ລິ້ງ ສຳຫລັບເຂົ້າຫາ

ວັນອາທິດ, ໒໑ ກໍລະກົດ ໒໐໒໔

ເຈົ້າໜ້າທີ່ຈີນເຕືອນ ກ່ຽວກັບ ການທີ່ບໍລິສັດແອເວີແກຣນ ອາດບໍ່ສາມາດຊຳລະໜີ້


ພວກນັກລົງທຶນຖືກຕຳຫຼວດ ແລະເຈົ້າໜ້າທີ່ຮັກສາຄວາມສະຫງົບອ້ອມໄວ້ ຢູ່ທາງເຂົ້າ ສຳນັກງານໃຫຍ່ຂອງກຸ່ມ Evergrande, ເມື່ອວັນທີ 23 ກັນຍາ 2021 ທີ່ເມືອງເຊັນເຊັນ ທາງພາກໃຕ້ຂອງຈີນ.
ພວກນັກລົງທຶນຖືກຕຳຫຼວດ ແລະເຈົ້າໜ້າທີ່ຮັກສາຄວາມສະຫງົບອ້ອມໄວ້ ຢູ່ທາງເຂົ້າ ສຳນັກງານໃຫຍ່ຂອງກຸ່ມ Evergrande, ເມື່ອວັນທີ 23 ກັນຍາ 2021 ທີ່ເມືອງເຊັນເຊັນ ທາງພາກໃຕ້ຂອງຈີນ.

ເຈົ້າໜ້າທີ່ຈີນພວມກະກຽມຮັບມືກັບວິກິດການທາງດ້ານການເງິນທີ່ອາດມີຂຶ້ນໃນຂະນະທີ່ ກຸ່ມ Evergrande ຊຶ່ງເປັນເຄືອ ຂອງບໍລິສັດອະສັງຫາລິມມະຊັບຍັກໃຫຍ່ ໃນຈີນ ປາກົດວ່າ ບໍ່ສາ ມາດຈ່າຍເງິນ ໃຫ້ແກ່ພັນທະບັດ ທີ່ມີກຳນົດຊຳລະໃນວັນພະຫັດວານນີ້.

ອີງຕາມໜັງສືພິມວອລສຕຣີດ (Wall Street Journal) ແລ້ວ ລັດຖະບານກາງໄດ້ມີຄຳສັ່ງໃຫ້ພວກເຈົ້າໜ້າທີ່ທ້ອງຖິ່ນໃນທົ່ວປະເທດຈີນ ເລີ້ມ “ກະກຽມຮັບມືກັບພາຍຸທີ່ອາດເກີດຂຶ້ນ” ຖ້າບໍລິສັດດັ່ງກ່າວ ຫາກບໍ່ສາມາດຕົກລົງ ກັບພວກເຈົ້າໜີ້ໄດ້. ບໍລິສັດ Evergrande ໃນປັດຈຸບັນນີ້ ມີໜີ້ສິນແລະຄວາມຮັບຜິດຊອບອື່ນໆຢູ່ຫຼາຍກວ່າ 300 ພັນລ້ານໂດລາ.

ລັດຖະບານກາງຂອງຈີນ ມີຄວາມເປັນຫ່ວງກັງວົນ ກ່ຽວກັບການກໍ່ຄວາມບໍ່ສະ ຫງົບຂຶ້ນຂອງປະຊາຊົນ ຍ້ອນວ່າທັງຂະໜາດ ແລະລັກສະນະ ຂອງບໍລິສັດ Evergrande. ບໍລິສັດດັ່ງກ່າວ ເປັນຜູ້ຮັບເໝົາກໍ່ສ້າງຫຼາຍກວ່າ 800 ໂຄງການຢູ່ໃນທົ່ວ ທຸກໆແຂວງຂອງຈີນ ຊຶ່ງໄດ້ຈ້າງພວກຄົນງານກຳມະກອນ ຫຼາຍໆພັນຄົນ ແລະມີການພົວພັນກັບບໍລິສັດສະໜອງອຸບປະກອນຈຳນວນນັບບໍ່ຖ້ວນ.

ການກໍ່ສ້າງຫຼາຍໆໂຄງການແມ່ນເປັນບ້ານເຮືອນທີ່ຜູ້ຊື້ໄດ້ຈ່າຍເງິນລ່ວງໜ້າເປັນຈຳນວນຫຼວງ ຫຼາຍໄປແລ້ວ ຊຶ່ງໃນບາງກໍລະນີນັ້ນ ການກໍ່ສ້າງໄດ້ເລີ້ມຢຸດຊະງັກລົງ ຍ້ອນວ່າທາງບໍລິສັດບໍ່ສາມາດຈ່າຍເງິນ ໃຫ້ແກ່ບໍລິສັດສະໜອງອຸບປະກອນ.

ປະຊາຊົນຍ່າງຜ່ານສຳນັກງານໃຫຍ່ຂອງບໍສັດ Evergrande ທີ່ເມືອງເຊັນເຊັນ ທາງພາກໃຕ້ຂອງຈີນ ເມື່ອວັນທີ 23 ກັນຍາ 2021.
ປະຊາຊົນຍ່າງຜ່ານສຳນັກງານໃຫຍ່ຂອງບໍສັດ Evergrande ທີ່ເມືອງເຊັນເຊັນ ທາງພາກໃຕ້ຂອງຈີນ ເມື່ອວັນທີ 23 ກັນຍາ 2021.

ນອກຈາກພວກເຈົ້າຂອງເຮືອນທີ່ມີຄວາມໂກດແຄ້ນແລ້ວ ບໍລິສັດດັ່ງກ່າວຍັງຖືກຟ້ອງຮ້ອງຈາກພວກນັກລົງທຶນສ່ວນບຸກຄົນ ຜູ້ທີ່ໄດ້ລົງທຶນ ໂດຍການຊື້ຮຸ້ນຂອງບໍລິສັດທີ່ນຳອອກຂາຍ. ນັບແຕ່ເດືອນກໍລະກົດປີ 2020 ເປັນຕົ້ນມາ ຮຸ້ນຂອງບໍລິສັດໄດ້ຕົກຮວບລົງ 91 ເປີເຊັນ ເຫຼືອຢູ່ປະມານ 34 ເຊັນຕໍ່ຮຸ້ນໃນເວລານີ້.

ບໍລິສັດ Evergrande ຕ້ອງໄດ້ຈ່າຍພັນທະບັດທີ່ມີກໍານົດຊໍາລະໃນວັນພະຫັດວານນີ້. ພັນທະ ບັດຊຸດທຳອິດແມ່ນເປັນເງິນໂດລາຂອງສະຫະລັດ ຕົກຢູ່ປະມານ 83 ລ້ານ 5 ແສນ. ຂໍ້ຕົກລົງກັບພວກເຈົ້າໜີ້ກໍແມ່ນໃຫ້ເວລາ 30 ມື້ແກ່ທາງບໍລິສັດທີ່ບໍ່ຕ້ອງໄດ້ຈ່າຍດອກເບ້ຍ ກ່ອນທີ່ຈະໄດ້ຮັບການພິຈາລະນາ ຢ່າງເປັນທາງການວ່າ ຜິດສັນຍາ. ແນວໃດກໍຕາມ ການບໍ່ສາມາດຊຳລະເງິນໄດ້ຕາມກຳນົດນີ້ຈະຖືກເບິ່ງກັນວ່າເປັນຮ່ອງຮອຍທີ່ບໍ່ດີຈາກຕະຫຼາດການເງິນ.

ການຈ່າຍເງິນພັນທະບັດຊຸດທີສອງແມ່ນເປັນເງິນຢວນຂອງຈີນແລະທາງບໍລິສັດໄດ້ປະກາດໃນວັນພຸດແລ້ວນີ້ວ່າ ໜີ້ສິນໄດ້ຮັບ “ການແກ້ໄຂໂດຍຜ່ານການເຈລະຈາ” ແຕ່ມັນໝາຍຄວາມວ່າຈັ່ງໃດ ແລະທາງບໍລິສັດໄດ້ທຳການຈ່າຍໜ້ອຍຫຼາຍປານໃດນັ້ນແມ່ນຍັງບໍ່ທັນເປັນທີ່ຈະແຈ້ງ.

ນອກເໜືອໄປຈາກການຖືຮຸ້ນໃນບໍລິສັດອະສັງຫາລິມມະຊັບແລ້ວ Evergrande ຍັງມີເຄືອບໍລິສັດໃນຂອບເຂດທີ່ກວ້າງຂວາງ ຮວມທັງ ບໍລິສັດຜະລິດລົດໄຟຟ້າ ທີມເຕະບານ ສວນສະໜຸກ 2 ແຫ່ງ ແລະບໍລິສັດປະກັນໄພຊີວິດ ແມ່ນຮວມຢູ່ໃນນັ້ນ. ບໍລິສັດດັ່ງກ່າວ ພະຍາຍາມທີ່ຈະຂາຍຊັບສິນຂອງຕົນຈຳນວນນຶ່ງ ເພື່ອ ນຳເງິນມາຈ່າຍໜີ້ ແຕ່ມາຈົນຮອດດຽວນີ້ ກໍປາກົດວ່າ ຍັງບໍ່ທັນປະສົບຄວາມສຳ ເລັດເທື່ອ ໃນການຊອກຫາເງິນສົດພຽງພໍເພື່ອເຮັດໃຫ້ພວກເຈົ້າໜ້າພໍໃຈ.

ອ່ານຂ່າວນີ້ຕື່ມເປັນພາສາອັງກິດ

XS
SM
MD
LG