ຈີນ ຈະບໍ່ປະຖິ້ມການນໍາໃຊ້ກຳລັງຕໍ່ ໄຕ້ຫວັນ, ລັດຖະບານ ປັກກິ່ງ ກ່າວໃນ ວັນພຸດມື້ນີ້ ລຸນຫຼັງການຊ້ອມລົບອີກຄັ້ງ ແລະການຢ້ຽມຢາມຂອງປະທານປະເທດຈີນ ທ່ານ ສີ ຈິ່ນຜິງ ຢູ່ບ່ອນເກີດເຫດການເສຍໄຊທີ່ມີຊື່ສຽງຂອງກອງກຳລັງຂອງ ໄຕ້ຫວັນ.
ຈີນ ຊຶ່ງຖືວ່າ ໄຕ້ຫວັນ ທີ່ປົກຄອງແບບປະຊາທິປະໄຕ ເປັນດິນແດນຂອງຕົນ ນັ້ນ ໄດ້ທຳການຊ້ອມລົບຂະໜາດໃຫຍ່ເປັນເວລານຶ່ງມື້ອ້ອມຮອບເກາະດັ່ງກ່າວ ໃນວັນຈັນແລ້ວນີ້ ໂດຍກ່າວວ່າ ເປັນການເຕືອນເຖິງ “ການກະທຳແບ່ງແຍກ ດິນແດນ” ພາຍຫຼັງຄຳປາໄສຂອງປະທານາທິບໍດີໄຕ້ຫວັນ ທ່ານ ລາຍ ຊິງ-ເຕ (Lai Ching-te) ໃນອາທິດແລ້ວນີ້.
ທ່ານ ເຊິນ ບິນຫົວ (Chen Binhua) ໂຄສົກສໍານັກງານສໍາລັບກິດຈະການໄຕ້ຫວັນຂອງຈີນ ກ່າວຕໍ່ກອງປະຊຸມລາຍງານປົກກະຕິຢູ່ນະຄອນຫຼວງປັກກິ່ງວ່າ “ພວກເຮົາເຕັມໃຈພະຍາຍາມເພື່ອຄວາມຫວັງຂອງການເຕົ້າໂຮມກັນໂດຍສັນຕິ ດ້ວຍຄວາມຈິງໃຈທີ່ສຸດ ແລະດ້ວຍຄວາມພະຍາຍາມທີ່ສຸດ.”
ທ່ານກ່າວຕື່ມວ່າ “ແຕ່ພວກເຮົາຈະບໍ່ໃຫ້ຄຳໝັ້ນກັບຕົນເອງ ທີ່ຈະປະຖິ້ມການໃຊ້ກຳລັງ.”
ແນວໃດກໍຕາມ, ທ່ານ ເຊິນ ກ່າວວ່າ ແມ່ນແນໃສ່ການແຊກແຊງຂອງ “ກອງກຳລັງພາຍນອກ” ແລະພວກແບ່ງແຍກດິນແດນໄຕ້ຫວັນຈຳນວນໜ້ອຍ ເທົ່ານັ້ນ, ບໍ່ແມ່ນປະຊາຊົນສ່ວນໃຫຍ່ຂອງໄຕ້ຫວັນ. ໄຕ້ຫວັນ ມີການພົວພັນທີ່ບໍ່ເປັນທາງການກັບ ສະຫະລັດ, ເຊິ່ງເປັນຜູ້ສະໜອງອາວຸດ ແລະເປັນພັນທະມິດທີ່ສໍາຄັນຂອງຕົນ.
ທ່ານກ່າວອີກວ່າ “ບໍ່ວ່າໄຕ້ຫວັນຈະມີທະຫານຫຼາຍປານໃດ ຫຼື ມີອາວຸດຫຼາຍພຽງໃດ, ແລະບໍ່ວ່າກອງກຳລັງພາຍນອກຈະເຂົ້າແຊກແຊງ ຫຼື ບໍ່, ຖ້າ ໄຕ້ຫວັນ ກ້າທີ່ຈະພົບກັບຄວາມສ່ຽງ, ມັນກໍຈະນຳໄປສູ່ການທຳລາຍຕົນເອງ.”
“ການກະທຳເພື່ອປົກປັກຮັກສາອະທິປະໄຕແຫ່ງຊາດ ແລະ ຜືນແຜ່ນດິນອັນຄົບຖ້ວນຂອງພວກເຮົາ ຈະບໍ່ຢຸດໃນຊ່ວງໄລຍະນີ້.”
ສື່ມວນຊົນແຫ່ງລັດຖະບານຈີນລາຍງານໃນວັນພຸດມື້ນີ້ວ່າ ປະທານປະເທດຈີນ ທ່ານ ສີ ຈິ່ນຜິງ ໄດ້ເດີນທາງໄປຮອດເກາະ ດົງຊານ (Dongshan) ແຂວງ ຟູຈຽນ ຂອງຈີນ ນຶ່ງມື້ກ່ອນໜ້ານັ້ນ, ເຊິ່ງເປັນເກາະທີ່ຕັ້ງຢູ່ໃກ້ກັບ ໄຕ້ຫວັນ ແລະເປັນສະຖານທີ່ທີ່ ຈິນ ສາມາດຕ້ານຄວາມພະຍາຍາມໃນການຮຸກຮານ ຂອງທະຫານ ໄຕ້ຫວັນ ໄດ້ໃນປີ 1953.
ຟໍຣັມສະແດງຄວາມຄິດເຫັນ