ລິ້ງ ສຳຫລັບເຂົ້າຫາ

logo-print

ອົງການນິລະໂທດກຳ ກ່າວວ່າ ບໍລິສັດຜະລິດຢາ ບໍ່ໄດ້ສະໜອງຢາວັກຊີນ ກັນໂຄວິດ ພຽງພໍ ແກ່ບັນດາປະເທດທຸກຍາກ


ພວກຜູ້ຊາຍເຜົ່າ ມາອາໄຊ (Maasai) ລຽນແຖວເພື່ອສັກຢາວັກຊີນກັນໄວຣັສໂຄໂຣນາຂອງ AstraZeneca ໂດຍທີ່ແມ່ຍິງຄົນນຶ່ງໄດ້ຮັບການສັກຢາວັກຊີນ ຢູ່ທີ່ຄລີນິກ ແຫ່ງນຶ່ງໃນເມືອງ ຄີມານາ (Kimana) ທາງພາກໃຕ້ຂອງເຄັນຢາ, ວັນທີ 28 ສິງຫາ 2021.

ອົງການນິລະໂທດກຳສາກົນ ຫຼື Amnesty International ກ່າວຫາບັນດາບໍລິສັດຜະລິດຢາ ທີ່ນຳໜ້າຂອງໂລກໃນການສ້າງ “ວິກິດການດ້ານສິດທິມະນຸດທີ່ບໍ່ເຄີຍມີມາກ່ອນ” ໂດຍບໍ່ສະໜອງຢາວັກຊີນກັນໂຄວິດ-19 ພຽງພໍແກ່ປະເທດທີ່ທຸກຍາກທັງຫຼາຍຂອງໂລກ.

ໃນບົດລາຍງານສະບັບນຶ່ງທີ່ນຳອອກເຜີຍແຜ່ວັນພຸດວານນີ້ ກຸ່ມປົກປ້ອງສິດທິມະນຸດດັ່ງກ່າວ ກ່າວວ່າ ບໍລິສັດອາສຕຣາເຊເນກາ, ຈອນສັນແລະຈອນສັນ, ໂມເດີນາ, ໂນວາແວັກສ໌ ແລະບໍລິສັດຄູ່ຮ່ວມງານ ຟາຍເຊີຣແລະບາຍໂອເອັນເທັກ “ບໍ່ສາມາດທີ່ຈະປະຕິບັດຕາມຄວາມຮັບຜິດຊອບ ດ້ານສິດທິມະນຸດຂອງເຂົາເຈົ້າ” ໂດຍການປະຕິເສດທີ່ຈະເຂົ້າຮ່ວມໃນໂຄງການລິເລີ້ມແບ່ງປັນຢາວັກຊີນແລະແບ່ງປັນເທັກໂນໂລຈີຢາວັກຊີນໃນທົ່ວໂລກ ຊຶ່ງຕົນສາມາດສະຫຼະສິດດ້ານສິດທິຊັບສິນທາງປັນຍາຂອງພວກເຂົາ.

ອົງການນິລະໂທດກຳ ກ່າວວ່າ ພຽງແຕ່ “ໜ້ອຍດຽວ” 0.3 ເປີເຊັນຂອງຢາວັກຊີນກັນໂຄວິດ 5 ພັນ 76 ຮ້ອຍລ້ານໂດສ ໄດ້ຖືກແຈກຢາຍໄປໃຫ້ພວກປະເທດທີ່ມີລາຍໄດ້ຕ່ຳໃນທົ່ວໂລກ ໃນຂະນະດຽວກັນ 79 ເປີເຊັນໄດ້ສົ່ງໄປໃຫ້ພວກປະເທດທີ່ມີລາຍໄດ້ຂັ້ນກາງຂຶ້ນໄປແລະຂັ້ນສູງ. ອົງການນີ້ກ່າວວ່າ ຄວາມບໍ່ສະເໝີພາບເປັນ “ແຮງກົດດັນເຮັດໃຫ້ລະບົບສາທາລະນະສຸກທັງຫຼາຍ ອ່ອນແອລົງສູ່ຂັ້ນລົ້ມແຫຼວແລະເຮັດໃຫ້ມີການເສຍຊີວິດຫຼາຍໝື່ນຄົນໃນແຕ່ລະອາທິດຊຶ່ງການຕາຍນີ້ອາດຈະສາມາດຫຼີກເວັ້ນໄດ້” ໂດຍສະເພາະໃນບາງເຂດຂອງອາເມຣິກາລາຕິນ, ອາຟຣິກາ ແລະເອເຊຍ.

ອົງການດັ່ງກ່າວ ກ່າວວ່າ ບໍລິສັດຟາຍເຊີ, ບາຍໂອເອັນເທັກ ແລະໂມເດີນາ ພຽງລຳພັງແມ່ນຄາດວ່າ ຈະສ້າງລາຍໄດ້ເຖິງ 130 ຕື້ໂດລາລວມທັງໝົດພາຍໃນທ້າຍປີ 2022.

“ຜົນກໍາໄລບໍ່ຄວນມາກ່ອນຊີວິດຄົນຢ່າງເດັດຂາດ” ນັ້ນແມ່ນຄໍາເວົ້າຂອງທ່ານນາງ ແອັກເນັສ ຄາລລາມາດ (Agnes Callamard) ເລຂາທິການໃຫຍ່ຂອງອົງການິລະໂທດກຳສາກົນ.

ອົງການນິລະໂທດກຳ ຮຽກຮ້ອງຕໍ່ລັດຖະບານທັງຫຼາຍແລະບັນດາບໍລິສັດຜະລິດຢາໃຫ້ນຳສົ່ງຢາວັກຊີນກັນໂຄວິດ-19 2 ຕື້ໂດສໄປໃຫ້ພວກປະເທດທີ່ມີລາຍໄດ້ຕ່ຳຫາປານກາງໃນທັນທີເພື່ອປະຕິບັດຕາມເປົ້າໝາຍຂອງອົງການສະຫະປະຊາຊາດ ໃນການສັກຢາວັກຊີນກັນໂຄວິດ-19 ແກ່ປະຊາກອນຂອງປະເທດເຫຼົ່ານັ້ນ ໃຫ້ໄດ້ເຖິງ 40 ເປີເຊັນພາຍໃນທ້າຍປີນີ້.

ບົດລາຍງານນີ້ ໄດ້ນຳອອກເຜີຍແຜ່ກ່ອນໜ້າກອງປະຊຸມສຸດຍອດທາງອອນໄລຂອງທ່ານໂຈ ໄບເດັນ ປະທານາທິບໍດີສະຫະລັດ ທີ່ໄດ້ຈັດຂຶ້ນຮ່ວມກັບກອງປະຊຸມສະມັດຊາໃຫຍ່ຂອງອົງການສະຫະປະຊາຊາດ ໃນອາທິດນີ້. ທ່ານໄບເດັນ ຄາດວ່າ ຈະປະກາດເປົ້າໝາຍ ການສັກຢາວັກຊີນໃນທົ່ວໂລກ ໃຫ້ໄດ້ 70 ເປີເຊັນ ພ້ອມກັນນັ້ນ ຈະຊື້ຢາວັກຊີນຂອງຟາຍເຊີ ສອງເຂັມຕື່ມອີກ 500 ລ້ານໂດສ ໂດຍຈະນຳເອົາການບໍລິຈາກລວມທັງໝົດຂອງສະຫະລັດ ຫຼາຍກວ່າ 1 ພັນ 1 ຮ້ອຍລ້ານໂດສ.

ອ່ານຂ່າວນີ້ຕື່ມ ເປັນພາສາອັງກິດ

ເບິ່ງຄວາມເຫັນ

ທ່ານອາດຈະມັກເລື້ອງນີ້ຄືກັນ

XS
SM
MD
LG