ອິສຣາແອລ ຊີ້ໂຕປະກັນໃນເຂດກາຊາ ທີ່ຖືກກຸ່ມຮາມາສ ທໍລະມານຢ່າງໜັກ

ລາຍງານໃໝ່ທີ່ຈັດທຳໂດຍກະຊວງສາທາລະນະສຸກຂອງອິສຣາແອລ ແລະກຽມສົ່ງໃຫ້ກັບສະຫະປະຊາຊາດ ໃນອາທິດນີ້ ລະບຸວ່າ ໂຕປະກັນທີ່ຖືກຈັບໄປຄຸມຂັງໄວ້ໃນເຂດກາຊານັ້ນ ໄດ້ຖືກທໍລະມານດ້ວຍວິທີຕ່າງໆ ແລະບໍ່ໄດ້ຮັບການເບິ່ງແຍງດ້ານການແພດແຕ່ຢ່າງໃດເລີຍ ອີງຕາມລາຍງານຂອງອົງການຂ່າວຣອຍເຕີສ.

ລາຍງານດັ່ງກ່າວອ້າງອີງບົດສຳພາດຈາກແພດ ແລະທີມທີ່ເບິ່ງແຍງໂຕປະກັນຊາວອິສຣາແອລ ແລະຊາວຕ່າງຊາດກວ່າ 100 ຄົນ ເຊິ່ງສ່ວນໃຫຍ່ ໄດ້ຮັບການປ່ອຍໂຕມາ ເມື່ອປາຍເດືອນພະຈິກ ປີ 2023 ໃນຊ່ວງທີ່ມີການຢຸດຍິງຊົ່ວຄາວ ລະຫວ່າງອິສຣາແອລ ແລະກຸ່ມຮາມາສ ໂດຍມີໂຕປະກັນ 8 ຄົນທີ່ເປັນຜູ້ໄດ້ຮັບການຊ່ອຍເຫຼືອອອກມາໂດຍກອງທັບອິສຣາແອລ.

ໂຕປະກັນກຸ່ມດັ່ງກ່າວມີເດັກແລະໄວໜຸ່ມຢູ່ກວ່າ 30 ຄົນ ໂດຍມີບາງຄົນຖືກພົບຂະນະທີ່ຖືກມັດມືມັດຕີນຢູ່ ມີຮ່ອງຮອຍການຖືກທຸບຕີ ແລະຖືກຈ້ຳກາດ້ວຍວັດຖຸຮ້ອນ ອ້າງອີງຂໍ້ມູນຈາກລາຍງານທີ່ລົງຊື່ແລະທີ່ຢູ່ໄປຍັງຜູ້ລາຍງານພິເສດຂອງອົງການສະຫະປະຊາຊາດດານການທໍລະມານ (U.N. Special Rapporteur on Torture) ແລະຖືກຕີພິມເຜີຍແຜ່ອອກມາໃນຊ່ວງຕອນເດິກວັນເສົາຜ່ານມານີ້.

ນອກຈາກນັ້ນ ໂຕປະກັນຜູ້ຍິງລາຍງານວ່າ ຖືກພວກທີ່ຈັບໂຕໄວ້ລ່ວງລະເມີດທາງເພດ ແລະຖືກຈີ້ດ້ວຍປືນນຳ ຂະນະທີ່ໂຕປະກັນຜູ້ຊາຍ ກໍຖືກທຸບຕີ ຈັບອົດເຂົ້າ ຖືກຈ້ຳກາ ມັດມືແລະຕີນ ລວມທັງຈັບຂັງແຍກ ແລະບໍ່ໄດ້ຮັບອະນຸຍາດໃຫ້ໃຊ້ຫ້ອງນ້ຳດ້ວຍ ຕາມຂໍ້ມູນໃນລາຍງານດັ່ງກ່າວ.

ໂຕປະກັນບາງຄົນ ຍັງຖືກປະຕິເສດການຮັກສາພະຍາບານເມື່ອໄດ້ຮັບບາດເຈັບຫຼືປ່ວຍໄຂ້.

ລາຍງານນີ້ ບໍ່ໄດ້ມີການລະບຸຊື່ຫຼືອາຍຸຂອງໂຕປະກັນ ເພື່ອປົກປ້ອງຄວາມເປັນສ່ວນໂຕ ແຕ່ລາຍລະອຽດບາງສ່ວນກົງກັບຂໍ້ມູນຂອງໂຕປະກັນ ແລະເຈົ້າໜ້າທີ່ທີ່ໃຫ້ການຮັກສາ ແລະໃຫ້ສຳພາດກັບຣອຍເຕີສ ແລະສື່ຂ່າວອື່ນໆ ລວມທັງໃນລາຍງານສະບັບນຶ່ງຂອງຢູເອັນ.

ກຸ່ມຮາມາສ ປະຕິເສດຕໍ່ຄຳກ່າວຫາວ່າ ມີການໃຊ້ຄວາມຮຸນແຮງຕໍ່ໂຕປະກັນກວ່າ 250 ຄົນທີ່ຖືກຈັບໄປຈາກອິສຣາແອລ ເມື່ອວັນທີ 7 ຕຸລາ 2023 ທີ່ກຸ່ມຕິດອາວຸດນີ້ ໄດ້ໂຈມຕີເຂົ້າໃສ່ ໂດຍໃນເວລານີ້ ຍັງມີໂຕປະກັນອີກປະມານ 100 ຄົນຢູ່ໃນກາຊາ ແລະທາງການອິສຣາແອລ ເຊື່ອວ່າ ປະມານເຄິ່ງນຶ່ງຍັງມີຊີວິດຢູ່.

ໃນຊ່ວງບໍ່ເທົ່າໃດອາທິດທີ່ຜ່ານມາ ມີຄວາມພະຍາຍາມຊຸກຍູ້ໃຫ້ເກີດການຢຸດຍິງໃນກາຊາອີກຄັ້ງ ພ້ອມກັບການບັນລຸຂໍ້ຕົກລົງປ່ອຍໂຕປະກັນຮອບໃໝ່ ແຕ່ຈົນຮອດປັນຈຸບັນນີ້ ຍັງບໍ່ມີຄວາມຄືບໜ້າໃດໆ ເກີດຂຶ້ນ.

ສົ່ງຄາມຄັ້ງນີ້ ເລີ້ມຕົນຈາກການທີ່ກຸ່ມຮາມາສໂຈມຕີອິສຣາແອລ ເຊິ່ງບໍ່ທັນຕັ້ງໂຕເມື່ອກວ່ານຶ່ງປີກ່ອນ ແລະເຮັດໃຫ້ມີຜູ້ເສຍຊີວິດປະມານ 1,200 ຄົນ ເຊິ່ງທາງການອິສຣາແອລລະບຸວ່າ ສ່ວນໃຫຍ່ເປັນພົນລະເຮືອນ ກ່ອນທີ່ ເທລະວີບຈະທຳການໂຈມຕີຕອບໂຕ້ກັບເຂົ້າໄປໃນເຂດກາຊາ ແລະການສູ້ລົບທີ່ດຳເນີນມາຈົນເຖິງບັດນີ້ ເຮັດໃຫ້ຊາວປາແລສໄຕນ໌ ເສຍຊີວິດກວ່າ 45,000 ຄົນແລ້ວ ອ້າງອີງຂໍ້ມູນຈາກກະຊວງສາທາລະນະສຸກຂອງກາຊາ ຂະນະທີປະຊາກອນເກືອບເຄິ່ງນຶ່ງຂອງກາຊາ ຕ້ອງກາຍມາເປັນຜູ້ພັດຖິ່ນ ແລະສະພາບຂອງເຂດປົກຄອງນີ້ ກຊຖືກທຳລາຍເຫຼືອແຕ່ເສດຊາກຕຶກໄປທົ່ວ.