ເບຍເປັນເຄື່ອງດື່ມມຶນເມົາແຕ່ມີຜູ້ບໍລິໂພກຢ່າງຫຼວງຫຼາຍໃນທົ່ວໂລກ. ໃນ ສະຫະລັດ, ການບໍລິໂພກເບຍແມ່ນໄດ້ເພີ່ມຂຶ້ນຢ່າງຕໍ່ເນື່ອງໃນແຕ່ລະປີ ເຖິງແມ່ນປັດຈຸບັນນີ້ ພາວະເງິນເຟີ້ຈະເຮັດໃຫ້ລາຄາສູງຂຶ້ນກໍຕາມ. ແຕ່ສຳລັບຢູ່ປະເທດລາວ, ເຊິ່ງແມ່ນປະເທດນຶ່ງທີ່ຜະລິດເບຍຫຼາຍນັ້ນ, ວິກິດການດ້ານເສດຖະກິດດັ່ງກ່າວ ກໍເບິ່ງຄືວ່າ ຈະບໍ່ເປັນອຸປະສັກຕໍ່ການດື່ມເບຍພໍປານໃດ?
ເບຍທີ່ມີຊື່ສຽງທີ່ສຸດໃນ ສະຫະລັດ ແມ່ນເບຍ ໂຄໂຣນາ ແລະ ບັດ ໄລທ໌, ເຊິ່ງມີຜູ້ບໍລິໂພກສູງທີ່ສຸດຕໍ່ຫົວຄົນຢູ່ໃນປະເທດ, ອີງຕາມການສຳຫຼວດຂອງເວັບໄຊ້ Statistic.com ຈາກການສຳຫຼວດທາງອອນໄລນ໌ຕໍ່ຜູ້ຕອບຄຳຖາມອາຍຸ 21 ປີຫາ 64 ປີ. ກົດໝາຍ ສະຫະລັດ ອະນຸຍາດໃຫ້ປະຊາຊົນ ອາເມຣິກັນ ທີ່ມີອາຍຸ 21 ປີຂຶ້ນໄປ ສາມາດຊື້ແລະດື່ມເບຍ ແລະ ຂອງມຶນເມົາອື່ນໆໄດ້.
ຄົນ ອາເມຣິກັນ ມັກດື່ມເບຍເວລາທີ່ເຂົາເຈົ້າໄປຊົມການແຂ່ງຂັນກິລາ ແລະ ເວລາທີ່ມີການຊຸມແຊວກັບໝູ່ເພື່ອນຢູ່ບ້ານ ພ້ອມທັງຮ້ານກິນດື່ມທັງຫຼາຍ ທີ່ເອີ້ນວ່າ ບາຣນັ້ນ. ແຕ່ບາງຄົນກໍມັກດື່ມຄົນດຽວເພື່ອເປັນການຜ່ອຍຄາຍຄວາມຄຽດຫຼັງຈາກເລີກວຽກ ຫຼື ວັນທ້າຍອາທິດ.
ລາຄາເບຍໃນເມື່ອກ່ອນແມ່ນສາມາດຊື້ໄດ້ຢ່າງສະບາຍ ເຊິ່ງແພັກນຶ່ງ 6 ແກ້ວມີລາຄາ 7 ຫາ 8 ໂດລາ ກ່ອນໂຣກລະບາດໂຄວິດ 19. ແຕ່ຫຼັງຈາກໂຣກລະບາດ ແລະ ເກີດພາວະເງິນເຟີ້ມັນໄດ້ກາຍເປັນສິ່ງທີ່ຕ້ອງພິຈາລະນາກ່ອນຊື້ສຳລັບຫຼາຍຄົນ. ໃນປີ 2024 ລາຄາສິນຄ້າແມ່ນໄດ້ເພີ່ມຂຶ້ນຢ່າງຫຼວງຫຼາຍ ເຮັດໃຫ້ຫຼາຍຄົວເຮືອນຕ້ອງດີ້ນຮົນເອົາຕົວລອດ, ການຊື້ເບຍມາດື່ມແມ່ນໄດ້ເປັນສິ່ງທີ່ມີລາຄາແພງ. ປັດຈຸບັນນີ້ເບຍແພັກລະ 6 ແກ້ວແມ່ນ 11 ໂດລາ ຫາ 14 ໂດລາ.
ທ່ານ ວິຣັດ ຄົນລາວທີ່ອາໄສຢູ່ ລັດ ເວີຈິເນຍ ກ່າວວ່າ “ດຽວນີ້ຂ້ອຍຊື້ເບຍໜ້ອຍລົງກວ່າເກົ່າ, ປົກກະຕິແລ້ວຂ້ອຍກໍບໍ່ໄດ້ກິນບາຍຫຼາຍຄືແຕ່ກີ້ແລ້ວ. ຂ້ອຍຫັນມາດື່ມເຫຼົ້າໄວນ໌ ແລະ ເຫຼົ້າຄັອກເທວທີ່ເມຍຂອງຂ້ອຍຊື້ຢູ່ຮ້ານມາໄວ້. ຂ້ອຍບໍ່ຮູ້ວ່າດຽວລາຄາເບຍມັນຂຶ້ນສູງຫຼາຍຊ່ຳໃດແລ້ວ.”
ສ່ວນຢູ່ໃນປະເທດ ລາວ, ການດື່ມເບຍກໍໄດ້ຮັບຄວາມນິຍົມຫຼາຍທີ່ສຸດ. ເບຍລາວ ເປັນເບຍອັນດັບນຶ່ງໃນປະເທດ ແລະ ຕະຫຼາດເບຍໃນ ລາວ ກໍໄດ້ເຕີບໂຕຢ່າງຫຼວງຫຼາຍໃນບໍ່ເທົ່າໃດປີທີ່ຜ່ານມາ ນອກຈາກເບຍລາວ ແລ້ວ ກໍຍັງມີເບຍຕ່າງປະເທດອື່ນໆ ເຊັ່ງ Heineken ແລະ Carlsberg ເປັນຕົ້ນ.
ເບຍລາວເປັນບໍລິສັດລັດວິສາຫະກິດທີ່ໃຫຍ່ທີ່ສຸດໃນລາວ ແລະ ກໍເປັນບໍລິສັດດຽວທີ່ຄອບງຳຕະຫຼາດເບຍໃນປະເທດ. ນັບຕັ້ງແຕ່ການກໍ່ຕັ້ງ ໃນປີ 1973, ເຂົາເຈົ້າໄດ້ເຕີບໃຫຍ່ຂະຫຍາຍຄົວຢ່າງຕໍ່ເນື່ອງ, ຈາກການຜະລິດເບຍພຽງຣົດຊາດດຽວ ແຕ່ຕອນທຳອິດ, ດຽວນີ້ ບໍລິສັດດັ່ງກ່າວແມ່ນໄດ້ຜະລິດຫຼາຍຊະນິດ ເຊິ່ງເດັ່ນກວ່າໝູ່ ກໍແມ່ນເບຍລາວ ລາເກີ, ເຊິ່ງແມ່ນເບຍດັ້ງເດີມ, ແລ້ວກໍມີເບຍດຳ, ເບຍໂກລດ໌, ເບຍ IPA ແລະ ຫຼ້າສຸດແມ່ນເບຍລາວ ກຣີນ ທີ່ອອກວາງຂາຍໃນຕະຫຼາດເມື່ອປີ 2023.
ລາຄາເບຍລາວເມື່ອກ່ອນແມ່ນມີລາຄາທີ່ບໍ່ແພງ, ແຕ່ຫຼັງຈາກເກີດໂຣກລະບາດ ແລະ ພາວະເງິນເຟີ້, ລາຄາເບຍລາວແມ່ນໄດ້ຂຶ້ນລາຄາສູງກວ່າທົບນຶ່ງ.
ທ່ານ ສັນຕິ ຄົນລາວທີ່ມັກດື່ມເບຍເປັນປະຈຳໄດ້ກ່າວ ກ່ຽວກັບ ການບໍລິໂພກເບຍໃນລາວຕໍ່ພວກເຮົາ ວ່າ “ລັງນຶ່ງມັນມີ 12 ແກ້ວເນາະ. ລັງນຶ່ງປະມານ 220,000 ກີບ. ສ່ວນຫຼາຍຊື້ເປັນລັງ, ຊື້ກິນນະ. ຖ້າເຮົາຊື້ເປັນແກ້ວນິ, ແກ້ວນຶ່ງຢູ່ຮ້ານກະປະມານ 25,000 ກີບ. ຖ້າວ່າ ເຮົາທຽບໃສ່ຕອນທີ່ວ່າ ບໍ່ທັນມີເງິນເຟີ້ເນາະ ກະຊິຖືກຢູ່ລັງນຶ່ງ 95,000 ຫຼືວ່າ 96,000 ນີ້ແຫຼະເນາະ. ແຕ່ຫຼັງຈາກທີ່ວ່າ ເງິນເຟີ້ຂຶ້ນມານີ້ ຂຶ້ນມາຫຼາຍກວ່າທົບແລ້ວ ປະມານສອງແສນປາຍ. ແລະກະຫວັງວ່າ ຊິເພີ່ມຂຶ້ນອີກເນາະ ຍ້ອນວ່າມີອາກອນມູນຄ່າເພີ່ມມາເດະ, 10 ເປີເຊັນຫັ້ນ. ເບຍລາວກະຊິເພີ່ມຂຶ້ນອີກ 10 ເປີເຊັນຕາມລາຄາ.”
ເຖິງແມ່ນຈະມີການຕຳໜິ ກ່ຽວກັບລາຄາເບຍທີ່ເພີ່ມຂຶ້ນສູງນັ້ນ, ບໍລິສັດເບຍລາວ ກໍບໍ່ມີທ່າທີວ່າ ຈະຫຼຸດລາຄາລົງໃນອະນາຄົດ, ເຊິ່ງບໍລິສັດເບຍລາວເປັນຜູ້ຄອງຕະຫຼາດ ແລະ ເບຍຕ່າງປະເທດກໍບໍ່ສາມາດເຂົ້າມາແຂ່ງຂັນກັບເບຍລາວໄດ້.
ຂໍ້ມູນທີ່ຖືກບັນທຶກໃນປີ 2018 ໂດຍເວັບໄຊ້ Statista ລະບຸວ່າ ການບໍລິໂພກເຫຼົ້າ ຫຼື ຂອງມຶນເມົາໃນປະເທດ ລາວ ແມ່ນປະມານ 10.7 ລິດຕໍ່ຄົນຕໍ່ປີ. ເພີ່ມຂຶ້ນຈາກປະມານ 4.4 ລິດໃນປີ 2005. ແນວໃດກໍຕາມ, ທ່າມກາງວິກິດການພາວະເງິນເຟີ້ນີ້, ຄົນລາວກໍໄດ້ຫຼຸດການດື່ມລົງ ຫຼື ຫາເບຍທີ່ມີລາຄາຖືກກວ່າ.
ທ່ານ ສັນຕິ ກ່າວວ່າ “ສ່ວນໃຫຍ່ກໍຍັງສືບຕໍ່ກິນເບຍປົກກະຕິ. ຄືພາກໃຕ້ເຮົານີ້ມັນຈະມີເບຍ ຫວຽດນາມ ນຳເຂົ້າມາຫັ້ນນະ ເປັນກະປ໋ອງ ເປັນຫຍັງມີລາຄາທີ່ຍ່ອມເຍົາ ຫຼືວ່າເບຍຊະນິດອື່ນ ທີ່ວ່າເປັນຄູ່ແຂ່ງເນາະ. ເບຍນ້ຳຂອງບໍ່ ເບຍແມ່ນຫຍັງຕ່າງໆນີ້ ມັນກະລາຄາບໍ່ແພງຫັ້ນນະ. ເຂົາກະຊິສືບຕໍ່ກິນຄືເກົ່າຫັ້ນແຫຼະ ແຕ່ວ່າອາດຈະປ່ຽນຊະນິດເບຍກິນຫັ້ນນະ. ແຕ່ວ່າກະຊິໄດ້ຫຼຸດປະລິມານລົງເນາະ ແຕ່ວ່າ ເຮົາກະຊິເລືອກກິນສະເພາະແຕ່ວ່າ ມັນຈຳເປັນຈຳເປັນບໍ່ ຊີ້ນະ. ອາດຊິບໍ່ຕໍ່ເນື່ອງ ອາດຊິດົນໆເທື່ອນຶ່ງ. ເດືອນນຶ່ງເທື່ອນຶ່ງ, ສອງເທື່ອຈັ່ງຊີ້ເນາະຕາມກຳລັງຊັບເຮົາມີຫັ້ນແຫຼະ.”
ການບໍລິໂພກເບຍຢ່າງຫຼວງຫຼາຍຂອງຄົນລາວໄດ້ເຮັດໃຫ້ປະເທດເພື່ອນບ້ານພາກັນຕົກໃຈ, ເຊິ່ງເມື່ອວັນທີ 7 ພຶດສະພາທີ່ຜ່ານມານັກຂ່າວໄທສອງທ່ານ ໃນລາຍການບອກຂ່າວເລົ່າສິບ ໄດ້ເວົ້າເຖິງການດື່ມເບຍຂອງຄົນລາວ ວ່າ “ເວລາເຂົາກິນເບຍກັນນີ້ ເຂົາບໍ່ໄດ້ກິດເປັນແກ້ວ ເຂົາກິນເປັນລັງ ຜູ້ຍິງເຕັມ ໂຕະເລີຍ ຢູ່ດ້ານຂ້າງຫັ້ນແມ່ນລັງເບຍກອງກັນເປັນລັງໆຂຶ້ນເລີຍ ເອື້ອຍເຫັນ ກັບຕາເລີຍ ແລ້ວກະຕົກໃຈ.”
ແຕ່ເນື່ອງຈາກວ່າຄົນລາວເປັນຄົນມັກມ່ວນ, ການຊຸມແຊວກັນແມ່ນຫຼີກລ່ຽງໄດ້ຍາກ ໂດຍສະເພາະແມ່ນຜູ້ທີ່ມີໝູ່ຫຼາຍ. ແມ່ຄ້າຄົນນຶ່ງໃນນະຄອນຫຼວງວຽງຈັນໄດ້ໃຫ້ຄຳເຫັນຕໍ່ພວກເຮົາທາງຂໍ້ຄວາມ ກ່ຽວກັບ ການຂາຍເບຍຢູ່ຮ້ານຂອງລາວວ່າ ຍັງຢູ່ໃນລະດັບເກົ່າຖ້າບໍ່ຫຼາຍຂຶ້ນ. ແຕ່ແນ່ນອນແມ່ນບໍ່ໄດ້ຫຼຸດລົງ, ໂດຍສະເພາະໃນໄລຍະບຸນປີໃໝ່ລາວທີ່ຜ່ານມາ ເບຍລາວແມ່ນໄດ້ຂາຍດີເປັນພິເສດ, ມື້ນຶ່ງໄດ້ຂາຍ 20 ລັງຂຶ້ນໄປ. ແຕ່ລະຄັ້ງຈະມີຄົນມາຊື້ 2 ຫາ 5 ລັງ, ໃນຂະນະທີ່ຮ້ານຂອງລາວຕັ້ງຢູ່ໃນບໍລິເວນທີ່ບໍ່ເປັນຈຸດທີ່ມີຄົນຫຼາຍປານໃດ. ຖ້າເປັນຈຸດທີ່ຢູ່ໃນເມືອງ ບ່ອນທີ່ມີການຊຸມແຊວກັນຫຼາຍກຸ່ມຢູ່ນຳກັນຄືຢູ່ຕາມແຄມທາງນັ້ນ ການຂາຍແມ່ນຄົງຈະບໍ່ຫຼຸດ 50 ລັງຕໍ່ມື້.
ແມ່ຄ້າຄົນດັ່ງກ່າວເວົ້າວ່າເບຍຢູ່ຮ້ານຂອງລາວແມ່ນຂາຍດີ ຕາມຫຼັງນ້ຳດື່ມບໍລິສຸດພຽງເທົ່ານັ້ນ.
ຟໍຣັມສະແດງຄວາມຄິດເຫັນ