ສະຫະພາບຢູໂຣບ ໄດ້ຕ້ອງຕິການຕັດສິນໃຈຂອງປະທານາທິບໍດີ ທຣຳ ທີ່ຫ້າມພວກນັກເດີນທາງຊາວຢູໂຣບສ່ວນໃຫຍ່ ບໍ່ໃຫ້ເຂົາມາໃນສະຫະລັດ ໃນໄລຍະ 30 ວັນນີ້. ເລີ້ມຈາກທ່ຽງຄືນວັນສຸກມື້ນີ້ຕາມເວລາໃນວໍຊິງຕັນ ຊຶ່ງພວກຊາວຕ່າງຊາດທັງໝົດ ຜູ້ທີ່ໄດ້ເດີນທາງເຂົ້າໄປໃນເຂດປອດພົມແດນ ແຊງເກນ (Schengen) ຂອງສະຫະພາບຢູໂຣບພາຍໃນ 14 ວັນຜ່ານມານີ້ຈະຖືກຫ້າມບໍ່ໃຫ້ເຂົ້າມາໃນປະເທດ ໂດຍເປັນຄວາມພະຍາທີ່ຈະຢຸດຢັ້ງການແຜ່ລະບາດຂອງໄວຣັສໂຄໂຣນາ. ດັ່ງທີ່ ເຮັນຣີ ຣີຈແວລ ລາຍງານມາຈາກນະຄອນຫຼວງລອນ ດອນ ທີ່ວ່າ ການເຄື່ອນໄຫວດັ່ງກ່າວ ໄດ້ສົ່ງຜົນເຮັດໃຫ້ເກີດພາວະແຕກຕື່ນໃນທົ່ວຕະຫຼາດການເງິນ ໃນຂະນະທີ່ ຄວາມຢ້ານກົວກຳລັງເພີ້ມຂຶ້ນນັບມື້ ກ່ຽວກັບຜົນກະທົບຕໍ່ເສດຖະກິດ ຂອງໂລກລະບາດດັ່ງກ່າວ ຊຶ່ງໄຊຈະເລີນສຸກ ຈະນຳເອົາລາຍລະອຽດມາສະເໜີທ່ານ ໃນອັນດັບຕໍ່ໄປ.
ຢູ່ທີ່ສະໜາມບິນ ແຟຣັງເຟີດຂອງເຢຍຣະມັນ ແລະ ຢູ່ທົ່ວທະວີບຢູໂຣບ ແຜນການເດີນທາງຕ່າງໆ ແມ່ນໄດ້ກາຍເປັນເລື້ອງທີ່ວຸ້ນວາຍສັບສົນ.
ທ່ານໂຈ ແຮຣ ນັກທ່ອງທ່ຽວຊາວອາເມຣິກັນຄົນນຶ່ງ ກ່າວວ່າ “ພວກເຮົາບໍ່ແນ່ໃຈວ່າ ພວກເຮົາຈະສາມາດກັບຄືນເຂົ້າໄປໃນປະເທດໄດ້ຫຼືບໍ່ ຖ້າສິ່ງໃດສິ່ງນຶ່ງ ຖືກຍົກເລີກ ດັ່ງນັ້ນ ຂ້າພະເຈົ້າ ຈຶ່ງໃຊ້ຈ່າຍເງິນ 3,000 ໂດລາ ສຳລັບຖ້ຽວບິນອື່ນອີກ.”
ສ່ວນ ທ່ານມິແກລ ປາຣາກວຍໂຣສ ຊາວສະເປນທີ່ອາໄສຢູ່ໃນນະຄອນມາຍອາມີ ລັດຟໍຣີດາ ກ່າວດັ່ງນີ້ “ມັນເປັນມາດຕະການທີ່ທ່ານທຣຳ ໄດ້ເອົາ ຍ້ອນວ່າ ເພິ່ນຂາດຄວາມເໝາະສົມ ແລະບໍ່ສາມາດເອົາມາດຕະການໃດໆໄດ້ຢູ່ທີ່ນັ້ນ ສະນັ້ນແລ້ວ ວິທີໃດນຶ່ງ ເພິ່ນກໍເລີຍຖິ້ມໂທດໃສ່ສັດຕູພາຍນອກ ໃນກໍລະນີນີ້ ກໍຄືຢູໂຣບ.”
ການປະກາດດັ່ງກ່າວ ໄດ້ສ້າງຄວາມຕື່ນຕົກໃຈ ກໍ່ໃຫ້ເກີດມີການຂາຍຮຸ້ນອອກຢ່າງໃຫຍ່ ຢູ່ໃນຕະຫຼາດການເງິນທັງຫຼາຍ ໂດຍທີ່ຮຸ້ນສາຍການບິນທັງຫຼາຍ ຖືກກະທົບຢ່າງໜັກ.
ເພື່ອໃຫ້ເຫດຜົນທີ່ສົມຄວນຕໍ່ການຫ້າມນັ້ນ ທ່ານປະທານາທິບໍດີ ທຣຳ ໄດ້ກ່າວວ່າ ພວກປະເທດໃນສະຫະພາບຢູໂຣບ ບໍ່ໄດ້ເອົາມາດຕະການລະມັດລະວັງຕ່າງໆ ແບບດຽວກັນກັບ ສະຫະລັດ ຫາກແຕ່ວ່າ ບັນດາຜູ້ນຳຂອງສະຫະພາບຢູໂຣບ ກໍໄດ້ປະຕິເສດຕໍ່ຂໍ້ກ່າວອ້າງດັ່ງກ່າວ.
ທ່ານແອຣິກ ມາແມຣ ໂຄສົກຄະນະກຳມາທິການຢູໂຣບ ກ່າວໃນພາສາອັງກິດວ່າ “ການຕັດສິນໃຈຂອງສະຫະລັດ ທີ່ໄດ້ປະກາດການຫ້າມເດີນທາງນັ້ນ ເປັນການເອົາມາດຕະການຝ່າຍດຽວ ແລະປາສະຈາກການປຶກສາຫາລືກັນ. ສະຫະພາບຢູໂຣບ ກໍຈະເອົາມາດຕະການທີ່ເຂັ້ມແຂງເພື່ອຈຳກັດການແຜ່ລະບາດຂອງໄວຣັສນັ້ນ.”
ອັງກິດ ແລະ ໄອຣ໌ແລນ ແມ່ນໄດ້ຮັບການຍົກເວັ້ນ ເຖິງແມ່ນວ່າ ປະເທດທັງສອງ ມີກໍລະນີຕິດເຊື້ອໄວຣັ ຫຼາຍຮ້ອຍກໍລະນີ ກໍຕາມ. ການໃຫ້ເຫດຜົນຂອງ ວໍຊິງຕັນ ກໍແມ່ນວ່າ ທັງສອງປະເທດນີ້ ບໍ່ໄດ້ເປັນສ່ວນນຶ່ງຂອງເຂດປອດພົມແດນ ແຊງເກນ ໃນການເດີນທາງ. ນາຍົກລັດຖະມົນຕີຂອງອັງກິດ ກໍໄດ້ອອກມາກ່າວເຕືອນວ່າ ສະຖານະການແມ່ນຈະຮ້າຍແຮງຂຶ້ນ.
ທ່ານບໍຣິສ ຈອນສັນ ນາຍົກລັດຖະມົນຕີອັງກິດ ເວົ້າວ່າ “ຂ້າພະເຈົ້າຕ້ອງບອກພວກທ່ານ ຢ່າງກົງໄປກົງມາ ບອກກັບມະຫາຊົນຊາວອັງກິດຢ່າງກົງໄປກົງມາ ອີກຫຼາຍໆຄອບຄົວ ແລະຫຼາຍໆຄອບຄົວຕື່ມອີກ ແມ່ນຈະສູນເສຍພວກຄົນຜູ້ທີ່ຮັກຫອມ ກ່ອນກຳນົດເວລາຂອງພວກເຂົາເຈົ້າ.”
ສະຫະລັດ ໄດ້ມີກໍລະນີຕິດເຊື້ອໄວຣັສໂຄໂຣນາ ຫຼາຍກວ່າ 1300 ຄົນແລ້ວ. ໂດຍທີ່ອົງການອະນາໄມໂລກຫຼື WHO ໄດ້ປະກາດວ່າ ເປັນການລະບາດໃນທົ່ວໂລກ ຈຶ່ງຈຳເປັນຕ້ອງໄດ້ເອົາມາດຕະການທີ່ເຂັ້ມງວດຫຼາຍຂຶ້ນ ອີງຕາມການກ່າວຂອງ ທ່ານໝໍດ້ານເຊື້ອໄວຣັສວິທະຍາ ສະເຕີຈີອອສ ໂມສໂກສ.
ທ່ານໝໍ ສະເຕີຈີອອສ ໂມສໂກສ ຢູ່ທີ່ມະຫາວິທະຍາໄລ ນໍທຳເບຣຍ ກ່າວວ່າ “ໂດຍຄວາມເຫັນສ່ວນຕົວ ຂ້າພະເຈົ້າແລ້ວ ແມ່ນວ່າ ການຈຳກັດໃນການເຄື່ອນຍ້າຍ ແມ່ນຈຳເປັນຕ້ອງເຮັດຢູ່ ໃນທົ່ວປະເທດຕ່າງໆ ບ່ອນທີ່ມີຫຼາຍຮ້ອຍກໍລະນີຕິດເຊື້ອໄວຣັສ. ຊຶ່ງປະກອບດ້ວຍ ສະຫະລັດ ມັນລວມທັງ ອັງກິດ ແລະຫຼາຍໆ ປະເທດໃນຢູໂຣບ.”
ຢູ່ໃນອີຕາລີ ບ່ອນທີ່ເກືອບນຶ່ງພັນຄົນ ໄດ້ເສຍຊີວິດຈາກເຊື້ອໄວຣັສ ພວກຮ້ານຄ້າ ແລະການບໍລິການທັງໝົດ ທີ່ບໍ່ມີຄວາມຈຳເປັນ ໄດ້ຖືກສັ່ງໃຫ້ປິດໄວ້.
ທ່ານໝໍ ໂມສໂກສ ກ່າວຕື່ມວ່າ “ພວກໂຮງໝໍທັງຫຼາຍ ມີຄົນປ່ວຍລົ້ນມື. ພວກເຂົາແມ່ນກະທັງວ່າ ບໍ່ມີອອກຊີເຈັນພຽງພໍອີກຕໍ່ໄປ ທີ່ຈະໃຫ້ແກ່ພວກຄົນ ຜູ້ທີ່ມີອາການຫອບຫືດ. ສະນັ້ນ ຖ້າອັນນີ້ ບໍ່ເຫັນເປັນສະພາບການທີ່ຮ້າຍແຮງຂອງສະຖານະການນີ້ ແລ້ວແມ່ນຫຍັງທີ່ຕ້ອງໄດ້ເຮັດເພື່ອໃຫ້ແນ່ໃຈວ່າ ພວກໂຮງໝໍທັງຫຼາຍ ໃນທົ່ວໂລກນັ້ນ ເມື່ອພວກເຮົາກຳລັງນຳຫຼັງປະເທດອີຕາລີ ນຶ່ງອາທິດ ຫຼື ສອງອາທິດ ຕໍ່ຈາກນັ້ນແລ້ວຂ້າພະເຈົ້າ ກໍບໍ່ແນ່ໃຈວ່າ ຈະເປັນສິ່ງໃດ.”
ຫຼາຍໆປະເທດໃນສະຫະພາບຢູໂຣບ ໄດ້ນຳເອົາການກວດກັບຄືນມາໃຊ້ພາຍໃນເຂດແດນ ຂອງຕົນ. ການມີຂໍ້ຈຳກັດໃນການເດີນທາງຄັ້ງຫຼ້າສຸດ ທີ່ໄດ້ວາງອອກໂດຍສະຫະລັດນັ້ນ ຜົນເສຍຫາຍທາງດ້ານເສດຖະກິດໂລກ ແມ່ນກຳລັງສູງຂຶ້ນໃນແຕ່ລະມື້.
