ລິ້ງ ສຳຫລັບເຂົ້າຫາ

ວັນພະຫັດ, ໒໓ ພຶດສະພາ ໒໐໒໔

ສະຫະລັດ ແລະຈີນ ເປີດການເຈລະຈາ ດ້ານປ້ອງກັນປະເທດ


ລັດຖະມົນຕີຊ່ອຍວ່າການກະຊວງການຕ່າງປະເທດສະຫະລັດ ທ່ານນາງ Michele Flournoy (ຊ້າຍ) ພົບປະ ກັບນາຍພົນ Ma Xiaotian ຮອງເສນາທິການກອງທັບປົດປ່ອຍປະຊາຊົນຈີນ ທີ່ ນະຄອນຫຼວງປັກກິ່ງ (8 ທັນວາ 2011)
ລັດຖະມົນຕີຊ່ອຍວ່າການກະຊວງການຕ່າງປະເທດສະຫະລັດ ທ່ານນາງ Michele Flournoy (ຊ້າຍ) ພົບປະ ກັບນາຍພົນ Ma Xiaotian ຮອງເສນາທິການກອງທັບປົດປ່ອຍປະຊາຊົນຈີນ ທີ່ ນະຄອນຫຼວງປັກກິ່ງ (8 ທັນວາ 2011)

ພວກເຈົ້າໜ້າທີ່ປ້ອງກັນປະເທດຂອງສະຫະລັດແລະຈີນໄດ້ພົບປະກັນທີ່ນະຄອນຫລວງ ປັກກິ່ງເມື່ອວັນພຸດອາທິດຜ່ານມານີ້ ທ່າມກາງຄວາມເຄັ່ງຕຶງ ກ່ຽວກັບຄໍາປະກາດຂອງ ວໍຊິງຕັນ ທີ່ວ່າສະຫະລັດຈະສົ່ງກອງກຳລັງໄປປະຈຳການທີ່ອອສເຕຣເລຍ ແລະສືບຕໍ່ ຂາຍອາວຸດໃຫ້ໃຕ້ຫວັນ

ທ່ານມາ ສຽວ​ຊ່ຽນຮອງ​ເສນາ​ທິການ​ກອງທັບ​ປົດ​ປ່ອຍຂອງປະ​ຊາຊົນຈີນ​ແລະລັດຖະມົນຕີ
ຊ່ອຍວ່າການກະຊວງປ້ອງກັນປະເທດສະຫະລັດ ​ທ່ານນາງ Michele Flournoy ​ເປັນ
ເຈົ້າພາບ​ຮ່ວມ ​ກອງ​ປະຊຸມ​ໃຫ້​ຄໍາ​ປຶກສາຫາລືກ່ຽວກັບການ​ປ້ອງ​ກັນ​ປະ​ເທດປະ​ຈໍາປີທີ່​ນະ
ຄອນຫລວງປັກ​ກິ່ງເມື່ອ​ວັນ​ພຸດ​ອາທິດຜ່ານ​ມາ.

ອົງການ​ຂ່າວ​ຊິນ​ຫົວຂອງທາງການຈີນໄດ້​ອ້າງ​ເອົາ​ຄໍາ​ເວົ້າຂອງ​ທ່ານມາທີ່​ກ່າວວ່າ ຄວາມ​ຈິງ
ແລ້ວ​ກອງ​ປະຊຸມ​ເປັນເວລານຶ່ງ​ມື້​ມີ​ຂຶ້ນຕາມ​ກໍານົດ​ການ​ສະ​ແດງໃຫ້​ເຫັນວ່າ​ ປະ​ເທດ​ທັງ​ສອງ
ມີ​ຄວາມ​ຈິງໃຈ​ຕໍ່​ກັນກ່ຽວ​ກັບ​ການສືບຕໍ່ຮັກສາ​ການ​ແລກປ່ຽນທາງດ້ານ​ທະຫານ​ກັນ​ລະຫວ່າງ
ກັນ​ຕໍ່​ໄປ.

ໃນ​ເດືອນ​ກັນຍາ​ຜ່ານ​ມາ​ນີ້ສະຫະລັດ​ໄດ້ປະກາດ​ຂາຍ​ອາວຸດ​ຍຸດ​ໂທປະກອນໃນ​ມູນ​ຄ່າ​ເກືອບ
ຫົກ​ພັນ​ລ້າ​ນ​ໂດ​ລາໃຫ້ແກ່ໄຕ້ຫວັນ ຊຶ່ງ​ເປັນ​ເກາະ​ທີ່ປົກຄອງ​ແຍກ​ຈາກ​ຈີນທີ່​ຈີນ​ຍັງ​ຖື​ວ່າ​ເປັນ​
ອານາ​ເຂດ​ສ່ວນ​ນຶ່ງ​ຂອງ​ຕົນ​ນັ້ນ.

ໃນ​ການ​ຕອບ​ໂຕ້​ຕໍ່​ການ​ຂາຍ​ອາວຸດ​ດັ່ງກ່າວ​ຄັ້ງ​ຜ່ານ​ມາ​ ປັກ​ກິ່ງໄດ້ໂຈະ​ການ​ແລກປ່ຽນ​ທາງ
ທະຫານກັບ​ວໍ​ຊິງ​ຕັນ.

ທ່ານ James Nolt ຫົວໜ້າຄະນະອາຈານປະຈຳວິທະຍາເຂດໜານ​ຈິ​ງຂອງສະ​ຖາ​ບັນເທັກ
ໂນ​ໂລ​ຈີນິວຢັອກຫລື New York Institute of Technology ກ່າວ​ວ່າ ທ່ານ​ຄິດ​ວ່າວໍ​
ຊິງຕັນມີ​ຄວາມ​ສົນ​ໃຈໃນ ການຈັດ​ຕັ້ງລະ​ບົບ​ການ​ຕິດ​ຕໍ່​ພົວພັນ​ທາງ​ທະຫານ​ຢ່າງ​ເປັນປົກ
ກະຕິຫລາຍ​ຂຶ້ນ.

ທ່ານ Nolt ກ່າວວ່າ “ຂ້າພະ​ເຈົ້າຢາກ​ຈະ​ເວົ້າວ່າ ບາງທີ ສໍາລັບ​ຝ່າຍ​ກອງທັບ​ສະ
ຫະລັດ​ແລ້ວບັນຫາ​ໃຫຍ່​ທີ່​ສຸດ​ກັບ​ຈີນ​ໃນ​ເວລາ​ນີ້ ກໍ​ຄື​ພະຍາຍາມເອົາມາຕະການ
ເສີມ ສ້າງຄວາມໄວ້ເນື້ອເຊື່ອໃຈຕ່າງໆ ຊຶ່ງເປັນວິທີ​ທາງ​ສື່​ສໍາພັນ​ກັນ​ດີ​ຂຶ້ນກວ່າ​
ເກົ່າ​ເພື່ອ​ເຮັດ​ໃຫ້​ເປັນ​ທີ່​ແນ່​ໃຈ​ວ່າ​ ຈະ​ບໍ່​ມີ​ເຫດການ​ໃດ​ນຶ່ງ​ ທີ່​ຈະເປັນບັນຫາຂັດ​
ແຍ້​ງ ທີ່​ຜິດພາດ ຫລື​ຄວາມ​ເຂົ້າ​ໃຈ​ຜິດ​ກັນ ​ກ່ຽວ​ກັບ​ການຝຶກຊ້ອມ​ທາງທະຫານ
ຫລືການຍິງ​ລູກ​ສອນ​ໄຟ ຫລື​ເກີດ​ການ​ປະ​ທະ​ກັນລະຫວ່າງເຮືອ​ລົບໃນ​ທ້ອງທະ​
ເລ​ຫລື​ສິ່ງ​ໃດ​ສິ່ງ​ນຶ່ງ​ໃນ​ທໍານອງ​ນັ້ນ. ຖ້າ​ຫາກ​ວ່າ​ພວກ​ເຂົາ​ເຈົ້າຕົກລົງ​ກັນໄດ້ນັ້ນ​
ກໍ​ໝາຍ​ເຖິງ​ວ່າ​ການ​ເກີດອຸບັດ​ເຫດ​ໃນບັນຫາຂັດແຍ້​ງກັນ​ບາງ​ປະການກັບ​ຈີນ ກໍ​
ເບິ່ງ​ຄື​ວ່າ​ຈະເບົາບາງລົງ”

ທ່ານ James Nolt ກ່າວວ່າ ອີກ​ບັນຫາ​ນຶ່ງ​ທີ່​ສ້າງຄວາມວິຕົກກັງວົນນັ້ນກໍ​ຄືກໍລະນີ​ພິພາດ​ກ່ຽວກັບເລື່ອງເຂດນໍ້າແດນດິນໃນ​ທະ​ເລ​ຈີນ​ໃຕ້. ລັດຖະບານ​ປັກ​ກິ່ງ​ກົດດັນ​ໃຫ້​ມີການແກ້​ໄຂ
ບັນຫາ​ນີ້​ແບບສອງຝ່າຍກັບ 5 ປະ​ເທດ​ທີ່​ອ້າງ​ເອົາ​ກໍາມະສິດ ​ແຕ່​ທ່ານ Nolt ກ່າວວ່າ ເຖິງ
ແມ່ນໂດຍວິທີນັ້ນກໍຕາມກໍຍັງບໍ່ເຫັນມີຄວາມກ້າວໜ້າພໍປານໃດ.

ທ່ານ Nolt ກ່າວວ່າ “ຂ້າພະເຈົ້າຄິດວ່າສາເຫດຕ່າງໆທີ່ສ້າງຄວາມເປັນຫ່ວງຢູ່ໃນ
ສະຫະລັດນັ້ນ ເນຶ່ອງຈາກສະຫະລັດຮູ້ສຶກວ່າ ໂອກາດທີ່ຈະເກີດບັນຫາຂັດແຍ້ງມີ
ເພີ່ມຂື້ນໃນເມື່ອບໍ່ມີການດໍາ​ເນີນ​ການ​ເຈລະຈາ​ກັນແລ​ະຂ້າພະ​ເຈົ້າຄິດ​ວ່າປະ​ເທດ
ອື່ນໆ​ກໍ​ພາກັນ​ຜັກ​ດັນ​ໃຫ້​ຈີນ​ທໍາ​ການ​ເຈລະຈາ​ ​ແລະ​ຈີນ​ກໍ​ບໍ່​ຊົງວ່າມີຄວາມສົນ​ໃຈ​
ປານ​ໃດ ​ເພາະວ່າຈີນ​ສາມາດ​ຢືນຢັນ​ການ​ອ້າງ​ເອົາ​ກໍ​າມະ​ສິດ​ຂອງຕົນ ​ແລະ​ເລິ່ມ
ປົກ​ປ້ອງ​ມັ​ນ​ໄວ້​ ໂດຍ​ທີ່​ບໍ່​ຕ້ອງ​ໃຫ້​ມີ​ການ​ເຈລະຈາ​ກັນ ​ແລະທ້າ​ໃຫ້​ຝ່າຍ​ອື່ນໆ​ເຮັດ
ບາງ​ສິ່ງ​ບາງ​ຢ່າງ​ກ່ຽວ​ກັບ​ເລຶ່ອງນີ້”

ໃນ​ຄໍາ​ປາ​ໃສ​ຕໍ່​ຄະນະ​ກໍາມາທິການກາງທາງທະຫານ ເມື່ອ​ວັນ​ອັງຄານສັບປະດາ​ຜ່ານ​ມາ​ນີ້ປະ
ທານຫູ ຈິນ​ເຖົາ​ໄດ້​ຮຽກຮ້ອງ​ໃຫ້​ກອງທັບ​ເຮືອຈີນກຽມພ້ອມເພື່ອທຳການສູ້​ລົບ​ທາງ​ທະຫານ.

ເມື່ອ​ວັນ​ພຸດ​ຜ່ານ​ມາ​ນີ້ທ່ານຮົງເລ​ໂຄສົກ​ກະຊວງ​ຕ່າງປະ​ເທດ​ຈີນໄດ້​ໃຫ້​ຄວາມ​ໝັ້ນ​ໃຈ​ແກ່​ພວກ
ນັກ​ຂ່າວ​ ທີ່ໄດ້ຊັກຖາມກ່ຽວ​ກັບ​ຄວາມ​ເຫັນ​ຂອງ​ປະທານຫູຈິນເຖົານັ້ນ.

ທ່ານຮົງ​ເລ ​ໄດ້​ກ່າວ​ຊໍ້າ​ວ່າ ສິ່ງ​ທີ່​ກາຍ​ເປັນ​ແນວທາງ​ອັນສອດຄ່ອງ​ຂອງລັດຖະບານ​ປັກ​ກິ່ງ​ນັ້ນ
ກໍ​ຄື​ຈີນ​ສືບຕໍ່ດໍາ​ເນີນ​ນະ​ໂຍບາຍ​ປ້ອງ​ກັນ​ປະ​ເທດຊຶ່ງ​ຢຶດໝັ້ນຢ່າງເຄັ່ງຄັດໃນດ້ານການປ້ອງ​ກັນ
ປະ​ເທດ​ໂດຍບໍ່​ຄິດ​ຈະ​ຮຸກຮານ​ຂົ່ມຂູ່​ປະ​ເທດ​ອື່ນໃດແລະ​ມຸ້ງ​ໝັ້ນໃນການ​ສ້າ​ຄວາມ​ສະຫງົບ​ສຸກ.

ທ່ານຮົງເລ ​ເວົ້າຕື່ມ​ວ່າ ການ​ພັດທະນາໃດໆກໍຕາມ​ຂອງ​ຈີນ​ນັ້ນ ​ແມ່ນ​ຈະ​ນໍາ​ເອົາໂອກາດ​ອັນ
ສໍາຄັນ​ມາສູ່​ໂລກ​ທັງ​ມວນ​ໄດ້.

ເ​ຊື່​ອກັນ​ວ່າ ​ໝູ່​ເກາະໝູ່ດອນຕ່າງໆ​ໃນເຂດທະ​ເລ​ຈີນ​ໃຕ້ ​ແມ່ນ​ຕັ້ງກວມບໍ່​ນໍ້າມັນ​ແລະ​ແກັສທໍາ​
ມະ​ຊາດສຳຮອງໃນປະ​ລິມານ​ມະຫາສານ. ພວກ​ທີ່​ອ້າງ​ເອົາ​ກໍາມະສິດ​ ນອກຈາກ​ຈີນ​ແລ້ວກໍ​ມີ
ບຣູ​ໄນ ມາ​ເລ​ເຊຍ ຟິລິ​ບປິນ ​ໄຕ້​ຫວັນ ​ແລະ​ຫວຽດນາມ.

XS
SM
MD
LG