ສະຫະລັດ ແລະ ເທີກີ ໄດ້ລົງນາມໃນຂໍ້ຕົກລົງ ເພື່ອໃຫ້ການ
ເຝິກແອບ ແລະປະກອບອາວຸດ ໃຫ້ພວກນັກຕໍ່ຕ້ານລັດຖະບານ
ຊີເຣຍນິຍົມແນວທາງປານກາງ ຕໍ່ສູ້ກັບພວກກຸ່ມກໍ່ການຮ້າຍ
ລັດອິສລາມ.
ຂໍ້ຕົກລົງດັ່ງກ່າວໄດ້ລົງນາມກັນ ໃນວັນພະຫັດວານນີ້ໂດຍ
ເອກອັກຄະລັດຖະທູດສະຫະລັດປະຈຳເທີກີ ທ່ານ John Bass
ແລະ ຮອງລັດຖະມົນຕີການຕ່າງປະເທດເທີກີ ທ່ານ Feridun
Sinirlioglu ທີ່ເອີ້ນຂໍ້ຕົກລົງດັ່ງກ່າວນີ້ວ່າ ເປັນ “ບາດກ້າວ
ອັນສຳຄັນ” ໃນການເປັນພາຄີລະຫວ່າງທັງສອງປະເທດ.
ກອງທັບສະຫະລັດ ໄດ້ກ່າວວ່າ ຕົນມີແຜນທີ່ຈະສົ່ງທະຫານອາເມຣິກັນຈຳນວນຫຼາຍກວ່າ
400 ຄົນ ລວມທັງ ໜ່ວຍກຳລັງປະຕິບັດການພິເສດ ໄປເຝິກແອບ ພວກຕໍ່ຕ້ານລັດຖະບານ
ຊີເຣຍ ຢູ່ຕາມສະຖານທີ່ ຕ່າງໆນອກປະເທດຊີເຣຍ ອັນເປັນສວນນຶ່ງຂອງການຕໍ່ສູ້ຕ້ານ
ພວກລັດອິສລາມ.
ບັນດາເຈົ້າໜ້າທີ່ສະຫະລັດ ກ່າວວ່າ ພວກເຂົາເຈົ້າວາງແຜນທີ່ຈະໃຫ້ ການເຝິກແອບ ແກ່
ພວກນັກຕໍ່ສູ້ຊາວຊີເຣຍ ຈາກກອງທັບຊີເຣຍເສລີ ປະມານ 5,000 ຄົນ ໃນໄລຍະ 3 ປີ. Saudi Arabia, Qatar ແລະ Turkey ໄດ້ສະເໜີຢ່າງເປີດເຜີຍທີ່ຈະເປັນເຈົ້າພາບສະໜອງສະຖານທີ່ການເຝິກແອບ.
ເທີກີ ຊຶ່ງມີເຂດແດນຕິດກັບຊີເຣຍ 750 ໄມລ໌ ກ່າວວ່າ ຕົນຫວັງວ່າ ການເຝິກແອບນີ້
ຍັງຈະເປັນການເສີມຄວາມເຂັ້ມແຂງ ໃຫ້ແກ່ພວກຕໍ່ຕ້ານລັດຖະບານ ທີ່ກຳລັງມີຄວາມ
ອ່ອນແອ ແລະ ແຕກແຍກກັນນັ້ນ ໃນການເຮັດສົງຄາມຕ້ານປະທານາທິບໍດີຊີເຣຍ ທ່ານ
Bashar al-Assad ທີ່ເທີກີຢາກໃຫ້ໂຄ່ນລົ້ມອອກຈາກຕຳແໜ່ງນັ້ນ ຍັງເປັນເປົ້າໝາຍ
ອັນສຳຄັນໃນຊີເຣຍ.
ແຕ່ແນວໃດກໍຕາມ ລັດຖະບານທ່ານໂອບາມາ ໄດ້ພິຈາລະນາເຫັນວ່າ ກຸ່ມລັດອິສລາມ
ແມ່ນເປັນໄພຂົ່ມຂູ່ທີ່ສຳຄັນກວ່າ ຕໍ່ຄວາມໝັ້ນຄົງຂອງຂົງເຂດ.
