ລິ້ງ ສຳຫລັບເຂົ້າຫາ

logo-print

ອາເມຣິກາ ລະນຶກເຖິງວັນ ຄົບຮອບ 20 ປີ ຂອງການໂຈມຕີ ເມື່ອວັນທີ 11 ກັນຍາ ໃນຂະນະທີ່ ປ. ໄບເດັນ ຫາທາງປິດສາກເຫດການນີ້


ທ່ານນາງເຈນ ຣາເມຍເຣສ, ຫົວໜ້າກຳກັບຫໍພິພິທະພັນ ຢູ່ທີ່ອະນຸສອນສະຖານແລະພິພິທະພັນ 9/11, ພວມໄຈ້ເບິ່ງບັດທັງຫຼາຍທີ່ຂຽນສະແດງຄວາມເສຍໃຈ ແກ່ຜູ້ເຄາະຮ້າຍ ໃນເຫດການໂຈມຕີກໍ່ການຮ້າຍ ໃນວັນທີ11 ກັນຍາ ຊຶ່ງໄດ້ຖືກບໍລິຈາກໃຫ້ຫໍພິພິທະພັນເພື່ອເກັບສະສົມໄວ້, ວັນທີ 16 ກໍລະກົດ 2021, ໃນນະຄອນນິວເຈີຊີ, ລັດນິວເຈີຊີ.

ຄວາມໜ້າຢ້ານຂອງວັນທີ 11 ກັນຍາ 2001 ໄດ້ຖືກເປີດເຜີຍອອກມາພາຍໃນພຽງ 102 ນາທີ. ໃນວັນດັ່ງກ່າວ ມີ 2,996 ຄົນໄດ້ເສຍຊີວິດຍ້ອນການໂຈມຕີທີ່ຮ້າຍແຮງສຸດຂອງພວກກໍ່ການຮ້າຍ ໃນປະຫວັດສາດຍຸກໃໝ່ຂອງສະຫະລັດ.

ສິ່ງທີ່ຕິດຕາມມາກໍແມ່ນ 19 ປີ ກັບ 10 ເດືອນ 3 ອາທິດ ແລະ 2 ວັນຂອງສົງຄາມໃນອັຟການິສຖານ ໂດຍກະຊວງປ້ອງກັນປະເທດຊຶ່ງມີທະຫານອາເມຣິກັນ ຢ່າງໜ້ອຍ 2,325 ຄົນ ທີ່ໄດ້ເສຍຊີວິດ. ບໍ່ມີໃຜຮູ້ເລີຍວ່າ ພົນລະເຮືອນຫຼາຍຊ່ຳໃດທີ່ໄດ້ຖືກຂ້າຕາຍ.

ໃນວັນທີ 11 ກັນຍາ 2021 ນີ້ ປະທານາທິບໍດີ ໂຈ ໄບເດັນ ພະຍາຍາມຈະເນັ້ນຢ້ຳເຖິງໂສກນາດຕະກຳທັງສອງຢ່າງດ້ວຍການໄປສະແດງຄວາມຄຳນັບຕໍ່ສະຖານທີ່ 3 ແຫ່ງ ຊຶ່ງຄວາມທຸກທໍລະມານອັນແສນສາຫັດ ທີ່ເຂົາເຈົ້າໄດ້ຮັບຈາກໄຟສົງຄາມທີ່ຍາວນານທີ່ສຸດຂອງອາເມຣິກາ.

ສົງຄາມຕໍ່ຕ້ານພວກກໍ່ການຮ້າຍໃນທົ່ວໂລກ ດັ່ງທີ່ມັນໄດ້ຖືກເອີ້ນນັ້ນ ຂະຫຍາຍວົງກວ້າງໄກອອກໄປ ຜ່ານປະເທດນ້ອຍໆໃນເຂດເອເຊຍກາງຄືອັຟການິສຖານ ກາຍເຂົ້າໄປເຖິງປະເທດອີຣັກ ແລະແຫ່ງອື່ນໆໃນໂລກທີ່ມີຄວາມກັງວົນ ໄກອອກໄປຈົນເຖິງອາຟຣິກາ. ບັນຫາຂັດແຍ້ງຢູ່ໃນອີຣັກໄດ້ເອົາຊີວິດພວກສະມາຊິກທະຫານສະຫະລັດ 4,500 ຄົນ ແລະພົນລະເຮືອນຫຼາຍແສນຄົນ.

ນັບຕັ້ງແຕ່ມີການຕັດສິນໃຈທີ່ຈະຖອນກຳລັງທະຫານອອກຈາກອັຟການິສຖານຢ່າງຄົບຖ້ວນ ພາຍໃນທ້າຍເດືອນສິງຫາ ຊຶ່ງໄດ້ກາຍເປັນເລື້ອງຖົກຖຽງກັນນັ້ນ ລັດຖະບານທ່ານໄບເດັນ ໄດ້ດຳເນີນການຢ່າງເດັດຂາດ ເພື່ອປະຖິ້ມຊ່ວງເວລາ 20 ປີທີ່ຜ່ານມານັ້ນ ໄວ້ທາງຫຼັງ ໂດຍການເຮັດໃຫ້ເອກະສານລັບຈໍານວນຫຼວງ ຫຼາຍນັ້ນ ບໍ່ໃຫ້ເປັນຄວາມລັບອີກຕໍ່ໄປ ທີ່ອາດຈະສະທ້ອນໃຫ້ເຫັນເຖິງເຫດການຕ່າງໆຂອງວັນທີ 11 ກັນຍາ ແລະຮັກສາໄລຍະຫ່າງໆ ຈາກລັດຖະບານຂອງກຸ່ມຕາລີບານ ທີ່ປົກຄອງດ້ວຍລະບອບຫົວແຂງກະດ້າງ ຖືພະເຈົ້າເປັນກົດໝາຍສັກສິດ ທີ່ໄດ້ເຂົ້າຢຶດອຳນາດໃນອັຟການິສຖານ ເມື່ອກຳລັງອາເມຣິກັນໄດ້ຖອນໂຕອອກໄປ.

ໃນວັນເສົາມື້ອື່ນນີ້ ທ່ານໄບເດັນ ຈະໄປຢ້ຽມຢາມສະຖານທີ່ທັງ 3 ທີ່ໄດ້ຈຸດຄະນວນສົງຄາມ ຄື ທີ່ນະຄອນນິວຢອກ ບ່ອນທີ່ໃນເວລາ 8 ໂມງ 46 ນາທີ ໃນຕອນເຊົ້າ ແດດສ່ອງຟ້າເດືອນກັນຍາມື້ນັ້ນ ເຮືອບິນສາຍການບິນ American Airlines ຖ້ຽວບິນ 11 ໄດ້ບິນເຂົ້າໄປຕຳຕຶກກ້ຳເໜືອຂອງ World Trade Center ແລະເມື່ອ 17 ນາທີຕໍ່ມາ ເຮືອບິນສາຍການບິນ United Airlines ຖ້ຽວບິນ 175 ບິນໄປຕຳຕຶກກ້ຳໃຕ້.

ທ່ານຍັງຈະໄປຢ້ຽມຢາມທຳນຽບຫ້າແຈບ່ອນທີ່ເຮືອບິນສາຍການບິນ American Airlines ຖ້ຽວບິນ 77 ໄດ້ບິນເຂົ້າຕຳໃນໄລຍະ 34 ນາທີຕໍ່ມາ ແລະຢູ່ອີກແຫ່ງນຶ່ງຕ່າງຫາກ ທ່ານແລະຮອງປະທານາທິບໍດີ ຄາມາລາ ແຮຣິສ ຈະໄປຢ້ຽມຄຳ ນັບ ຢູ່ທີ່ທົ່ງຫຍ້າ ທີ່ໂດດດ່ຽວໃນເມືອງແຊງສ໌ວີລ (Shanksville) ລັດເພັນຊີລເວເນຍ ອັນເປັນແຫ່ງສຸດທ້າຍບ່ອນທີ່ເຮືອບິນສາຍການບິນ United Airlines ຖ້ຽວບິນ 93 ທີ່ໄດ້ຕົກນັ້ນ.

ອ່ານຂ່າວນີ້ຕື່ມ ເປັນພາສາອັງກິດ

ເບິ່ງຄວາມເຫັນ

ທ່ານອາດຈະມັກເລື້ອງນີ້ຄືກັນ

XS
SM
MD
LG