປະເຊີນໜ້າກັບສະພາວະເງິນເຟີ້ ໃນ
ອັດຕາທີ່ສູງເມື່ອທຽບກັບປະເທດສະມາຊິກໃນກຸ່ມອາຊຽນ
ດ້ວຍກັນ ໂດຍເປັນຮອງແຕ່ພຽງຫວຽດນາມປະເທດດຽວ ເທົ່ານັ້ນ.
ລາຍການດັ່ງກ່າວຂອງ ESCAP ໄດ້ຄາດ
ໝາຍວ່າອັດຕາເງິນເຟີ້ໃນຕະຫຼອດປີ 2011
ຂອງຫວຽດນາມ ຈະຢູ່ທີ່ລະດັບສະເຫລ່ຍ
ເຖິງ 9.9% ໃນຂະນະທີ່ອັດຕາເງິນເຟີ້ໃນອິນ
ໂດເນເຊຍຈະຢູ່ທີ່ລະດັບ 6.2%, ຟີລິບປິນ
4.4%, ໄທ 3.5% ແລະສິງກະໂປ 3.3%.
ສ່ວນຢູ່ໃນລາວນັ້ນ ຖ້າຫາກວ່າອິງຕາມການ
ລາຍງານຂອງທະນາຄານແຫ່ງຊາດລາວ ກໍ
ປາກົດວ່າ ອັດຕາເງິນເຟີ້ໄດ້ເພີ່ມຂຶ້ນຈາກ
6.06% ໃນຊ່ວງເດືອນມັງກອນມາເປັນ
7.15% ແລະ 7.66% ໃນເດືອນກຸມພາ
ແລະມີນາປີນີ້ຕາມລໍາດັບ ເຊິ່ງກໍມີສາເຫດສໍາຄັນມາຈາກລາຄານໍ້າມັນໃນຕະຫຼາດໂລກທີ່ແພງ
ຂຶ້ນຢ່າງຕໍ່ເນື່ອງນັ້ນເອງ.
ພາຍໃຕ້ສະພາບການດັ່ງກ່າວນີ້ ກໍບໍ່ພຽງແຕ່ຈະສົ່ງຜົນກະທົບຕໍ່ເປົ້າໝາຍການພັດທະນາ
ເພື່ອລົບລ້າງບັນຫາຄວາມຍາກຈົນຂອງປະຊາຊົນໃນລາວເທົ່ານັ້ນ ຫາກແຕ່ກໍຍັງເຮັດໃຫ້
ປະຊາຊົນລາວຕ້ອງປະເຊີນກັບບັນຫາສິນຄ້າລາຄາແພງຫຼາຍຂຶ້ນອີກດ້ວຍ.
ໂດຍສະເພາະແມ່ນສິນຄ້າອຸປະໂພກບໍລິໂພກນັ້ນ ໄດ້ມີການ
ປັບລາຄາສູງຂຶ້ນໃນອັດຕາສະເຫລ່ຍທີ່ເກີນກວ່າ 10% ເມື່ອ
ທຽບກັບໃນໄລຍະຕົ້ນປີ ເນື່ອງຈາກວ່າການປັບຂຶ້ນລາຄາຈໍາ
ໜ່າຍນໍ້າມັນດັ່ງກ່າວໄດ້ເປັນຜົນເຮັດໃຫ້ຕົ້ນທຶນການຜະຫລິດ
ແລະການຂົນສົ່ງສິນຄ້າໃນລາວນັ້ນໄດ້ປັບຕົວສູງຂຶ້ນອີກດ້ວຍ
ເຊັ່ນກັນ ຈຶ່ງເຮັດໃຫ້ທາງການລາວຕ້ອງຍອມອະນຸຍາດໃຫ້ມີ
ການປັບຂຶ້ນລາຄາຈໍາໜ່າຍສິນຄ້າໃນປະເທດ ດ້ວຍນັ້ນເອງ.
ນອກຈາກນີ້ ສີນຄ້າຢ່າງໜຶ່ງທີ່ທາງການລາວບໍ່ມີນະໂຍບາຍ
ທີ່ຈະຄວບຄຸມລາຄາເລຍນັ້ນກໍຄືເຂົ້າກິນ ເນື່ອງຈາກເກງວ່າ
ການຄວບຄຸມລາຄາຈະເຮັດໃຫ້ຊາວນາລາວແກ້ໄຂບັນຫາດ້ວຍການພາກັນສົ່ງເຂົ້າໄປຂາຍ
ຕ່າງປະເທດ ຫຼາຍກວ່າການຂາຍໃນປະເທດ ຊຶ່ງກໍຈະເຮັດໃຫ້ເກີດບັນຫາຂາດແຄນເຂົ້າກິນ
ພາຍໃນປະເທດລາວໄດ້ໃນໄລຍະຕໍ່ໄປ.
ແຕ່ຢ່າງໃດກໍຕາມ ສໍາລັບທາງການລາວແລ້ວກໍຍັງຄົງເຊື່ອໝັ້ນວ່າຈະສາມາດຄວບຄຸມອັດຕາ
ເງິນເຟີ້ ໃຫ້ຢູ່ໃນລະດັບທີ່ບໍ່ເກິນອັດຕາການຂະຫຍາຍຕົວທາງເສດຖະກິດໃນຕະຫຼອດແຜນ
ການປະຈໍາປີ 2010-2011 ນີ້ເຊີ່ງກໍຄືໃນອັດຕາສະເຫລ່ຍ 8% ແລະໃນຂະນະດຽວກັນກໍ
ຍັງຄົງເຊື່ອໝັ້ນວ່າຈະສາມາດຮັກສາສະເຖຍລະພາບຂອງຄ່າເງິນກີບໄດ້ອີກດ້ວຍ ດັ່ງທີ່ເຈົ້າ
ໜ້າທີ່ຂັ້ນສູງໃນທະນາຄານແຫ່ງຊາດລາວໄດ້ໃຫ້ການຊີ້ແຈງວ່າ:
“ພວກເຮົາສາມາດຮັກສາສະເຖຍລະພາບຂອງເງິນກີບ
ໄວ້ໄດ້ຢ່າງໝັ້ນທ່ຽງ ອັດຕາແລກປ່ຽນກໍມີຄວາມສະ
ງົບເງິນກີບກໍແຂງຄ່າຂຶ້ນ ອັດຕາການແຂງຄ່າເງິນ
ກີບທຽບກັບໂດລາໃນປີຜ່ານມາ ກໍຢູ່ໃນລະດັບ
9.78% ຖ້າທຽບກັບເງິນບາດກໍແມ່ນແຂງຄ່າຂຶ້ນປະ
ມານ 5.68%.”
ນັບຈາກເດືອນມັງກອນປີນີ້ເປັນຕົ້ນມາ ທາງການລາວໄດ້ອະນຸມັດໃຫ້ປັບຂຶ້ນລາຄາຈໍາ
ໜ່າຍນໍ້າມັນໃນປະເທດໄປແລ້ວເຖິງ 8 ຄັ້ງ ແລະໃນການປັບຂຶ້ນໃນຄັ້ງລ່າສຸດເມື່ອທ້າຍ
ເດືອນເມສາທີ່ຜ່ານມານີ້ ກໍເຮັດໃຫ້ລາຄາຈໍາໜ່າຍນໍ້າມັນໃນເຂດນະຄອນວຽງຈັນໄດ້ປັບ
ຂຶ້ນຈາກ 11,810 ກີບ ຕໍ່ລິດ ເປັນ 12,200 ກີບຕໍ່ລິດ ສໍາລັບນໍ້າມັນແອັດຊັງພິເສດ.
ສ່ວນນໍ້າມັນແອັດຊັງທຳມະດາກໍເພີ້ມຂຶ້ນຈາກ 10,640 ກີບ ເປັນ 11,000 ກີບຕໍ່ລິດ
ແລະນໍ້າມັນກາຊວນເພີ້ມຂຶ້ນຈາກ 9,670 ກີບຕໍ່ລິດ ເປັນ 10,060 ກີບຕໍ່ລິດ.
ຍິ່ງໄປກວ່ານັ້ນ ສໍາລັບປະຊາຊົນລາວຢູ່ແຂວງຊຽງຂວາງ,
ຫົວພັນ ຜົ້ງສາລີ, ອຸດົມໄຊ, ຫລວງນໍ້າທາ ແລະ ຫລວງ
ພະບາງນັ້ນ ກໍຍັງຕ້ອງຊື້ນໍ້າມັນໃນລາຄາທີ່ແພງກວ່າປະ
ຊາຊົນໃນເຂດນະຄອນວຽງຈັນອີກດ້ວຍ ເນື່ອງຈາກວ່າ
ຜູ້ຈໍາໜ່າຍນໍ້າມັນຈະບວກຄ່າຂົນສົ່ງເຂົ້າໄປນໍານັ້ນເອງ.
