ເມື່ອ 3 ປີກ່ອນນີ້ ຈີນແລະມຽນມາ ໄດ້ລົງນາມໃນຂໍ້ຕົກລົງ ສະບັບ
ນຶ່ງ ເພື່ອກໍ່ສ້າງຕາໜ່າງທາງລົດໄຟຄວາມໄວສູງ ທີ່ເຊື່ອມໂຍງ
ແຂວງຢຸນນານຂອງຈີນ ໄປຫາອ່າວ Bengal. ແຕ່ໃນເດືອນແລ້ວ
ນີ້ ບັນທຶກຄວາມເຂົ້າໃຈກັນ ໄດ້ໝົດອາຍຸໄປ ເຮັດໃຫ້ອະນາຄົດ
ຂອງແຜນການດັ່ງກ່າວ ຕົກຢູ່ໃນສະພາບບໍ່ແນ່ນອນ. ລັດຖະມົນ
ຕີກະຊວງລົດໄຟມຽນມາກ່າວວ່າ ໂຄງການດັ່ງກ່າວໄດ້ຖືກປະ
ຖິ້ມໄປແລ້ວ ແຕ່ບັນດາເຈົ້າໜ້າທີ່ຈີນຍັງບໍ່ຍອມປະລະໂຄງການ
ນີ້ໄປເທື່ອ. Gabrielle Paluch ນັກຂ່າວວີໂອເອ ລາຍງານມາ
ຈາກບາງກອກ ທີ່ສິງຈະນຳມາສະເໜີທ່ານ.
ບັນດາເຈົ້າໜ້າທີ່ມຽນມາ ກ່າວວ່າ ແຜນການສ້າງທາງລົດໄຟຄວາມໄວສູງໃນວົງເງິນ
20 ພັນລ້ານດອນລາ ທີ່ຈະເຊື່ອມໂຍງທ່າກຳປັ່ນເດີນທະເລທີ່ມິດງຽບ ໃນນຶ່ງຂອງພວກ
ລັດທີ່ທຸກຈົນທີ່ສຸດຂອງມຽນມາ ໄປຫາເມືອງຄຸນໝິງ ນະຄອນຫຼວງແຂວງຢຸນນານຂອງ
ຈີນນັ້ນ ບໍ່ເຄີຍຄຶດວ່າ ຈະເປັນຄວາມຈິງຂຶ້ນມາຈັກເທື່ອ ແລະການກໍ່ສ້າງໃດໆກໍຍັງບໍ່ທັນ
ໄດ້ເລີ້ມຂຶ້ນເທື່ອ. ທາງລົດໄຟສາຍນີ້ ຈະສ້າງຄຽງຄູ່ໄປກັບທໍ່ລຳລຽງແກສທຳມະຊາດ
Shwe ທີ່ຈີນ ໄດ້ສ້າງສຳເລັດໄປແລ້ວນັ້ນ. ທາງເສັ້ນນຶ່ງ ກໍມີກຳນົດວ່າ ຈະສ້າງຂຶ້ນໄປ
ພ້ອມເຊັ່ນດຽວກັນ.
ທ່ານ Myint Wai ຫົວໜ້າຫ້ອງການກະຊວງລົດໄຟມຽນມາ ກ່າວເມື່ອເດືອນແລ້ວນີ້ວ່າ
ໂຄງກນດັ່ງກ່າວໄດ້ຖືກລົບລ້າງໄປ ເພາະວ່າມັນເປັນການຕັດສິນໃຈ ຂອງປະຊາຊົນ
ມຽນມາ. ທ່ານກ່າວຕື່ມວ່າ ບໍ່ມີ “ແຜນ ການຈັດຕັ້ງປະຕິບັດໂຄງການນີ້ແລະຂໍ້ຕົກລົງ
ໄດ້ໝົດອາຍຸໄປແລ້ວ ດັ່ງນັ້ນພວກເຮົາ ຈະບໍ່ດຳເນີນໂຄງການນີ້ຕໍ່ໄປ ອີງຕາມຄຳ
ຮຽກຮ້ອງຕ້ອງການຂອງປະຊາຊົນ.”
ພວກໂຄງການວິສາຫະກິດຮ່ວມຂະໜາດໃຫຍ່ຕ່າງໆ ຄ້າຍຄືກັນນີ້ ລະຫວ່າງຈີນແລະມຽນມາ ໄດ້ກະຕຸ້ນໃຫ້ເກີດການຄັດຄ້ານຈາກປະຊາຊົນ ສ່ວນຫຼາຍແມ່ນຈາກປະຊາຊົນ
ໃນທ້ອງຖິ່ນ ທີ່ຈະໄດ້ຮັບຜົນກະທົບຈາກການກໍ່ສ້າງນີ້. ພວກໂຄງການຕ່າງໆເຫຼົ່ານີ້ ແມ່ນ
ຮວມທັງການກໍ່ສ້າງເຂື່ອນໄຟຟ້າພະລັງນ້ຳຂະໜາດໃຫຍ່ ໃສ່ແມ່ນ້ຳ Myitsone ໃນລັດ Kachin ທີ່ປາກົດວ່າ ໄດ້ງົດໄປແລ້ວຢ່າງແນ່ນອນ ແລະບໍ່ທອງແດງ Latpedaung ທີ່
ຈີນເປັນຜູ້ບໍລິຫານ ໃນພາກເໜືອຂອງມຽນມານັ້ນ.
ທ່ານ Wong Aung ນັກເຄື່ອນໄຫວ ຈາກຂະບວນການຕໍ່ຕ້ານການສ້າງທໍ່ສົ່ງແກສ Shwe ກ່າວວ່າ ການຍົກເລີກໂຄງລ່າງພື້ນຖານລາຍໃຫຍ່ໆກັບຈີນ ແມ່ນຊ່ອງທາງນຶ່ງຂອງລັດ
ຖະບານພົນລະເຮືອນແຕ່ໃນນນາມຊື່ໆ ເພື່ອທຳການປ່ຽນແປງຢ່າງກະທັນຫັນ ຊຶ່ງແຕກ
ຕ່າງໄປຈາກອະດີດລັດຖະບານທະຫານ.
ທ່ານ Wong Aung ກ່າວວ່າ “ເວລາພວກເຂົາເຈົ້າເລີ້ມສ້າງທໍ່ລຳລຽງແກັສທຳມະ
ຊາດ ໃນເວລານັ້ນ ໄດ້ມີການປະຕິບັດງານທາງທະຫານຫຼາຍ ແລະປະຊາຊົນ
ຫຼາຍຄົນ ກໍໄດ້ຖືກກົດຂີ່ຂົ່ມເຫັງ ພາຍໃຕ້ການປົກຄອງຂອງພວກທະຫານ. ມາ
ບັດນີ້ ພວກເຮົາຖືວ່າ ອັນນີ້ມັນເປັນການເຄື່ອນໄຫວທາງດ້ານການເມືອງອັນ
ນຶ່ງ ພາຍໃຕ້ອັນທີ່ເອີ້ນວ່າ ລັດຖະບານພົນລະເຮືອນ ພາຍໃຕ້ການນຳພາຂອງ
ປະທານາທິບໍດີ Thein Sein. ປະທານາທິບໍດີມັກກ່າວຂຶ້ນມາເລື້ອຍໆ ກ່ຽວກັບ
ການປະກອບສ່ວນຂອງປະຊາຊົນ ແລະລະບອບປະຊາທິປະໄຕ ທີ່ສາມາດ
ສ້າງຕັ້ງເວທີແບບນຶ່ງຂຶ້ນສຳລັບປະຊາຊົນໃນເຂດທ້ອງຖິ່ນໃຫ້ເຂົ້າຄວບຄຸມ
ແລະສະແດງຄວາມເປັນຫ່ວງກັງວົນຂອງເຂົາເຈົ້າອອກມາໄດ້.”
ທ່ານ Yang Houlan ເອກອັກຄະລັດຖະທູດຈີນກ່າວວ່າ ຈີນຍັງບໍ່ໄດ້ປະລະແຜນການດັ່ງກ່າວເທື່ອ. ໃນຖະແຫຼງການສະບັບນຶ່ງທີ່ສົ່ງໄປຍັງ ວີໂອເອ ທ່ານ Yang Houlan
ກ່າວວ່າ “ຈີນແລະມຽນມາ ໄດ້ປະຕິບັດການອອກແບບຮ່ວມກັນຂອງໂຄງການດັ່ງ
ກ່າວນີ້ແລ້ວ” ແລະ ”ທາງຝ່າຍຈີນກໍຕຽມພ້ອມທີ່ຈະສືບຕໍ່ດຳເນີນງານຮ່ວມກັນກ່ຽວ
ກັບໂຄງການດັ່ງກ່າວ.”
ທ່ານ Yang Houlan ກ່າວວ່າ ໂຄງການດັ່ງກ່າວເປັນພາກສ່ວນນຶ່ງຂອງຕາໜ່າງທາງລົດໄຟຂ້າມຊາດໃນເອເຊຍ ຫຼື Trans-Asian Railway network ທີ່ຈະເຊື່ອມໂຍງໝົດທຸກປະເທດ ໃນຂົງເຂດເອເຊຍຕາເວັນອອກສຽງໃຕ້ ແຕ່ສິງກະໂປ ໄປຫາຈີນ ໂດຍໃຊ້ລາງລົດໄຟຄວາມໄວສູງ ທີ່ຈີນສ້າງໃຫ້ ຕາມຂໍ້ຕົກລົງ ທີ່ໄດ້ລົງນາມກັນໃນປີ 2009 ນັ້ນ. ໂຄງການດັ່ງກ່າວ ໄດ້ຖືກຂະໜານນາມວ່າ “Iron Silk Road” ຫຼືເສັ້ນທາງເຫຼັກສາຍໄໝ ໂດຍລັດ
ຖະບານຈີນ ແລະມີເຈດຕະນາເພື່ອນຳມາແຫ່ງການພັດທະນາທາງດ້ານເສດຖະກິດຕໍ່ພວກປະເທດທີ່ອຸດົມຮັ່ງມີດ້ານແຫຼ່ງຊັບພະຍາກອນທີ່ຕິດກັບຈີນ ແລະອຳນວຍ ໃຫ້ຈີນ
ເຂົ້າຫາທ່າກຳປັ່ນໄດ້ຫຼາຍແຫ່ງຂຶ້ນ. ມີພຽງບໍ່ເທົ່າໃດປະເທດທີ່ຮ່ວມໃນການລົງນາມ ໄດ້
ທຳການເຄື່ອນໄຫວທີ່ແທ້ຈິງຕາມສັນຍາສະບັນດັ່ງກ່າວ.
ເຖິງຢ່າງໃດກໍດີ ຄວາມຮູ້ສຶກຕໍ່ຕ້ານຈີນ ແມ່ນແຂງແຮງຢູ່ໃນມຽນມາ ມາເປັນເວລາຫຼາຍ
ທົດສະວັດ ໃນລະຫວ່າງຍຸກສະໄໝການປົກຄອງ ແບບສັງຄົມນິຍົມທີ່ມີການກໍ່ຄວາມວຸ້ນວາຍຕໍ່ຕ້ານຈີນທີ່ຢ່າງຮ້າຍແຮງ ສະເໝີມາ ແລະໃນຂະນະດຽວກັນລັດ Rakhine ຂອງມຽນມາຕ້ອງການການພັດທະນາຫຼາຍທີ່ສຸດ ເຂດເສດຖະກິດພິເສດ ແລະທ່າເຮືອ
ນ້ຳເລິກທີ່ວາງແຜນໄວ້ ທີ່ເມືອງ Kyaukpyu ກໍຍັງບໍ່ທັນໄດ້ດຳເນີນການແບບໂຄງສ້າງພື້ນຖານ ແລະການບໍລິການຕ່າງໆທີ່ປະຊາຊົນໃນລັດ Rakhine ຫຼາຍຄົນຕ້ອງການນັ້ນ.
