ປະທານາທິບໍດີຣັດເຊຍ, ທ່ານວລາດິເມຍ ປູຕິນ ໄດ້ຕັດສິນໃຈລົງແຂ່ງຂັນເລືອກຕັ້ງປະທາ ນາທິບໍດີໃນເດືອນມີນາ ແລະຈະຢູ່ໃນວັງເຄຣັມລິນ ໄປອີກຢ່າງຫນ້ອຍຈົນຮອດປີ 2030, ອີງຕາມອົງການຂ່າວຣອຍເຕີສ໌ (Reuters) ລາຍງານໃນວັນທີ 6 ພະຈິກ, ໂດຍອ້າງອີງເຖິງ 6 ແຫຼ່ງຂ່າວ ທີ່ມີຄວາມຮູ້ກ່ຽວກັບແຜນການນີ້. ໂດຍທີ່ກຳອຳນາດມາໄດ້ 23 ປີ ແລ້ວ ທ່ານເປັນຜູ້ປົກຄອງທີ່ດຳລົງຕຳແໜ່ງດົນທີ່ສຸດຂອງຣັດເຊຍ. ເມື່ອຖືກກ່າວຫາວ່າ ກໍ່ອາຊະຍາກໍາສົງ ຄາມໃນຢູເຄຣນ, ແລະມີບຸກຄົນຝ່າຍຄ້ານທີ່ສໍາຄັນທີ່ຖືກຈໍາຄຸກ ຫຼື ຖືກເນລະເທດ, ທ່ານປູຕິນອາຍຸ 71 ປີ, ຈະບໍ່ປະເຊີນກັບຄູ່ແຂ່ງດ້ານການເມືອງໃນຂະນະທີ່ທ່ານໄດ້ຮັບຄະແນນເຫັນດີຈາກປະຊາຊົນ 80 ເປີເຊັນ, ອີງຕາມຣອຍເຕີສ໌
ແຕ່ຢ່າງໃດກໍ່ຕາມ, ເຈົ້າໜ້າທີ່ເລືອກຕັ້ງໃນຣັດເຊຍ ພວມມີສະຕິລະວັງຕົວສູງໂດຍຄາດວ່າ ຈະມີການແຊກແຊງ ແລະປອງທໍາລາຍ ຈາກປະຊາຄົມຣັດເຊຍ ທີ່ມີຈໍານວນຫຼວງຫຼາຍທີ່ພັດຖິ່ນ ຢູ່ຕ່າງປະເທດ ທີ່ມີສະມາຊິກເຄື່ອນໄຫວຫ້າວຫັນສ່ວນໃຫຍ່ ບໍ່ພໍໃຈຫຼາຍຂຶ້ນ ກັບນະໂຍບາຍພາຍໃນ ແລະຕ່າງປະເທດຂອງທ່ານປູຕິນ ຊຶ່ງຄວາມຮູ້ສຶກແບບນັ້ນ ໄດ້ເພີ້ມທະວີຂຶ້ນຍ້ອນການ ທໍາສົງຄາມກັບຢູແຄຣນ.
ໃນລະຫວ່າງກອງປະຊຸມທີ່ນະຄອນຫຼວງມົສກູໃນວັນທີ 21 ພະຈິກຜ່ານມາ, ທ່ານນາງແອລລາ ແພມຟີໂລວາ (Ella Pamfilova), ຫົວໜ້າຄະນະກຳມະການເລືອກຕັ້ງສູນກາງຣັດເຊຍ ໄດ້ໃຊ້ພາສາທີ່ຫຍາບຄາຍ ແລະເສື່ອມຊາມໃນການພັນລະນາເຖິງພີ່ນ້ອງຮ່ວມຊາດທີ່ພັດຖິ່ນ ຢູ່ຕາງປະເທດ, ຊຶ່ງເນັ້ນໃຫ້ເຫັນເຖິງຄວາມກັງວົນໃຈ ກ່ອນການເລືອກຕັ້ງຂອງວັງເຄຣັມລິນ.
ທ່ານນາງແພມຟີໂລວາກ່າວວ່າ "ດຽວນີ້, ຈະມີການເລືອກຕັ້ງປະທານາທິບໍດີໃນເດືອນມີນາ 2024 ນີ້, ແລະກໍມີວຽກທີ່ເຮັດສໍາເລັດແລ້ວ ໂດຍພວກຄົນຊັ້ນຕໍ່າທີ່ບໍ່ພຽງແຕ່ໜີໄປເທົ່ານັ້ນ ແຕ່ດຽວນີ້ ຍັງເປັນຜູ້ຫາເງິນໄດ້ຄ່າຈ້າງຕໍ່າຢ່າງໜ້າສົງສານ ໂດຍການສ້າງພື້ນຖານເພື່ອລົບກວນການເລືອກຕັ້ງ, ເຮັດໃຫ້ການເລືອກຕັ້ງຂາດຄວາມເຊື່ອຖື."
ການກ່າວອ້າງນັ້ນ ເປັນຄວາມຈິງແຕ່ບາງສ່ວນ.
ບັນດາຜູ້ນຳ ແລະນັກເຄື່ອນໄຫວຝ່າຍຄ້ານຂອງຣັດເຊຍທີ່ຖືກເນລະເທດ ພວມວາງແຜນ ການໂຄສະນາຫາສຽງ ຕ້ານທ່ານປູຕິນເພື່ອແນໃສ່ເຮັດໃຫ້ການເລືອກຕັ້ງປະທານາທິບໍດີ ເດືອນມີນາ 2024 ຢູ່ໃນບ້ານເກີດເມືອງນອນຂອງພວກເຂົາເຈົ້າ ບໍ່ຖືກຕ້ອງຊອບທໍາ.
ນັບຕັ້ງແຕ່ເດືອນກັນຍາເປັນຕົ້ນມາ, ບັນດາກຸ່ມຝ່າຍຄ້ານຣັດເຊຍ ທີ່ຖືກເນລະເທດ ໄດ້ສົນທະນາກັນຢ່າງເປີດເຜີຍ ກ່ຽວກັບແຜນການທີ່ຈະສົ່ງອິດທິພົນຕໍ່ການລົງຄະແນນສຽງເລືອກຕັ້ງປະທານາທິ ບໍດີປີ 2024.
ວັນທີ 30 ກັນຍາຜ່ານມາ, ທ່ານແມັກຊິມ ຄາດສ໌ (Maxim Katz), ນັກບັນລະຍາຍ ຜ່ານ ທາງວີດິໂອທີ່ເປັນຝ່າຍຄ້ານຂອງຣັດເຊຍທີ່ມີຜູ້ຕິດຕາມ 1 ຕື້ 950 ລ້ານຄົນຢູ່ໃນ YouTube, ໄດ້ສະເໜີໃຫ້ມີການໂຄສະນາຫາສຽງຮ່ວມ ເພື່ອຮັບປະກັນວ່າ ທ່ານປູຕິນຈະບໍ່ໄດ້ເປັນປະທານາທິບໍດີຣັດເຊຍອີກຕໍ່ໄປ. ທ່ານຄາດສ໌ ໄດ້ຮຽກຮ້ອງ ໃຫ້ທຸກຂະບວນການ ເຄື່ອນໄຫວຂອງຝ່າຍຄ້ານຂອງຣັດເຊຍສົມທົບຊັບພະຍາກອນ ແລະສາມັກຄີກັນເພື່ອບັນລຸເປົ້າຫມາຍດັ່ງກ່າວ.
ໃນວັນທີ 22 ຕຸລານີ້, ຊາວຣັດເຊຍປະມານ 200 ຄົນທີ່ຕາງໜ້າໃຫ້ກຸ່ມຄົນພັດຖິ່ນຢູ່ຕ່າງ ປະເທດ, ຂະບວນການເຄື່ອນໄຫວທາງການເມືອງ ແລະສະມາຄົມຕ່າງໆ ໄດ້ພົບປະກັບສະມາຊິກທີ່ມີອິດທິພົນຂອງພັກຝ່າຍຄ້ານທາງການເມືອງທີ່ພັດຖິ່ນຂອງຣັດເຊຍ. ຄວາມພະຍາຍາມດັ່ງກ່າວໄດ້ຖືກສົ່ງເສີມໂດຍຄູ່ແຂ່ງທາງດ້ານການເມືອງທີ່ມີມາແຕ່ດົນນານຂອງ ທ່ານປູຕິນ, ຄືທ່ານມິຄາຍອິນ ໂຄດໍກອຟສກີ (Mikhail Khodorkovsky) ແລະພັນທະມິດຂອງທ່ານ.
ພວກຜູ້ເຂົ້າຮ່ວມໄດ້ລົງນາມໃນຂໍ້ຕົກລົງເພື່ອເລີ້ມຕົ້ນການໂຄສະນາທົ່ວປະເທດຕໍ່ຕ້ານທ່ານປູຕິນ ກ່ອນການເລືອກຕັ້ງປະທານາທິບໍດີປີ 2024.
“ໄດ້ມີການຕັດສິນໃຈແລ້ວວ່າ ພວກເຮົາຮຽກຮ້ອງໃຫ້ພີ່ນ້ອງຮ່ວມຊາດ ເຂົ້າຮ່ວມການໂຄສະ ນາແຫ່ງຊາດ 'ບໍ່ ເລືອກເອົາ ປູຕິນ'. ພວກເຮົາເຊື່ອວ່າມັນແມ່ນທ່ານວລາດິເມຍ ປູຕິນຄວນ ເປັນຜູ້ຖືກຕຳນິ ທີ່ດຶງເອົາປະເທດຂອງພວກເຮົາ ໄປສູ່ຄວາມຂັດແຍ້ງ ໃນພາກພື້ນ, ໄປສູ່ສົງ ຄາມອັນໃຫຍ່ຫຼວງ,” ນັ້ນຄືຄໍາເວົ້າຂອງທ່ານໂຄດໍກອຟສກີ.
ບັນດາຜູ້ແທນຝ່າຍຄ້ານ ຍັງໄດ້ວາງແຜນການເຄື່ອນໄຫວທີ່ລວມມີການຕ້ານການໂຄສະນາເຜີຍແຜ່ຂອງວັງເຄຣັມລິນ, ຮັບປະກັນການປ້ອງກັນທາງດ້ານກົດໝາຍໃຫ້ແກ່ພວກທີ່ຖືກດຳເນີນຄະດີໃນຣັດເຊຍດ້ວຍເຫດຜົນທາງການເມືອງ, ແລະ ໃຫ້ການຊ່ວຍແກ່ພວກນັກເຄື່ອນໄຫວຕ້ານສົງຄາມ.
ເປົ້າໝາຍຫຼັກຂອງພັກຝ່າຍຄ້ານຣັດເຊຍທີ່ພັດຖິ່ນ ແມ່ນເຮັດໃຫ້ການເລືອກຕັ້ງປະທານາທິບໍ ດີຂອງທ່ານປູຕິນໃນເດືອນມີນາ 2024 ເປັນສິ່ງທີ່ບໍ່ຖືກຕ້ອງຊອບທໍາ, ຕາມທີ່ ທ່ານດມິຕຣີ ກູດກອຟ (Dmitry Gudkov), ຜູ້ນຳຝ່າຍຄ້ານ ແລະອະດີດສະມາຊິກສະພາ ດູມມາກ່າວຕໍ່ຊ່ອງໂທລະພາບ FREEDOM ຂອງຢູເຄຣນ.
ທ່ານກູດກອຟ (Gudkov) ກ່າວວ່າ ແຜນການເພື່ອໃຫ້ບັນລຸເປົ້າໝາຍດັ່ງກ່າວ ລວມມີການ ພົວພັນກັບຜູ້ນຳໃນດ້ານການອອກຄວາມຄິດເຫັນ-ນັກການເມືອງທີ່ມີອິດທິພົນ, ນັກຂຽນທີ່ມີຊື່ສຽງ, ນັກສິລະປິນທີ່ໂດ່ງດັງ, ນັກຮ້ອງ ນັກດົນຕີ ແລະ ນັກສະແດງ - ເພື່ອໂຄສະນາຫາສຽງຕ້ານທ່ານປູຕິນ, ເພື່ອໃຫ້ມັນໄປຮອດຊາວຣັດເຊຍເປັນລ້ານໆຄົນ ທັງຢູ່ພາຍໃນ ແລະຕ່າງປະເທດ.
ຍັງມີໂຄງການທາງອິນເຕີແນັດແລະສື່ສັງຄົມອີກ, ລວມທັງໂຄງການ "Legion of Elves" ຫລື “ກອງທະຫານເທບທິດານ້ອຍ” -ຊຶ່ງຕ້ານສົງຄາມ, ໂຄງການລິເລີ່ມຕ້ານການໂຄສະນາການໂຄສະນາຊວນເຊື່ອ ທີ່ກ່ຽວຂ້ອງກັບວຽກງານຂອງຊາວອົບພະຍົບຣັດເຊຍຫຼາຍສິບຄົນ, ອີງຕາມທ່ານອີກໍ ຄູຣອຟເທັຟ (Egor Kuroptev), ຜູ້ອໍານວຍການຫ້ອງການມູນນິທິຣັດເຊຍ ເສລີ ຫລື Free Russia Foundation ໃນເຂດພູເຂົາຄໍເຄຊັສໃຕ້ (Caucasus) ກ່າວຕໍ່ໜັງສືພິມ Insider, ຊຶ່ງເປັນອົງການຂ່າວຣັດເຊຍທີ່ມີສຳນັກງານຕັ້ງຢູ່ລັດເວຍກ່າວໃນວັນທີ 16 ພະຈິກຜ່ານມາ.
ເປົ້າຫມາຍຂອງໂຄງການ "elves" ແມ່ນເພື່ອຍຸຕິສົງຄາມໃນຢູເຄຣນ ແລະຊ່ວຍເຮັດໃຫ້ ຊາວຣັດເຊຍ "ບໍ່ຖືກລ້າງສະຫມອງ" ໂດຍການໂຄສະນາຊວນເຊື່ອຂອງລັດ ແລະສື່ມວນຊົນທີ່ຄວບຄຸມໂດຍວັງເຄຣັມລິນ. “ເພື່ອວ່າ ເມື່ອຄົນຜູ້ນຶ່ງເບິ່ງໂທລະທັດ ແລ້ວກໍມາເບິ່ງໃນສື່ສັງຄົມ ແລະ ຈະເຫັນທັດສະນະທີ່ແຕກຕ່າງກັນ,” ອີງຕາມທ່ານ ຄູຣອຟເທັຟ ເວົ້າ.
ນັບຕັ້ງແຕ່ໂຄງການດັ່ງກ່າວໄດ້ເປີດຕົວໃນເກືອບ 2 ປີກ່ອນ ໂຄງການ "elves" ໄດ້ຂຽນຄໍາຄິດເຫັນຫຼາຍກວ່າ 2.3 ລ້ານອັນໃນສື່ສັງຄົມ ທີ່ຊຶມຊັບເຂົ້າໄປໃນຊຸມຊົນໃຊ້ອິນເຕີແນັດທີ່ສະຫນັບສະຫນູນລັດຖະບານຣັດເຊຍປະມານ 900 ຊຸມຊົນ, ຕົ້ນຕໍແມ່ນໃນເວທີສື່ສັງຄົມຂອງລັດຖະບານຣັດເຊຍ, vKontakte.
ຊາວຣັດເຊຍບາງຄົນທີ່ພັດຖິ່ນ ໄດ້ສະເໜີວິທີທີ່ຮ້າຍແຮງກວ່ານັ້ນ ໃນການປົດທ່ານປູຕິນ ອອກຈາກອຳນາດ. ທ່ານອິລລິຢາ ໂປໂນມາເຣຟ (Ilya Ponomarev), ອະດີດຮອງ ສະພາດູມມາຂອງຣັດເຊຍ ທີ່ອາໄສຢູ່ນະຄອນຫຼວງກີຢິບຕັ້ງແຕ່ປີ 2014, ໄດ້ສະຫນັບສະຫນູນການຕໍ່ຕ້ານເຈົ້າໜ້າທີ່ຣັດເຊຍດ້ວຍອາວຸດ ແລະ ເຂົ້າຮ່ວມໃນການສ້າງຕັ້ງກອງທັບອິດສະຫລະພາບຣັດເຊຍ, ເປັນຫນ່ວຍງານນຶ່ງທີ່ຢູ່ພາຍໃນກອງທັບຢູເຄຣນ ທີ່ປະກອບດ້ວຍພົນລະເມືອງຣັດເຊຍຕໍ່ຕ້ານລະບອບປົກຄອງຂອງປູຕິນ.
ທ່ານໂປໂນມາເຣຟ ຍັງໄດ້ສ້າງ “ສະພາແຫ່ງຣັດເຊຍເງົາ” ທີ່ເອີ້ນວ່າສະພາຜູ້ແທນປະຊາຊົນ, ຊຶ່ງປະກອບດ້ວຍບັນດາອະດີດສະມາຊິກສະພາຣັດເຊຍທີ່ ດຽວນີ້ອາໄສຢູ່ຕ່າງປະເທດ.
ເຊັ່ນດຽວກັນກັບການເລືອກຕັ້ງທີ່ຜ່ານມາ, ວັງເຄຣັມລິນ ໄດ້ຮັບປະກັນວ່າໃຫ້ກໍາຈັດຂອງຄູ່ແຂ່ງທາງດ້ານການເມືອງຂອງຕົນໝົດທຸກຄົນ ໃຫ້ອອກໄປຈາກການເລືອກຕັ້ງເດືອນມີນາ 2024. ໃນວັນທີ 17 ເມສານີ້, ສານຂອງມົສກູໄດ້ຕັດສິນວ່າ ຝ່າຍຄ້ານທີ່ໂດດເດັ່ນຂອງ ຣັດເຊຍ ທ່ານວລາດິເມຍ ກາຣາ-ເມີຊາ (Vladimir Kara-Murza) ມີຄວາມຜິດໃນຂໍ້ຫາຂາຍຊາດ ແລະໄດ້ຕັດສິນລົງໂທດຈຳຄຸກ 25 ປີ, ໂດຍອ້າງອີງເຖິງການກ່າວຄຳປາໄສຕໍ່ສະມາຊິກສະພາຕໍ່າລັດອາຣີໂຊນາໃນປີ 2022 ທີ່ທ່ານໄດ້ກ່າວປະນາມການບຸກລຸກຂອງຣັດເຊຍ.
ຜູ້ຕໍານິວິຈານປູຕິນທີ່ໂດດເດັ່ນທີ່ສຸດ, ທ່ານອາເລັກເຊ ນາວາລນີ (Alexei Navalny) ໄດ້ຖືກ ຈໍາຄຸກຕັ້ງແຕ່ວັນທີ 17 ມັງກອນ 2021, ໂດຍໄດ້ຮັບໂທດຈໍາຄຸກ 19 ປີ ໃນຂໍ້ກ່າວຫາສ້າງຊຸມຊົນຫົວຮຸນແຮງ ແລະຍຸຍົງໃຫ້ເກີດລັດທິຫົວຮຸນແຮງ.
ເຊື່ອກັນວ່າຄົນເຊື້ອຊາດຣັດເຊຍ ເປັນນຶ່ງໃນກຸ່ມຄົນພັດຖິ່ນທີ່ໃຫຍ່ທີ່ສຸດຂອງໂລກ, ມີຊາວຣັດເຊຍປະມານ 20 ຫາ 30 ລ້ານຄົນອາໄສຢູ່ຕ່າງປະເທດ. ຣັດເຊຍໄດ້ປະສົບກັບການອົບພະຍົບໜີຂອງຄົນຄັ້ງໃຫຍ່ທີ່ສຸດ ນັບຕັ້ງແຕ່ທ່ານປູຕິນໄດ້ສັ່ງໃຫ້ກອງທັບຣັດເຊຍ ບຸກ ລຸກຢູເຄຣນໃນເດືອນກຸມພາປີ 2022. ອີງຕາມການຄາດການຫລາຍອັນ, ມີປະຊາຊົນ 5 ແສນ ຫາ 1,3 ລ້ານຄົນ ໄດ້ໜີອອກຈາກຣັດເຊຍໃນປີກາຍນີ້.
ສ່ວນໃຫຍ່ຂອງພວກເຂົາ, ອີງຕາມການສໍາຫຼວດແລ້ວ ແມ່ນໜີໄປຍ້ອນເຫດຜົນທາງດ້ານການເມືອງ - ມີການຂັດແຍ້ງກັບເຈົ້າຫນ້າທີ່ ແລະການກົດຂີ່ຂົ່ມເຫັງ.
ພວກພັດຖິ່ນຣັດເຊຍຫຼາຍຄົນ ຍັງຄົງເຄື່ອນໄຫວທາງດ້ານການເມືອງຢ່າງຫ້າວຫັນຢູ່ຕ່າງປະ ເທດ ໃນນາມສ່ວນບຸກຄົນ ຫຼື ເປັນສ່ວນນຶ່ງຂອງອົງການຈັດຕັ້ງຝ່າຍຄ້ານຣັດເຊຍ ຫຼາຍຝ່າຍ ທີ່ສ້າງຕັ້ງຂຶ້ນສ່ວນໃຫຍ່ ແມ່ນຢູ່ໃນຢູໂຣບ ແລະບາງອົງການຢູ່ໃນສະຫະລັດ.
ການກ່າວອ້າງຂອງທ່ານນາງແພມຟີລອຟວາ (Pamfilova) ເວົ້າວ່າຊາວຣັດເຊຍທີ່ຖືກເນລະເທດຈະພະຍາຍາມ "ເຮັດໃຫ້" ການເລືອກຕັ້ງປະທານາທິບໍດີຢູ່ໃນປະເທດ “ຂາດ ຄວາມເຊື່ອຖືໄດ້” ແມ່ນພາໃຫ້ເຂົ້າໃຈຜິດ.
ພວກນັກສັງເກດການສາກົນຈາກບັນດາກຸ່ມຕ່າງໆເຊັ່ນ: ອົງການຄວາມໝັ້ນຄົງ ແລະການຮ່ວມມືໃນຢູໂຣບ, ລັດຖະສະພາຂອງສະພາຢູໂຣບ ແລະ ອື່ນໆ ໄດ້ບັນທຶກການລະເມີດຢ່າງເປັນລະບົບໃນການເລືອກຕັ້ງຂອງຣັດເຊຍ ຕັ້ງແຕ່ປີ 2011. ການລະເມີດນັ້ນ ລວມມີການບໍ່ອະນຸຍາດໃຫ້ພວກຕໍານິວັງເຄຣັມລິນເຂົ້າຮ່ວມໃນການແຂ່ງຂັນ, ການແຊກແຊງຂອງລັດຖະບານເຂົ້າໃນການລົງຄະແນນສຽງ, ການລົງຄະແນນສຽງທີ່ສໍ້ໂກງ ແລະລະເມີດຂັ້ນຕອນການນັບຄະແນນສຽງ. ຕົວຢ່າງ ອົງການ OSCE ໄດ້ພັນລະນາການເລືອກຕັ້ງປະທາ ນາທິບໍດີປີ 2012 ໃນຣັດເຊຍວ່າ "ຮູ້ຜົນລ່ວງໜ້າແລ້ວ ແລະບໍ່ຍຸຕິທໍາ."
ໃນວັນທີ 13 ຕຸລາຜ່ານມານີ້, ລັດຖະສະພາຂອງສະພາຢູໂຣບ ໄດ້ອອກຖະແຫຼງການຮຽກຮ້ອງໃຫ້ປະເທດຢູໂຣບ ຖືວ່າການປົກຄອງຂອງທ່ານປູຕິນ ເປັນການກະທຳທີ່ຜິດກົດໝາຍ ຖ້າຫາກທ່ານຍັງດຳລົງຕຳແໜ່ງຫຼັງຈາກການເລືອກຕັ້ງປີ 2024 ເປັນຕົ້ນໄປ. ຖ້າເປັນແນວນັ້ນ, ຖະແຫຼງການນັ້ນກ່າວວ່າ ຢູໂຣບຕ້ອງຍຸຕິການພົວພັນກັບຣັດເຊຍທັງໝົດ, ຍົກເວັ້ນແຕ່ດ້ານມະນຸດສະທຳເທົ່ານັ້ນ.
“ອຳນາດອັນລົ້ນເຫຼືອຂອງປະທານາທິບໍດີທີ່ໄດ້ມາຍ້ອນການດຳລົງຕຳແໜ່ງເປັນໄລຍະຍາວທີ່ສຸດບວກກັບການຂາດການກວດກາ ແລະການດຸ່ນດ່ຽງ ເຊັ່ນລັດຖະສະພາທີ່ເຂັ້ມແຂງ, ອົງການຕຸລາການທີ່ເປັນອິດສະຫລະ, ສື່ມວນຊົນທີ່ເສລີ ແລະ ສັງຄົມພົນລະເຮືອນທີ່ຮຸ່ງເຮືອງ ໄດ້ຫັນເອົາສະຫະພັນຣັດເຊຍໃຫ້ກາຍເປັນປະເທດຜະເດັດການໂດຍແທ້ຈິງ,” ຖະແຫຼງການນັ້ນເວົ້່າ.
