ລິ້ງ ສຳຫລັບເຂົ້າຫາ

logo-print

ການເຕີບໂຕ ທາງເສດຖະກິດ ແລະຫຼຸດຜ່ອນ ຄວາມທຸກຍາກ ຢູ່ແຂວງສະວັນນະເຂດ ​ປະ​ຕິ​ບັດ​ໄດ້ ຕ່ຳກວ່າເປົ້າໝາຍ


ຄອບ​ຄົວ​ຢູ່ໝູ​ບ້ານ​ທີ່​ທຸກ​ຈົນໃນ ແຂວງ​ສະ​ຫວັນ​ນະ​ເຂດ ສ​ປ​ປ ລາວ

ກ​ານ​ເຕີບ​ໂຕ​ທາງ​ເສດ​ຖະ​ກິດ ແລະ​ການ​ຫລຸດ​ຜ່ອນ​ບັນ​ຫາ​ທຸກ​ຍາກ​ໃນ​ແຂວງ​ສະ​ວັນ​
ນະ​ເຂດ ໃນ​ປີ 2019 ປະ​ຕິ​ບັດ​ໄດ້​ຕ່ຳ​ກວ່າ​ເປົ້າ​ໝາຍ​ເຊັ່ນ​ດຽວ​ກັນກັບ​ການ​ຈັດ​ຕັ້ງ​ປະ​ຕິ​
ບັດ​ໃນ​ທົ່ວ​ປະ​ເທດ​ລາວ ຊຶ່ງ​ຊົງ​ລິດ ໂພນ​ເງິນ ມີລາຍ​ງານຈາກ ບາງກອກ.

ກ​ານ​ເຕີບ​ໂຕ​ທາງ​ເສດ​ຖະ​ກິດ ແລະ​ການ​ຫລຸດ​ຜ່ອນ​ບັນ​ຫາ​ທຸກ​ຍາກ​ໃນ​ແຂວງ​ສະ​ວັນ​ນະ​ເຂດ ໃນ​ປີ 2019 ປະ​ຕິ​ບັດ​ໄດ້​ຕ່ຳ​ກວ່າ​ເປົ້າ​ໝາຍ​ເຊັ່ນ​ດຽວ​ກັນກັບ​ການ​ຈັດ​ຕັ້ງ​ປະ​ຕິ​ບັດ​ໃນ​ທົ່ວ​ປະ​ເທດ​ລາວ.

ທ່ານ​ສັນ​ຕິພາບ ພົມ​ວິ​ຫານ ເຈົ້າ​ແຂວງ ແລະ​ເລ​ຂາ​ພັກ ແຂວງ​ສະ​ຫວັນ​ນະ​ເຂດ ຖະ​ແຫຼງຍອມ​ຮັບ​ວ່າ​ ການ​ເຕີບ​ໂຕ​ທາງ​ເສດ​ຖະ​ກິດ ແລະ​ການ​ຫລຸດ​ຜ່ອນ​ບັນ​ຫາ​ຄວາມ​ຍາກ​ຈົນ​ຂອງ​ປະ​ຊາ​ຊົນ​ລາວ ໃນ​ແຂວງ​ສະ​ຫວັນ​ນະ​ເຂດ​ ໃນ​ປີ 2019 ຈັດ​ຕັ້ງ​ປະ​ຕິ​ບັດ​ໄດ້​ຕ່ຳ​ກວ່າ​ແຜນ​ການແລະ​ເປົ້າ​ໝາຍ​ທີ່​ວາງ​ໄວ້ຄື​ເສດ​ຖະ​ກິດ​ຂະ​ຫຍາຍ​ໂຕ​ເພີ້ມ​ຂຶ້ນ​ໃນ​ອັດ​ຕາ​ສະ​ເຫຼ່ຍ 9 ເປີ​ເຊັນ ຂະ​ນະ​ທີ່​ແຜນ​ການ​ໄດ້​ວາງ​ໄວ້​ທີ່ ​ອັດ​ຕາ​ສະ​ເຫຼ່ຍ​ບໍ່​ຫລຸດ 9.5 ເປີ​ເຊັນ ທຽບ​ໃສ່​ປີ 2018 ໂດຍ​ມີ​ສາ​ເຫດ​ມາ​ຈາກ​ໄພ​ນ້ຳ​ຖ້ວມ ແລະ​ຜົນ​ກະ​ທົບ​ຈາກ​ສົງ​ຄາມ​ການ​ຄ້າ ທີ່​ມີ​ການ​ປັບ​ພາ​ສີ​ການ​ຄ້າ​ໃຫ້​ສູງ​ຂຶ້ນ ລະ​ຫວ່າງ​ຈີນ​ກັບ​ສະ​ຫະ​ລັດ​ອາ​ເມ​ຣິ​ກາ​ນັ້ນ.

ໂດຍ​ຈາກ​ຜົນ​ກະ​ທົບ​ດັ່ງ​ກ່າວ ໄດ້​ເຮັ​ດ​ໃຫ້​ຍອດ​ຜະ​ລິດ​ຕະ​ພັນ​ພາຍ​ໃນ ຫຼື (GDP) ຂອງ​ແຂວງ​ສະ​ຫວັນ​ນະ​ເຂດ ​ມີ​ມູນ​ຄ່າ​ລວມ 18,890.74 ຕື້​ກີບ ຄຶດ​ສະ​ເຫຼ່ຍ​ເປັນ​ລາຍ​ຮັບ​ຂອງ​ປະ​ຊາ​ຊົນ​ໄດ້​ທີ່ 2,126 ໂດ​ລາ​ສະ​ຫະ​ລັດ ຕໍ່​ຄົນ​ຕໍ່​ປີ ຊຶ່ງ​ຕ່ຳ​ກວ່າ​ແຜນ​ການ​ວາງ​ໄວ້​ທີ່​ລະ​ດັບ 2,188 ໂດ​ລາ​ສະ​ຫະ​ລັດ ຕໍ່​ຄົນ​ຕໍ່​ໄປີ ໂດຍ​ພາກ​ກະ​ສິ​ກຳ​ຂະ​ຫຍາຍ​ໂຕ​ພຽງ​ແຕ່ 2 ເປີ​ເຊັນເທົ່າ​ນັ້ນ ເນຶ່ອງ​ຈາກວ່າ​ໄພ​ນ້ຳ​ຖ້ວມເຮັດ​ໃຫ້​ການ​ຜະ​ລິດ​ເຂົ້າ​ນາ​ປີໄດ້​ພຽງ 599,231 ໂຕນ ຫຼື​ທຽບ​ກັບ 68.75 ເປີ​ເຊັນ ຂອງ​ແຜນ​ການ ສ່ວນ​ພາກ​ບໍ​ລິ​ການ​ກໍ​ຂະ​ຫຍາຍ​ໂຕ​ໃນອັດ​ຕາ​ສະ​ເຫຼ່ຍ 10.09 ເປີ​ເຊັນ ໂດຍ​ຫລຸດແຜນ​ການ 0.8 ເປີ​ເຊັນ ແລະພາກ​ອຸດ​ສາ​ຫະ​ກໍ​າ ທີ່​ຂະ​ຫຍາຍ​ໂຕ​ໃນ​ລະ​ດັບ 13,46 ເປີ​ເຊັນ ຊຶ່ງ​ເກີນ​ຄາດ​ໝາຍ 0.84 ເປີ​ເຊັນ ອັນ​ເປັນ​ຜົນ​ຈາກ​ການ​ລົງ​ທຶນ​ຂອງ​ບໍ​ລິ​ສັດ​ຕ່າງ​ຊາດ​ໃນ​ເຂດ​ເສດ​ຖະ​ກິດ​ພິ​ເສດ ສະ​ຫວັນ​-ເຊ​ໂນ ດັ່ງທີ່ເຈົ້າ​ໜ້າ​ທີ່​ຂັ້ນ​ສູງ ໃນ​ຄະ​ນະ​ຄຸ້ມ​ຄອງ​ເສດ​ຖະ​ກິດ​ພິ​ເສດ ສະ​ຫວັນ​-ເຊ​ໂນ ໃຫ້​ການ​ຢືນ​ຢັນ​ວ່າ:

“ການ​ລົງ​ທຶນ​ຂອງ​ຕ່າງ​ປະ​ເທດ​ອັນ​ເປັນ​ອຸດ​ສາ​ຫະ​ກຳ​ໃໝ່​ທີ່​ທັນ​ສະ​ໄໝ ມັນ​ມີ​ອຸດ​ສາ​ຫະ​ກຳ​ຂອງ​ນັກ​ທຸ​ລະ​ກິດ​ຍີ່​ປຸ່ນ ເປັນ​ຕົ້ນ​ໂຮງ​ງານ​ຜະ​ລິດກ້ອງ NIKON ໂຮງ​ງານ​ຜະ​ລິດອະໄຫລ່​ລົດ TOYOTA ໂຮງ​ງານ​ຜະ​ລິດ​ລົດ HYUNDAI ຂອງ​ເກົາ​ຫຼີ​ໃຕ້ ໂຮງ​ງານ​ຜະ​ລິດອະ​ໄຫລ່​ເຮືອ​ບິນໂບ​ອິ້ງ 787 ໂຮງ​ງານ​ຜະ​ລິດ​ອະ​ໄຫລ່​ເຮືອ​ບິນ​ແອ​ບັ​ສ​ຂອງຮອນ​ແລນ ໂຮງ​ງານ​ຜະ​ລິດ​ແກ້ວ​ແວ່ນ​ຕາ ESSILOR ຂອງ​ຝ​ຣັ່ງ ​ຫຼື​ວ່າ​ການ​ປະ​ຕິ​ບັດທີ່​ຫັນ​ເປັນ​ອຸດ​ສາ​ຫະ​ກຳ​ທັນ​ສະ​ໄໝ​ຢູ່​ແຂວງ​ສະ​ຫວັນ​ນະ​ເຂດ​ນີ້ ໄດ້​ຂະ​ຫຍາຍ​ໂຕ​ດີ​ຂຶ້ນ."

ສ່ວນ​ການ​ແກ້​ໄຂ​ປັນ​ຫາ​ຄວາມ​ທຸກ​ຍາກ​ຂອງ​ປະ​ຊ​າ​ຊົນ​ໃນ​ແຂວງ​ສະ​ວັນ​ນະ​ເຂດ ​ໃນ​ປີ 2019 ທີ່​ຜ່ານ​ມາ​ກໍ​ສາ​ມາດ​ລົບ​ລ້າງ​ບັນຫາ​ຍາກ​ຈົນໄດ້ 952 ຄອບ​ຄົວ ແລະ​ປະ​ກາດ​ໃ​ຫ້ 9 ບ້ານ​ຫລຸດ​ພົ້ນ​ຈາກ​ບັນ​ຫາ​ຍາກ​ຈົນ ຈຶ່ງ​ຍັງ​ເຫຼື​ອ 7,048 ຄອບ​ຄົວ​ໃນ 94 ບ້ານ ທີ່​ຈະຕ້ອງ​ດຳ​ເນີນມາດ​ຕະ​ການ​ໃນ​ທຸກວິ​ທີ​ທາງ ເພື່ອ​ເຮັດ​ໃຫ້​ຫລຸດ​ພົ້ນ​ຈາກ​ບັນ​ຫາ​ຍາກ​ຈົນ​ໃຫ້​ໄດ້​ຢ່າງ​ສິ້ນ​ເຊີງ​ພາຍ​ໃນ​ປີ 2020 ນີ້.

ທາງ​ດ້ານ​ເຈົ້າ​ໜ້າ​ທີ່​ທະ​ນ​ະຄານໂລກປະ​ຈຳ​ລາວເປີດ​ເຜີຍ​ວ່າ ກອງ​ທືນ​ລົບ​ລ້າງ​ຄວາມ​ທຸກ​ຍາກ​ໃນ​ລາວ​ໄດ້​ຮັບ​ການ​ສະ​ໜັບ​ສະ​ໜູນ​ງົບ​ປະ​ມານ​ຄຶດ​ເປັນ​ມູນ​ຄ່າ​ລວມ 54 ລ້ານໂດ​ລາ​ສະ​ຫະ​ລັດ ສຳ​ລັບ​ນໍາໃຊ້ໃນ​ການ​ຈັດ​ຕັ້ງ​ປະ​ຕິ​ບັດ​ວຽກ​ງານ​ພັດ​ທະ​ນາ​ພື້ນ​ຖານ​ໂຄງ​ຮ່າງ​ເພື່ອ​ແກ້​ໄຂ​ບັນ​ຫາ​ຄວາມ​ຍາກ​ຈົນ​ຂອງ​ປະ​ຊາ​ຊົນໃນ​ເຂດ​ຊົນ​ນະ​ບົດ ໃນ​ຊ່ວງ​ປີ 2017-2019 ໃນ​ນີ້ ລັດ​ຖະ​ບານ​ລາວ​ໄດ້​ປະ​ກອບ​ສ່ວນ​ພຽງ 6 ລ້ານ​ໂດ​ລາ​ສະ​ຫະ​ລັດ ໂດຍ​ລາວ​ຍັງ​ມີ​ຄອບ​ຄົວ​ຍາກ​ຈົນ​ເຫຼືອ​ຢູ່ 64,593 ຄອບ​ຄົວ​ໃນ 1,536 ບ້ານ ທີ່​ລັດ​ຖະ​ບານ​ລາວ​ຈະ​ຕ້ອງດຳ​ເນີນ​ມາດ​ຕະ​ການ​ລົບ​ລ້າງ​ໃຫ້​ໄດ້​ຢ່າງສິ້ນ​ເຊີງ​ຕາມ​ເປົ້າ​ໝາຍ​ທີ່​ວາງ​ໄວ້​ໃນ​ປີ 2020.

ສ່ວນ​ສະ​ພາ​ເສດ​ຖະ​ກິດ ແລະ​ສັງ​ຄົມ​ແຫ່ງສະ​ຫະ​ປະ​ຊາ​ຊາດ​ຄາດ​ໝາຍ​ໄວ້​ວ່າ ລາວ​ຈະ​ຫລຸດ​ພົ້ນ​ຈາກ​ສະ​ພາບ​ດ້ອຍ​ພັດ​ທະ​ນາ​ໃນ​ປີ 2024 ເພ​າະ​ລັດ​ຖະ​ບານ​ລາວ​ປະ​ຕິ​ບັດ​ໄດ້​ແລ້ວ 2 ໃນ 3 ເງື່ອນ​ໄຂ ຄື​ຍອດ​ລາຍ​ຮັບ​ແຫ່ງ​ຊາດ​ຕໍ່​ຫົວ​ຄົນ (GNI) ຕ້ອງ​ບໍ່​ຫລຸດ 1,242 ໂດ​ລາ​ສະ​ຫະ​ລັດ ຕໍ່​ຄົນ ຊຶ່ງ​ລັດ​ຖະ​ບານ​ລາວ​ປະ​ຕິ​ບັດ​ໄດ້​ທີ່​ລະ​ດັບ 1,996 ໂດ​ລາ​ສະ​ຫະ​ລັດ ຕໍ່​ຄົນ​ໃນ​ປີ 2015 ສ່ວນ​ດັດ​ຊະ​ນີ​ຊັບ​ສິນມະ​ນຸດ (HAI) ຕ້ອງ​ເຖິງ​ອັດ​ຕາ​ສະ​ເລ່ຍ 66 ເປີ​ເຊັນ ໂດຍ​ລັດ​ຖະ​ບານ​ລາວ​ປະ​ຕິ​ບັດ​ໄດ້​ທີ່​ລະ​ດັບ 72.8 ເປີ​ເຊັນ ໃນ​ປີ 2015 ຈຶ່ງ​ຍັງ​ເຫຼືອ​ພຽງ​ແຕ່​ດັດ​ຊະ​ນີ​ຄວາມ​ອ່ອນ​ໄຫວ​ທາງ​ເສດ​ຖະ​ກິດ (EVI) ທີ່​ຕ້ອງ​ຕ່ຳ​ກວ່າ 32 ເປີ​ເຊັນ ແຕ່​ລັດ​ຖະ​ບານ​ລ​າວ​ຍັງ​ຈັດ​ຕັ້ງ​ປະ​ຕິ​ບັດ​ໄດ້​ທີ່​ລະ​ດັບ 33.7 ເປີ​ເຊັນ.

ເບິ່ງຄວາມເຫັນ (1)

ຟໍຣັມສະແດງຄວາມເຫັນ ກ່ຽວກັບເລື່ອງນີ້ ອັດແລ້ວ

ທ່ານອາດຈະມັກເລື້ອງນີ້ຄືກັນ

XS
SM
MD
LG