ໃນວັນພະຫັດວານນີ້ ຄະນະກຳມະການກິດຈະການຕ່າງປະເທດ
ຂອງສະພາຕ່ຳສະຫະລັດ ໄດ້ສ້າງຄວາມຄືບໜ້າຕໍ່ຮ່າງກົດໝາຍ
ສະບັບໜຶ່ງ ທີ່ບັນດາສະມາຊິກ ຂອງກຳມະການ ກ່າວວ່າ ຈະປະ
ຕິຮູບ ອົງການກະຈາຍສຽງພົນລະເຮືອນນາໆຊາດ ທີ່ໄດ້ຮັບການ
ສະໜັບສະໜຸນໂດຍລັດຖະບານ ໃຫ້ດີຂຶ້ນເພື່ອຕອບໂຕ້ຕໍ່ການ
ໂຄສະນາຊວນເຊື່ອ ທີ່ສະລັບຊັບຊ້ອນ ຈາກປະເທດຕ່າງໆເຊັ່ນ
ຣັດເຊຍ ແລະ ກຸ່ມກໍ່ການຮ້າຍ ເຊັ່ນ ລັດອິສລາມ.
ທ່ານ Ed Royce ປະທານຄະນະກຳມະການດັ່ງກ່າວ ເປີດກອງ
ປະຊຸມເພື່ອອະພິປາຍ ດັດແກ້ ຫຼືຂຽນຄືນຮ່າງກົດໝາຍນີ້ ໂດຍ
ກ່າວວ່າ ກົດໝາຍປະຕິຮູບການຕິດຕໍ່ສື່ສານນາໆຊາດ ຂອງ
ສະຫະລັດ ສະບັບປີ 2015 ຫຼື H.R. 2323 ແມ່ນມີຄວາມຕ້ອງການ ທີ່ຈະຮັບມືກັບ ການໃຊ້ “ຂໍ້ມູນໃຫ້ເປັນອາວຸດ” ເພື່ອກະຈາຍທິດສະດີການວາງແຜນລັບ ແລະ ບ່ອນທຳລາຍ ຄວາມໝັ້ນຄົງແຫ່ງຊາດ.
ທ່ານ Eliot Engel ສະມາຊິກຄົນສຳຄັນຂອງພັກເດໂມແຄຣັດ ໃນຄະນະກຳມະການ
ຈາກລັດນິວຢອກ ກ່າວວ່າ ຮ່າງກົດໝາຍດັ່ງກ່າວ “ຈະພາໃຫ້ມີການປັບປຸງໃໝ່ ທີ່ມີ
ຄວາມຈຳເປັນນັ້ນ” ດ້ວຍການລວບລວມເອົາອົງການກະຈາຍສຽງຕ່າງໆ ເຂົ້າກັນ ແລະ
ປັບປຸງໃໝ່ໂຄງຮ່າງການບໍລິຫານງານ ແລະ ກຳນົດຢ່າງຈະແຈ້ງກ່ຽວກັບບົດບາດ ຂອງ
ເຂົາເຈົ້າ.
ໃນປັດຈຸບັນນີ້ ສະພາຜູ້ວ່າການກະຈາຍສຽງຂອງສະຫະລັດຫລື BBG ຊຶ່ງເປັນອົງການ
ອິດສະຫຼະ ຂອງລັດຖະບານກາງ ເປັນຜູ້ດູແລທົ່ວໄປ ຕາໜ່າງການກະຈາຍສຽງ ພົນລະເຮືອນ ຂອງລັດຖະບານສະຫະລັດ ທີ່ຮວມ ທັງສຽງອາເມຣິກາ ຫຼື VOA ວິທະຍຸຢູໂຣບເສລີ ວິທະຍຸ ອິດສະຫຼະພາບ ຕາໜ່າງອອກອາກາດພາກຕາເວັນອອກກາງ (ໂທລະພາບ alhurra ແລະ ວິທະຍຸ Sawar) ວິທະຍຸເອເຊຍເສລີ ແລະ ຫ້ອງການກະຈາຍສຽງ ຄິວບາ ທີ່ຮວມທັງ
ໂທລະພາບ ແລະ ວິທະຍຸ Marti.
ຜູ້ອຳນວຍການຂອງຕາໜ່າງເຫຼົ່ານັ້ນ ໃນເວລານີ້ແມ່ນລາຍງານໂຕຕໍ່ BBG ບ່ອນທີ່
ສະມາຊິກ ທີ່ເຮັດວຽກບໍ່ເຕັມເວລາ 9 ທ່ານ ພົບປະກັນ ໃນທຸກໆສອງເດືອນ. ເພື່ອປັບປຸງ
ໃນການເຮັດການຕັດສິນໃຈນັ້ນ ຮ່າງ ກົດໝາຍສະບັບນີ້ ຮຽກຮ້ອງໃຫ້ສ້າງຕັ້ງຄະນະນຳພາ ຂອງພະແນກການ ຢ່າງເຕັມເວລາຂຶ້ນ. ສ່ວນ BBG ຈະມີໜ້າທີ່ບົດບາດເປັນທີ່ປຶກສາ.
ຂັ້ນຕໍ່ໄປ ຮ່າງກົດໝາຍນີ້ ຈະຖືກສົ່ງໄປພິຈາລະນາໂດຍສະພາຕ່ຳ ຄົບຄະນະ ຖ້າຫາກມີ
ການຮັບຮອງເອົາ ຫລັງຈາກນັ້ນກໍຈະຖືກສົ່ງໄປຍັງ ສະພາສູງ.
BBG ກ່າວວ່າ ລາຍການຂອງຕົນ ທີ່ອອກອາກາດທັງໝົດ 61 ພາສາ ນັ້ນ ມີການຊັ່ງຊາວ່າ ມີຜູ້ຮັບຟັງ ແລະ ຊົມ 215 ລ້ານຄົນຢູ່ໃນ 100 ກວ່າປະເທດ.
