ລິ້ງ ສຳຫລັບເຂົ້າຫາ

ວັນອາທິດ, ໒໑ ກໍລະກົດ ໒໐໒໔

ການ​ສົ່ງ​ຍານ​ອະ​ວະ​ກາດຂອງ ສະ​ຫະ​ລັດ ຂຶ້ນ​ໄປ​ສະ​ຖາ​ນີ​ອະ​ວະ​ກາດ ​ເປັນ​ສິ່ງ​ທີ່​ສ້າງ​ຄວາມ​ພາກ​ພູມ​ໃຈ​​ໃຫ້​ຄົນ ອາ​ເມ​ຣິ​ກັນ ​ເປັນ​ຢ່າງ​ຍິ່ງ


NASA Boeing Starliner
please wait
Embed

No media source currently available

0:00 0:00:39 0:00

​ຊົມ​ວິ​ດີ​ໂອ ກ່ຽວ​ກັບ ລາຍ​ງານນີ້

ເມື່ອ​ຕົ້ນ​ເດືອນນີ້ອົງ​ການ​ NASA ໄດ້​ສົ່ງ​ນັກ​ອະ​ວະ​ກາດ ສະ​ຫະ​ລັດ ສອງ​ຄົນ​ຂຶ້ນ​ໄປ​ສະ​ຖາ​ນີ​ອະ​ວະ​ກາດ​ສາ​ກົນ ດ້ວຍ​ຈະຫຼວດ​ທີ່​ຜະ​ລິດ​ໂດຍ​ບໍ​ລິ​ສັດ Boeing ຊື່​ວ່າ Statliner. ບໍ​ລິ​ສັດ Boeing ໄດ້​ສົ່ງ​ຍານ​ຂອງ​ເຂົາ​ເຈົ້າ​ຂຶ້ນ​ໄປ​ເປັນ​ຄັ້ງ​ທຳ​ອິດ​ໃນ​ປະ​ຫວັດ​ສາດ ຫຼັງ​ຈາກ​ໄດ້​ປະ​ສົບ​ກັບ​ຄວາມ​ລົ້ມ​ແຫຼວຫຼາຍຄັ້ງ. ໃນ​ການ​ປ່ອຍ​ຍານ​ດັ່ງ​ກ່າວ​ນັ້ນ ກໍ​ມີ​ປະ​ຊາ​ຊົນ​ຈຳ​ນວນຫຼາຍ​ໃຫ້​ຄວາມ​ສົນ​ໃຈ, ເຊິ່ງ​ກໍ​ມີ​ຄົນ​ລາວ​ທ່ານ​ນຶ່ງ​ໄດ້​ໄປ​ຊົມ ແລະ ກໍ​ມີ​ຄວາມ​ປະ​ທັບ​ໃຈ​ນຳ​ການ​ປ່ອຍ​ຍານ​ດັ່ງ​ກ່າວ. ພຸດ​ທະ​ສອນ ມີ​ລາຍ​ງານ​ມາ​ສະ​ເໜີ​ທ່ານ​ໃນ​ອັນ​ດັບ​ຕໍ່​ໄປ.

ສະ​ຖາ​ນີ​ອະ​ວະ​ກາດ​ສາ​ກົນມີ​ຕົ້ນ​ກຳ​ເນີດ​ມາ​ແຕ່​ປີ 1984 ເວ​ລາ​ທີ່​ປະ​ທາ​ນາ​ທິ​ບໍ​ດີ ສະ​ຫະ​ລັດ ທ່ານ ໂຣ​ໂນ​ລ ເຣ​ແກ​ນ ໄດ້​ໃຫ້​ການ​ອະ​ນຸ​ມັດ ແລະ ລັດ​ຖະ​ສະ​ພາ ສະ​ຫະ​ລັດ ກໍໄດ້​ຈັດສັນ​ງົບ​ປະ​ມານ​ໃຫ້​ໃນ​ປີ​ດັ່ງ​ກ່າວ. ໂຄງ​ການ​ສະ​ຖາ​ນີ​ອະ​ວະ​ກາດ​ສາ​ກົນ​ໄດ້​ຮັບ​ການ​ຮ່ວມ​ມື​ຈາກຫຼາຍ​ປະ​ເທດ​ໄດ້​ແກ່ ກ​າ​ນາ​ດາ, ຍີ່​ປຸ່ນ ແລະ ຫຼາຍ​ປະ​ເທດ​ອົງ​ການ​ອະ​ວະ​ກາດ ຢູ​ໂຣບ, ອີງ​ຕາມ​ເວັບ​ໄຊ້​ຂອງ​ອົງ​ການ NASA.

ເຂົາ​ເຈົ້າ​ໄດ້​ກ່າວ​ວ່າ​ສະ​ຖາ​ນີ ອະ​ວະ​ກາດ​ຖືກ​ອອກ​ແບບ​ໃນ​ລະ​ຫວ່າງ​ປີ 1984 ແລະ 1993. ສະ​ຖາ​ນີ​ອະ​ວະ​ກາດ​ສາ​ກົນ​ຖືກ​ປະ​ຕິ​ບັດ​ການ​ໂດຍ 5 ອົງ​ການ​ທີ່​ເປັນ​ຄູ່​ຮ່ວມ ຄື ອົງ​ການ​ອະ​ວະ​ກາດ​ສາ​ກົນ, ອົງ​ການ​ອະ​ວະ​ກາດ ຢູ​ໂຣບ, ອົງ​ການ​ສຳຫຼວດ​ອະ​ວະ​ກາດ ຍີ່​ປຸ່ນ, ອົງ​ການ​ການ​ບິນ ແລະ ອະ​ວະ​ການດ​ແຫ່ງ​ຊາດ ຫຼື NASA, ແລະ ບໍ​ລິ​ສັດອະ​ວະ​ກາດ​ລັດ​ຖະ​ບານ “Roscosmos,” ເຊິ່ງ​ຄູ່​ຮ່ວມ​ແຕ່​ລະ​ຝ່າຍ​ແມ່ນ​ຮັບ​ຜິດ​ຊອບ​ສຳ​ລັບ​ການ​ບໍ​ລິ​ຫານ ແລະ ຄວບຄຸມ​ເຄື່ອງ​ມືທີ່​ເຂົາ​ເຈົ້າ​ສະ​ໜອງ​ໃຫ້.

ນັບ​ຕັ້ງ​ແຕ່​ສະ​ຖາ​ນີ​ອະ​ວະ​ກາດ​ໄດ້​ເລີ່​ມ​ປະ​ຕິ​ບັດ​ການ, ນັກ​ບິນ​ອະ​ວະ​ກາດ 279 ຄົນ​ຈາກ 22 ປະ​ເທດ​ໄດ້​ເດີນ​ທາງ​ໄປ​ສະ​ຖາ​ນີ​ອະ​ວະ​ກາດ​ສາ​ກົນ. ການ​ປ່ອຍ​ຍານ​ອະ​ວະ​ກາດ​ສ່ວນຫຼາຍ​ແມ່ນ​ຖືກ​ປ່ອຍ​ຂຶ້ນ​ຢູ່​ໃນ ສະ​ຫະ​ລັດ.

ເມື່ອ​ວັນ​ທີ 5 ມິ​ຖຸ​ນາ​ທີ່​ຜ່ານ​ມາ ອົງ​ການ​ NASA ໄດ້​ປ່ອຍ​ຍານ​ອະ​ວະ​ກາດ Starliner ດ້ວຍ​ຈະຫຼວດ​ລຳ​ໃໝ່ Atlas V ອອກ​ຈາກ​ສະ​ຖາ​ນີກຳ​ລັງອະ​ວະ​ກາດ ເຄບ ຄາ​ນາ​ວາ​ຣອ​ລ ຢູ່​ລັດ ຟ​ລໍ​ຣິ​ດາ, ເຊິ່ງ​ເປັນ​ຄວາມ​ພະ​ຍາ​ຍາມ​ຄັ້ງ​ທີ​ສາມ ຫຼັງ​ຈາກ​ໄດ້​ປະ​ສົບ​ຄວາມ​ລົ້ມ​ແຫຼວ​ໃນ​ການ​ປ່ອຍ​ຂຶ້ນ​ສອງ​ຄັ້ງ​ກ່ອນ​ໜ້ານີ້.

ທ່ານ ກິ່ງ​ສະ​ຫວັນ, ຄົນ​ລາວ​ທີ່​ອາ​ໄສ​ຢູ່​ລັດ​ຟ​ລໍ​ຣິ​ດາ ໄດ້​ໄປ​ເບິ່ງ​ການ​ປ່ອຍ​ຍານ​ອະ​ວະ​ກາດ Starliner ແລະ ມີ​ຄວາມ​ຮູ້​ສຶກ​ຕື່ນ​ເຕັ້ນ ແລະ ປະ​ທັບ​ໃຈ​ກັບ​ການ​ປ່ອຍ​ຍານ​ດັ່ງ​ກ່າວ.

ທ່ານ ກິ່ງ​ສະ​ຫວັນ ກ່າວ​ວ່າ “ຂ້າ​ພະ​ເຈົ້າ​ຄິດ​ວ່າໃນ​ຊີ​ວິດ​ນຶ່ງ ມັນ​ເປັນ​ກຳ​ໄລ​ຊີ​ວິດ​ທີ່​ສຸດ​ທີ່​ມາ​ເຫັນ ເພາະ​ວ່າ​ຂ້າ​ພະ​ເຈົ້າ​ຢູ່ ຟ​ລໍ​ຣິ​ດາ ໄດ້​ຍ້າຍ​ມາ​ຢູ່​ໜີ້. ແລ້ວ​ກໍ​ໄດ້​ຖື​ໂອ​ກາດນີ້​ຕ້ອງ​ໄປ​ໃຫ້​ໄດ້​ ໄປ​ໃຫ້​ເຫັນ​ໃຫ້​ໄດ້​ເພາະ​ວ່າ​ຊາວ ອາ​ເມ​ຣິ​ກາ ຫຼາຍ​ຄົນ​ບໍ່​ສາ​ມາດ​ມາ​ເຖິງ, ມາ​ເຫັນ ມາ​ເບິ່ງ​ໄດ້ເພາະ​ວ່າ​ມັນ​ໄກ. ສອງ​ມາ​ແລ້ວ​ເຂົາ​ເຈົ້າ​ກະ​ລໍ​ຖ້າ​ເບິ່ງ​ແຕ່​ທາງ​ໂທ​ລະ​ທັດ. ການ​ເດີນ​ທາງ​ມາ​ເບິ່​ງ​ມັນ​ບໍ່​ໄດ້​ງ່າຍ​ໃດ, ຄັນ​ເຈົ້າ​ຢາກ​ມາ​ເບິ່ງ​ປະ​ຕິ​ທິນ​, ມື້​ໃດ, ເວ​ລາ​ໃດ. ເຈົ້າ​ຕ້ອງ​ໄດ້​ຂີ່​ເຮືອ​ບິນ​ມາ​ເບາະ, ຂັບ​ລົດ​ມາ​ເບາະ. ມາ​ຢູ່​ໂຮງ​ແຮມ, ມາ​ຖ້າ​ເບິ່ງ​ເພາະ​ສະ​ນັ້ນ​ມັນ​ມີ​ຄ່າ​ໃຊ້​ຈ່າຍຫຼາຍ​ຄັນ​ຊິ​ຕັ້ງ​ໃຈ​ມາ. ໂດຍ​ສະ​ເພາະ​ດຽວນີ້​ແມ່ນ​ລະ​ດູ​ຮ້ອນ, ກະ​ມີ​ນັກ​ທ່ອງ​ທ່ຽວ​ມາຫຼາຍ. ຄັນ​ເຂົາ​ເຈົ້າ​ມາ​ຖືກ​ເວ​ລາ​ກະ​ຖື​ວ່າເຂົາ​ເຈົ້າໂຊກ​ດີ.”

​ທ່ານ ກິ່ງ​ສະ​ຫວັນ ຄົນ​ລາວ​ທີ່​ອາ​ໄສ​ຢູ່​ລັດ ຟ​ລໍ​ຣິ​ດາ ຢືນ​ຖ່າຍ​ຮູບ​ຢູ່​ໜ້າ​ໂລ​ໂກ້​ອົງ​ການ NASA, ຫໍ​ພິ​ພິ​ທະ​ພັນ​ອະ​ວະ​ກາດ, ລັດ ຟ​ລໍ​ຣິ​ດາ.
​ທ່ານ ກິ່ງ​ສະ​ຫວັນ ຄົນ​ລາວ​ທີ່​ອາ​ໄສ​ຢູ່​ລັດ ຟ​ລໍ​ຣິ​ດາ ຢືນ​ຖ່າຍ​ຮູບ​ຢູ່​ໜ້າ​ໂລ​ໂກ້​ອົງ​ການ NASA, ຫໍ​ພິ​ພິ​ທະ​ພັນ​ອະ​ວະ​ກາດ, ລັດ ຟ​ລໍ​ຣິ​ດາ.

ການ​ປ່ອຍ​ຍານ​ອະ​ວະ​ກາດ​ໃນ​ລັດ​ຟ​ລໍ​ຣິ​ດາ​ແມ່ນ​ສາ​ມາດ​ຊົມ​ໄດ້​ແບບບໍ່​ເສຍ​ເງິນ ແລະ ເສຍ​ເງິນ. ແຕ່​ການ​ເສຍ​ເງິນນີ້ ​ທ່ານ​ຈະ​ໄດ້​ເຂົ້າ​ໄປ​ໃນ​ບໍ​ລິ​ເວນ​ຂອງ​ສູນ​ອະ​ວະ​ກາດ​ເຄັນ​ເນ​ດີ ແລະ ຢູ່​ໃນ​ບໍ​ລິ​ເວນ​ທີ່​ສາ​ມາດ​ຊົມ ແລະ ສຳ​ຜັດ​ການ​ບິນ​ຂຶ້ນ​ຂອງ​ຈະຫຼວດ​ໄດ້​ຢ່າງ​ໃກ້​ຊິດ.

ທ່ານ ກິ່ງສະ​ຫວັນ ກ່າວ​ວ່າ “ຂ້າ​ພະ​ເຈົ້າ​ໄດ້​ໄປ​ຕອນ​ທີ​ສາມ, ຕັ້ງ​ໃຈຂັບ​ລົດ​ອອກ​ຈາກ​ບ້ານ​ໄປ​ສອງ​ຊົ່ວ​ໂມງ. ໄປ ເຄບ​ ຄາ​ນາ​ວາ​ໂຣ​ລ Kennedy Space Center. ​ເວ​ລາ​ໄປ​ແລ້ວ​ເຮົາ​ຕ້ອງ​ໄດ້​ຊື້​ປີ້​ເຂົ້າ​ໄປ​ສອງ​ປີ້. ປີ້​ນຶ່ງ​ແມ່ນ​ສຳ​ລັບ​ໄປ​ເບິ່ງ​ຫໍ​ພິ​ພິ​ທະ​ພັນ ແລະ ອີກ​ປີ້​ນຶ່ງ​ຫັ້ນ 70 ໂດ​ລາ​ຫັ້ນ ແມ່ນ​ເຮົາ​ໄປ​ນັ່ງ​ຢູ່​ບ່ອນ​ທີ່​ເບິ່ງ​ເຂົາ​ເຈົ້າ​ຊິ​ສົ່ງ​ຍານ​ອະ​ວະ​ກາດ​ຫັ້ນ. ເຮົາ​ຕ້ອງ​ໄດ້​ຂີ່​ລົດ​ເມ​ອອກ​ຈາ​ກຫໍ​ພິ​ພິ​ທະ​ພັນ​ໄປ​ໄກ​ເຕີບ. ແລ້ວ​ກໍ​ໄປ​ລໍ​ຖ້າ​ຢູ່​ຫັ້ນ​ເປັນ​ຊົ່ວ​ໂມງ. ໄປ​ນັ່ງ​ຢູ່​ບ່ອນ​ເຂົາ​ເຈົ້າ​ໃຫ້​ນັ່ງ, ມັນ​ຢູ່​ຄົນ​ລະ​ຟາກ​ນ້ຳ. ບ່ອນ​ຍານ​ອະ​ວະ​ກາດ​ຢູ່​ຟາກ​ນ້ຳ​ນຶ່ງ ແລະ ເຮົາ​ກໍ​ຢູ່​ຟາກ​ນ້ຳ​ນຶ່ງ. ຊຶ່ງ​ຢູ່​ຫ່າງ​ກັນ​ປະ​ມານ 5 ໄມ​ປາຍ. ເວ​ລາ​ຢູ່​ຫັ້ນ​ໂຄ​ສົກ​ກະ​ມາ​ອະ​ທິ​ບາຍ​ເລື່ອງ​ຕ່າງໆ​ໃຫ້​ຟັງ. ແລ້ວ​ເຂົາ​ເຈົ້າ​ບອກວ່າ​ ເວ​ລາ​ທີ່​ຍານອ​ະ​ວະ​ກາດ​ຈູດ​ຂຶ້ນ ເຮົາ​ຈະ​ໄດ້​ຮັບ​ຄວາມ​ຮູ້​ສຶກ ຄວາມ​ສັ່ນ​ສະ​ເທືອນ​ຂອງ​ຍານ​ອະ​ວະ​ກາດ ເພາະ​ວ່າ​ມັນ​ດັງ​ແຮງ. ເຂົາ​ເຈົ້າ​ເຕືອນ​ລະ​ກະ​ເວ​ລາ​ນັ້ນ ຫຼາຍ​ຄົນ​ກະ​ໄດ້​ລໍ​ຖ້າ​ເນາະ. ນັບ​ຖອຍຫຼັງ ແຕ່​ກະ​ບໍ່​ຂຶ້ນ​ອີກ. ກະ​ພາ​ກັນ​ຜິດ​ຫວັງ​ເປັນ​ເທື່ອ​ທີ​ສາມ​ທີ​ສີ່​ລະ​ຫັ້ນ. ບັດ​ນີ້​ຕໍ່​ມາ​ເທື່ອ​ສຸດ​ທ້າຍ ຂ້າ​ພະ​ເຈົ້າ​ເວົ້າ​ວ່າ​ ຢ້ານ​ມັນ​ຊິບໍ່​ຂຶ້ນ​ອີກ​ແລ້ວ​ກະ​ເລີຍ​ວ່າ​ຈັ່ງ​ໃດ​ກະ​ໄປ ຊິ​ໄປ​ເບິ່ງ​ອີກ ແຕ່​ໄປ​ເທື່ອນີ້​ຂ້າ​ພ​ະ​ເຈົ້າ​ບໍ່​ໄດ້​ຊື້​ປີ້​ເຂົ້າ​ໄປ​ເບິ່ງ ແຕ່​ໄດ້​ໄປ​ຢືນ​ຢູ່​ແຄມ​ນ້ຳ​ກັບຫຼາຍ​ໆຄົນ. ແຕ່​ກະ​ໄດ້​ເຫັນ​ອີຫຼີ.”

ທ່ານ ກິ່ງ​ສະ​ຫວັນ ຖ່າຍ​ຮູບ​ກັບ​ນັກ​ບິນ​ອະ​ວະ​ກາດຢູ່​ຫໍ​ພິ​ພິ​ທະ​ພັນ.
ທ່ານ ກິ່ງ​ສະ​ຫວັນ ຖ່າຍ​ຮູບ​ກັບ​ນັກ​ບິນ​ອະ​ວະ​ກາດຢູ່​ຫໍ​ພິ​ພິ​ທະ​ພັນ.

ປະ​ຊາ​ຊົນ ອາ​ເມ​ຣິ​ກັນ ແມ່ນ​ມີ​ຄວາມ​ພາກ​ພູມ​ໃຈ​ກັບ​ຂະ​ແໜງ​ອະ​ວະ​ກາດ​ຂອງ​ເຂົາ​ເຈົ້າ, ເພາະ​ວ່າ​ເຂົາ​ເຈົ້າ​ເປັນ​ຜູ້​ນຳ​ໜ້າ​ໝູ່​ຢູ່​ໃນ​ໂລກ.

ທ້າວ ເຣ​ມັອນ ຈາກ​ເມືອງ ຮາ​ທ​ແລນ, ລັດ ມິ​ຊິ​ແກນ, ນັກ​ກິ​ລາ​ຍິ​ງ​ທະ​ນູ ອາ​ເມ​ຣິ​ກັນ ​ທີ່​ໄດ້​ໄປ​ຊົມ​ການ​ປ່ອຍ​ຍານ​ອະ​ວະ​ກາດ Boeing Starliner ໄດ້​ກ່າວ​ຕໍ່​ພວກ​ເຮົາ​ວ່າ ຂ້າ​ພະ​ເຂົ້າ​ມາ​ທີ່ນີ້​ເພື່ອ​ການ​ແຂ່ງ​ຂັນ​ຍິງ​ທະ​ນູ​ຊິງ​ແຊັ້ມ​ໂລກຢູ່​ເມືອງ ເດ​ໂທ​ນາ. ພວກ​ເຮົາ​ໄດ້​ຂີ່​ເຮືອ​ບິນ​ມາ​ທີ່ນີ້ ແລະ ຊິ​ຂັບ​ລົດ​ໄປ​ເມືອງ​ເດ​ໂທ​ນາ ແລະ ເຮົາ​ເຫັນ​ການ​ປ່ອຍ​ຍານ​ອະ​ວະ​ກາດ ແລະ ມັນ​ກໍ​ຄັກຫຼາຍ, ຂ້ອຍ​ໄດ້​ຖ່າຍ​ວິ​ດີໂອ​ໄວ້ ແລະ ຂ້ອຍ​ກໍ​ຈະ​ເກັບ​ມັນ​ໄວ້​ຕະຫຼອດ​ຊີ​ວິດ. ມັນ​ຄັກຫຼາຍ.”

ຍານ​ອະ​ວະ​ກາດ Starliner ມີ​ກຳ​ນົດ​ຈະ​ເດີນ​ທາງ​ກັບ​ລົງ​ມາ​ໂລກ​ໃນ​ວັນ​ທີ 26 ມິ​ຖຸ​ນານີ້.

ສະ​ຫະ​ລັດ ໄດ້​ປະ​ສົບຄວາມ​ສຳ​ເລັດໃນ​ການ​ສົ່ງ​ຄົນ​ຂຶ້ນ​ໄປ​ສະ​ຖາ​ນີ​ອະ​ວະ​ກາດ​ສາ​ກົນຫຼາຍ​ຄັ້ງ. ເຂົາ​ເຈົ້າ​ມີ​ຈະຫຼວດ ແລະ ຍານ​ອະ​ວະ​ກາດຫຼາຍ​ລຸ້ນ. ທັນ​ສະ​ໄໝ​ທີ່​ສຸດ​ຂອງຍານອະວະກາດ ກໍແມ່ນ​ຍານ​ຂອງ​ບໍ​ລິ​ສັດ SpaceX ທີ່ສາ​ມາດບິນກັບລົງ​ມາ​ຈອດ​ຢູ່​ຖານ​ຂອງ​ມັນ​ຄື​ເກົ່າ ແລະ ໝູນ​ໃຊ້​ໄດ້ຫຼາຍ​ຄັ້ງ. ຖ້າ​ຍານ​ອະ​ວະ​ກາດ Starliner ສາ​ມາດ​ນຳ​ເອົາ​ນັກ​ບິນ​ອະ​ວະ​ກາດ​ກັບ​ລົງ​ມາ​ໂລກ​ຄືນ​ໄດ້​ຢ່າງ​ສຳ​ເລັດ​ເຂົາ​ເຈົ້າ​ກໍ​ຈະ​ກາຍ​ເປັນ​ອີກ​ບໍ​ລິ​ສັດ​ນຶ່ງ ​ທີ່​ຈະ​ຖືກ​ນຳ​ໃຊ້​ເພື່ອ​ສົ່ງ​ຄົນ​ຂຶ້ນ​ໄປ​ສະ​ຖາ​ນີ​ອະ​ວະ​ກາດ​ສາ​ກົນ​ໃນ​ອະ​ນາ​ຄົດ.

ຟໍຣັມສະແດງຄວາມຄິດເຫັນ

XS
SM
MD
LG