ສະມາຊິກສະພາຍິງຄົນນຶ່ງ ຂອງອັຟການິສຖານ ລອດຊີວິດມາ
ໄດ້ ຈາກການໂຈມຕີດ້ວຍລະເບີດສະຫລະຊີບ ທີ່ໄດ້ເອົາຊີວິດ
ຂອງຜູ້ຄົນທີ່ຜ່ານກາຍໄປມາ ຢ່າງນ້ອຍ 3 ຄົນ ແລະ ເຮັດໃຫ້
ອີກຫຼາຍກວ່າ 10 ຄົນ ໄດ້ຮັບບາດເຈັບ ລວມທັງສະມາຊິກສະພາ
ຄົນນີ້ນຳດ້ວຍ.
ເຈົ້າໜ້າທີ່ຕຳຫລວດ ກ່າວວ່າ ທ່ານນາງ Shukria Barakzai
ພວມເດີນທາງຢູ່ໃນຂະບວນລົດ ຜ່ານນະຄອນຫລວງກາບູລ
ໃນວັນອາທິດມື້ນີ້ ເວລາຜູ້ຮ້າຍບີບຄະນວນ ລະເບີດໃຫ້ແຕກຂຶ້ນ.
ບັນດາເຈົ້າໜ້າທີ່ ກ່າວວ່າ ທ່ານນາງ Barakzai ແມ່ນໄດ້ຮັບບາດເຈັບນ້ອຍນຶ່ງ ໃນການ
ໂຈມຕີຄັ້ງນີ້ ແຕ່ບໍ່ມີອາການຮ້າຍແຮງ.
ສະມາຊິກສະພາ ຊຶ່ງເປັນຜູ້ຕໍ່ສູ້ເພື່ອສິດທິຂອງພວກຜູ້ຍິງ ຄົນນີ້ ເປັນຜູ້ ສະໜັບສະໜຸນ
ຢ່າງແຂງຂັນ ຕໍ່ປະທານາທິບໍດີ Ashraf Ghani.
ການໂຈມຕີດ້ວຍລະເບີດສະຫລະຊີບ ໃນນະຄອນຫລວງ ຂອງອັຟການິສຖານດັ່ງກ່າວ
ແມ່ນເປັນຄັ້ງຫລ້າສຸດ ທີ່ແນໃສ່ສະມາຊິກ ຂອງລັດຖະບານອັຟການິສຖານ ທີ່ໄດ້ຮັບ
ການໜຸນຫລັງໂດຍສະຫະລັດ ຊຶ່ງກຳລັງຕໍ່ສູ້ກັບການກະບົດທີ່ນຳໂດຍພວກຫົວຮຸນແຮງ
ຕາລີບານນັ້ນ.