ໃນວັນອັງຄານມື້ນີ້ ເປັນຂີດໝາຍຂອງວັນຄົບຮອບ 30 ປີ ກ່ຽວກັບໄພພິບັດນິວເຄລຍ ທີ່ Chernobyl ບ່ອນທີ່ໄດ້ເກີດການລະເບີດຂຶ້ນທີ່ໂຮງໄຟຟ້າ ໃກ້ໆກັບເມືອງ ໄດ້ມີກະທົບຕໍ່ຂົງເຂດຢ່າງກວ້າງແຂວງ ແລະມັນໄດ້ສົ່ງຄວັນກຳມັນລັງສີຂຶ້ນສູ່ທ້ອງຟ້າກຸ້ມໄປໃນທົ່ວໂລກ.
ທ່າມກາງທີ່ເກີດໄພພິບັດດັ່ງກ່າວ ມີສອງຄົນ ໄດ້ເສຍຊີວິດໃນທັນທີທັນໄດ ໃນຂະນະທີ່ ມີອີກ 29 ຄົນ ຕື່ມອີກ ໄດ້ເສຍຊີວິດລົງພາຍໃນບໍ່ເທົ່າໃດສັບປະດາຕໍ່ມາ. ມີການສັນນິຖານທີ່ວ່າໄດ້ມີຜູ້ຄົນອີກຫຼາຍພັນຄົນ ໄດ້ເສຍຊີວິດລົງຈາກການເປັນໂຮກມະເຮັງ ແລະການເຈັບປ່ວຍຢ່າງອື່ນທີ່ຕິດຕາມມາໃນຫຼາຍໆປີຈາກນັ້ນ.
ຍັງມີທາດຢູເຮນຽມທີ່ຍັງຫຼົງເຫຼືອຢູ່ຂ້າງໃນໂຮງໄຟຟ້ານັ້ນ ຊຶ່ງຍັງເຮັດໃຫ້ມີຄວາມຢ້ານກົວວ່າ ຜົນກະທົບຈາກກຳມັນຕະພາບລັງສີ ຮົ່ວໄຫຼອອກມາສູ່ຂົງເຂດ ຊຶ່ງເປັນບ່ອນທີ່ມີຄວາມສ່ຽງແລະບໍ່ປອດໄພ ຢ່າງນ້ອຍ ໃນອີກນຶ່ງສັດຕະວັດຕໍ່ໜ້າພຸ້ນ.
ບັນດາຜູ້ອຸບປະຖຳນາໆຊາດ ໄດ້ປະຕິຍານຕົນ ໃນວັນຈັນວານນີ້ວ່າ ຈະໃຫ້ເງິນຊ່ອຍເຫຼືອຈຳນວນ 99 ລ້ານໂດລ່າ ເພື່ອໃຫ້ການຄຸ້ມກັນ ປົກປ້ອງສະຖານທີ່ຕ່າງໆໃນເຂດ Chernobyl ໃຫ້ປອດໄພກວ່າເກົ່າ.
ເຕົາແຍກຂອງໂຮງໄຟຟ້າ ໄດ້ກາຍມາເປັນບ່ອນທີ່ທຳການສ້າງສາຄືນໃໝ່ ມີອຸບປະກອນ ເຄື່ອງຍົກຢູ່ເທິງໂຮງໄຟຟ້າ ທີ່ຍັງຫຼົງເຫຼືອຢູ່ນັ້ນ. ລະດັບກຳມັນຕະພາບລັງສີຍັງສາມາດທີ່ຈະສົ່ງສັນຍານທີ່ເປັນອັນຕະລາຍໃນ 3 ທົດສະວັດ ຫຼັງຈາກການລະເບີດຂຶ້ນແລ້ວນັ້ນ. ມີພວກຄົນງານປະມານ 7 ພັນຄົນ ເຮັດວຽກເພື່ອມ້ຽນມັດສະຖານທີ່ດັ່ງກ່າວ. ພວກພະນັກງານນັ້ນແມ່ນມີຫຼວງຫຼາຍ ເພາະພວກພະນັກງານທັງຫຼາຍ ແມ່ນຈະມີຂີດຈຳກັດໃນການຖືກເຜີຍແບ ໃສ່ກຳມັນຕະພາບລັງສີທີ່ວ່ານີ້.
ທ່ານ Volodymyr Yeger ນັກຊ່ຽວຊານດ້ານຄວາມປອດໄພ ຈາກສະຖາບັນວິທະຍາສາດແຫ່ງຊາດຢູເຄຣນ ແລະ ຮັບເປັນຜູ້ນຳທ່ຽວໃຫ້ VOA ໃນສະຖານທີ່ດັ່ງກ່າວ ກ່າວວ່າ ພວກເຂົາເຈົ້າບໍ່ໄດ້ຢູ່ໃນອັນຕະລາຍ.
ທ່ານ Yeger ໄດ້ກ່າວວ່າ “ຖ້າຫາກທ່ານໄດ້ປະຕິບັດຕາມກົດລະບຽບການຂອງຄວາມປອດໄພແລ້ວ ນັ້ນແມ່ນປອດໄພທີ່ສຸດ ຢ່າງແນ່ນອນ ລະດັບຂອງກຳມັນຕະພາບລັງສີ ທີ່ຜູ້ໃດຜູ້ນຶ່ງສາມາດຮັບ ໃນສະຖານທີ່ນີ້ນັ້ນ ແມ່ນສູງໜ້ອຍນຶ່ງ ກວ່າ ໃນນະຄອນ Kyiv ເປັນຕົ້ນ.”
ເບິ່ງ: Chernobyl ບ່ອນທີ່ມີມົນລະພິດທີ່ຮ້າຍແຮງທີ່ສຸດໃນໂລກ
