ໃນຕົ້ນເດືອນນີ້, ກະຊວງພະລັງງານຂອງສະຫະລັດ ຫຼື DOE ໄດ້ປະກາດເງື່ອນໄຂກ່ຽວກັບເງິນກູ້ທີ່ເປັນປະຫວັດການ ໃນມູນຄ່າ 2.26 ຕື້ໂດລາ ເພື່ອໃຊ້ເຂົ້າໃນການຂຸດຄົ້ນຫາທາດ ລີທຽມ (Lithium) ສຳຮອງທີ່ໃຫຍ່ທີ່ສຸດໃນອາເມລິກາເໜືອ. ເງິນກູ້ດັ່ງກ່າວ ແມ່ນບາດກ້າວທີ່ສຳຄັນໃນຄວາມພະຍາຍາມຂອງລັດຖະບານສະຫະລັດ ເພື່ອຫຼຸດຜ່ອນການເພິ່ງພາອາໄສ ຈີນ ສຳລັບທາດໂລຫະທີ່ໃຊ້ໃນການສ້າງໝໍ້ໄຟ.
ແນວໃດກໍ່ຕາມ, ບັນດານັກວິເຄາະກ່າວວ່າ ມັນອາດຈະຊ້າເກີນໄປແລ້ວ ທີ່ຈະທໍາການເຄື່ອນໄຫວອອກຈາກການເພິ່ງພາຈີນຢ່າງສົມບູນ ເມື່ອເວົ້າເຖິງຂັ້ນຕອນຂອງການປຸງແຕ່ງໂລຫະ ແລະການຜະລິດຫມໍ້ໄຟ.
ຫ້ອງການໂຄງການເງິນກູ້ ຫຼື LPO ຂອງກະຊວງດັ່ງກ່າວນັ້ນກ່າວວ່າ ຢູ່ໃນກອງທຶນ ຖ້າໄດ້ຮັບການອະນຸມັດຫຼັງຈາກການທົບທວນຄືນ ອາດຈະຊ່ວຍໃຫ້ບໍລິສັດ Lithium Americas Corp. ສາມາດສ້າງໂຮງງານປຸງແຕ່ງທາດ lithium carbonate ຢູ່ໂຄງການຂຸດຄົ້ນບໍ່ແຮ່ Thacker Pass ໃນຂົງເຂດຮໍາໂບ (Humboldt) ຂອງລັດເນວາດາ ໄດ້.
ຫ້ອງການ LPO ກ່າວວ່າ ໂຄງການດັ່ງກ່າວ ຈະຊ່ວຍ "ຮັບປະກັນລະບົບຕ່ອງໂສ້ການສະຫນອງພາຍໃນປະເທດທີ່ເຊື່ອຖືໄດ້, ແລະຍືນຍົງ ສໍາລັບວັດສະດຸທີ່ສໍາຄັນຕ່າງໆ, ເຊິ່ງເປັນກະແຈໃນການບັນລຸເປົ້າຫມາຍທີ່ທະເຍີທະຍານທາງດ້ານພະລັງງານ ແລະສະພາບອາກາດທີ່ສະອາດຂອງພວກເຮົາ ພ້ອມທັງຫຼຸດຜ່ອນການເພິ່ງພາທາງດ້ານເສດຖະກິດຂອງຄູ່ແຂ່ງພວກເຮົາເຊັ່ນ: ປະເທດຈີນ."
ຢູ່ໃນເວັບໄຊທ໌ທາງການຂອງບໍລິສັດ Lithium Americas Corp. ກ່າວວ່າ ວັດສະດຸຫມໍ້ໄຟ ສາມາດກາຍມາເປັນ "ແຫຼ່ງສະໜອງ ແລະຜະລິດໄດ້ຢູ່ໃນສະຫະລັດຢ່າງສົມບູນ, ເຊິ່ງເປັນການຊ່ວຍຫຼຸດຜ່ອນໃນການສ້າງທາດຄາບອນໂດຍລວມລົງ, ຊ່ວຍຫຼຸດຄ່າໃຊ້ຈ່າຍໃນການຂົນສົ່ງ ແລະຫຼຸດຄວາມສ່ຽງຕໍ່ລະບົບຕ່ອງໂສ້ຂອງການສະຫນອງນໍາອີກດ້ວຍ."
ຟໍຣັມສະແດງຄວາມຄິດເຫັນ