ເມື່ອສອງປີທີ່ຜ່ານມາ, ໃນຂະນະທີ່ ຣັດເຊຍ ໄດ້ບຸກລຸກດິນແດນສ່ວນກາງຂອງຂອງ ຢູເຄຣນ ນັ້ນ, ບັນດາປະເທດເອເຊຍກາງຢ້ານວ່າ ເຂົາເຈົ້າຈະເປັນປະເທດຕໍ່ໄປທີ່ຈະຮູ້ສຶກເຖິງຜົນກະທົບຂອງຄວາມຫຼົງໄຫຼໃນການຕໍ່ສູ້ເພື່ອກູ້ຄືນເຂດແດນທີ່ສູນເສຍໄປຂອງປະທານາທິບໍດີ ວລາດິເມຍ ປູຕິນ.
ແຕ່ໃນຂະນະທີ່ ຣັດເຊຍ ໄດ້ປະສົບຄວາມຫຍຸ້ງຍາກໃນສະໜາມລົບ ແລະ ປະສົບກັບການສູນເສຍຂະໜາດໃຫຍ່ຕໍ່ຄູ່ປໍລະປັກ ຢູເຄຣນ ທີ່ມີຄວາມມຸ່ງໝັ້ນນັ້ນ, ບັນດານັກຊ່ຽວຊານ ແລະ ນັກການເມືອງໃນປັດຈຸບັນ ແລະ ອະດີດ ໃນນະຄອນຫຼວງ ວໍຊິງຕັນ ແມ່ນໄດ້ເຫັນພາກພື້ນເອເຊຍກາງ ທີ່ມີຄວາມໝັ້ນໃຈຫຼາຍຂຶ້ນ ແລະ ກ້າສະແດງອອກ ທີ່ເຂົາເຈົ້າກຳລັງພະຍາຍາມຢ່າງໜັກເພື່ອລວມຕົວກັນ ແລະ ໃຊ້ອຳນາດການຕໍ່ລອງທີ່ຍິ່ງໃຫຍ່ກັບທັງ ຣັດເຊຍ, ຈີນ ແລະ ສະຫະລັດ.
ບັນດານັກສັງເກດການມາຍາວນານບາງຄົນເຕືອນວ່າ ພາກພື້ນດັ່ງກ່າວ ອາດຕົກເປັນເຫຍື່ອຄວາມທະເຍີທະຍານຂອງວັງເຄຣັມລິນ ອີກຄັ້ງນຶ່ງ. ເຂົາເຈົ້າໄດ້ໂຕ້ຖຽງວ່າ ປະເທດເວັນຕົກຕ້ອງເຂົ້າໃຈສິ່ງທ້າທາຍຂອງເຂົາເຈົ້າ ແລະ ຊ່ວຍຂະຫຍາຍໂອກາດຕ່າງໆຂອງເຂົາເຈົ້າ.
ໃນທັດສະນະຄະຕິຂອງເຂົາເຈົ້າ, ຜົນອອກມາທີ່ດີທີ່ສຸດສຳລັບ ອຸສເບກິສຖານ, ກາຊັກສະຖານ, ເຄຍກິສຖານ, ທາຈີກິສຖານ ແລະ ເທີກເມນິສຖານ ຈະປາກົດອອກມາຈາກຄວາມຂັດແຍ້ງ ລະຫວ່າງ ຢູເຄຣນ ແລະ ຣັດເຊຍ ເປັນພາກພື້ນອິດສະຫຼະ ແລະ ສາມັກຄີກັນ.
ທ່ານ ເຟຣເດຣິກ ສຕາ, ປະທານຂອງສະຖາບັນສາຍພູຄໍເຄຊັສ-ເອເຊຍກາງ ໃນນະຄອນຫຼວງ ວໍຊິງຕັນ, ເຊິ່ງແມ່ນຜູ້ໃຫ້ການສະໜັບສະໜູນສຳລັບການລວມເສດຖະກິດ ແລະ ການເມືອງທີ່ກວ້າງຂວາງໃນພາກພື້ນດັ່ງກ່າວ. ທ່ານໄດ້ສັງເກດເຫັນວ່າ ລັດຖະບານຂອງພາກພື້ນນັ້ນ ໄດ້ໃຊ້ “ຈີນ ເພື່ອທຳການດຸ່ນດ່ຽງກັບ ຣັດເຊຍ… ແລະ ອາເມຣິກາ, ເພື່ອຄວາມດຸ່ນດ່ຽງລະຫວ່າງເຂົາເຈົ້າ.”
ຟໍຣັມສະແດງຄວາມຄິດເຫັນ