ລິ້ງ ສຳຫລັບເຂົ້າຫາ

ວັນອັງຄານ, ໒໕ ມິຖຸນາ ໒໐໒໔

ຈີນ ບໍ່​ເວົ້າ​ຄວາມ​ຈິງ ກ່ຽວ​ກັບ​ການ​ສະ​ໜອງ ຢາ​ຂ້າ​ແມງ​ໄມ້ທີ່ມີ​ພິດ ​ໂດຍ​ອົງ​ການ​ອາ​ຫານ​ໂລກ ໃຫ້​ແກ່​ປະ​ເທດ​ທີ່​ມີ​ລາຍ​ໄດ້​ຕ່ຳ ພາຍ​ໃຕ້​ທ່ານ​ຈູ


ແຟ້ມ - ທ່ານ​ຈູ ດົງ​ຢູ ຈາກ​ຈີນ ກ່າວ​ຄຳ​ປາ​ໄສ ທີ່ກອງ​ປະ​ຊຸມ ສະ​ໄໝ​ທີ 41 ທີ່​ສຳ​ນັກ​ງານ​ໃຫຍ່ ​ອົງ​ການ​ອາ​ຫານ​ແລະ​ກະ​ເສດ​ສະ​ຫະ​ປະ​ຊາ​ຊາດ ນະ​ຄອນ​ໂຣມ ເມື່ອ​ວັນ​ທີ 22 ມິ​ຖຸ​ນາ 2019.
ແຟ້ມ - ທ່ານ​ຈູ ດົງ​ຢູ ຈາກ​ຈີນ ກ່າວ​ຄຳ​ປາ​ໄສ ທີ່ກອງ​ປະ​ຊຸມ ສະ​ໄໝ​ທີ 41 ທີ່​ສຳ​ນັກ​ງານ​ໃຫຍ່ ​ອົງ​ການ​ອາ​ຫານ​ແລະ​ກະ​ເສດ​ສະ​ຫະ​ປະ​ຊາ​ຊາດ ນະ​ຄອນ​ໂຣມ ເມື່ອ​ວັນ​ທີ 22 ມິ​ຖຸ​ນາ 2019.
ທ່ານ​ຫວັງ ເຫວິນ​ບິນ

ທ່ານ​ຫວັງ ເຫວິນ​ບິນ

ໂຄ​ສົກ​ກະ​ຊວງ​ການ​ຕ່າງ​ປະ​ເທດ​ຈີນ

: “… ການ​ຖືກ​ເລືອກຄືນ​ຂອງ​ທ່ານ (ຈູ ດົງ​ຢູ) ຫົວ​ໜ້າ​ອົງ​ການ​ອາ​ຫານ ແລະ​ກະ​ເສດ​ຂອງ​ສະ​ຫະ​ປະ​ຊາ​ຊາດ ໃນ​ປັດ​ຈຸ​ບັນ ດ້ວຍ​ຄະ​ແນນ​ສຽງ​ສ່ວນ​ຫຼາຍສະ​ແດງ​ໃຫ້​ເຫັນ​ວ່າ ວຽກ​ງານ​ຂອງ​ທ່ານ​ໃນ​ຮອບ​ສີ່​ປີ​ທີ່​ຜ່ານ​ມາໄດ້​ ຖືກ​ຮັບ​ຮູ້​ເປັນ​ຢ່າງ​ສູງ​ໂດຍ​ປະ​ຊາ​ຄົມ​ນາໆ​ຊາດ ແລະ​ການ​ໃຫ້​ເຫດ​ຜົນ​ທີ່​ທ່ານ ​ຫາ​ກໍ​ອ້າງ​ໄປ​ນັ້ນ ແມ່ນ​ເປັນ​ທີ່​ຮັບ​ເອົາ​ບໍ່​ໄດ້ ຕໍ່​ປະ​ຊາ​ຄົມ​ນາໆ​ຊາດ.”

ເຮັດ​ໃຫ້​ສັງ​ຄົມ​ເຂົ້າ​ໃຈ​ຜິດ
ພາຍ​ໃຕ້​ທ່ານ​ຈູ ອົງ​ການ FAO ໄດ້​ຫັນ​ເຫ​ໄປ​ຈາກ​ນະ​ໂຍ​ບາຍ​ທີ່​ມີ​ມາ​ດົນ​ນານ

ເມື່ອ​ວັນ​ທີ 2 ກໍ​ລະ​ກົດ ທ່ານ​ຈູ ດົງ​ຢູ (Qu Dongyu) ອະ​ດີດ​ລັດ​ຖະ​ມົນ​ຕີ​ຂອງ​ຈີນ ໄດ້​ຖືກ​ເລືອກ​ ໃຫ້​ເຂົ້າ​ຮັບ​ຕຳ​ແໜ່ງ​ເປັນ​ສະ​ໄໝ​ທີ​ສອງ ໃນ​ຖາ​ນະ​ຜູ້​ອຳ​ນວຍ​ການ​ໃຫຍ່ຂອງ​ອົງ​ການ​ອາ​ຫານ​ແລະ​ກະ​ເສດ​ສະ​ຫະ​ປະ​ຊາ​ຊາດຫຼື FAO. ທ່ານ​ຈູ ເປັນ​ຜູ້​ສະ​ໝັກ​ພຽງ​ຜູ້​ດຽວ​ເທົ່າ​ນັ້ນ ໃນ​ການ​ເລືອກ​ຕັ້ງ​ດັ່ງ​ກ່າວນີ້.

ນຶ່ງ​ໃນ​ບັນ​ດາ​ອົງ​ການ​ຈັດ​ຕັ້ງ​ທີ່​ໃຫຍ່​ທີ່​ສຸດ ແລະ​ມີ​ອິດ​ທິ​ພົນ​ຫຼາຍ​ທີ່​ສຸດ​ຂອງ​ສະ​ຫະ​ປະ​ຊາ​ຊາດ, ອົງ​ການ FAO ແມ່ນ​ມີ​ໜ້າ​ທີ່​ບົດ​ບາດໃນ​ການ​ກຳ​ກັບ​ນຳ​ຄວາມ​ພະ​ຍາ​ຍາມ​ຂອງ​ນາໆ​ຊາດ ເພື່ອ​ເອົາ​ຊະ​ນະ​ຄວາມ​ອຶດ​ຢາກແລະ​ບັນ​ລຸ​ຄວາມ​ໝັ້ນ​ຄົງທາງ​ດ້ານ​ອາ​ຫານ​ຢູ່​ໃນ​ທົ່ວ​ໂລກ.

ສອງມື້ ​ກ່ອນ​ການ​ເລືອກ​ຕັ້ງ​ຜູ້​ນຳ​ ຂອງ​ອົງ​ການ FAO, ລາຍ​ງານ​ການ​ສືບ​ສວນ​ຂອງ​ເຢຍ​ຣະ​ມັນ ໄດ້​ກ່າວ​ຫາ​ທ່ານ​ຈູ​ວ່າ ​ສ້າງ​ຄວາມ​ເສຍ​ຫາຍ​ ໃຫ້​ແກ່ອົງ​ການ​ອາ​ຫານ​ສະ​ຫະ​ຊາ​ຊາດ ແລະຫັນ​ເຫ​ໄປ​ຈາກ​ນະ​ໂຍ​ບາຍ​ຂອງ​ທາງ​ອົງ​ການ ໃນ​ການ​ຊ່ວຍ​ໃຫ້​ພວກ​ພໍ່​ໄຮ່​ຊາວ​ສວນ​ຫລຸດ​ຜ່ອນ​ການ​ເພິ່ງ​ພາ​ນຳ​ການ​ໃຊ້​ຢາ​ຂ້າ​ແມງ​ໄມ້.

ການ​ສືບ​ສວນ​ເປີດ​ເຜີຍ​ວ່າ ພ​າຍ​ໃຕ້​ການ​ນຳ​ພາ​ຂອງ​ທ່ານ​ຈູ ອົງ​ການ FAO ໄດ້​ໃຫ້​ການ​ອະ​ນຸ​ມັດ ອຳ​ນວຍ​ຄວາມ​ສະ​ດວກ ແລະ​ສະ​ໜອງ​ທຶນ​ແກ່​ບັນ​ດາ​ປະ​ເທດ​ທີ່​ທຸກ​ຍາກ​ໃນ​ອາ​ຟ​ຣິ​ກາ ແລະ​ເອ​ເຊຍ​ໃຕ້ ພ້ອມ​ກັບ​ຢາ​ຂ້າ​ແມງ​ໄມ້​ທີ່​ຖືກ​ຫ້າມ​ຢູ່​ໃນ​ຢູ​ໂຣບ ຍ້ອນ​ມີ​ສານ​ພິດ​ທີ່​ສູງ​ເກີນ​ໄປ.

ເມື່ອ​ມີ​ການ​ຖາມ​ກ່ຽວ​ກັບ​ການ​ກ່າວ​ຫານີ້​ຕໍ່​ທ່ານ​ຈູ ກະ​ຊວງ​ການ​ຕ່າງ​ປະ​ເທດ​ຈີນ​ຕອບ​ວ່າ:

“ ….ການ​ຖືກ​ເລືອກຄືນ​ອີກຂອງ​ທ່ານ (ຈູ ດົງ​ຢູ) ດ້ວຍ​ຄະ​ແນນ​ສຽງ​ສ່ວນ​ຫຼາຍ ສະ​ແດງ​ໃຫ້​ເຫັນ​ວ່າ ວຽກ​ງານ​ຂອງ​ທ່ານ​ໃນ​ຮອບ​ສີ່​ປີ​ທີ່​ຜ່ານ​ມາໄດ້​ຖືກ​ຮັບ​ຮູ້​ເປັນ​ຢ່າງ​ສູງ​ໂດຍ​ປະ​ຊາ​ຄົມ​ນາໆ​ຊາດ ແລະ​ການ​ໃຫ້​ເຫດ​ຜົນ​ທີ່​ທ່ານ​ຫາ​ກໍ​ອ້າງ​ໄປ​ນັ້ນ ແມ່ນ​ເປັນ​ທີ່​ຮັບ​ເອົາ​ບໍ່​ໄດ້ ຕໍ່​ປະ​ຊາ​ຄົມ​ນາໆ​ຊາດ” ໂຄ​ສົກກະ​ຊວງ​ການ​ຕ່າງ​ປະ​ເທດ​ຈີນ ທ່ານ​ຫວັງ ເຫວິນ​ບິນ ກ່າວ​ໃນ​ວັນ​ທີ 3 ກໍ​ລະ​ກົດ.

ນັ້​ນ​ແມ່ນ​ພາ​ໃຫ້​ສັງ​ຄົມ​ເຂົ້າ​ໃຈ​ຜິດ.

ພາຍ​ໃຕ້​ທ່ານ​ຈູ ອົງ​ການ FAO ໄດ້​ຫັນ​ເຫ​ໄປ​ຈາກ​ນະ​ໂຍ​ບາຍ​ທີ່​ມີ​ມາ​ເປັນ​ເວ​ລາ​ດົນ​ນານ ໃນ​ການ​ຫຼຸດ​ຜ່ອນ​ການ​ເພິ່ງ​ພາ​ຕໍ່​ຢາ​ຂ້າ​ແມງ​ໄມ້ ແລະ​ໄດ້​ເຮັດ​ຂໍ້​ຕົກ​ລົງ​ໃນ​ການ​ເປັນ​ພາ​ຄື​ກັບ ກັບ​ກຸ່ມອຸດ​ສາ​ຫະ​ກຳ​ແລະ​ບໍ​ລິ​ສັດ ​ສານ​ເຄ​ມີ​ທາງ​ດ້ານ​ກະ​ສິ​ກຳ ຮວມ​ທັງ​ບັນ​ດາ​ບໍ​ລິ​ສັດ​ທີ່​ເຊື່ອມ​ໂຍງ​ກັບ​ລັດ​ຖະ​ບານ​ຈີນ.

ເວ​ລາ​ເວົ້າ​ເຖິງ​ສຸ​ຂະ​ພາບ​ຂອງຜົນ​ລະ​ປູກ ອົງ​ກາ​ນອ​າ​ຫານ​ແລະ​ກະ​ເສດ​ຂອງ​ສະ​ຫະ​ປະ​ຊາ​ຊາດກ່າວ​ວ່າ ນະ​ໂຍ​ບາຍ​ຂອງ​ຕົນ​ແມ່ນ​ຊຸກ​ຍູ້​ວີ​ທີ​ການ​ທີ່​ເອີ້ນ​ວ່າ ການ​ຄຸ້ມ​ຄອງ​ປະ​ສົມ​ປະ​ສານ ຊຶ່ງ​ໄດ້​ເນັ້ນ​ຢ້ຳ​ເຖິງ​ການ​ລົບ​ກວນ​ທີ່​ເປັນ​ໄປ​ໄດ້​ທີ່​ໜ້ອຍ​ທີ່​ສຸດ ​ຕໍ່​ລະ​ບົບ​ນິ​ເວດ​ດ້ານ​ການ​ກະ​ສິ​ກຳ​ ແລະ​ຊຸກ​ຍູ້​ໃຫ້​ນຳ​ໃຊ້​ກົນ​ໄກ​ການ​ຄວບ​ຄຸມ​ແມງ​ໄມ້​ຕາມ​ທຳ​ມະ​ຊາດ.

ໂດຍ​ເປັນ​ທາງ​ການ​ແລ້ວ ການ​ສະ​ເໜີ​ແນະ​ຂອງ​ອົງ​ການ FAO ໃຫ້​ນຳ​ໃຊ້ຢາ​ຂ້າ​ແມງ​ໄມ້​ທີ່​ເໝາະ​ສົມ “ໃນ​ວິ​ທີ​ທີ່​ສຸດ​ທ້າຍ​ເທົ່າ​ນັ້ນ” ເວ​ລາ​ໃດ​ທີ່​ບໍ່​ມີ​ທາງ​ເລືອກ.

ການ​ເກັບ​ກ່ຽວ​ເຂົ້າ​ເບ​ລ່ ທີ່​ທົ່ງ​ແຫ່ງ​ນຶ່ງ​ໃກ້​ກັບ​ບ້ານ Krasne ໃນ​ເຂດ​ເຊີ​ນີ​ຮິບ ປະ​ມານ 122 ກິ​ໂລ​ແມັດ ຢູ່​ທາງ​ເໜືອ​ຂອງ​ນະ​ຄອນ​ຫຼວງ​ກິ​ຢິບ ເມື່ອ​ວັນ​ທີ 5 ກໍ​ລະ​ກົດ 2019.(AFP PHOTO /FAO/ANATOLII STEPANOV)
ການ​ເກັບ​ກ່ຽວ​ເຂົ້າ​ເບ​ລ່ ທີ່​ທົ່ງ​ແຫ່ງ​ນຶ່ງ​ໃກ້​ກັບ​ບ້ານ Krasne ໃນ​ເຂດ​ເຊີ​ນີ​ຮິບ ປະ​ມານ 122 ກິ​ໂລ​ແມັດ ຢູ່​ທາງ​ເໜືອ​ຂອງ​ນະ​ຄອນ​ຫຼວງ​ກິ​ຢິບ ເມື່ອ​ວັນ​ທີ 5 ກໍ​ລະ​ກົດ 2019.(AFP PHOTO /FAO/ANATOLII STEPANOV)

ແຕ່​ແນວ​ໃດ​ກໍ​ຕາມ ການ​ສືບ​ສວັນ ທີ່​ມີ​ຊື່​ວ່າ “Food.Power.China” ທີ່​ຜະ​ລິດ​ຂຶ້ນ​ໂດຍ​ອົງ​ການ​ອອກ​ອາ​ກາດ​ສາ​ທາ​ລະ​ນະ ບາ​ວາ​ຣຽນ​ເຢຍ​ຣະ​ມັນ ຊຶ່ງ​ເປັນ​ອົງ​ການ​ອອກ​ອາ​ກາດ​ສູນ​ກາງ​ຂອງ​ປະ​ເທດ, RBB Fernsehen ແລະ SWR Fernsehen, ໄດ້​ເຜີຍ​ໃຫ້​ເຫັນ​ວ່າ ອົງ​ການ FAO ພາຍ​ໃຕ້​ການ​ນຳ​ພາ​ ຂອງ​ທ່ານ​ຈູ ໄດ້​ອຳ​ນວຍ​ຄວາມ​ສະ​ດວກ ແລະ​ໃຫ້​ທຶນ​ແບບ​ໃດເພື່ອ​ໃຫ້​ມີ​ການ​ນຳ​ໃຊ້​ຢາ​ຂ້າ​ແມງ​ໄມ້​ເພີ້ມ​ຂຶ້ນຢູ່​ໃນ​ບັນ​ດາ​ປະ​ເທດ​ທີ່​ທຸກ​ຍາກ​ໃນ​ອາ​ຟ​ຣິ​ກາແລະ​ເອ​ເຊຍ​ຕາ​ເວັນ​ອອກ​ສຽງ​ໃຕ້.”

ໃນ​ປີ 2020 ນຶ່ງ​ປີ​ຫຼັງ​ຈາກ​ທ່ານ​ໄດ້​ເຂົ້າ​ກຳ​ຕຳ​ແໜ່ງ​ຫົວ​ໜ້າ​ອົງ​ການ FAO ທ່ານ​ຈູ​ໄດ້​ລົງ​ນາມ ໃນ​ຈົດ​ໝາຍ​ສະ​ແດງ​ຄວາມ​ຕັ້ງ​ໃຈ ເພື່ອ​ສຳ​ຫຼວດ​ເບິ່ງ​ການ​ເປັນ​ພາ​ຄີ​ໃໝ່ກັບ​ບໍ​ລິ​ສັດ CropLife International ຊຶ່ງ​ເປັນ​ກຸ່ມ​ວິ້ງ​ເຕັ້ນ​ກ່ຽວ​ກັບ​ອຸດ​ສາ​ຫະ​ກຳ​ສານ​ເຄ​ມີ​ທີ່​ໃຫຍ່​ທີ່​ສຸດ.

ບໍ​ລິ​ສັດ CropLife International ກ່າວ​ວ່າ ພາ​ລະ​ກິດ​ຂອງ​ຕົນ​ແມ່ນ ເພື່​ອ​ຊຸກ​ຍູ້ເທັກ​ໂນ​ໂລ​ຈີ​ຕ່າງໆ​ທາງ​ດ້ານ​ກະ​ສິ​ກຳ ເຊັ່ນ​ວ່າ ຢາ​ຂ້າ​ແມງ​ໄມ້ ແລ​ະ​ເທັກ​ໂນ​ໂລ​ຈີ​ຊີ​ວະ​ພາບ​ຂອງ​ພືດ.“ ​ບັນ​ດາສະ​ມາ​ຊິກ​ຂອງ​ສະ​ມາ​ຄົມ​ແມ່ນ​ຮວມ​ທັງ​ບໍ​ລິ​ສັດ​ເບ​ເຢີ, ຊູ​ມີ​ໂຕ​ໂມ​ເຄ​ມີ​ໂກ​ລ ແລະ​ຊິນ​ເຈັນ​ຕາ.

ແຜນ​ການ​ເຂົ້າ​ເປັນ​ພາ​ຄີ​ດັ່ງ​ກ່າວ ໄດ້​ກໍ່​ໃຫ້​ເກີດ​ມີ​ຄວາມ​ເປັນ​ຫ່ວງ​ກັງ​ວົນ ພາຍ​ໃນ​ກຸ່ມ​ສັງ​ຄົມ​ພົນ​ລະ​ເຮືອນ ແລະ​ໃນ​ໝູ່​ພວກ​ນັກ​ວິ​ທະ​ຍາ​ສາດທີ່​ກ່າວ​ວ່າ ມັນ​ຈະ​ສ້າງ​ຄວາມ​ເສຍ​ຫາຍ​ໃຫ້​ແກ່​ຄວາມ​ສາ​ມາດ​ຂອງ​ອົງ​ການ FAO ທີ່​ຈະ​ເຮັດ​ວຽກ​ໃນ​ຖາ​ນະ​ອົງ​ການ​ອິດ​ສະ​ຫຼະ ເປັນ​ກາງແລະ​ເອ​ເຢັນ​ທີ່​ຊື່​ສັດ ລະ​ຫວ່າງ​ລັດ​ຖະ​ບານ​ຂອງ​ປະ​ເທດ​ຕ່າງ​ແລະ​ພາກ​ເອກ​ກະ​ຊົນ.

ພວກ​ນັກ​ວິ​ຊາ​ການ ນັກ​ວິ​ທະ​ຍາ​ສາດແລະ​ນັກ​ຄົ້ນ​ຄວ້າກຸ່ມ​ນຶ່ງ ໄດ້​ພິມ​ເຜີຍ​ແຜ່​ຈົດ​ໝາຍ​ສະ​ບັບ​ນຶ່ງ​ທີ່​ສົ່ງ​ໄປ​ຫາ​ທ່ານ​ຈູ ກ່າວ​ວ່າ ຄວາມ​ເປັນ​ໄປ​ໄດ້​ໃນ​ການ​ເປັນ​ພາ​ຄີ “ບ່ອນ​ທຳ​ລາຍ​ນະ​ໂຍ​ບາຍ​ຂອງ FAO ເພື່ອ​ຫຼຸດ​ຜ່ອນ​ຄວາມ​ເສຍ​ຫາຍ​ໃຫ້​ໜ້ອຍ​ທີ່​ສຸດ​ຕໍ່​ການ​ນຳ​ໃຊ້​ສານ​ເຄ​ມີ​ຂ້າ​ແມງ​ໄມ້ ຢູ່​ໃນ​ທົ່ວ​ໂລກ ຮວມ​ທັງ​ຄວາມ​ສ່ຽງ​ທີ່​ພົວ​ພັນ​ກັບ​ຢາ​ຂ້າ​ແມງ​ໄມ້​ທີ່​ເປັນ​ອັນ​ຕະ​ລາຍ​ສູງ (HHPs) ຊຶ່ງ​ຫຼາຍໆ​ຊະ​ນິດ​ແມ່ນ​ຜະ​ລິດ​ໂດຍ​ສະ​ມາ​ຊິກ​ຂອງບໍ​ລິ​ສັດ CropLife.”

ຈົດ​ໝາຍ​ກ່າວ​ຕື່ມ​ວ່າ ສະ​ຖາ​ບັນ​ສະ​ຫະ​ປະ​ຊາ​ຊາດ “ບໍ່​ຄວນ​ໃຫ້​ການ​ສະ​ໜັບ​ສະ​ໜຸນ​ຕໍ່​ສະ​ມາ​ຄົມ​ບໍ​ລິ​ສັດ​ເອກ​ກະ​ຊົນທີ່​ຊອກ​ຫາ​ຜົນ​ກຳ​ໄລໃນ​ການ​ສືບ​ຕໍ່​ຂາຍ​ຜະລິດ​ຕະພັນ ທີ່​ຖືກ​ຈົດ​ບັນ​ທຶກວ່າ​ມີ​ຜົນ​ກະ​ທົບ​ທີ່​ເປັນ​ອັນ​ຕະ​ລາຍ​ຕໍ່​ຊີ​ວະ​ນາໆ​ພັນ.

ເວັບ​ໄຊ​ຂ່າວ​ວິ​ທະ​ຍາ​ສາດ Mongabay ຊີ້​ໃຫ້​ເຫັນ​ວ່າ ພາຍ​ໃຕ້​ທ່ານ​ຈູ ອົງ​ການ FAO ໄດ້​ໃຫ້​ການ​ອະ​ນຸ​ມັດ​ຕໍ່​ການ​ນຳ​ໃຊ້ “ຢາ​ຂ້າ​ແມງ​ໄມ້​ທີ່​ເປັນ​ພິດ 6 ຊະ​ນິດ​ຢູ່​ໃນ​ເຂດ​ອາ​ຟ​ຣິ​ກາ​ຕາ​ເວັນ​ອອກ 3 ຊະ​ນິດ​ໃນ​ນັ້ນແມ່ນ​ຖື​ວ່າ​ເປັນ​ອັນ​ຕະ​ລາຍ​ໂດຍອົງ​ການ​ອະ​ນາ​ໄມ​ໂລກ.

ເວັບ​ໄຊ​ Mongabay ໃຫ້​ຂໍ້​ສັງ​ເກດ​ວ່າ ອີງ​ຕາມ​ຂໍ້​ມູນ​ຂອງ​ອົງ​ການ FAO ເອງ​ແລ້ວ 95.8 ເປີ​ເຊັນ ຂອງ​ຢາ​ຂ້າ​ແມງ​ໄມ້ທີ່​ສົ່ງ​ໄປ​ໃຫ້ ​ບັນ​ດາ​ປະ​ເທດ​ໃນ​ເຂດ​ອາ​ຟ​ຣິ​ກາ​ຕາ​ເວັນ​ອອກ ລະ​ຫວ່າງ​ປີ 2019 ຫາ 2021 ​ຊຶ່ງ “ໃນ​ທາງວິ​ທະ​ຍາ​ສາດ​ແລ້ວ​ໄດ້​ພິ​ສູດ​ໃຫ້​ເຫັນ​ວ່າ ເປັນ​ອັນ​ຕະ​ລາຍ​ຮ້າຍ​ແຮງ” ຕໍ່​ມະ​ນຸດ ປາ ແລະ​ສັດ​ລ້ຽງ​ລູກ​ດ້ວຍ​ນ້ຳ​ນົມ.

ໃນ​ເອກ​ກະ​ສານ​ທີ່​ກ່າວ​ມາ​ຂ້າງ​ເທິງນັ້ນ ອະ​ດີດ​ພະ​ນັກ​ງານ​ຂອງ​ອົງ​ການ FAO ທ່ານ​ແຮນ​ສ໌ ດ​ຣາຍ​ເອີ້ (Hans Dreyer) ກ່າວ​ວ່າ “ທ່ານ​ຕື່ນ​ຕົກ​ໃຈ ໃນ​ຄວາມ​ຖີ່​ຂອງ​ການ​ຈັດ​ສົ່ງຢາ​ຂ້າ​ແມງ​ໄມ້​ທີ່​ເປັນ​ພິດໃນ​ທຳ​ນອງນີ້ໄດ້​ຮັບ​ການ​ອະ​ນຸ​ມັດ.”

ຕັກ​ແຕນ​ນ້ອຍ​ທະ​ເລ​ຊາຍ ທີ່​ຍັງ​ບໍ່​ທັນ​ປົ່ງ​ປີກ​ເທື່ອ ເຕັ້ນ​ໄປ​ມາ ເວ​ລາ​ມີ​ຄົນ​ຍ່າງ​ໄປ​ໃກ້ ໃນ​ຂະ​ນະ​ທີ່​ຜູ້​ແທນ​ອົງ​ການ​ອາ​ຫານ​ແລະ​ກະ​ເສດ ສ​ປຊ ຫຼື (FAO) ສັງ​ເກດ​ເບິ່ງ​ພວກ​ເຂົາ ຢູ່​ໃນ​ທະ​ເລ​ຊາຍ ໃກ້​ເມືອງ Garowe ໃນ​ເຂດ​ເຄິ່ງ​ປົກ​ຄອງ​ຕົນ​ເອງ Puntland ຂອງ​ໂຊ​ມາ​ເລຍ. (ແຟ້ມ)
ຕັກ​ແຕນ​ນ້ອຍ​ທະ​ເລ​ຊາຍ ທີ່​ຍັງ​ບໍ່​ທັນ​ປົ່ງ​ປີກ​ເທື່ອ ເຕັ້ນ​ໄປ​ມາ ເວ​ລາ​ມີ​ຄົນ​ຍ່າງ​ໄປ​ໃກ້ ໃນ​ຂະ​ນະ​ທີ່​ຜູ້​ແທນ​ອົງ​ການ​ອາ​ຫານ​ແລະ​ກະ​ເສດ ສ​ປຊ ຫຼື (FAO) ສັງ​ເກດ​ເບິ່ງ​ພວກ​ເຂົາ ຢູ່​ໃນ​ທະ​ເລ​ຊາຍ ໃກ້​ເມືອງ Garowe ໃນ​ເຂດ​ເຄິ່ງ​ປົກ​ຄອງ​ຕົນ​ເອງ Puntland ຂອງ​ໂຊ​ມາ​ເລຍ. (ແຟ້ມ)

ທ່ານ​ອາ​ແລັນ ​ຣັ​ສ​ກາ (Allan Hruska) ອະ​ດີດ​ເຈົ້າ​ໜ້າ​ທີ່​ອົງ​ການ FAO ຊຶ່ງ​ເປັນ​ນັກ​ຊ່ຽວ​ຊານ​ດ້ານ​ການ​ຄຸ້ມ​ຄອງ​ພືດ ກ່າວ​ຕໍ່​ພວກ​ນັກ​ຂ່າວ​ວ່າ ໂດຍ​ການ​ເຂົ້າ​ເປັນ​ພາ​ຄີ ກັບ​ບໍ​ລິ​ສັດ CropLife ລະ​ຫວ່າງ​ປະ​ເທດນັ້ນ ອົງ​ການ​ດັ່ງ​ກ່າວ​ ຂອງ​ສະ​ຫະ​ປະ​ຊາ​ຊາດ ບໍ່​ໄດ້​ຢູ່​ໃນ​ທ່າ​ທີ ທີ່​ຈະ​ປຶກ​ສາ​ຫາ​ລື ​ກ່ຽວ​ກັບ​ການ​ເປັນ​ອັນ​ຕະ​ລາຍ​ຕໍ່​ຊີ​ວິດ​ຂອງ​ຢາ​ຂ້າ​ແມງ​ໄມ້ໄດ້​ອີກ​ຕໍ່​ໄປ ກັບ​ບັນ​ດາ​ປະ​ເທດ​ສະ​ມາ​ຊິກ ແລະ​ບໍ​ລິ​ສັດ​ຕ່າງໆ.

“ປັດ​ຈຸ​ບັນ​ນີ້ ຜູ້​ອຳ​ນວຍ​ການ​ໃຫຍ່​ ຫົວ​ຍິ້ມ​ໃສ່​ກ້ອງ ກັບ​ພວກ​ຜູ້​ນຳ ​ຂອງ​ບໍ​ສັດ CropLife ແລະ​ກ່າວ​ວ່າ ‘ພວກ​ເຮົາ​ໄດ້​ເຂົ້າ​ສູ່​ການ​ເປັນ​ພາ​ຄີ​ຍຸດ​ທະ​ສາດ. ພວກ​ເຮົາ​ຈະ​ກ້າວ​ເດີນ​ໄປ​ຂ້າງ​ໜ້າ​ພ້ອມ​ກັນ.` ສຳ​ລັບ​ຂ້າ​ພະ​ເຈົ້າ​ແລ້ວ ນັ້ນ​ແມ່ນການ​ປາ​ກົດ​ໂຕ​ແລະ​ສົ່ງ​ສານ​ທີ່​ບໍ່​ຖືກ​ຕ້ອງ" ທ່ານ​ຣັ​ສ​ກາ​ກ່າວ.

ອົງ​ການ FAO ເຂົ້າ​ເປັນ​ພາ​ຄີ​ກັບ​ບໍ​ລິ​ສັດ CropLife ລະ​ຫວ່າງ​ປະ​ເທດ​ທີ່​ເປັນ​ສະ​ມາ​ຊິກ​ຂອງ Syngenta ໃນ​ປີ 2020 ໂດຍ​ກ່າວ​ວ່າ ເປົ້າ​ໝາຍ​ແມ່ນ​ເພື່ອ “ລົງ​ມື​ດຳ​ເນີນ​ການ​ແລກ​ປ່ຽນ​ທາງ​ດ້ານ​ເທັກ​ນິກ ແລະ​ປຶກ​ສາ​ຫາ​ລື​ ໃນ​ຂົງ​ເຂດ​ທີ່​ມີ​ຜົນ​ປະ​ໂຫຍດ​ຮ່ວມ​ກັນ.”

ພວກ​ນັກ​ຂ່າວ​ເຢຍ​ຣະ​ມັນ ວິ​ເຄາະ​ວ່າ ຂໍ້​ມູນ​ຂອງອົງ​ການ FAO ​ຖື​ວ່າ​ຢາ​ຂ້າ​ແມງ​ໄມ້​ທີ່​ຖືກ​ຈັດ​ສົ່ງ ແລະ​ພົບ​ວ່າ Syngenta ແມ່ນ​ເປັນ​ຜູ້​ສະ​ໜອງ​ ລາຍ​ໃຫຍ່​ທີ່​ສຸດ​ເທົ່າ​ທີ່​ເຄີຍ​ມີ​ມາ.

Syngenta ແມ່ນ​ບໍ​ລິ​ສັດ​ຊ່ຽວ​ຊານ​ດ້ານ​ເມັດ​ພັນ​ແລະ​ຢາ​ຂ້າ​ແມງ​ໄມ້ ແມ່ນ​ເປັນ​ເຈົ້າ​ຂອງ​ໂດຍ​ບໍ​ສິ​ສັດ​ສານ​ເຄ​ມີ​ແຫ່ງ​ຊາດ​ຂອງ​ຈີນ (China National Chemical Corporation (ChemChina) ຊຶ່ງ​ເປັນ​ບໍ​ລິ​ສັດ​ລັດ​ວິ​ສາ​ຫະ​ກິດ​ສານ​ເຄ​ມີ​ຂອງ​ຈີນ.

ອີງ​ຕາມ ​ສະ​ຖາ​ບັນ​ເສດ​ຖະ​ກິດ​ລະ​ຫວ່າງ​ປະ​ເທດ​ປີ​ເຕີ​ສັນ ຊຶ່ງ​ເປັນ​ສະ​ຖາ​ບັນ​ນັກ​ຊ່ຽວ​ຊານ​ທີ່​ຕັ້ງ​ຢູ່​ວໍ​ຊິງ​ຕັນ​ ແລ້ວ ບໍ​ລິ​ສັດ​ລັດ​ວິ​ສາ​ຫະ​ກິດ​ໃນ​ຈີນແມ່ນ​ບໍ​ລິ​ສັດ​ທີ່​ລັດ​ຖະ​ບານ​ຈີນ​ເປັນ​ເຈົ້າ​ຂອງ ດ້ວຍ​ການ​ຖື​ຮຸ້ນ​ສ່ວນ​ໃຫຍ່ ນັ້ນ​ໝາຍ​ຄວາມ ລັດ​ຖະ​ບານ​ຈີນ​ສາ​ມາດ ​ເຂົ້າ​ຮ່ວມ​ໃນ​ການກຳ​ນົດແຜນ​ຍຸດ​ທະ​ສາດ​ໃຫ້​ບໍ​ລິ​ສັດ​ສານ​ເຄ​ມີ​ແຫ່ງ​ຊາດ​ຂອງ​ຈີນ ແລະ​ເຂົ້າ​ແຊກ​ແຊງ​ໃນ​ຂັ້ນ​ຕອນ​ການ​ຕັດ​ສິນ​ໃຈ​ຕ່າງໆ.

ທີ່​ມາ ພະ​ແນກ Polygraph ຂອງວີ​ໂອ​ເອ

XS
SM
MD
LG