ປະທານາທິບໍດີ ສະຫະລັດ ທ່ານ ໂຈ ໄບເດັນ ໄດ້ສົນທະນາກັບນາຍົກລັດຖະມົນຕີຂອງເອທິໂອ ເປຍ ທ່ານ ອາບີ ອາເມັດ ໃນມື້ວັນຈັນວານນີ້, ໂດຍໄດ້ສະແດງຄວາມກັງວົນ ກ່ຽວກັບສົງຄາມທີ່ຕໍ່ ເນື່ອງພາຍໃນປະເທດ ແລະການໂຈມຕີທາງອາກາດຄັ້ງຫຼ້າສຸດ ອັນໄດ້ສັງຫານພົນລະເຮືອນໄປ ຫຼາຍສິບຄົນຢູ່ໃນບໍລິເວນຂົງເຂດ ທິເກຣ.
ທໍານຽບຂາວກ່າວວ່າ ຜູ້ນໍາຂອງທັງສອງປະເທດ “ໄດ້ຫາລືເຖິງວິທີການເຈລະຈາໃຫ້ໄວຂຶ້ນກ່ຽວ ກັບການເຈລະຈາການຢຸດຍິງ” ຫຼັງຊ່ວງເວລານຶ່ງປີແຫ່ງສົງຄາມກາງເມືອງພາຍໃນປະເທດ ອັນໄດ້ເຮັດໃຫ້ມີຜູ້ເສຍຊີວິກຫຼາຍພັນຄົນ ແລະ ເຮັດໃຫ້ປະຊາຊົນຫຼາຍກວ່າ 2 ລ້ານຄົນຈໍາເປັນຕ້ອງໄດ້ຫລົບໜີຈາກເຮືອນຊານຂອງພວກເຂົາເຈົ້າ.
ທໍານຽບຂາວ ກ່າວວ່າ ທ່ານ ໄບເດັນ ໄດ້ເນັ້ນຢໍ້າເຖິງ “ຄວາມຮີບດ່ວນໃນການປັບປຸງການເຂົ້າເຖິງດ້ານມະນຸດສະທໍາໄປທົ່ວປະເທດ ເອທິໂອເປຍ, ແລະຄວາມຈໍາເປັນໃນການແກ້ໄຂຄວາມກັງວົນທາງດ້ານສິດທິມະນຸດຂອງຊາວ ເອທິໂອເປຍ ທັງໝົດທີ່ໄດ້ຮັບຜົນກະທົບ, ລວມເຖິງຄວາມກັງວົນ ກ່ຽວກັບ ການຈັບກຸມຄຸມຂັງປະຊາຊົນຊາວ ເອທິໂອເປຍ ພາຍໃຕ້ພາວະສຸກເສີນຂອງລັດຖະ ບານ.”
ລັດຖະບານຂອງທ່ານ ໄບເດັນ ບໍ່ໄດ້ໃຫ້ລາຍລະອຽດໃດໆ ກ່ຽວກັບ ປະຕິກິລິຍາຂອງທ່ານ ອາບີ ຕໍ່ຄວາມເປັນຫ່ວງຂອງຜູ້ນໍາ ສະຫະລັດ.
ຢູ່ໃນຖະແຫຼງການກ່ຽວກັບການໂທລະສັບຂອງທໍານຽບຂາວ ທ່ານ ໄບເດັນ “ໄດ້ສະແດງຄວາມເປັນຫ່ວງວ່າຄວາມເປັນປໍລະປັກທີ່ຍັງດຳເນີນຢູ່ຕໍ່ມາຮວມທັງການໂຈມຕີທາງອາກາດເມື່ອໄວໆມານີ້ ຍັງສືບຕໍ່ເຮັດໃຫ້ພົນລະເຮືອນບາດເຈັບລົ້ມຕາຍ ແລະໄດ້ຮັບຄວາມທຸກທໍລະມານ ແລະທ່ານໄດ້ກ່າວຢ້ຳເຖິງຄວາມໝັ້ນໝາຍຂອງ ສະຫະລັດ ທີ່ຈະເຮັດວຽກຮວມກັບສະຫະພາບ ອາຟຣິກາ ແລະ ຄູ່ຮ່ວມງານຢູ່ໃນຂົງເຂດເພື່ອຊ່ວຍຊາວ ເອທິໂອເປຍ ແກ້ໄຂບັນຫາຂັດແຍ້ງດ້ວຍສັນຕິວິທີ.”
ທຳນຽບຂາວກ່າວວ່າ “ພວກຜູ້ນຳທັງສອງຍັງໄດ້ກ່າວຢ້ຳ ເຖິງຄວາມສຳຄັນໃນຄວາມສຳພັນລະຫວ່າງ ສະຫະລັດ ກັບ ເອທິໂອເປຍ ຄວາມເປັນໄປໄດ້ໃນການທີ່ຈະເສີມຂະຫຍາຍການຮ່ວມມືກ່ຽວກັບບັນຫາຕ່າງໆ ແລະ ຄວາມຈຳເປັນໃນການສ້າງຄວາມກ້າວໜ້າຢ່າງໜັກແໜ້ນເພື່ອແກ້ໄຂບັນຫາຂັດແຍ້ງ.”
ທ່ານ ໄບເດັນ ໄດ້ໂທລະສັບດັ່ງກ່າວມີຂຶ້ນ ໃນຂະນະທີ່ບັນດາອົງການໃຫ້ຄວາມຊ່ວຍເຫຼືອໄດ້ຢຸດການປະຕິບັດງານໃນເຂດ ທິເກຣ ທາງພາກຕາເວັນຕົກສຽງເໜືອຂອງເອທິໂອເປຍໃກ້ຊາຍແດນຂອງ ເອຣິເທຣຍ ຫຼັງຈາກໄດ້ມີການໂຈມຕີທາງອາກາດໃນແລງວັນສຸກແລ້ວ ທີ່ເຮັດໃຫ້ອົບພະຍົບພົນລະເຮືອນທີ່ຍົກຍ້າຍຖິ່ນຖານຍ້ອນບັນຫາຂັດແຍ້ງ 56 ຄົນເສຍຊີວິດແລະ ອີກ 30 ຄົນບາດເຈັບ.
