ເບິ່ງວີດິໂອ ລານງານທີ່ກ່ຽວຂ້ອງກັນ
ຄາດກັນວ່າ ມີຫລາຍກວ່າ 20,000 ຄົນ ເຂົ້າຮ່ວມກອງປະຊຸມ AIDS 2012 ຊຶ່ງຈັດຂຶ້ນ
ພາຍໃຕ້ຫົວຂໍ້ Turning the Tide Together ຫລື ຮ່ວມກັນຕ່າວປີ້ນຄື້ນກະແສຟອງ.
ຄະນະຜູ້ແທນ ທີ່ເຂົ້າຮ່ວມໃນພິທີເປີດກອງປະຊຸມ ໄດ້ຖືກຕ້ອນຮັບໂດຍສຽງຮ້ອງເພງ
ໝູ່ຂອງພວກຜູ້ຊາຍເກ ຫລືຜູ້ຊາຍທີ່ຮັກຮ່ວມເພດດຽວກັນ ແລະຄຸນພໍ່ Charles
Straight ທີ່ນໍາພາການສວດມົນພາວະນາ.
ສຽງຮ້ອງເພັງ…….
ຄຸນພໍ່ Charles Straight ກ່າວວ່າ: ”ນີ້ຄືຄໍາໄຫວ້ວອນຂອງພວກເຮົາ ແລະກໍເປັນ
ຄວາມປາດຖະໜາຮ່ວມກັນຂອງພວກເຮົາສໍາລັບກອງປະຊຸມ Aids 2012 ນີ້: ພວກ
ເຮົາຈົ່ງມາພາກັນ ຮ່ວມຈິດຮ່ວມໃຈກັນ ໃນທົ່ວໂລກ ຢ່າງທີ່ບໍ່ເຄີຍມີມາກ່ອນ ເພື່ອ
ຕ່າວປີ້ນກະແສຟອງຂອງເຊື້ອ HIV ແລະໂຣກເອດສ໌ ຢູ່ໃນໂລກນີ້. ຂໍໃຫ້ເປັນເຊ່ນນັ້ນ
ເຖາະ ພວກເຮົາຈົ່ງພາກັນເຮັດໃຫ້ມັນເກີດຂຶ້ນ. ແລະຜູ້ໃດທີ່ເຊື່ອວ່າຈະເຮັດ ດັ່ງນັ້ນໄດ້
ຈົ່ງພາກັນເວົ້າ ພ້ອມກັບຂ້ອຍວ່າ Amen ຫລື ສາທຸ.”
ກອງປະຊຸມກ່ຽວກັບໂຣກເອດສ໌ໃນທີ່ສຸດກໍໄດ້ໄຂຂຶ້ນອີກທີ່ສະຫະລັດ ຫລັງຈາກມີ ການຍົກເລີກຂໍ້ຫ້າມບໍ່ໃຫ້ພວກທີ່ຕິດເຊື້ອ HIV ເຂົ້າປະເທດນີ້. ດຣ. Elly Katabira
ຈາກປະເທດອູການດາ ຊຶ່ງເປັນ ປະທານຮ່ວມຝ່າຍນາໆຊາດຂອງກອງປະຊຸມນີ້
ໄດ້ກ່າວກ່ຽວກັບ ບັນຫາດັ່ງກ່າວ. ດຣ. Elly Katabira ເວົ້າວ່າ:
”ຢູ່ໃນສະຫະລັດນີ້ ຄະ
ນະລັດຖະບານຂອງທ່ານ
ໂອບາມາ ໄດ້ຍົກເລີກຂໍ້
ຫ້າມບໍ່ໃຫ້ພວກທີ່ຕິດເຊື້ອ
HIV ເຂົ້າປະເທດ ໃນປີ
2009. ແລະໃນທີ່ສຸດ
ພວກເຮົາກໍໄດ້ກັບຄືນມາ
ທີ່ນີ້ອີກ ຫລັງຈາກ 22 ປີ
ໄດ້ຜ່ານໄປ. ຂ້າພະເຈົ້າ
ຢາກສະແດງຄວາມຂອບ
ໃຈຕໍ່ໝົດທຸກຄົນ ທີ່ໄດ້
ມີບົດບາດສໍາຄັນ ຊ່ວຍ
ເຮັດໃຫ້ກອງປະຊຸມນີ້ເກີດ
ຂຶ້ນ, ໂດຍສະເພາະກໍແມ່ນ
ປະຊາຊົນອາເມຣິກັນແລະ
ຜູ້ນໍາທີ່ພວກເຂົາ ເຈົ້າ ເລືອກຕັ້ງເອົາ. ຂອບໃຈຫລາຍໆ.”
ດຣ. Elly Katabira ກ່າວຕໍ່ໄປວ່າ ແຕ່ກໍຍັງມີ 46 ປະເທດ, ດິນແດນແລະເຂດອະທິປະໄຕ ທີ່ຍັງສືບຕໍ່ເກືອດຫ້າມໃນການເດີນທາງທີ່ ຄ້າຍຄືກັນນີ້. ດຣ. Katabira ໄດ້ຊຸກຍູ້ໃຫ້ພວກ
ຜູ້ນໍາ, ເຈົ້າໜ້າທີ່, ພວກວາງນະໂຍບາຍ ແລະຜູ້ບໍລິຈາກທັງຫລາຍ ຈົ່ງສືບຕໍ່ສ້າງຄວາມກ້າວ ໜ້າໃນການຕໍ່ຕ້ານກັບໂຣກລະ ບາດອັນນີ້. ດຣ. Elly Katabira ເວົ້າວ່າ:
”ພວກເຮົາຕ້ອງຕົກລົງໃຈຮ່ວມກັນວ່າ ຈະບໍ່ມີວັນກ້າວຄືນຫລັງ ເຖິງແມ່ນວ່າຈະຢູ່ໃນ
ໄລຍະທີ່ມີຄວາມຫຍຸ້ງຍາກທາງເສດຖະກິດ ກໍຕາມ.”
ດຣ. Diane Havlir, ຊຶ່ງເປັນປະທານຮ່ວມຈາກສະຫະລັດ ກໍໄດ້ເນ້ນຍໍ້າຂໍ້ຄວາມດັ່ງກ່າວ
ເຊ່ນກັນ. ດຣ. Diane Havlir ເວົ້າວ່າ:
“ຂໍ້ຄວາມທີ່ຂ້າພະເຈົ້າຢາກສົ່ງເຖິງພວກວາງນະໂຍບາຍທັງຫລາຍຢູ່ທົ່ວໂລກ ກໍຄື: ໃຫ້ລົງທຶນເຂົ້າໃສ່ດ້ານວິທະຍາສາດ. ລົງທຶນເຂົ້າໃສ່ການຄົ້ນຄວ້າປິ່ນປົວໂຣກລະ
ບາດອັນນີ້. ແລ້ວພວກທ່ານກໍຈະສາມາດປ່ຽນແປງຊີວິດຂອງຄົນໄດ້.”
ທ່ານນາງ Havlir ເປັນນາຍແພດ ຢູ່ໂຮງໝໍ ແຫ່ງນຶ່ງ ທີ່ນະຄອນຊານ ຟຣານຊິສໂກ ລັດ
ແຄລິຟໍເນຍ ທີ່ບໍ່ສາມາດປົວຄົນເຈັບທີ່ມີເຊື້ອ HIV ຫລືເປັນໂຣກເອດສ໌ຢູ່ໃນຂັ້ນເລີ້ມຕົ້ນນັ້ນ
ໃຫ້ສໍາເລັດຜົນໄດ້. ແຕ່ ໃນເດືອນແລ້ວນີ້ ທ່ານນາງ ມີຄວາມຮູ້ສຶກໄດ້ຢ່າງແທ້ຈິງວ່າ ເວລາ
ໄດ້ປ່ຽນ ແປງໄປ. ດຣ. Havlir ເວົ້າວ່າ:
”ຄົນເຈັບຂອງຂ້ອຍເອງຜູ້ນຶ່ງ ຈົກເອົາແກ້ວຢາຕ້ານເຊື້ອ HIV ແກ້ວນຶ່ງອອກມາ ແລະ
ບອກຂ້ອຍວ່າ: ຂ້ອຍເອີ້ນຢາພວກນີ້ວ່າ ເປັນຢາຜູ້ ເຖົ້າຂອງຂ້ອຍ. ຂ້ອຍເອງກໍບໍ່ເຂົ້າໃຈ.
ລາວຍິ້ມ ແລະເວົ້າອີກວ່າ. ຢາພວກນີ້ ຈະຊ່ວຍໃຫ້ຂ້ອຍດໍາລົງຊີວິດຕໍ່ໄປຈົນແກ່ເຖົ້າ
ເປັນຊາຍ ຊະລາຜູ້ນຶ່ງໄດ້. ພວກເຮົາທຸກຄົນຢາກໃຫ້ເລື້ອງນີ້ກາຍເປັນເລື້ອງຂອງທຸກໆ
ຄົນທີ່ດໍາລົງຊີວິດຢູ່ກັບເຊື້ອ HIV ຈົນກວ່າວ່າ ຈະບໍ່ມີເຊື້ອໄວຣັສດັ່ງກ່າວນີ້ອີກຕໍ່ໄປ.”
ນຶ່ງໃນບັນດາຜູ້ກ່າວຄໍາປາໄສ
ເປີດກອງປະຊຸມ Aids 2012
ນີ້ ກໍໄດ້ແກ່ປະທານທະນາຄານ
ໂລກ ດຣ. Jim Yong Kim ຊຶ່ງ
ໄດ້ເຮັດວຽກທີ່ກ່ຽວຂ້ອງຢ່າງໜັກ
ກັບການຕໍ່ສູ້ທາງວິທະຍາສາດ
ຕ້ານ ເຊື້ອ HIV/AIDS. ທ່ານເປັນ
ປະທານທະນາຄານໂລກຜູ້ທໍາອິດ
ທີ່ໄດ້ກ່າວຄໍາປາໄສຕໍ່ກອງປະຊຸມ
ນາໆຊາດກ່ຽວກັບໂຣກເອດສ໌
ຊຶ່ງທ່ານໄດ້ກ່າວໃນຕອນນຶ່ງວ່າ:
”ຂ້າພະເຈົ້າມາທີ່ນີ້ກໍເພື່ອນໍາເອົາ
ທັງຄໍາໝັ້ນສັນຍາ ແລະຄວາມ
ທ້າທາຍມາໃຫ້ພວກທ່ານ. ຂ້າ
ພະເຈົ້າໃຫ້ຄໍາໝັ້ນສັນຍາວ່າ
ທະນາຄານໂລກ ຈະເຮັດວຽກຢ່າງບໍ່ຮູ້ອິດຮູ້ເມື່ອຍ ຮ່ວມກັບພວກທ່ານທຸກຄົນ ເພື່ອຜັກ
ດັນການຕໍ່ສູ້ຕ້ານໂຣກເອດສ໌ ໃຫ້ກ້າວໜ້າໄປຈົນກວ່າພວກເຮົາຈະໄດ້ຮັບໄຊຊະນະ. ແລະ
ພ້ອມກັນນັ້ນ ຂ້າພະເຈົ້າກໍທ້າທາຍ ພວກທ່ານ ໃຫ້ທໍາງານຮ່ວມກັບຂ້າພະເຈົ້າ ເພື່ອລະ
ດົມພະລັງອໍານາດທາງສິນລະທໍາ ແລະບົດຮຽນຈາກຕົວຈິງ ທີ່ຂະບວນການຕ້ານໂຣກ
ເອດສ໌ ໄດ້ຮັບນັ້ນ ມາໃຊ້ ເພື່ອເລັ່ງລັດ ຄວາມກ້າວໜ້າໃນການກໍາຈັດໂຣກລະບາດຮ້າຍ
ແຮງອີກຢ່າງນຶ່ງຂອງໂລກ ກໍຄື ຄວາມທຸກຍາກນັ້ນ.”
ເບິ່ງສະໄລດ໌ຮູບກ່ຽວກັບກອງປະຊຸມນີ້
ກອງປະຊຸມໂຣກເອດສ໌ນາໆຊາດ ຄັ້ງທີ 19 ຈະດໍາເນີນ ໄປຈົນ ຮອດວັນສຸກ ທີ 27 ກໍລະກົດ ຫລືວັນສຸກອາທິດນີ້ເອງ.
