ສະຫະພາບຢູໂຣບຫຼືອີຢູແລະເທີກີ ໄດ້ຕົກລົງກັນໃນວັນສຸກວານ
ນີ້ ທີ່ທຸກໆຝ່າຍຫວັງວ່າ ຈະຊ່ອຍບັນເທົາ ວິກິດການດ້ານອົບພະ
ຍົບທີ່ຮ້າຍແຮງສຸດ ນັບແຕ່ສົງຄາມໂລກຄັ້ງທີສອງເປັນຕົ້ນມາ.
ປະທານສະພາຢູໂຣບ ທ່ານ Donald Tusk ແລະທ່ານ Ahmet
Davutoglu ນາຍົກລັດຖະມົນຕີເທີກີເອີ້ນຂໍ້ຕົກລົງນີ້ວ່າມີຄວາມ
ສຳຄັນເປັນພິເສດ. ນາຍົກລັດຖະມົນຕີເທີກີກ່າວໃນວັນສຸກວານ
ນີ້ວ່າມັນເປັນວັນສຳຄັນທາງປະຫວັດສາດສຳລັບເທີແລະສະຫະ
ພາບຢູໂຣບ.
ທ່ານ Davutoglu ກ່າວຕື່ມວ່າ ພວກເຮົາໃນມື້ນີ້ໄດ້ສຳນຶກວ່າເທີ
ກີ ແລະສະຫະພາບຢູໂຣບ ແມ່ນມີຊະຕາກຳອັນດຽວກັນ ມີການທ້າທາຍ ແລະມີອະນາຄົດ
ແບບດຽວກັນ.
ຂໍ້ຕົກລົງດັ່ງກ່າວເລີ້ມມີຜົນບັງຄັບໃຊ້ໃນວັນອາທິດມື້ອື່ນນີ້. ພວກອົບພະຍົບທັງໝົດທີ່ເຂົ້າ
ໄປໃນກຣີສແບບຜິດກົດໝາຍ ຈາກຊີເຣຍແລະແຫ່ງອື່ນໆ ຮວມທັງເທີກີນຳດ້ວຍ ຈະຖືກ
ສົ່ງກັບຄືນໄປເທີກີ ຫລັງຈາກໄດ້ມີການຈົດທະບຽນ ແລະການຂໍລີ້ໄພໃນຢູໂຣບຂອງພວກ
ເຂົາເຈົ້າ ໄດ້ຮັບການພິຈາລະນາ.
ເພື່ອເປັນການແລກປ່ຽນ ພວກອົບພະຍົບຫລາຍພັນຄົນທີ່ຫຼົບໜີໄປເທີກີແລະຂໍລີ້ໄພຢ່າງ
ຖືກຕ້ອງຕາມກົດໝາຍນັ້ນ ຈະຖືກສົ່ງໄປຕັ້ງຖິ່ນຖານ ໃນຈຳນວນທີ່ເທົ່າກັນ ຢູ່ໃນ 28 ປະ
ເທດສະມາຊິກຂອງສະຫະພາບຢູໂຣບ.
ເວລານີ້ ເທີກີມີອົບພະຍົບຊາວຊີເຣຍຢູ່ໃນປະເທດຢູ່ແລ້ວ ເກືອບ 3 ລ້ານຄົນ. ເທີກີຈະໄດ້
ຮັບການຊ່ອຍເຫລືອທາງດ້ານການເງິນ ຈາກສະຫະພາບຢູໂຣບ ເພື່ອຮັບມືກັບວິກິດການ
ອົບພະຍົບ ພ້ອມກັບການເຈລະຈາ ເພື່ອເຂົ້າເປັນສະມາຊິກຂອງສະຫະພາບຢູໂຣບທີ່ໄວ
ຂຶ້ນ ແລະການເດີນທາງໂດຍບໍ່ຕ້ອງຂໍວີຊ່າ ສຳລັບປະຊາຊົນຊາວເທີກີ ໃນບັນດາປະເທດຕ່າງໆຂອງສະຫະພາບຢູໂຣບ.
ເທີກີມີປະຫວັດການເຄົາລົບນັບຖືສິດທິມະນຸດທີ່ບໍ່ຄ່ອຍດີປານໃດ ແລະກຸ່ມປົກປ້ອງສິດທິມະນຸດບາງກຸ່ມກ່າວວ່າ ແຜນການດັ່ງກ່າວ ໃຊ້ຜູ້ຄົນທີ່ຊອກສະແຫວງບ່ອນລີ້ໄພ ຈາກສົງ
ຄາມ ຄວາມທຸກຍາກ ແລະການກໍ່ການຮ້າຍ ເປັນເຄື່ອງຕໍ່ລອງ ທາງການເມືອງ.
ອົງການອົບພະຍົບຂອງສະຫະປະຊາຊາດກ່າວວ່າ ມັນເປັນເລື້ອງສຳຄັນທີ່ທຸກຝ່າຍຕ້ອງ
ໄດ້ນັບຖືກົດໝາຍຂອງສາກົນແລະຂອງຢູໂຣບນຳດ້ວຍ.
Idomeni Camp Refugees Mull Future in Europe
