ຜູ້ພິພາກສາລັດຖະບານກາງສະຫະລັດເວົ້າວ່າ ໃນຕອນບ່າຍຂອງວັນພະຫັດມື້ນີ້ ທ່ານ
ຈະປະກາດວ່າທຳນຽບຂາວ ຈະຕ້ອງອະນຸຍາດໃຫ້ ທ່ານຈີມ ອາໂກສຕາ (Jim Acosta)
ຈາກອົງການຂ່າວ CNN ເຂົ້າໄປໃນເຂດທຳນຽບ ຂອງປະທາ ນາທິບໍດີຢ່າງໜ້ອຍເປັນ
ການຊົ່ວຄາວ ເພື່ອໃຫ້ນັກຂ່າວດັ່ງກ່າວສາມາດເຮັດໜ້າທີ່ຂອງຜູ້ກ່ຽວໄດ້ນັ້ນ ຫລືບໍ່.
ທ່ານທີມໂມທີ ແຄລລີ ຜູ້ພິພາກສາ ປະຈຳເຂດຂອງສະຫະລັດ ກ່າວຕໍ່ພວກນັກຂ່າວວ່າ
ທ່ານຢາກໄປນອນຄົ້ນຄິດກ່ຽວກັບການຕັດສິນເລື້ອງນີ້ໃນຕອນກາງຄືນ ສາກ່ອນ ແລະ
ຈະອອກຄຳຕັດສິນກ່ຽວກັບຄຳຮ້ອງຂອງອົງການຂ່າວ CNN ໃນການອອກຄຳສັ່ງເພື່ອ
ໃຫ້ມີສິດເຂົ້າໄປທຳນຽບຂາວຊົ່ວຄາວ ໃນເວລາ 15 ໂມງ ຕາມເວລາໃນທ້ອງຖິ່ນ ຊຶ່ງ
ກົງກັບເວລາ 20:00 ໂມງຕາມເວລາສາກົນ ມື້ນີ້.
ທະນາຍຄວາມຂອງອົງການຂ່າວ CNN, ທ່ານ ເທັດ ບາວທຣັສ (Ted Boutrous)
ກ່າວຕໍ່ທ່ານແຄລລີວ່າ ມັນມີຫລາຍວິທີຢູ່ ທີ່ທຳນຽບຂາວຈະດັດປັບໃຫ້ເໝາະສົມເພື່ອ
ຮັບມືກັບທ່ານອາໂກສຕາໄດ້ ເຊັ່ນບໍ່ເອີ້ນຊື່ລາວເພື່ອໃຫ້ລາວມີໂອກາດຖາມ ໃນເວລາ
ຢູ່ກອງປະຊຸມນັກຂ່າວຕ່າງໆ. ທະນາຍຄວາມທ່ານນີ້ຍັງກ່າວເພີ້ມອີກວ່າ "ຮູ້ທ່ານປະ
ທານາທິບໍດີ ດີຢູ່ແລ້ວ, ທ່ານອາດຈະເອີ້ນຊື່ຂອງຈີມ ອາໂກສຕາ ໃນມື້ທຳອິດທີ່ລາວ
ໄດ້ຮັບບັດຜ່ານປະຕູເຂົ້າທຳນຽບຂາວຄືນນັ້ນໂລດ."
ພວກທະນາຍຄວາມຂອງລັດຖະບານ ໂຕ້ຖຽງວ່າການປະພຶດຂອງທ່ານອາໂກສຕາໄດ້
ຂັດຂວາງທຳນຽບຂາວ ບໍ່ໃຫ້ສາມາດດຳເນີນກອງປະຊຸມຖະແຫຼງຂ່າວຢ່າງເປັນລະບຽບໄດ້.
"ການດຳເນີນຄວາມພະຍາຍາມຂອງນັກຂ່າວ ທີ່ຈະກວາມເອົາກອງປະຊຸມຖະແຫລງ
ຂ່າວທັງໝົດຜູ້ດຽວ ມັນບໍ່ແມ່ນການສະແດງຄຳຄິດເຫັນ" ນັ້ນຄືຄຳເວົ້າຂອງຮອງລັດຖະ
ມົນຕີຊ່ວຍວ່າການກະຊວງຍຸຕິທຳ ທ່ານ ເຈມສ໌ ເບີນແນມ (James Burnham) ທີ່
ບອກຜູ້ພິພາກສາວ່າ ການຍຶດເອົາບັດເຂົ້າທຳນຽບຂາວຂອງທ່ານ ອາໂກສຕາໄວ້ ບໍ່ໄດ້
ພາໃຫ້ເກີດຄວາມເສຍຫາຍ ແກ່ນັກຂ່າວຢ່າງກະທັນຫັນ ແລະ ຢ່າງບໍ່ມີຄວາມຮັບຜິດ
ຊອບ ທີ່ຈະເຮັດໃຫ້ຈຳເປັນຕ້ອງ ໄດ້ອອກຄຳສັ່ງເພື່ອໃຫ້ຜູ້ກ່ຽວມີສິດເຂົ້າໄປໃນທີ່ນັ້ນ
ຊົ່ວຄາວໄດ້.
"ສຳລັບອົງການຂ່າວ CNN ແລ້ວ ຂ້າພະເຈົ້າບໍ່ຄິດວ່າມີຫຍັງເສຍຫາຍທັງສິ້ນເລີຍ,"
ນັ້ນຄືຄຳເວົ້າຂອງທ່ານ ເບີນແນມ ໂດຍໃຫ້ຂໍ້ສັງເກດວ່າ ອົງການຂ່າວດັ່ງກ່າວ ມີນັກ
ຂ່າວຄົນອື່ນອີກ 50 ຄົນ ທີ່ມີບັດເຂົ້າໄປທຳນຽບຂາວໄດ້.
ການຮັບຟັງຄຳໃຫ້ການກ່ຽວກັບການອອກຄຳສັ່ງເອົາສິດ ໃນການເຂົ້າໄປທຳນຽບຂາວນີ້
ເປັນຄຳຟ້ອງຮ້ອງຄັ້ງທຳອິດຂອງອົງການຂ່າວດັ່ງກ່າວ ຕໍ່ປະທານາທິບໍດີ ດໍໂນລ ທຣຳ
ພາຍຫລັງທີ່ທຳນຽບຂາວໄດ້ຍຶດເອົາບັດໃຫ້ສິດແກ່ຫົວໜ້ານັກຂ່າວຂອງ CNN ເຂົ້າໄປ
ໃນທຳນຽບຂາວໄດ້ ເປັນຕົ້ນມາ.
