ມີພຽງແຕ່2-3 ສັບປະດາກ່ອນໜ້ານີ້ເທົ່ານັ້ນ ທີ່ເບິ່ງຄືວ່າ ການໂຄສະນາຫາສຽງຂອງທ່ານ Trump ຄືວ່າມີບັນຫາ ແຕ່ວ່ານັບຕັ້ງແຕ່ ຕອນນັ້ນ ຕອນທີ່ທ່ານ Donald Trump ຜູ້ສະໝັກເປັນ ປະທານາທິບໍດີສະຫະລັດສັງກັດພັກ Republican ກໍໄດ້ເກັບສະສົມຄະແນນ ໃນອັນທີ່ເອີ້ນວ່າ ລັດທີ່ບໍ່ແນ່ນອນ ຕາຍຕົວ ຊຶ່ງຊ່ຽວຊານເລື້ອງການຢັ່ງຫາງສຽງ ທ່ານ Tim Malloy ໄດ້ບອກກັບ VOA ຜ່ານທາງ Skype ຊຶ່ງທ່ານກ່າວວ່າ “ຕອນທີ່ທ່ານເບິ່ງເຂົ້າໄປໃນລັດ Florida, Carolina ເໜືອ, Pennsyvania, ແລະ Ohio ທີ່ໃກ້ຊິດກັບທີ່ສຸດ
ຊຶ່ງລັດພວກນີ້ ແມ່ນເປັນລັດທີ່ທັງສອງ ຜູ້ສະໝັກຈຳເປັນທີ່ຈະຕ້ອງຊະນະ ແລະຖ້າຫາກວ່າ ໃນການແຂ່ງຂັນແລ່ນມ້າມື້ນີ້ ບໍ່ມີຜູ້ໃດຮູ້ດອກວ່າ ຜູ້ທີ່ຊະນະນັ້ນແມ່ນຜູ້ໃດໃນການເລືອກຕັ້ງຄັ້ງນີ້ ເພາະສະນັ້ນ ພວກປ່ອນບັດຄວນຈະຮຽນຮູ້ວ່າ ການເລືອກຕັ້ງຄັ້ງນີ້ ແມ່ນໃກ້ຄຽງກັນຫຼາຍທີ່ສຸດ. ຜູ້ສະໜັກທີ່ມີສຽງດັງ ຜູ້ສະໝັກທີ່ນິຍົມ ແລະນັ້ນ ແມ່ນວ່າ ໄດ້ປ່ຽນແປງໄປ ມື້ຕໍ່ມື້.”
ທັງສອງທ່ານ Trump ແລະທ່ານ Clinton ແມ່ນມີພວກທີ່ຈົງຮັກພັກດີ ແຕ່ວ່າ ພວກປ່ອນບັດທັງຫຼາຍຍັງຄົງບໍ່ທັນຕັດສິນວ່າຈະເລືອກຜູ້ໃດເທື່ອ. ທ່ານ Malloy ກ່າວວ່າ ການໂຕ້ວາທີໃນອານາຄົດ ໂດຍສະເພາະການໂຕ້ວາທີຄັ້ງທຳອິດ ໃນວັນທີ 26 ກັນຍາ ຈະມາເຖິງນີ້ ຈະຊ່ອຍໃນການຕັດສິນໃຈໃຫ້ພວກເຂົາເຈົ້າ.
ທ່ານ Tim Malloy ກ່າວເພີ້ມຕື່ມວ່າ “ພວກເຮົາຖາມຄຳຖາມທີ່ວ່າ ແມ່ນຜູ້ສະໝັກທ່ານໃດ ທີ່ຈະເປັນຜູ້ທີ່ເໝາະສົມໃນການກຳກັບເລື້ອງອາວຸດນິວເຄລຍ ທ່ານໃດ ຈະຮັບມືກັບວິກິດການນາໆຊາດ ໃນສະຖານະການທີ່ດີທີ່ສຸດ ບັນຫາເລື້ອງຄົນເຂົ້າເມືອງນັ້ນ ນັ້ນແມ່ນເລື້ອງໃຫຍ່ ຊຶ່ງເປັນຄຳຖາມທີ່ຍືດເຍື້ອມາດົນແລ້ວ. ແມ່ນຜູ້ໃດຈະມີຄວາມເປັນຫ່ວງເປັນໃຍ ໃນການປົກປ້ອງຄຸ້ມຄອງຄອບຄົວຂອງທ່ານແລະທ່ານ. ແລະນັ້ນລະ
ແມ່ນເລື້ອງທີ່ພວກຜູ້ຄົນ ຄວນຈະເພັ່ງເລັ່ງ ເອົາໃຈໃສ່ ແລະຕອນທີ່ການຢັ່ງສຽງ ອອກມາກ່ຽວກັບເລື້ອງພວກນີ້ແລ້ວນັ້ນ ແຕ່ວ່າໃນທີ່ສຸດ ມັນກໍຈະຂຶ້ນຢູ່ກັບການໂຕ້ວາທີ.”
ການເປັນໂຣກປອດບວມຂອງທ່ານນາງ Clinton ໄດ້ບັງຄັບໃຫ້ທ່ານນາງຍົກເລີກແຜນການ ທັງໜົດໃນລັດ California ເຮັດໃຫ້ມີຄຳຖາມຂຶ້ນກ່ຽວກັບ ສຸກຂະພາບຂອງ
ທ່ານນາງ ແຕ່ວ່າເລື້ອງນີ້ ຈະບໍ່ມີຜົນກະທົບຕ່ການຫາສຽງແຕ່ຢ່າງໃດ.
ຜູ້ປ່ອນບັດແມ່ຍິງຜູ້ນຶ່ງຈາກລັດນິວຢ໊ອກ ກ່າວວ່າ “ຂ້ອຍຫວັງວ່າ ທ່ານນາງຄົງຈະບໍ່ໃຊ້ເລື້ອງນີ້ ເປັນເຫດຜົນ ແຕ່ ຂ້ອຍບໍ່ຄິດວ່າ ມັນບໍ່ໜ້າຈະມີຜົນກະທົບຫຽັງຫຼາຍ.”
ຜູ້ປ່ອນບັດອີກຜູ້ນຶ່ງເປັນຜູ້ຊາຍຈາກລັດນິວຢ໊ອກ ກ່າວວ່າ “ຜູ້ໃດກໍເປັນປອດບວມໄດ້. ຄົນເຮົາ ຄວນຈະເບິ່ງ ເຖິງຄວາມອົດທົນລຳບາກທີ່ທ່ານນາງ ໄດ້ອອກຫາສຽງແລະທ່ານນາງ ກໍໄດ້ຮັບການພັກຜ່ອນແຕ່ພຽງໜ້ອຍດຽວ. ນັ້ນລະແມ່ນການສະແດງອອກເຖິງສິ່ງທີ່ທ່ານນາງໄດ້ເຮັດເພື່ອປະຊາຊົນ ເພາະວ່າທ່ານນາງ ໄດ້ເຮັດວຽກມາຢ່າງຫຼວງຫຼາຍ ພະຍາຍາມຈະໃຫ້ປະຊາຊົນເຂົ້າໃຈເຖິງສິ່ງທີ່ທ່ານນາງຢາກຈະກະທຳເພື່ອປະເທດຊາດ.”
ທ່ານ Malloy ກ່າວວ່າ ການຢັ່ງຫາງສຽງທັງຫຼາຍທັງປວງ ສະແດງໃຫ້ເຫັນເປັນພຽງຊ່ວງໄລຍະສັນໆ. ແນວໂນ້ມທີ່ຕ້ອງໄດ້ຕິດຕາມໄປ ຈະແມ່ນວ່າ ທ່ານ Trump ສາມາດຈະເກັບກຳເອົາການສະນັບສະໜຸນຈາກພວກແມ່ຍິງ ຄົນຜີວດຳ ແລະຜູ້ຄົນທີ່ມີເຊື້ອສາຍ ສະເປນ ຫຼືບໍ່
ກໍວ່າ ທ່ານນາງ Clinton ຈະປະສົບຜົນສຳເລັດໃນການຮັກສາພວກທີ່ສະໜັບສະໜຸນທ່ານໄວ້ໄດ້ຫຼືບໍ່.
