ທຳນຽບປະທານາທິບໍດີ ບູຣຸນດີ ກ່າວວ່າ ປະທານາທິບໍດີ Pierre Nkurunziza ໄດ້ສາບານໂຕເຂົ້າຮັບຕຳແໜ່ງເປັນສະໄໝທີ 3 ໃນວັນພະຫັດມື້ນີ້, 6 ມື້ກ່ອນພິທີສາບານໂຕ ທີ່ໄດ້ກຳນົດໄວ້.
ທຳນຽບປະທານາທິບໍດີ ໄດ້ປະກາດກ່ຽວກັບພິທີສາບານໂຕດັ່ງ ກ່າວທີ່ບໍ່ມີການແຈ້ງໃຫ້ ຊາບລ່ວງໜ້າ ໃນຕອນເຊົ້າຂອງວັນພະຫັດມື້ນີ້.
ການພະຍາຍາມເຂົ້າຮັບຕຳແໜ່ງສະໄໝທີສາມ ຂອງທ່ານ ປະທານາ ທິບໍດີ ໄດ້ກໍ່ໃຫ້ເກີດວິກິດການດ້ານການເມືອງທີ່ໄດ້ເພີ້ມ ທະວີຄວາມຮຸນແຮງຂຶ້ນ ຫລັງຈາກທ່ານໄດ້ ຊະນະ ການເລືອກຕັ້ງ ໃນວັນທີ 21 ກໍລະກົດທີ່ຜ່ານມານີ້. ເຊິ່ງໄດ້ຖືກຕຳໜິວ່າມີຂໍ້ບົກຜ່ອງ. ບັນດາກຸ່ມຝ່າຍຄ້ານທີ່ ໄດ້ຂວ້ຳບາດ ຫຼື boycott ການເລືອກຕັ້ງ, ກ່າວວ່າ ສະພາບ ການ ບໍໍ່ໄດ້ເອື້ອອຳນວຍໃຫ້ມີ ການເລືອກຕັ້ງທີ່, ຍຸດຕິທຳ, ໂປ່ງໃສ ແລະ ເປີດກວ້າງໃຫ້ທຸກພັກຝ່າຍເຂົ້າ ຮ່ວມ.
ການປະກາດຂອງປະທານາທິບໍດີ ທີ່ຈະລົງແຂ່ງໃນການເລືອກຕັ້ງອີກສະໄໝໜຶ່ງ ໃນເດືອນ ເມສາທີ່ຜ່ານມາ ກໍ່ໃຫ້ເກີດການພະຍາຍາມກໍ່ລັດຖະປະຫານ ແລະ ການປະທ້ວງດ້ານການເມືອງຫຼາຍອາທິດ ເຊິ່ງໄດ້ເຮັດໃຫ້ຫຼາຍກວ່າ 100 ຄົນເສຍຊີວິດ.
ບັນດານັກວິເຄາະກ່າວວ່າ ການເລືອກຕັ້ງເພື່ອເຂົ້າຮັບຕຳແໜ່ງຕື່ມອີກ ຂອງທ່ານ Nkurunziza ໄດ້ທຳລາຍລັດຖະທຳມະນູນ ແລະ ສົນທິສັນຍາ Arusha, ເຊິ່ງໄດ້ເຮັດໃຫ້ສົງຄາມກາງເມືອງທີ່ແກ່ຍາວ ມາເປັນເວລາ 13 ປີຂອງປະເທດສິ້ນສຸດລົງ.
ສານລັດຖະທຳມະນູນຂອງ ບູຣຸນດີ ໄດ້ຕັດສິນວ່າ ທ່ານສາມາດລົງ ສະໝັກເອົາຕຳແໜ່ງໄດ້ ເພາະວ່າ ທ່ານເປັນຄົນທີ່ໄດ້ຖືກເລືອກ ໂດຍສະພາ, ບໍ່ແມ່ນລົງສະໝັກແຂ່ງຂັນ ໃນປີ 2005.
ໃນວັນອາທິດທີ່ຜ່ານມາ ສະຫະພາບ ອາຟຣິກາ ໄດ້ເຕືອນວ່າ ວິກິດການດ້ານການເມືອງໃນ ບູຣຸນດີ ອາດຈະສ້າງຄວາມຫາຍະນະ ໃຫ້ແກ່ປະເທດດັ່ງກ່າວ ແລະ ຂົງເຂດອ້ອມແອ້ມ.
ຖະແຫຼງການໂດຍກຳມາທິການສະຫະພາບ ອາຟຣິກາ ທ່ານ Nkosazana Dlamini-Zuma, ມີຂຶ້ນມື້ໜຶ່ງຫຼັງຈາກການສັງຫານອະດີດຜູ້ບັນຊາການທະຫານ ທ່ານ Jean Bikomagu.
ມືປືນຊຶ່ງບໍ່ຊາບຝ່າຍ ໄດ້ສັງຫານທ່ານ Bikomagu ຢູ່ນອກເຮືອນຂອງທ່ານໃນນະຄອນ ຫຼວງ Bujumbura. ການເສຍຊີວິດຂອງທ່ານ ມີຂຶ້ນ ຫລັງຈາກການສັງຫານທີ່ປຶກສາດ້ານຄວາມໝັ້ນຄົງ ຂອງປະທານາທິບໍດີ ທ່ານ Adolphe Nshimirimana ໃນວັນທີ 2 ສິງຫາ ທີ່ຜ່ານມາ.
