ພະຍາດຕາຕໍ້ ຫຼື Glaucoma ແມ່ນສາເຫດໃຫຍ່ ທີ່ພາໃຫ້ຕາບອດ
ຊຶ່ງມັນບໍ່ອາດສາມາດປົວຄືນໄດ້ ແລະ ໂດຍທົ່ວໄປແລ້ວ ຜູ້ຄົນບໍ່ຮູ້
ຈັກເລີຍວ່າ ຕົນເປັນພະຍາດດັ່ງກ່າວຈົນກວ່າມັນຮ້າຍແຮງເກີນໄປ
ແລ້ວ. ແຕ່ດັ່ງທີ່ Carol Pearson ຜູ້ສື່ຂ່າວວີໂອເອ ລາຍງານມາກໍ
ແມ່ນວ່າ ຖ້າຫາກກວດເຫັນພະຍາດຕາຕໍ້ຕັ້ງແຕ່ຕອນຕົ້ນໆ ແລະ
ໄດ້ຮັບການ ຮັກສາປິ່ນປົວທັນທີໂລດ ຜູ້ຄົນທີ່ເປັນພະຍາດຕາຕໍ້ນີ້
ກໍອາດຈະສາມາດ ຮັກສາສາຍຕາຂອງເຂົາເຈົ້າໄວ້ໄດ້.
ໄຊຈະເລີນສຸກ ມີລາຍລະອຽດກ່ຽວກັບເລື້ອງນີ້ ມາສະເໜີທ່ານ.
ທ່ານ Jeffery Miller ເລີ້ມເປັນພະຍາດຕາຕໍ້ ໃນຕອນທີ່ລາວ ມີອາຍຸໄດ້ 30 ປີ.
ທ່ານ Miller ເວົ້າວ່າ “ຂ້ອຍບໍ່ແມ່ນຄົນ ທີ່ຖືເບົາ ກ່ຽວກັບສາຍຕາຂອງຂ້ອຍ. ຂ້ອຍ
ແມ່ນຄົນ ທີ່ຮູ້ຈັກຄຸນຄ່າອີຫຼີອີຫຼໍ ໃນສິ່ງທີ່ຂ້ອຍສາມາດຮັກສາໄວ້ໄດ້ນັ້ນ.”
ອິງຕາມ ອົງການອະນາໄມໂລກແລ້ວ ມີ 70 ລ້ານກວ່າຄົນໃນທົ່ວໂລກ ໄດ້ຮັບຜົນກະທົບ
ຈາກພະຍາດຕາຕໍ້. ໂດຍທຳມະດາແລ້ວ ຜູ້ຄົນແມ່ນບໍ່ຮູ້ຈັກເລີຍວ່າ ຕົນມີບັນຫາ ຈົນກວ່າ
ພະຍາດຕາຕໍ້ ໄດ້ທຳລາຍ ສາຍຕາສ່ວນໃຫຍ່ ຂອງເຂົາເຈົ້າ ຢ່າງເປັນການຖາວອນແລ້ວ.
ຢູ່ທີ່ປະເທດຈີນ ແລະ ອິນເດຍ ພະຍາດຕາຕໍ້ ແມ່ນສາເຫດອັນດັບທີສອງ ທີ່ພາໃຫ້ຜູ້ຄົນ
ຕາບອດ. ຊາວອາຟຣິກາຜິວດຳ ແລະ ອາເມຣິກາລາຕິນ ກໍເປັນກຸ່ມ ທີ່ມີຄວາມອ່ອນໄຫວ
ໃນການເປັນພະຍາດຕາຕໍ້ໄດ້ງ່າຍ ແລະມັນກໍ ຕິດຕໍ່ກັນຢູ່ໃນຄອບຄົວ ດັ່ງດຽວກັນກັບ
ສະພາບທີ່ນາງ Jill Herndon ປະເຊີນຢູ່.
ນາງ Herndon ເວົ້າວ່າ “ມັນເປັນສິ່ງ ທີ່ໜ້າຢ້ານກົວສະເໝີ ເມື່ອຄຸ່ນ ຄິດວ່າ ຈະສູນ
ເສຍສາຍຕາຂອງຕົນ.”
ອາຍຸຂອງເຮົານັ້ນ ກໍເປັນອີກປັດໄຈນຶ່ງຂອງຄວາມສ່ຽງ ເຖິງແມ່ນວ່າ ຜູ້ຄົນໃນທຸກໆໄວ
ສາມາດເປັນພະຍາດນີ້ໄດ້. ການຮັກສາປິ່ນປົວ ແມ່ນລວມທັງ ໃຊ້ຢາຢອດຕາ ກິນຢາ ຫຼື
ຜ່າຕັດ.
ດຣ. Robert Weinreb ທີ່ມະຫາວິທະຍາໄລ ກາລີຟໍເນຍ ຢູ່ເມືອງ ແຊນດີເອໂກ້ ເປັນຜູ້
ນຳພາການສຶກສາ ຂອງວາລະສານສະມາຄົມການແພດ ກ່ຽວກັບວິທີກວດຫາ ແລະ ຮັກສາ
ພະຍາດຕາຕໍ້ 2 ປະເພດຫຼັກ ຄື: ມຸມປິດ ແລະ ມຸມເປີດ.
ດຣ. Weinreb ເວົ້າວ່າ “ຕາກໍຄືກັບອ່າງນ້ຳ ມັນມີກັອກນ້ຳ ແລະ ມັນມີບ່ອນລະບາຍ
ນ້ຳ. ນຶ່ງໃນສອງປະເພດດັ່ງກ່າວນັ້ນ ບ່ອນລະບາຍນ້ຳ ແມ່ນຕັນຢູ່ພາຍໃນ ແລະ
ໃນປະເພດນຶ່ງອີກ ບ່ອນລະບາຍນ້ຳ ມັນຖືກປົກຄຸມໄວ້ ແລະ ຕັນຢູ່ພາຍນອກ.”
ເວລາ “ບ່ອນລະບາຍນ້ຳ” ຂອງຕາ ເກີດການອຸດຕັນ ຫຼື ໄຫຼໄປມາບໍ່ໄດ້ ມັນເຮັດໃຫ້
ຄວາມດັນໃນຕາເພີ້ມຂຶ້ນ ແລະ ໄປທຳລາຍເສັ້ນປະສາດສາຍຕາ.
ດຣ. Weinreb ເວົ້າວ່າ “ບັນດາຜູ້ໃຫ້ການຮັກສາຂັ້ນທຳອິດ ມີບົດ ບາດອັນສຳຄັນ
ໃນການກວດຫາ ຮັບຮູ້ ແລະ ກໍແນະນຳບັນດາຄົນປ່ວຍ ຜູ້ທີ່ມີຄວາມສ່ຽງສູງທີ່ສຸດ
ໃນການເປັນພະຍາດຕາຕໍ້.”
ບັນດານາຍໝໍປະຈຳຄອບຄົວ ສາມາດສອບຖາມກ່ຽວກັບປະຫວັດຂອງພະຍາດຕາຕໍ້ ຢູ່
ໃນຄອບຄົວຂອງຄົນປ່ວຍ. ເຂົາເຈົ້າຍັງສາມາດ ກວດເບິ່ງເສັ້ນປະສາດສາຍຕາ ຂອງ
ບັນດາຄົນປ່ວຍໄດ້ອີກ. ຖ້າເສັ້ນປະສາດສາຍຕາ ເບິ່ງບໍ່ປົກກະຕິແລ້ວ ນາຍໝໍສາມາດ
ບອກຄົນປ່ວຍ ໃຫ້ໄປຫາໝໍຕາສະເພາະ. ເຖິງແມ່ນວ່າ ມີການຮັກສາປິ່ນປົວຕ່າງໆ ຢູ່ກໍ
ຕາມ ແຕ່ວິທີປ້ອງກັນທີ່ດີທີ່ສຸດ ກໍຄື ການກວດຕາ ໃນທຸກໆປີ.
ທ່ານ Jeffery Miller ເວົ້າວ່າ “ພຽງແຕ່ໃຫ້ໄປກວດຕາຂອງເຈົ້າ ຕັ້ງແຕ່ຫົວທີ ເທົ່າທີ່ເຈົ້າສາມາດເຮັດໄດ້ ແລະ ໃຫ້ກວດຢ່າງລະອຽດ ເທົ່າທີ່ເຈົ້າສາມາດເຮັດໄດ້.”
ນັ້ນແມ່ນຄຳແນະນຳ ຈາກພວກທີ່ຮູ້ເລື່ອງດີ. ການສຶກສານີ້ໄດ້ຖືກພີມ ເຜີຍແຜ່ ໃນວາລະສານຂອງສະມາຄົມການແພດອາເມຣິກັນ ຫຼື Journal of the American Medical Association.
ເບິ່ງວີດີໂອ ພາສາລາວ ເລື້ອງຕາເຂົ້າເຜື້ອ ສາມາດຜ່າຕັດ ໃຫ້ຫາຍດີໄດ້
