ລິ້ງ ສຳຫລັບເຂົ້າຫາ

ວັນອັງຄານ, ໑໙ ມີນາ ໒໐໒໔

ອາການຂອງທ່ານ ຈູມມະລີ ໄຊຍະສອນ ຍັງສາຫັດຢູ່ ພາຍຫລັງປະສົບ ເຫດເຮືອຂວໍ້າ ຢູ່ອ່າງນໍ້າງື່ມ


ອະດີດປະທານປະເທດລາວ, ທ່ານ Choummaly Sayasone ກ່າວຄໍາປາໄສເນື່ອງໃນວັນຄົບຮອບ 60 ປີ ແຫ່ງການສ້າງຕັ້ງ ພັກປະຊາຊົນປະຕິວັດລາວ
ອະດີດປະທານປະເທດລາວ, ທ່ານ Choummaly Sayasone ກ່າວຄໍາປາໄສເນື່ອງໃນວັນຄົບຮອບ 60 ປີ ແຫ່ງການສ້າງຕັ້ງ ພັກປະຊາຊົນປະຕິວັດລາວ

ອາການຂອງອະດີດປະທານປະເທດລາວ, ທ່ານ ຈູມມະລີໄຊຍະສອນ, ອາຍຸ 85 ປີ ທີ່ເປັນຜູ້ນຶ່ງໃນຈໍານວນ 31 ກວ່າຄົນທີ່ລອດຊີວິດຈາກເຫດເຮືອຂວໍ້າໃນອ່າງນໍ້າງື່ມໃນຕອນເຊົ້າຂອງວັນທີ 4 ເມສາຜ່ານມານັ້ນ ປັດຈຸບັນຍັງມີອາການບາດເຈັບສາຫັດຢູ່ ແລະອາດຈະກໍາລັງໄດ້ຮັບການປິ່ນປົວຢູ່ທີ່ປະເທດສິງກະໂປ ອີງຕາມປະຊາຊົນຜູ້ນຶ່ງທີ່ຮູ້ກ່ຽວກັບເລື້ອງນີ້ ແລະບໍ່ປະສົງອອກນາມ ທີ່ເລົ່າສູ່ຟັງນັ້ນກໍຄືວ່າ:
“ເຂົາເຈົ້າພາກັນຫຸບໄປສິງກະໂປ ແຕ່ວ່າຫາກບໍ່ເວົ້າບໍ່ຫຍັງໄດ໋, ປົວຢູ່ສິງກະໂປໄດ໋, ຈັກຊິເປັນຈັ່ງໃດ ຊິລອດຢູ່ເບາະຫລືຈັ່ງໃດ. ກະຊິລອດຢູ່ຕິ, ຍັງມິດຢູ່.”

ທ່ານນາງກ່າວອີກວ່າ ສ່ວນຫລາຍເຈົ້າໜ້າທີ່ຂັ້ນສູງຂອງລາວ ມັກຈະໄປປິ່ນປົວສຸຂະພາບຢູ່ສິງກະະໂປ ຖ້າມີອາການສາຫັດ. ແຕ່ຢ່າງໃດກໍຕາມທາງການລາວ ແລະອົງການຂ່າວສານໃນລາວ ກໍບໍ່ໄດ້ໃຫ້ການຢືນຢັນກ່ຽວກັບເລື້ອງນີ້.

ພ້ອມກັນນັ້ນ ອີກທ່ານນຶ່ງທີ່ໄດ້ເຂົ້າຮ່ວມພິທີຊາປະນະກິດສົບພັນລະຍາຂອງເພິ່ນ, ມື້ລາງທ່ານນາງ ແກ້ວສາຍໃຈ ໄຊຍະສອນພ້ອມກັບລູກຊາຍ ແລະສະມາຊິກຄອບຄົວຂອງເພິ່ນອີກ 4 ຄົນທີ່ເສຍຊີວິດນັ້ນ ກໍບອກວ່າ ຜູ້ກ່ຽວບໍ່ສາມາດເວົ້າໄດ້ວ່າ ເພິ່ນກໍາລັງໄດ້ຮັບການປິ່ນປົວຢູ່ໃສ ແຕ່ທ່ານກໍບອກໄດ້ວ່າ ທ່ານຈູມມະລີ ຄົງຈະຍັງມີອາການໜັກຫລາຍຢູ່ ເພາະໃນຕອນທີ່ເພິ່ນຖືກຊ່ວຍກູ້ຊີວິດຂຶ້ນ ມາຈາກນໍ້ານັ້ນກໍປາກົດວ່າໜັກຫລາຍ ຊຶ່ງເມື່ອບວກໃສ່ກັບການທີ່ເພິ່ນກໍມີພະຍາດປະຈໍາຕົວເຊັ່ນ ເບົາຫວານຢູ່ແລ້ວ ອາການຂອງເພິ່ນກໍຄົງຈະໜັກຢູ່.

ທ່ານຈູມມະລີໄຊຍະສອນ ໄດ້ເຂົ້າຮ່ວມການປະຕິວັດໃນປີ 1954 ໂດຍການ ອາສາສະໝັກເປັນທະຫານຂຶ້ນໄປເຕົ້າໂຮມທີ່ເມືອງຊໍາເໜືອໃນແຂວງຫົວພັນ. ທ່ານໄດ້ເປັນປະທານປະເທດ ຄົນທີ 5 ຂອງລາວ ແຕ່ປີ 2006 ຫາ 2016. ໃນຕອນທີ່ທ່ານ ເປັນປະທານປະເທດລາວຢູ່ນັ້ນ ໄດ້ພົບກັບ ອະດີດປະທານາທິບໍດີ ບາຣັກ ໂອບາມາ ຢູ່ທີ່ກອງປະຊຸມສຸດຍອດລະຫວ່າງ ສະຫະລັດ ກັບກຸ່ມປະເທດອາຊຽນ ທີ່ຈັດຂຶ້ນຢູ່ທີ່ລັດຄາລິຟໍເນຍໃນເດືອນກຸມພາ ປີ 2016 ກ່ອນໜ້າທີ່ທ່ານ ໂອບາມາໄປຢ້ຽມຢາມລາວ ໃນເດືອນ 9 ຂອງປີດຽວກັນນັ້ນ.

XS
SM
MD
LG