ສິບອົງການແຖວໜ້າ ເພື່ອສິດທິມະນຸດ ໄດ້ຄັດເລືອກເອົາພວກນັກຕໍ່ສູ້ ເພື່ອປົກປ້ອງສິດທິມະນຸດ 3 ທ່ານ ຊຶ່ງສອງທ່ານ ແມ່ນຈາກປະເທດເທີກີແລະໂຄລອມເບຍ ແລະຄົນທີ 3 ແມ່ນອົບພະຍົບຊາວຊູດານ ໃນປາປົວນິວກີນີ ຜູ້ ທີ່ເຂົ້າຮອບສຸດທ້າຍເພື່ອຮັບລາງວັນ Martin Ennals Award 2019. ລາງ ວັນດັ່ງກ່າວ ຕັ້ງຂຶ້ນເພື່ອເປັນກຽດແກ່ເລຂາທິການໃຫຍ່ຂອງອົງການນິລະໂທດກຳສາກົນແຕ່ປີ 1968 ຫາ 1980. ລີຊາ ຊໄລນ໌ ນັກຂ່າວວີໂອເອມີລາຍງານຈາກຈີນີວາ ຊຶ່ງວັນນະສອນ ຈະນຳມາສະເໜີທ່ານ ໃນອັນດັບຕໍ່ໄປ.
ພວກນັກຕໍ່ສູ້ ເພື່ອປົກປ້ອງສິດທິມະນຸດ 3 ທ່ານ ໄດ້ໄຊນະຜູ້ສະໝັກທັງໝົດ 75 ຄົນ ຍ້ອນການສູ້ຊົນຢ່າງເດັດດ່ຽວ ຂອງພວກເຂົາເຈົ້າ ເພື່ອຄວາມເປັນທຳ ໃນດ້ານສິດ ສຳລັບພວກທີ່ດ້ອຍໂອກາດ ແລະພວກທີ່ບໍ່ຄ່ອຍມີຄວາມສຳຄັນ ຊຶ່ງເລື້ອຍໆ ມັກຈະເຮັດໃຫ້ເສລີພາບສ່ວນຕົວແລະຊີວິດຂອງພວກເຂົາເຈົ້າ ຕົກຢູ່ໃນຄວາມສ່ຽງ.
ທ່ານນາງເອເຣັນ ເຄັສເກິນ ທະນາຍຄວາມແລະ ນັກເຄື່ອນໄຫວ ເພື່ອສິດທິມະນຸດ ໃນເທີກີ ແມ່ນຖືກຂັງຄຸກ ໃນເດືອນສິງຫາ ປີ 2016 ຊຶ່ງເປັນສ່ວນນຶ່ງຂອງການກວດລ້າງ ໃນທົ່ວປະເທດ ນຶ່ງເດືອນຫຼັງຈາກໄດ້ມີການພະຍາຍາມກໍ່ລັດຖະ ປະຫານຕໍ່ຕ້ານປະທານາທິບໍດີ.
ຜູ້ອຳນວຍການຂອງມູນນິທິ Martin Ennals ທ່ານ ໄມໂກ ຄຳບາຕາ ບອກກັບວີໂອເອວ່າ ໃນເວລາ ທີ່ທ່ານນາງຖືກຈັບກຸມນັ້ນ. ທ່ານນາງ ເຄັສເກິນເປັນ ຫົວໜ້າບັນນາທີ່ການ ຂອງໜັງສືພິມ ທີ່ໄດ້ລົງຂ່າວກ່ຽວກັບບັນຫາ ຂອງຊາວເຄີດ. ທ່ານໄດ້ກ່າວວ່າ ທ່ານນາງເປັນຜູ້ຮັບຜິດຊອບໃນຫຼາຍໆເລື້ອງ ທີ່ໄດ້ພິມເຜີຍແຜ່ ແລະໄດ້ຕັດສິນລົງໂທດ ໃຫ້ຕິດຄຸກເປັນເວລາ 12 ປີ ເຄິ່ງ ຊຶ່ງຄະດີດັ່ງກ່າວ ຍັງມີການຂໍອຸທອນຢູ່ໃນເວລານີ້.
ທ່ານຄຳບາຕາ ກ່າວວ່າ “ທ່ານນາງ ໄດ້ເຮັດວຽກ ໂດຍສະເພາະ ບັນຫາຂອງພວກແມ່ຍິງ, ໃນທຸກໆເລື້ອງ ຈາກການຂົ່ມຂືນຊຳເລົາ ທາງເພດໃນຄຸກ ເຖິງ ເລື້ອງບ່ອນທີີ່ທ່ານນາງໄດ້ສ້າງຕັ້ງອົງການຂຶ້ນມາ. ທ່ານນາງໄດ້ເຮັດວຽກ ກັບກຸ່ມພວກກະເທີຍ ພວກຮັກຮ່ວມເພດ ພວກປ່ຽນເພດ ຫຼື ທີ່ເອີ້ນວ່າ LGBTI ແລະບັນຫາຊາວເຄີດ ແລະການຂ້າລ້າງເຜົ່າພັນຂອງຊາວອາເມເນຍ. ນັ້ນແມ່ນ 4 ເລື້ອງບູລິມມະສິດ ທີ່ທ່ານນາງໄດ້ເລີ້ມມາ ຕັ້ງແຕ່ 1996 ພຸ້ນ.”
ຜູ້ທີ່ຖືກສະເໜີຊື່ຄົນທີ 2 ແມ່ນ ທ່ານມາຣີໂນ ຄໍໂດບາ ເບີຣີໂອ, ສະມາຊິກຄົນນຶ່ງຂອງກຸ່ມຊາວໂຄລອມເບຍຜິວດຳ ຫຼືອາໂຟຣ-ໂຄລອມເບຍ, ທ່ານໄດ້ທຳການຕໍ່ສູ້ເພື່ອສິດທິໃນການຄອບຄອງທີ່ດິນຂອງຊົນເຜົ່າດັ່ງກ່າວ. ທ່ານຄຳບາຕາກ່າວ ວ່າ ທ່ານໄດ້ປະເຊີນໜ້າກັບການຖືກໂຈມຕີ ຈາກເຈົ້າຂອງທີ່ດິນທີ່ມີອິດທິພົນ ທີ່ຢາກສວຍໃຊ້ດິນ ເພື່ອການຕັດໄມ້ທ່ອນຂາຍ ແລະເຮັດບໍ່ແຮ່.
ຜູ້ທີ່ຖືກສະເໜີຊື່ເຂົ້າໄປຊິງລາງວັນຄົນສຸດທ້າຍແມ່ນ ທ່ານອັບດູລ ອາຊິສ ມູຮາ ເມດ ແມ່ນມາຈາກເຂດດາຟົວ ປະເທດຊູດານ. ທ່ານໄດ້ຫລົບໜີໄປຍັງນະຄອນ ຫຼວງຄາຣ໌ທູມ, ປະສົບກັບບັນຫາ ໃນຖານະເປັນນັກສຶກສາທີ່ທຳການເຄື່ອນໄຫວ ແລະຫລົບໜີອີກຄັ້ງນຶ່ງໄປຍັງອອສເຕຣຍເລຍ ເພື່ອຂໍລີ້ໄພ. ທ່ານໄດ້ຖືກກັກຂັງ ທີ່ເກາະມານູສ ຂອງປາກົວນິວກີນີ ໃນຮອບ 5 ປີ ຜ່ານມານີ້.
ທ່ານຄຳບາຕາ ກ່າວວ່າ ທ່ານມູຮາເມດ ແມ່ນເປັນຜູ້ສະໜັບສະໜູນພວກຜູ້ຊາຍ ທີ່ອາໄສຢູ່ໃນເກາະ ທີ່ມີສະພາບການແມ່ນຂີ້ຮ້າຍແລະບໍ່ຄ່ອຍດີດັ່ງກ່າວນີ້. ທ່ານໄດ້ຈັດແຈງເລື້ອງນີ້ ດ້ວຍຄວາມສະຫຼຽວສະຫຼາດ ໂດຍນຳໃຊ້ສື່ສັງຄົມ ແລະ podcasts.
“ທ່ານໄດ້ເຄື່ອນໄຫວຢ່າງສັນຕິແລະທ່ານໄດ້ເປັນກະບອກສຽງຕໍ່ໂລກພາຍນອກ, ໂດຍສະເພາະ ຕໍ່ອອສເຕຣຍເລຍ ກ່ຽວກັບຜົນກະທົບ ແລະສິ່ງທີ່ຈະຕິດຕາມມາ… ແທ້ຈິງແລ້ວ ທ່ານໄດ້ເນັ້ນຢ້ຳບໍ່ແມ່ນສະພາບຕົວຈິງພາຍໃນສູນນັ້ນດ້ວຍຊ້ຳ ແຕ່ຄວາມຈິງທີ່ວ່າ ພວກເຂົາເຈົ້າບໍ່ມີບ່ອນໄປ ແລະບໍ່ມີອາະນາຄົດເລີຍ.”
ຂ້າຫຼວງໃຫຍ່ດ້ານສິດທິມະນຸດ ຂອງສະຫະປະຊາຊາດ ທ່ານນາງມິແຊລ ບາເຊີເລ່
ຈະປະກາດຜູ້ທີ່ໄດ້ຮັບລາງວັນ Martin Ennals ໃນວັນທີ 13 ກຸມພາ. ຜູ້ຊະນະ
ຈະໄດ້ຮັບເງິນລາງວັນ ຈຳນວນ 30,000 ໂດລາ. ແລະ 2 ທ່ານ ພວກທີ່ເປັນຮອງ
ລົງມາ ຈະໄດ້ເງິນລາງວັນ ຜູ້ລະ 10,000 ໂດລາ.
ອ່ານຂ່າວນີ້ເພີ້ມຕື່ມເປັນພາສາອັງກິດ
