ສະຫະພັນກໍາມະບານລາວຮ້ອງຂໍໃຫ້ພິຈາລະນາ ປັບຂຶ້ນອັດຕາຄ່າຈ້າງຂັ້ນຕໍ່າໃນ
ທົ່ວປະເທດ ເພາະຄ່າຄອງຊີບທີ່ສູງຂຶ້ນ ເຮັດໃຫ້ແຮງງານໃນລາວບໍ່ສາມາດຄອງຊີບ
ຢູ່ໄດ້ພຽງພໍ.
ທ່ານວັນນະລາດ ຫົງສາທິລາດ ປະທານສະຫະພັນກໍາມະບານລາວ ແຂວງສະຫວັນ
ນະເຂດ ຖະແຫລງ ຢືນຢັນວ່າ ສູນກາງສະຫະພັນກໍາມະບານ ໄດ້ສະແດງການຮຽກຮ້ອງຕໍ່ຄະນະລັດຖະບານລາວ ເມື່ອບໍ່ນານມານີ້ ເພື່ອຂໍໃຫ້ພິຈາລະນາປັບຂຶ້ນເງິນອັດຕາຄ່າຈ້າງຂັ້ນຕໍ່າຈາກ 9 ແສນກີບມາເປັນອັດຕາໃໝ່ ທີ່ສອດຄ່ອງກັບພາວະຄ່າຄອງຊີບ ທີ່
ປັບຕົວສູງຂຶ້ນໃນປັດຈະບັນນີ້ ດັ່ງທີ່ທ່ານໄດ້ຢືນຢັນວ່າ:
“ເພື່ອເຮັດໃຫ້ກໍາມະກອນໄດ້ເຄື່ອນໄຫວວຽກງານປົກກະຕິແລ້ວ ກະຍົກລະດັບຊີ
ວິດການເປັນຢູ່ຂອງພວກເຂົາເຈົ້າຂຶ້ນໃຫ້ມັນດີ ແລະກໍເພື່ອເປັນການສ້າງກໍາລັງໃຈ
ໃຫ້ແກ່ກໍາມະກອນ ທີ່ທໍາການຜະລິດ ຢູ່ຕາມໂຮງຈັກ ໂຮງງານ. ຂ້າພະເຈົ້າຄິດວ່າ
ອັນນຶ່ງ ຢາກໃຫ້ມີການປັບປຸງກ່ຽວກັບບັນຫາເລື່ອງຄ່າແຮງງານຂັ້ນຕໍ່າ ເພາະວ່າ
ປັດຈຸບັນນີ້ ພວກເຮົາຍັງໄດ້ປະຕິບັດກັນຢູ່ໃນລະດັບ 9 ແສນກີບ ແລ້ວມາທຽບໃສ່
ກັບຄ່າຄອງຊີບ ໃນປັດຈຸບັນນີ້ ກໍເຫັນວ່າ ຄ່າຄອງຊີບມັນກະມີການເໜັງຕີງ. ສະນັ້ນ
ຈຶ່ງວ່າຢາກນໍາສະເໜີ ໃຫ້ທາງພາກລັດກໍຄືຂັ້ນເທິງ ພິຈາລະນາກ່ຽວກັບການປັບປຸງ
ຄ່າແຮງງານຂັ້ນຕໍ່າຄືນໃໝ່ ອາດຈະຍົກລະດັບຂຶ້ນອີກ ໃນລະດັບນຶ່ງ ເພື່ອໃຫ້ມັນ
ສອດຄ່ອງກັບສະພາບເສດຖະກິດໃນປັດຈຸບັນ.”
ແຕ່ຢ່າງໃດກໍຕາມ ການທີ່ແຮງງານລາວສ່ວນໃຫຍ່ ເປັນແຮງງານທີ່ບໍ່ມີສີມື ກໍຖືເປັນປັດ
ໄຈນຶ່ງ ທີ່ເຮັດໃຫ້ໄດ້ຮັບຄ່າຈ້າງໃນອັດຕາຕໍ່າກວ່າແຮງງານຈາກຕ່າງປະເທດ ທີ່ມີຝີມື.
ທັ້ງນີ້ ກະຊວງແຮງງານ ແລະສະຫວັດດີການສັງຄົມໄດ້ເລີ່ມການຈັດຕັ້ງປະຕິບັດຄຳສັ່ງ
ນາຍົກລັດຖະມົນຕີເລກທີ 62/ນຍ ກ່ຽວກັບ ການຂຶ້ນທະບຽນແຮງງານຊາວຕ່າງຊາດໃນ
ລາວ ຊຶ່ງເປັນການ ຈັດຕັ້ງປະຕິບັດຮ່ວມກັບກະຊວງປ້ອງກັນຄວາມສະຫງົບ ໃນຊ່ວງ ເດືອນທັນວາ 2015 ເຖິງເດືອນ ກັນຍາ 2016 ໂດຍສາມາດຂຶ້ນທະບຽນແຮງງານ ຕ່າງຊາດໄດ້ທັງໝົດ 22,766 ຄົນ ໃນນີ້ແບ່ງ ເປັນແຮງງານ ຫວຽດນາມ 17,537 ຄົນ, ຈີນ 4,323 ຄົນ, ໄທ 612 ຄົນ ແລະ ອື່ນໆ 132 ຄົນ.
ແຕ່ຢ່າງໃດກໍຕາມ ການຂຶ້ນທະບຽນດັ່ງກ່າວກໍຍັງບໍ່ໄດ້ບັນລຸຕາມເປົ້າໝາຍ ເນື່ອງຈາກ ວ່າຍັງມີແຮງງານຊາວຕ່າງຊາດໃນ ລາວ ອີກຈຳນວນບໍ່ນ້ອຍ ທີ່ບໍ່ຍອມຂຶ້ນທະບຽນຕາມ ລະບຽບກົດ ໝາຍໃນ ລາວ ຊຶ່ງເຊື່ອວ່າມີຈຳນວນຫຼາຍກວ່າ 30,000 ຄົນທີ່ຍັງຄົງເດີນ ທາງໄປມາລະຫວ່າງ ລາວ ກັບປະເທດທີ່ເປັນພູມລຳເນົາຂອງແຮງງານເຫຼົ່ານີ້ ຊຶ່ງກໍໝາຍ ຄວາມວ່າແຮງງານ ຕ່າງຊາດດັ່ງກ່າວນີ້ຍັງຄົມລັກລອບທຳງານໂດຍຜິດກົດໝາຍຢູ່ໃນ ລາວ ຕໍ່ໄປນັ້ນເອງ.
ນອກຈາກນີ້ ການທີ່ ລາວ ຕ້ອງປະເຊີນໜ້າກັບບັນຫາຂາດແຄນແຮງງານມີຝີມື ແລະ ບໍ່ສາມາດຕອບສະໜອງແຮງງານມີຝີມືໃຫ້ກັບບັນດາບໍລິສັດຕ່າງຊາດທີ່ລົງທຶນໃນ ລາວ ໄດ້ຢ່າງພຽງພໍນັ້ນ ຍັງເຮັດໃຫ້ທາງການ ລາວ ຕ້ອງອະນຸຍາດໃຫ້ບັນດາບໍລິສັດຕ່າງຊາດ ຊ້າງແຮງງານມີຝີມືຈາກ ຕ່າງປະເທດໄດ້ຈຳນວນຫຼາຍໝື່ນຄົນ ແລະ ການທີ່ແຮງງານ
ລາວ ສ່ວນຫຼາຍກໍໄດ້ພາກັນເດີນ ທາງໄປທຳງານຢູ່ໃນ ໄທ ທີ່ມີຄ່າຈ້າງສູງກວ່າຢູ່ໃນ
ລາວ ນັ້ນ ຍັງເຮັດໃຫ້ເກີດບັນຫາຂາດແຄນ ແຮງງານຫຼາຍຂຶ້ນອີກດ້ວຍ.
ທັງນີ້ໂດຍຕາມແຜນການພັດທະນາດ້ານແຮງງານໃນຊ່ວງປີ 2016-2020 ນັ້ນ ລັດ
ຖະບານ ລາວ ໃຫ້ຄວາມສຳຄັນເປັນພິເສດໃນການພັດທະນາຫຼັກສູດເພື່ອສ້າງແຮງ ງານທີ່ມີຝີມືໃຫ້ໄດ້ ຫຼາຍກວ່າ 658,000 ຄົນ ສຳລັບຕອບສະໜອງໃຫ້ແກ່ບັນດາ ບໍລິສັດຕ່າງຊາດທີ່ລົງທຶນໃນ ລາວ ໃຫ້ໄດ້ຢ່າງພຽງພໍ ແລະ ສ້າງມາດຕະຖານຝີມື ແຮງງານໃໝ່ໃຫ້ໄດ້ໃນ 25 ສາຂາອາຊີບ, ດຳເນີນ ການທົດສອບ ແລະອອກໃບຢັ້ງຢືນ ມາດຕະຖານຝີມືແຮງງານ 27ສາຂາອາຊີບໃຫ້ກັບແຮງງານ ລາວ 12,500 ຄົນເພື່ອ ໃຫ້ສາມາດໄປທຳງານໄດ້ໃນທຸກປະເທດສະມາຊິກໃນກຸ່ມ ອາຊຽນ ດ້ວຍກັນ.
